ភ្នំពេញ៖ ប្រទេសថៃកំពុងព្យាយាមរកគ្រប់មធ្យោបាយ ដើម្បីជួយជនជាតិថៃបីនាក់ដែលត្រូវបានតុលាការខេត្តសៀមរាបរបស់ប្រទេសកម្ពុជា កាត់ទោសឱ្យជាប់ពន្ធនាគារចំនួន១៨ខែពីបទចូលប្រទេសកម្ពុជាដោយខុសច្បាប់។ មន្ត្រីផ្លូវការរដ្ឋាភិបាលកម្ពុជាបាននិយាយថា ក្រសួងការបរទេសកម្ពុជាមិនទាន់បានទទួលសំណើផ្លូវការ ឬទំនាក់ទំនងការទូតពីភាគីថៃនៅឡើយទេ។
រដ្ឋាភិបាលទីក្រុងបាងកក កំពុងរិះរកមធ្យោបាយផ្លូវច្បាប់ ដើម្បីជួយទណ្ឌិតជនជាតិថៃបីនាក់ដែលត្រូវបានកាត់ទោសឱ្យជាប់ពន្ធនាគារចំនួន១៨ខែ នៅក្នុងប្រទេសកម្ពុជាចំពោះការឆ្លងដែនខុសច្បាប់ និងការកាន់កាប់អាវុធខុសច្បាប់។
តុលាការខេត្តសៀមរាម បានកាត់ទោសជនជាតិថៃបីនាក់នេះឱ្យជាប់ពន្ធនាគារក្នុងម្នាក់ៗចំនួន១៨ខែ និងពិន័យ២៥០ដុល្លារអាមេរិកពីបទឆ្លងចូលទឹកដីកម្ពុជា និងការប្រើប្រាស់អាវុធខុសច្បាប់កាលពីសប្តាហ៍មុន។
ជនជាតិថៃទាំងបីនាក់នេះ មានឈ្មោះ Sanong Wongcharoen អាយុ៣៦ឆ្នាំ Lim Puangpet អាយុ៣៩ឆ្នាំ និងLan Sapsri អាយុ៥៣ឆ្នាំ។ អ្នកទាំងបីមកពីស្រុក Sangkhla នៃខេត្ត Surin ហើយត្រូវបានចាប់ខ្លួន ដោយអាជ្ញាធរខេត្តឧត្តរមានជ័យរបស់ប្រទេសកម្ពុជានៅថ្ងៃទី១៨ ខែសីហា ឆ្នាំ២០១០។
កាសែត Bangkok Post បានរាយការណ៍ថា លោកនាយករដ្ឋមន្ត្រី Abhisit Vejjajiva បានបញ្ជាឱ្យលោករដ្ឋមន្ត្រីការបរទេស Kasit Piromya ជួយអន្តរាគមន៍ដល់ជនជាតិថៃបីនាក់នេះ ដោយបញ្ជាក់ថា ក្រសួងការបរទេសថៃកំពុងតែសិក្សាអំពីវិធីដែលប្រទេសថៃ អាចទទួលបានផលប្រយោជន៍ពីកិច្ចព្រមព្រៀង ដែលបានធ្វើឡើងរវាងប្រទេសថៃ និងប្រទេសកម្ពុជាចំពោះអ្នកទោសជនជាតិថៃនេះ។
លោក កួយ គង់ អនុរដ្ឋលេខាធិការ និងជាអ្នកនាំពាក្យក្រសួងការបរទេសកម្ពុជា បានថ្លែងថា ក្រសួងការបរទេសកម្ពុជាមិនទាន់បានទទួលសំណើ ឬលិខិតផ្លូវការពីភាគីថៃតាមរយៈការទំនាក់ទំនងការទូតនៅឡើយទេ។
«យើងអត់ឃើញមានជាសំណើ លិខិតផ្លូវការ ឬបញ្ចូនមនុស្សមកទំនាក់ទំនងតាមផ្លូវទូតទេ។ យើងអត់ទាន់អាចសន្និដ្ឋាន ព្រោះយើងមិនទាន់បានឃើញការទំនាក់ទំនងពីភាគីថៃ។ យើងគ្រាន់តែឃើញតាមសារព័ត៌មានប៉ុណ្ណោះ»។
នៅក្នុងឆ្នាំ២០០៩ តុលាការខេត្ត Sisaket និង Ubon របស់ប្រទេសថៃ បានកាត់ទោសប្រជាពលរដ្ឋខ្មែរ យ៉ាងតិច២៧នាក់ឱ្យជាប់ពន្ធនាគារពី ១៥ខែដល់ ៩ឆ្នាំពីបទឆ្លងចូល និងកាប់ឈើព្រៃនៅក្នុងទឹកដីថៃដោយខុសច្បាប់។
នៅក្នុងឆ្នាំ ២០០៩ដដែល តុលាការខេត្តបន្ទាយមានជ័យរបស់ប្រទេសកម្ពុជា បានកាត់ទោសជនជាតិថៃម្នាក់ឱ្យជាប់ពន្ធនាគារបីខែពីបទឆ្លងដែនចូលប្រទេសកម្ពុជាដោយខុសច្បាប់។ ទោះបីជាឆ្មាំការពារព្រំដែនកម្ពុជាបានចាប់ខ្លួន និងបានដោះលែងជនជាតិថៃ៤២នាក់ផ្សេងទៀតឱ្យត្រឡប់ទៅប្រទេសថៃវិញ បន្ទាប់ពីបានឆ្លងចូលទឹកដីកម្ពុជាដោយខុសច្បាប់នោះ។
ប្រទេសកម្ពុជា និងប្រទេសថៃបានចុះហត្ថលេខាលើកិច្ចព្រមព្រៀងផ្ទេរអ្នកទោសនៅខែសីហា ឆ្នាំ២០០៩ ដើម្បីបង្កើតវិធានការសម្រាប់ផ្ទេរអ្នកទោសឱ្យទៅបន្តជាប់ពន្ធនាគារនៅក្នុងប្រទេសកំណើតរបស់ខ្លួន សម្រាប់ទោសដែលនៅសេសសល់ បន្ទាប់ពីបានជាប់ពន្ធនាគាររយៈពេលអប្បបរមា។
ក្នុងដំណើរទស្សនកិច្ចរបស់លោកនាយករដ្ឋមន្ត្រី Abhisit Vejjajiva មកកម្ពុជាក្នុងខែមករា ឆ្នាំ២០០៩ ប្រទេសកម្ពុជា បានបញ្ជូនអ្នកទោសថៃពីរនាក់ Chiming Abdul Azi និង Muhamma-dyalludin Mading ឱ្យទៅជាប់ទោសនៅក្នុងប្រទេសថៃ។ អ្នកទាំងពីរបានពាក់ព័ន្ធនឹងក្រុមភេរវកម្ម Jemaah Islamiah ហើយត្រូវបានកាត់ទោសដាក់ពន្ធនាគារអស់មួយជីវិត ដោយតុលាការកម្ពុជាក្នុងខែធ្នូ ឆ្នាំ២០០៤ ចំពោះការប៉ុនប៉ងដាក់គ្រាប់បែកនៅស្ថានទូតអាមេរិក និងអង់គ្លេសនៅក្នុងទីក្រុងភ្នំពេញ។
លោក កួយ គង់ បានបញ្ជាក់ថា ប្រទេសកម្ពុជា បានស្នើសុំឱ្យប្រទេសថៃបញ្ជូនជនជាតិខ្មែរបួននាក់ ដែលត្រូវបានកាត់ទោសឱ្យជាប់ពន្ធនាគារអស់មួយជីវិតដោយតុលាការថៃ តែសំណើនេះនៅមិនទាន់កើតចេញជាលទ្ធផលនៅឡើយទេរហូតដល់ពេលនេះ៕