ទីក្រុងបាងកក ប្រទេសថៃ — លោក Pita Limjaroenrat បានធ្វើដំណើរតាមជើងយន្តហោះក្រុមហ៊ុនអាកាសចរណ៍ Thai Airways ពីទីក្រុង New York (ញូវយ៉ក) សហរដ្ឋអាមេរិក កាលពីថ្ងៃ ១៩ ខែកញ្ញា ឆ្នាំ ២០០៦ ឆ្ពោះមកកាន់ក្រុងបាងកក ប្រទេសថៃ ដើម្បីចូលរួមពិធីបុណ្យសពរបស់ឪពុកលោក។ តាមផ្លូវហោះហើរ យន្តហោះនេះក៏បានឈប់នៅក្រុងឡុងដ៍ ប្រទេសអង់គ្លេស។
នាថ្ងៃនោះ នៅលើយន្តហោះដូចគ្នានេះ អតីតនាយករដ្ឋមន្ត្រីថៃលោក Thaksin Shinawatra កំពុងតែប្រឈមនឹងអ្វីមួយដែលនឹងបញ្ចប់អាណត្តិដឹកនាំរបស់លោកយ៉ាងតក់ក្រហល់ នោះគឺ អគ្គមេបញ្ជាការយោធាថៃមួយរូបបានធ្វើរដ្ឋប្រហារនៅក្រុងបាងកក ដោយដណ្តើមអំណាចពីអ្នកនយោបាយដែលជាមហាសេដ្ឋីរូបនេះ ដែលលោកទើបនឹងបានចូលរួមមហាសន្និបាតអង្គការសហប្រជាជាតិនៅទីក្រុង New York។
លោក Pita មិនបានចាប់អារម្មណ៍លើភាពតានតឹងនេះនោះទេ ស្របពេលលោក Thaksin ដែលប្តេជ្ញាតទល់នឹងរបបសឹកយោធាពីចម្ងាយ បានត្រៀមចុះពីយន្តហោះនៅព្រលានយន្តហោះ Gatwick ក្នុងក្រុងឡុងដ៍។
លោកថ្លែងថា៖ «ពួកគាត់[ពេលនោះ]ប្រហែលជាប់រវល់ខ្លាំងហើយ ប៉ុន្តែខ្ញុំមិនអាចបានដឹងនោះទេ។ [ព្រោះ]ឪពុករបស់ខ្ញុំទើបទទួលមរណភាព»។
នេះជាការលើកឡើងរបស់លោក Pita ពីអ្វីដែលបានកើតឡើងនៅលើយន្តហោះរវាងលោក Thaksin និងមន្ត្រីរដ្ឋាភិបាល ដែលមន្ត្រីខ្លះក្នុងចំណោមនោះធ្លាប់ជាចៅហ្វាយនាយរបស់លោក មុនពេលលោកចូលរៀនថ្នាក់អនុបណ្ឌិតផ្នែកគោលនយោបាយសាធារណៈនៅសាលា Kennedy School នៃសាកលវិទ្យាល័យ Harvard នៅសហរដ្ឋអាមេរិក ប៉ុន្មានសប្តាហ៍មុននោះ។
ភាពក្រៀមក្រំអំពីការបាត់បង់ឪពុករបស់លោក ដែលជាមន្ត្រីធនាគារប្រែផ្លាស់ជាសហគ្រិនមួយរូប ប្រហែលធ្វើឱ្យលោក Pita មិនសូវចាំច្បាស់ពីអ្វីដែលបានកើតឡើងនៅឆ្នាំ ២០០៦។ ប៉ុន្តែអន្តរាគមន៍សាជាថ្មីពីសំណាក់យោធានៅក្នុងឆាកនយោបាយថៃនៅឆ្នាំ ២០១៤ បានធ្វើឱ្យលោកចាប់ផ្តើមមានប្រជាប្រិយខ្ពស់ផ្នែកនយោបាយ ស្របពេលលោកដឹកនាំគណបក្ស Move Forward Party ឬហៅជាភាសាថៃថា Gao Glai (កាវក្លៃ) គាំទ្រដោយយុវជន ឆ្ពោះទៅកាន់ការបោះឆ្នោតជាតិនៅថ្ងៃទី ១៤ ខែឧសភាខាងមុខ។
នៅក្នុងការប្រកួតប្រជែងបោះឆ្នោតនេះ លោក Pita បានផ្តល់ជាគំនិតនៃការផ្លាស់ប្តូរ ស្របតាមពាក្យស្លោករបស់គណបក្ស៖ «បោះឆ្នោតឱ្យគណបក្ស Move Forward ប្រទេសថៃនឹងលែងដូចមុនទៀតទេ»។ លោកបានប្រមើលមើលពីជ័យជម្នះដែលបញ្ចប់នូវវដ្តរដ្ឋប្រហារដោយយោធា ដែលបានបង្អាក់នយោបាយថៃរាល់ប្រាំពីរឆ្នាំម្តង ចាប់តាំងពីពេលដែលថៃបានចាត់ទុកខ្លួនជាប្រទេសរាជាធិបតេយ្យអាស្រ័យរដ្ឋធម្មនុញ្ញកាលពីឆ្នាំ ១៩៣២។
នៅក្នុងបទសម្ភាសន៍កាលពីពេលថ្មីៗនេះជាមួយវីអូអេភាសាថៃ លោក Pita វ័យ ៤២ឆ្នាំ បាននិយាយថា៖ «ដំបូង អ្នកត្រូវបន្ថយអំណាចយោធា ហើយត្រូវធានាថា អំណាចនិងហិរញ្ញប្បទានលើយោធាត្រូវបានត្រួតពិនិត្យ និងមានតុល្យភាព»។
រូបឯកសារ៖ លោក Pita Limjaroenrat មេដឹកនាំនិងបេក្ខជននាយករដ្ឋមន្ត្រីនៃគណបក្ស Move Forward លើកដៃស្វាគមន៍ក្រុមអ្នកគាំទ្រ អំឡុងធ្វើយុទ្ធនាការនៅទីក្រុងបាងកក ប្រទេសថៃ កាលពីថ្ងៃទី ២២ ខែមេសា ឆ្នាំ ២០២៣។
រូបឯកសារ៖ លោក Pita Limjaroenrat មេដឹកនាំនិងបេក្ខជននាយករដ្ឋមន្ត្រីនៃគណបក្ស Move Forward ចូលរួមក្នុងព្រឹត្តិការណ៍ចាប់លេខរៀងគណបក្ស នៅទីក្រុងបាងកក ប្រទេសថៃ កាលពីថ្ងៃទី ៤ ខែមេសា ឆ្នាំ ២០២៣។
លោកក៏បានស្នើឡើងពីការតម្រូវឱ្យមានចន្លោះពេលប្រាំពីរឆ្នាំ មុនពេលមន្ត្រីយោធាអាចចូលប្រឡូកក្នុងឆាកនយោបាយ ក្រោយពីចាកចេញពីការបម្រើការជាយោធា។ លោក Pita បានបន្ថែមថា រដ្ឋធម្មនុញ្ញថ្មីគួរតែត្រូវបានតាក់តែងឡើងដោយប្រជាជន ដោយមានមាត្រាផ្សេងៗដែលរារាំងមន្រ្តីរាជការពីការគាំទ្ររដ្ឋប្រហារ និងមិនឱ្យមាននិទណ្ឌភាពចំពោះមេដឹកនាំរដ្ឋប្រហារ។
គោលនយោបាយរបស់គណបក្ស Move Forward ផ្តោតលើការផ្តល់ជាអត្ថប្រយោជន៍ផ្នែកសុខុមាលភាពផ្សេងៗ ដែលរួមមានប្រាក់ជំនួយឧបត្ថម្ភថែទាំកុមារ និងប្រាក់ជំនួយឧបត្ថម្ភដល់មនុស្សចាស់ជរា ដែលមានសរុបជិត ២០ពាន់លានដុល្លារ។ ហើយប្រមាណ ៧,៧ភាគរយនៃទំហំទឹកប្រាក់នេះគឺ មកពីការបន្ថយទំហំយោធា។
នៅក្នុងការស្ទង់មតិដោយសារព័ត៌មាន Matichon និងសារព័ត៌មាន Daily News ធ្វើឡើងចន្លោះថ្ងៃទី ២២ និងថ្ងៃទី ២៨ ខែមេសា លោក Pita បាននាំមុខនៅក្នុងលទ្ធផលចំពោះសំណួរអំពីជម្រើសសម្រាប់នាយករដ្ឋមន្ត្រី ដោយមានការគាំទ្រ ៤៩.១៧ភាគរយ បន្តដោយអ្នកស្រី Paetongtarn Shinawatra ចំនួន ១៩.៥៩ភាគរយ និងមហាសេដ្ឋីផ្នែកអចលនទ្រព្យប្រែផ្លាស់ជាអ្នកនយោបាយលោក Srettha Thavisin ចំនួន ១៥.៥៤ភាគរយ។ អ្នកទាំងពីរគឺ មកពីគណបក្ស Pheu Thai ហើយគណបក្សនេះត្រូវបានរំពឹងថា នឹងទទួលបានអាសនៈមួយភាគធំនៅសភា។ ការស្ទង់មតិនេះមានអ្នកចូលរួមតាមអនឡាញចំនួន ៧៨.៥៨៣នាក់។
នៅក្នុងការស្ទង់មតិមុនៗ គណបក្ស Pheu Thai មានប្រៀបជាងគណបក្សលោក Pita ក្នុងនោះរួមមានការស្ទង់មតិមួយដោយអង្គភាពស្រាវជ្រាវនៃវិទ្យាស្ថានរជាតិរដ្ឋបាលអភិវឌ្ឍន៍ (NIDA) អំឡុងពីថ្ងៃទី៣ ដល់ថ្ងៃទី៧ ខែមេសា។
គូប្រជែងប្រកៀកប្រកិតបំផុតរបស់លោក Pita នៅក្នុងការស្ទង់មតិតាមសារព័ត៌មានគឺ មកពីត្រកូលគ្រួសារល្បីឈ្មោះក្នុងឆាកនយោបាយថៃ។ អ្នកស្រី Paetongtarn វ័យ ៣៦ឆ្នាំ គឺជា កូនស្រីរបស់លោក Thaksin Shinawatra និងបេក្ខភាពទាំងពីររូបបានស្គាល់គ្នា ចាប់តាំងពីពេលរៀននៅអនុវិទ្យាល័យ ដោយសារឪពុកមារបស់លោក Pita ជិតដិតនឹងគ្រួសារលោក Thaksin។
ការស្តារគណបក្សឡើងវិញ
កាលពីឆ្នាំ ២០១៤ មេដឹកនាំយោធាមួយរូបទៀត គឺលោកឧត្តមសេនីយ៍ Prayut Chan-o-cha បានទម្លាក់អតីតនាយករដ្ឋមន្ត្រីថៃ អ្នកស្រី Yingluck Shinawatra ដែលជាប្អូនស្រីរបស់លោក Thaksin ចេញពីអំណាច ដោយនេះបានបើកផ្លូវឱ្យមានការកាន់តំណែងជានាយករដ្ឋមន្ត្រីរយៈពេលជាងប្រាំបីឆ្នាំរបស់លោក Prayut។ នៅអំឡុងពេលដឹកនាំរបស់លោក Prayut ថៃបានធ្វើការបោះឆ្នោតកាលពីថ្ងៃទី ២៤ ខែមីនា ឆ្នាំ២០១៩។
គណបក្សរបស់លោក Pita ដែលកាលពីពេលនោះមានឈ្មោះថា Future Forward (ឬ អនាគតថ្មី) ត្រូវបានដឹកនាំ ដោយអ្នកស្នងត្រកូលម្ចាស់សហគ្រាសផ្គត់ផ្គង់គ្រឿងបន្លាស់រថយន្តថៃ Summit Group។ មនោគមេវិជ្ជាជឿនលឿនរបស់លោក Thanathorn Juangroongruangkit និងភាពជាយុវវ័យរបស់លោក បានទាក់ទាញជនជំនាន់ថ្មី ដែលភាគច្រើនជាជនវ័យក្មេងចូលក្នុងនយោបាយ។
ក្នុងរយៈពេលតែជាងមួយឆ្នាំបន្ទាប់ពីត្រូវបានបង្កើតឡើង គណបក្ស Future Forward បានឈ្នះអាសនៈចំនួន ៨១ នៅក្នុងការបោះឆ្នោតឆ្នាំ ២០១៩ ហើយបានក្លាយជាគណបក្សធំជាងគេបង្អស់ទីបីនៅថៃ។ លោក Pita ដែលមានបទពិសោធន៍ជាអ្នកប្រឹក្សាផ្នែកគ្រប់គ្រង មុនពេលទទួលបានសញ្ញាបត្រអនុបណ្ឌិតពីសាកលវិទ្យាល័យ Harvard និងសាលាផ្នែកគ្រប់គ្រង Sloan School of Management នៃសាកលវិទ្យាល័យ Massachusetts Institute of Technology (MIT) របស់អាមេរិក បានចូលកាន់តំណែងជាតំណារាស្ត្រនៅរដ្ឋសភា។
គណបក្ស Future Forward បានទាក់ទាញក្តីស្រមៃនៃអ្នកបោះឆ្នោត និងហ៊ានតតាំងប្រឆាំងនឹងរដ្ឋអំណាចដែលផ្តោតលើស្ថាប័នរាជវង្សដ៏មានឥទ្ធិពល។
រូបឯកសារ៖ លោក Prayut Chan-o-cha នាយករដ្ឋមន្ត្រីថៃ ស្វាគមន៍សមាជិកនៃគណៈរដ្ឋមន្ត្រីថ្មីរបស់រដ្ឋាភិបាលថៃ នៅវិមានរដ្ឋាភិបាល ក្នុងទីក្រុងបាងកក ប្រទេសថៃ កាលពីថ្ងៃទី ១៦ ខែមិថុនា ឆ្នាំ ២០១៩។
រូបឯកសារ៖ លោក Thaksin Shinawatra អតីតនាយករដ្ឋមន្ត្រីថៃ ថ្លែងនៅក្នុងបទសម្ភាសន៍ជាមួយសារព័ត៌មាន AFP នៅទីក្រុងហុងកុង កាលពីថ្ងៃទី ២៥ ខែមីនា ឆ្នាំ ២០១៩។
លោក Prayut ដោយមានការគាំទ្រពីព្រឹទ្ធសភាដែលមានសមាជិក ២៥០ នាក់ គ្រប់គ្រងដោយសម្ព័ន្ធមិត្តរបស់លោក បានបង្កើតជារដ្ឋាភិបាលចម្រុះមួយកាលពីឆ្នាំ ២០១៩។ បន្ទាប់មក នៅខែកុម្ភៈ ឆ្នាំ ២០២០ តុលាការធម្មនុញ្ញបានចេញសេចក្តីសម្រេចរំលាយគណបក្ស Future Forward ក្រោយរកឃើញថា គណបក្សនេះបានទទួលកម្ចីខុសច្បាប់ចំនួន ៦លានដុល្លារពីលោក Thanathorn។
សេចក្តីសម្រេចនេះក៏បានហាមឃាត់សមាជិកសំខាន់ៗនៃគណបក្សនេះ រួមទាំងលោក Thanathorn ពីការកាន់តំណែងក្នុងផ្នែកនយោបាយផងដែរ។ លោក Pita ដែលទទួលបានការកោតសរសើរពីភាគីទាំងសងខាងចំពោះជំនាញក្នុងការនិយាយរបស់លោក បានលេចឡើងចេញពីភាពច្របូកច្របល់នេះក្លាយជាមេដឹកនាំថ្មីនៃគណបក្ស Move Forward Party ដែលជាគណបក្សថ្មីកើតចេញពីគណបក្ស Future Forward។
លោក Pita បានថ្លែងប្រាប់វីអូអេភាសាថៃថា លោកចង់ឱ្យគណបក្ស Move Forward ឈ្នះអាសនៈកាន់តែច្រើននៅក្នុងការបោះឆ្នោតនាពេលខាងមុខ គឺច្រើនជាងគណបក្ស Future Forward កាលពីឆ្នាំ ២០១៩ ទៅទៀត។
លោកបានថ្លែងថា៖ «ខ្ញុំ (ព្យាយាម) រៀបចំគណបក្សក្នុងរចនាសម្ព័ន្ធស្ថាប័ន ដើម្បីធានាថា គណបក្សនឹងជាស្ថាប័ននយោបាយមួយ ដែលមានរចនាសម្ព័ន្ធ យុទ្ធសាស្រ្ត ដំណើរការផ្សេងៗ។ នៅពេលយើងធ្វើដូច្នេះ យើងអាចយកតាមគំរូនេះ ហើយយើងអាចធ្វើឱ្យកាន់តែប្រសើរនាពេលបន្តបន្ទាប់»។
ការបញ្ចៀសពី «នយោបាយបុគ្គលនិយម»
នៅប្រទេសថៃ ជាទីដែលមេដឹកនាំមួយចំនួនចាប់ពីព្រះមហាក្សត្រ រហូតដល់ពលរដ្ឋធម្មតា ដែលត្រូវបានហៅក្រៅផ្លូវការ «លោកពុក» និងទទួលបានការគោរព ការគោរពបែបនេះតែងជំរុញជារលកគាំទ្រដែលទាញសំឡេងនៅក្នុងការបោះឆ្នោត ខណៈអ្នកនយោបាយប្រើប្រាស់ឈ្មោះរបស់ខ្លួនដើម្បីទាក់ទាញការគាំទ្រ។
បុគ្គលល្បីឈ្មោះក្នុងឆាកនយោបាយតាមស្រុកតូចនិងធំនៃខេត្តទាំង ៧៧នៅថៃ អាចវាស់ស្ទង់ប្រជាប្រិយភាពរបស់ខ្លួនតាមរយៈចំនួនផ្កា និងកន្សែងបង់ក ពាក់ដោយអ្នកគាំទ្ររបស់ពួកគេ ដែលនេះនាំឱ្យមានការនឹកឃើញពីរបៀបដែលអ្នកបួងសួងផ្តល់ការគោរពនៅកន្លែងសក្ការៈបូជា។
លោក Thaksin ដែលឥឡូវនេះកំពុងរស់នៅនិរទេសខ្លួននៅក្រុង Dubai បន្ទាប់ពីត្រូវបានរកឃើញថា មានទោសពាក់ព័ន្ធអំពើពុករលួយ ជំរុញនូវវប្បធម៌គាំទ្របុគ្គលនិយមខាងលើនេះ ខណៈលោកបង្ហាញការគាំទ្របេក្ខជនឈរឈ្មោះពីចម្ងាយ។ អតីតមេដឹកនាំ ប្រជានិយមរូបនេះ បានធ្វើឱ្យមានការមិនពេញចិត្តខ្លាំងពីសំណាក់ក្រុមអ្នកប្រឆាំងនឹងរូបលោក។ អ្នកគាំទ្រលោក Thaksin ចម្អកអ្នកមិនពេញចិត្តនោះថា ការណ៍នេះជា «ការខ្លាចរអាខ្មោចលោក Thaksin»។ មិនមានមេដឹកនាំថៃច្រើននោះទេ ដែលជាប់ឆ្នោតនិងអាចកៀរគរការគាំទ្រខ្លាំងតាមឈ្មោះបុគ្គលដូចលោក Thaksin។
លោក Pita ថ្លែងថា៖ «ខ្ញុំមិនជឿខ្លាំងលើការធ្វើនយោបាយបុគ្គលនិយមនោះទេ។ ខ្ញុំជឿលើនយោបាយជារចនាសម្ព័ន្ធស្ថាប័ន ពីព្រោះជាវាត្រូវតែជា... ការងារជាក្រុម។ ត្រូវតែមានប្រព័ន្ធមួយរៀបចំឡើង»។
លោកបានបន្តថា៖ «ខ្ញុំគិតថា ការធ្វើនយោបាយតាមបុគ្គលនិយមមិនសមស្របនឹងបញ្ហាប្រឈមនាពេលបច្ចុប្បន្ននៅថៃនោះទេ។ ការមានបុគ្គលិកលក្ខណៈដែលអាចប្រាស្រ័យទាក់ទងជាមួយពលរដ្ឋដោយការគោរព និងភាពស្មោះត្រង់ ប្រហែលជាអ្វីល្អមួយ ដែលពលរដ្ឋអាចផ្សារភ្ជាប់ជាមួយអ្នក ហើយស្តាប់អ្វីដែលអ្នកស្នើឡើង។ តែនយោបាយរៀបចំជាស្ថាប័នគឺជា មធ្យោបាយឆ្ពោះទៅមុខ»។
អំឡុងពេលយុទ្ធនាការឃោសនានាពេលថ្មីៗនេះនៅខេត្ត Nong Khai ភាគឦសាន ប្រទេសថៃ ឆ្លងពីទន្លេមេគង្គពីប្រទេសឡាវ អ្នកគាំទ្របានបង្ហាញការគាំទ្រយ៉ាងខ្លាំងមកលើលោក Pita ដែលបានលែងលះជាមួយភរិយា និងទទួលបានសិទ្ធិចិញ្ចឹមកូនស្រីរបស់លោក។ អតីតអ្នកប្រឹក្សាប្រចាំក្រុមហ៊ុន Boston Consulting Groupរូបនេះ បានធ្វើការឃោសនានៅក្នុងកម្តៅថ្ងៃដ៏ក្តៅ ដោយមានពាក់កម្រងផ្កាពណ៌ទឹកក្រូចជាច្រើនរុំជុំវិញករបស់លោក។
ពលរដ្ឋតាមស្រុកនានាបានចាត់ទុកលោក Pita ដែលមានបំណងរៀបចំនយោបាយជារចនាសម្ព័ន្ធស្ថាប័ន ដូចជាអ្នកនយោបាយសម័យថ្មីចេញពីអ្នកបច្ចេកទេស ធៀបនឹងអ្នកនយោបាយជំនាន់ចាស់ដែលភាគច្រើនជាបុរសសាងឈ្មោះពីត្រកូលអ្នកនយោបាយ។ លោក Pitaសង្ឃឹមថា នឹងអាចដកចេញអ្នកនយោបាយបែបនេះពីប្រព័ន្ធនយោបាយថៃ។
លោក Pita បានថ្លែងប្រាប់ក្រុមអ្នកគាំទ្ររបស់លោក មុនពេលចេញក្នុងឡានវ៉ែនមួយដែលមានបង្អួចបិទខ្មៅថា៖ «គណបក្ស Gao Glai យល់ដឹងពីអ្នកជំនាន់ថ្មី ប៉ុន្តែក៏យកចិត្តទុកដាក់ពីអ្នកជំនាន់ចាស់ផងដែរ»។
មានក្រែមការពារកម្តៅ និងសៀវភៅនិពន្ធឡើងដោយអ្នកនយោបាយអាមេរិកាំងលោក Bernie Sanders ក្រោមចំណងជើងថា៖ «ជារឿងធម្មតាក្នុងការខឹងសម្បាលើមូលធននិយម» ស្ថិតនៅក្នុងប្រអប់ក្បែររូបលោក។
លោក Pita Limjaroenrat មេដឹកនាំនិងបេក្ខជននាយករដ្ឋមន្ត្រីនៃគណបក្ស Move Forward លើកដៃស្វាគមន៍ក្រុមអ្នកគាំទ្រ អំឡុងធ្វើយុទ្ធនាការនៅទីក្រុងបាងកក ប្រទេសថៃ កាលពីថ្ងៃទី ២២ ខែមេសា ឆ្នាំ ២០២៣។
គណបក្សគាំទ្រដោយយុវជន
អ្នកបោះឆ្នោតវ័យក្មេងដែលបានជំរុញឱ្យលោក Thanathorn ក្លាយជាកម្លាំងមួយ ឥឡូវនេះកំពុងប្រមូលផ្តុំនៅពីក្រោយគណបក្ស Move Forward។ គណបក្សនេះកំពុងធ្វើឱ្យខ្លួនខុសប្លែកពីគូប្រជែងប្រមាណ ៧០ គណបក្សទៀត នៅក្នុងការបោះឆ្នោតនៅថ្ងៃទី ១៤ ខែឧសភា ដោយជាគណបក្សដែលបញ្ចេញសំឡេងខ្លាំងស្តីពីការបញ្ចប់ការដាក់បញ្ចូលឈ្មោះកាតព្វកិច្ចយោធា ការធ្វើវិមជ្ឈការអំណាចទៅកាន់បណ្តាខេត្ត ការបំបែកការគ្រប់គ្រងផ្តាច់មុខក្នុងវិស័យគ្រឿងស្រវឹង និងការធ្វើវិសោធនកម្មលើច្បាប់ប្រមាថរាជវង្សដ៏តឹងរ៉ឹង។
ការវិភាគលើបណ្តាញសង្គមនិងទិន្នន័យនានាកំពុងផ្សារភ្ជាប់គណបក្ស Move Forward ជាមួយនឹងយុវជនថៃ ដែលជាយុទ្ធសាស្រ្តមួយយកគំរូតាមយុទ្ធសាស្រ្តឈ្នះការបោះឆ្នោតកាលពីឆ្នាំ ២០០៨ របស់លោក Barack Obama សម្រាប់តំណែងជាប្រធានាធិបតីអាមេរិក។ លោក Pita យល់ដឹងពីសារៈសំខាន់នៅក្នុងការបង្កើតជាមូលដ្ឋានគាំទ្រតាមប្រព័ន្ធអនឡាញ ដោយលោកធ្លាប់មានបទពិសោធន៍អមមិត្តរួមថ្នាក់ជនជាតិអាមេរិកាំង ដែលបានបម្រើការដោយស្ម័គ្រចិត្តក្នុងយុទ្ធនាការឃោសនារបស់លោក Obama អំឡុងពេលកំពុងសិក្សានៅសាលា Kennedy School។
យុទ្ធសាស្រ្តតាមប្រព័ន្ធអនឡាញបានទាក់ទាញការចូលរួមពីសំណាក់អ្នកបោះឆ្នោត។ កាលពីប៉ុន្មានសប្តាហ៍មុន អ្នកប្រើប្រាស់បណ្តាញសង្គម TikTok ម្នាក់ ដែលមានគណនីឈ្មោះ misterknp2 បានផលិតវីដេអូដ៏ល្បីមួយ ដោយបង្ហាញពីរបៀបនៅក្នុងការដាក់រូបលោក Pita លើអាល់ប៊ុមក្នុង App សម្រាប់ធ្វើការណាត់ជួបរកគូស្នេហ៍ Tinder ក្នុងកិច្ចប្រឹងប្រែងដើម្បីកៀរគរអ្នកបោះឆ្នោតឱ្យគណបក្ស Move Forward។
ប៉ុន្តែមធ្យោបាយចាស់ក៏នៅតែមានសារៈសំខាន់ផងដែរ ជាពិសេសលើខ្នង ដៃ និងជើងខាងស្តាំរបស់លោក Pita ដែលមានរូបសាក់ រួមមានស្នាមសាក់បែបវប្បធម៌ជនជាតិ Maori របស់ញូវែលសេឡង់ ដែលលោកនិយាយថា នាំឱ្យមាន «សំណាងល្អ នៅពេលអ្នកចង់បានជ័យជម្នះនៅក្នុងការប្រកួតប្រជែង»៕
ប្រែសម្រួលដោយលោក ណឹម សុភ័ក្ត្របញ្ញា