មេដឹកនាំគណបក្សជំទាស់ដ៏ធំនៅក្នុងប្រទេសកម្ពុជា នៅថ្ងៃនេះ បានអំពាវនាវរកអន្ដរាគមន៍ពីសហគមន៍អន្ដរជាតិដើម្បីអាចវិលត្រឡប់ចូលក្នុងប្រទេសវិញបាន។ សេចក្ដីអំពាវនាវនេះធ្វើឡើងប៉ុន្មានថ្ងៃប៉ុណ្ណោះ បន្ទាប់ពីប្រធានគណបក្សកាន់អំណាចបានបដិសេធមិនព្រមធ្វើអន្ដរាគមន៍ទៅរដ្ឋាភិបាល ដើម្បីជួយដោះស្រាយបញ្ហារបស់លោកនោះទេ។
មេដឹកនាំគណបក្សជំទាស់ ដែលកំពុងតែភៀសខ្លួននៅក្រៅប្រទេស គឺលោកសម រង្ស៊ី បានអំពាវនាវនៅថ្ងៃចន្ទនេះ ឲ្យក្រុមតំណាងរាស្រ្តអន្តរជាតិនៅក្នុងពិភពលោកជំរុញឲ្យរដ្ឋាភិបាលរបស់ពួកគេរៀងៗខ្លួន ដាក់សម្ពាធទៅលើរដ្ឋាភិបាលក្រុងភ្នំពេញ ប្រយោជន៍ដើម្បីឲ្យលោកមានលទ្ធភាពចូលមកក្នុងប្រទេសកម្ពុជាវិញបាន។
លោកសម រង្ស៊ី បានភៀសខ្លួនទៅក្រៅប្រទេសអស់រយៈពេលជិតមួយឆ្នាំមកហើយ គឺនៅមុនពេលដែលតុលាការខ្មែរផ្តន្ទាទោសរូបលោកឲ្យជាប់ពន្ធនាគាររយៈពេលពីរឆ្នាំ ពីបទញុះញង់ជាតិសាសន៍ និងបទបំផ្លិចបំផ្លាញទ្រព្យសម្បត្តិសាធារណៈ ដែលទាក់ទងទៅនឹងការដកបង្គោលព្រំដែនកម្ពុជា-វៀតណាម នៅក្នុងស្រុកចន្រ្ទា ខេត្តស្វាយរៀង។
នៅក្នុងលិខិតផ្ញើជូនសមាជិកសភាប្រទេសនានា នៅថ្ងៃនេះ លោកសម រង្ស៊ីអំពាវនាវឲ្យសមាជិក សភាទាំងនោះ រួបរួមសាមគ្គីគ្នាដើម្បីជួយឲ្យរូបលោកបានវិលត្រឡប់មកបម្រើការងារជាតំណាងរាស្រ្តនៅក្នុងប្រទេសកម្ពុជាវិញ តាមរយៈសមាជិកសភាអន្តរជាតិទាំងនោះស្នើឲ្យរដ្ឋាភិបាលរបស់ពួកគេដាក់សម្ពាធទៅលើរដ្ឋាភិបាលក្រុងភ្នំពេញ។ លោកសម រង្ស៊ីចាត់ទុកថា រដ្ឋាភិបាលកម្ពុជាសព្វថ្ងៃគឺជារដ្ឋាភិបាលផ្តាច់ការ។
ឆ្លើយតបតាមទូរស័ព្ទពីទីក្រុងលីវើភូល ប្រទេសអង់គ្លេស នៅល្ងាចនេះ ជាទីដែលលោកបានចូលរួមសមាជរបស់គណបក្សនយោបាយមួយនៅក្នុងប្រទេសអង់គ្លេសនោះ លោកសម រង្ស៊ីមានប្រសាសន៍ថា លោកបានបញ្ជូនលិខិតអំពាវនាវរបស់លោកទៅកាន់សហភាពអន្តរសភា ទៅកាន់សភាអ៊ឺរ៉ុបដែលមានមូលដ្ឋាននៅក្នុងទីក្រុងប៊្រុយសែល ទៅកាន់សភាប្រទេសបារាំង និងសភាប្រទេសអ៊ីតាលី។
មេដឹកនាំគណបក្សជំទាស់ដដែលនេះរំពឹងថា សមាជិកសភាទាំងនោះនឹងជួយដល់រូបលោក។
«គេនឹងធ្វើអន្តរាគមន៍ដើម្បីធ្វើម៉េចឲ្យមានការគោរពគោលការណ៍លទ្ធិប្រជាធិបតេយ្យពិតប្រាកដ»។
ផ្ទុយទៅវិញ លោកផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តី ចាត់ទុកថា នេះគឺជាកំហុសឆ្គងដ៏ធ្ងន់ធ្ងររបស់លោកសម រង្ស៊ី ដែលនឹងមិនអាចរកដំណោះស្រាយបានឡើយ។
«សំអាងទៅលើបរទេសដើម្បីដាក់សម្ពាធមកលើរាជរដ្ឋាភិបាលគឺជាកំហុសធ្ងន់ ហើយគួរឲ្យសោកស្តាយនៃមោទនភាពជាកូនខ្មែរម្នាក់ ព្រោះយើងដឹងហើយថា ប្រទេសកម្ពុជាមិនមែនជាប្រទេសខ្ញុំអ្នកណាទេ។ កម្ពុជាជាប្រទេសមួយដែលឯករាជ្យ»។
សូមបញ្ជាក់ថា ការស្វែងរកអន្តរាគមន៍ពីសហគមន៍អន្តរជាតិរបស់លោកសម រង្ស៊ី គឺធ្វើឡើងបន្ទាប់ពី ប្រធានគណបក្សគ្រប់គ្រងអំណាច និងជាប្រធានព្រឹទ្ធសភា គឺលោកជា ស៊ីម បានបដិសេធកាលពីសប្តាហ៍មុនមិនព្រមធ្វើអន្តរាគមន៍ដើម្បីជួយដល់លោកសម រង្ស៊ីឲ្យទទួលបានអភ័យឯកសិទ្ធិតំណាងរាស្រ្តរបស់លោកមកវិញ។
នៅក្នុងពិធីសម្ពោធន៍ស្ពានព្រែកព្នៅ ជាយទីក្រុងភ្នំពេញកាលពីព្រឹកមិញនេះ លោកនាយករដ្ឋមន្រ្តីខ្មែរ ហ៊ុន សែនបានប្រកាសទុកជាមុនថា លោកនឹងមិនជួយធ្វើអន្តរាគមន៍ណាមួយនៅក្នុងការលើកលែងទោសជូនលោកសម រង្ស៊ី នោះទេ៕