ពីប្រទេសអង់គ្លេស សហរដ្ឋអាមេរិក ប៉ាគីស្ថាន កេនយ៉ា អ៊ុយក្រែន ម៉ិចស៊ិក អេស្ប៉ាញ អាល្លឺម៉ង់ និងកូរ៉េខាងត្បូង៕
រូបភាពជុំវិញពិភពលោក៖ ១៣ កញ្ញា ២០២២
ក្បួនរថយន្តដឹកមឈូសព្រះមហាក្សត្រិយានី Elizabeth ទី ២ បានទៅដល់ព្រះបរមរាជវាំង Buckingham ក្នុងក្រុងឡុងដ៍ ប្រទេសអង់គ្លេស។
ក្បួនរថយន្តដឹកមឈូសព្រះមហាក្សត្រិយានី Elizabeth ទី ២ បានចាកចេញពីមូលដ្ឋានកងទ័ពអាកាស RAF Northolt ក្នុងក្រុងឡុងដ៍ ឆ្ពោះទៅកាន់ព្រះបរមរាជវាំង Buckingham។
កុមារម្នាក់ពាក់មកុដធ្វើពីក្រដាសកំពុងសម្លឹងមើលកម្រងផ្ការំឮកវិញ្ញាណក្ខន្ធនៅសួន Green Park ជិតព្រះបរមរាជវាំង Buckingham ក្នុងក្រុងឡុងដ៍ បន្ទាប់ពីការសោយទិវង្គតរបស់ព្រះមហាក្សត្រិយានី Elizabeth ទី ២។
ក្រុមសន្តិសុខយាមល្បាតក្នុងបរិវេណព្រះបរមរាជវាំង Buckingham ក្នុងក្រុងឡុងដ៍។
អ្នកទម្លាយរឿងពាក់ព័ន្ធនឹងក្រុមហ៊ុន Twitter លោក Peiter Zatko ស្បថក្នុងសវនាការមួយនៅព្រឹទ្ធសភា ដើម្បីពិនិត្យមើលករណីជុំវិញហានិភ័យសន្តិសុខផ្នែកទិន្នន័យ ក្នុងរដ្ឋធានីវ៉ាស៊ីនតោន សហរដ្ឋអាមេរិក។
ពលរដ្ឋរងគ្រោះដោយសារទឹកជំនន់ឈរតម្រង់ជួរ ដើម្បីទទួលអាហារចែកចាយដោយទីភ្នាក់ងារ Saylani Welfare Trust នៅជំរំបណ្តោះអាសន្នមួយ នៅក្រុង Sehwan ក្នុងខេត្ត Sindh ប្រទេសប៉ាគីស្ថាន។
ស្រ្តីម្នាក់ (កណ្តាល) សុំឲ្យកងកម្លាំងសន្តិសុខកេនយ៉ាជួយខ្លួន អំឡុងហេតុការណ៍រត់ជាន់គ្នានៅច្រកទ្វារមជ្ឈមណ្ឌលកីឡាអន្តរជាតិ Moi ក្នុងរដ្ឋធានីណៃរ៉ូប៊ី ប្រទេសកេនយ៉ា មុនពេលពិធីស្បថចូលកាន់តំណែងរបស់លោក William Ruto។
ភ្លើងឆេះព្រៃនៅតំបន់ Cedar Creek បន្តឆាបឆេះ ក្នុងរដ្ឋ Oregon ខណៈពលរដ្ឋប្រឈមនឹងការបញ្ជាឲ្យជម្លៀសចេញ ហើយគុណភាពខ្យល់កាន់តែអាក្រក់ឡើង ស្របពេលភ្លើងឆេះព្រៃនេះបន្តរាលដាលនៅតំបន់ភាគខាងលិច សហរដ្ឋអាមេរិក។
ទាហានអ៊ុយក្រែនជួយទាហានមួយរូបទៀត ខណៈយានជំនិះយោធាកំពុងធ្វើដំណើរលើទឹកដីដែលត្រូវបានរំដោះមួយក្នុងតំបន់ Kharkiv កាលពីថ្ងៃទី១២ ខែកញ្ញា ឆ្នាំ២០២២។ កងកម្លាំងអ៊ុយក្រែនបានដណ្តើមយកទឹកដីមួយភាគធំមកវិញពីរុស្ស៊ី ដោយរុញច្រានកងកម្លាំងរុស្ស៊ីត្រឡប់ទៅព្រំដែនភាគឦសានប្រទេសវិញនៅតាមតំបន់ខ្លះ និងបានអះអាងថា បានចាប់បានទាហានរុស្ស៊ីមួយចំនួន។
ជនចំណាកស្រុកវេណេស៊ុយអេឡានាំគ្នារត់ បន្ទាប់ពីឆ្លងទន្លេ Rio Bravo នៅសហរដ្ឋអាមេរិក ដើម្បីស្វែងរកសិទ្ធិជ្រកកោននយោបាយ នៅក្នុងរូបភាពមួយពីក្រុង Ciudad Juarez រដ្ឋ Chihuahua ប្រទេសម៉ិចស៊ិក កាលពីថ្ងៃទី១២ ខែកញ្ញា ឆ្នាំ២០២២។
លោក Jimmy Kimmel និងលោក Will Arnett បង្ហាញការសម្តែងមួយ ខណៈពេលអ្នកទាំងពីរត្រៀមប្រកាសជ័យលាភីពានរង្វាន់សម្រាប់ការនិពន្ធរឿងភាគកំប្លែងល្អបំផុត នៅកម្មវិធីប្រគល់ពានរង្វាន់ Emmy លើកទី ៧៤ ក្នុងក្រុង Los Angeles រដ្ឋ California សហរដ្ឋអាមេរិក កាលពីថ្ងៃទី១២ ខែកញ្ញា ឆ្នាំ២០២២។
អ្នកស្រី Julia Garner ទទួលពានរង្វាន់ Emmy ដល់ស្រ្តីជាតួរងល្អបំផុត ក្នុងរឿងភាគ «Ozark» នៅកម្មវិធីប្រគល់ពានរង្វាន់ Emmyលើកទី ៧៤ នៅមហោស្រព Microsoft Theater ក្នុងក្រុង Los Angeles រដ្ឋ California សហរដ្ឋអាមេរិក។
បុរសមួយក្រុមរត់ពីគោបាមួយ អំឡុងពេលពិធីបុណ្យ «Toro de la Vega» ក្នុងក្រុង Tordesillas ប្រទេសអេស្ប៉ាញ។
ក្រុមរបាំប៉ាឡេ State Ballet Berlin (Staatsballett Berlin) សម្តែងក្នុងកម្មវិធី «From Berlin with Love» នៅលើនាវាមួយ ដែលដឹកអ្នកដំណើរមើលកន្លែងទេសចរណ៍នានា តាមដងទន្លេ Spree River ក្នុងក្រុងប៊ែរឡាំង ប្រទេសអាល្លឺម៉ង់ កាលពីថ្ងៃទី១២ ខែកញ្ញា ឆ្នាំ២០២២។
អ្នកមកលេងម្នាក់ថតរូបក្នុងសួនផ្ការីកមួយនៅក្រុង Paju ប្រទេសកូរ៉េខាងត្បូង។