ខណៈដែលពិភពលោកទើបនឹងបានធូរស្បើយពីការបះបោរស៊ីវិលនិងពីមហន្ដរាយធម្មជាតិ ប្រទេសរុស្ស៊ីខិតខំយកចំណេញពីតម្លៃប្រេងឡើងថ្លៃដែលនឹងបំបាត់ចោលនូវឱនភាពថវិការបស់ខ្លួនក្នុងឆ្នាំ២០១១។
ប្រទេសលីប៊ីបានផ្អាកការលក់ប្រេងទៅឲ្យប្រទេសក្រៅ។ ការបះបោរនយោបាយនៅតំបន់ឈូងសមុទ្រប៉េសបានជំរុញឲ្យប្រទេសក្នុងតំបន់នោះឋិតនៅក្នុងភាពប្រុងប្រយ័ត្ន។ ជប៉ុននិងអាល្លឺម៉ង់បានបិទម៉ាស៊ីនរ៉េអាក់ទ័របរិមាណូមួយភាគបួនរបស់ខ្លួន។ នៅក្នុងវិស័យថាមពលរបស់ពិភពលោកសព្វថ្ងៃនេះ ប្រទេសរុស្ស៊ីហាក់ដូចជាអ្នកឈ្នះ។ ដោយផលិតបាន១១%នៃថាមពលរបស់ពិភពលោក រុស្ស៊ីបានក្លាយទៅជាអ្នកនាំចេញថាមពលដ៏ធំជាងគេរបស់ពិភពលោក។
Leonid Grigoriev សិក្សាអំពីសេដ្ឋកិច្ចថាមពលរបស់រុស្ស៊ីនៅសាលាសេដ្ឋកិច្ចជាន់ខ្ពស់នៃទីក្រុង ម៉ូស្គូ៖
«នេះជាចំនួនថាមពលដ៏ធំមហិមាប្រមាណ៥ដងលើសពីចំនួនភាគចំណែករុស្ស៊ីនៅក្នុងផលិតផលសរុបរបស់ពិភាពលោកឬ GDP សាកល ឬ ចំនួនប្រជាជនពិភពលោក។ នេះជាតួលេខមូលដ្ឋាន»។
ដោយគេរំពឹងថាតម្លៃប្រេងនឹងឡើងជាង១០០ដុល្លារក្នុងមួយធុងជាមធ្យមក្នុងឆ្នាំនេះ គេរំពឹងថាប្រាក់ចំណេញច្រើនសន្ធឹកពីការលក់ប្រេងនឹងបំបាត់ចោលឱនភាពថវិការបស់រុស្ស៊ីក្នុងឆ្នាំនេះ។
ពេលវេលានេះកើតឡើងចំពេលដែលរដ្ឋាភិបាលក្រិមឡាំង ដែលកំពុងតំឡើងប្រាក់បៀរវត្សរ៍និងប្រាក់ចូលនិវត្ដន៍ ហើយនិងការរៀបចំការបោះឆ្នោតជាតិជាថ្មី។ ការតំឡើងចុងក្រោយបង្អស់
នោះមានកាលពីថ្ងៃសុក្រ ចំពេលដែលប្រធានាធិបតី ឌីមីទ្រី មេដវិដេវ (Dmitry Medvedev) ប្រកាសអំពីការតំឡើងប្រាក់ខែប្រមាណបីដងដល់ទាហាននៅខែមករាឆ្នាំក្រោយ តែ១០ថ្ងៃប៉ុណ្ណោះមុនការបោះឆ្នោត។
ប្រេងនិងឧស្ម័នផ្ដល់ប្រាក់ចំណូល៤០ភាគរយទៅក្នុងថវិកាជាតិរុស្ស៊ី។ នៅពេលដែលប្រេងឡើងថ្លៃលើសពី២៧ដុល្លារក្នុងមួយធុង ក្រសួងហិរញ្ញវត្ថុរុស្ស៊ីប្រមូលយកចំនួន៩០សេនក្នុងមួយដុល្លារ។
លោក Leonid Grigoriev ថ្លែងទៀតថា៖
«ហេតុនេះហើយដែលរុស្ស៊ីពឹងផ្អែកខ្លាំងមកលើប្រេងនិងតម្លៃប្រេង។ ហើយបើមានចលាចលក្នុងពិភពលោក វានឹងនាំលុយចូលភ្លាមៗដល់ថវិកាជាតិរុស្ស៊ី»។
សព្វថ្ងៃប្រាក់បម្រុងនៃរូបិយវត្ថុបរទេសទំាងអស់របស់រុស្ស៊ីកើន១០០លានដុល្លារក្នុងមួយសប្ដាហ៍។ រហូតដល់ចុងខែមិនាប្រាក់បម្រុងទាំងអស់របស់រុស្ស៊ីនឹងកើនដល់៥០០ពាន់លានដុល្លារជាប្រទេសមានប្រាក់បម្រុងច្រើនទីបីក្នុងពិភពលោកក្រោយប្រទេសចិននិងជប៉ុន។ សព្វថ្ងៃនេះសេដ្ឋវិទូបានតំឡើងការលូតលាស់សេដ្ឋកិច្ចរុស្ស៊ីកើនដល់៥%ក្នុងឆ្នាំ២០១១ជាកម្ពស់ខ្ពស់បំផុតចាប់តាំងពីឆ្នាំ២០០៨ជាឆ្នាំដែលមានវិបត្ដិសេដ្ឋកិច្ចសកល។
ប្រាក់ចំណេញពីប្រេងកាតបានធ្លាក់ចូលទៅក្នុងហោប៉ៅអតិថិជនរុស្ស៊ី។ កាលពីឆ្នាំមុនការលក់រថយន្ដនិងដំណើរកម្សាន្តនៅបរទេសឡើងខ្ពស់១ភាគ៣។ ជនជាតិរុស្ស៊ីប្រមាណ១០%ទៅកម្សាន្តវិស្សមកាលនៅក្រៅប្រទេស។ នៅឆ្នាំក្រោយ រុស្ស៊ីនឹងឈ្នះអាល្លឺម៉ង់ដោយមានទីផ្សារលក់ឡានធំជាងគេនៅក្នុងទ្វិបអឺរុប។ នៅក្នុងខែកុម្ភៈក្រុមហ៊ុនរថយន្ដ Ford ក្រុមហ៊ុន GM និង Volkwagen បានប្រកាសបើកការផ្សងព្រេងរកស៊ីរួមដើម្បីផលិតរថយន្ដជាច្រើនថែមទៀតក្នុងប្រទេសរុស្ស៊ី។
ពលរដ្ឋរុស្ស៊ីផ្ដើមចំណាយលុយកាក់នៅពេលនេះ ពីព្រោះគេមិនដឹងច្បាស់អំពីអនាគតរបស់គេ។
ក្នុងមួយទសវត្សរ៍តម្លៃប្រេងឡើងថ្លៃយ៉ាងលឿនពី៨ដុល្លារក្នុងមួយធុងកាលពីឆ្នាំ១៩៩៨ដល់១៤៧ដុល្លារក្នុងឆ្នាំ២០០៨។ បើគិតអំពីអនាគតវែងឆ្ងាយអ្នកវិភាគនិយាយថា វិបត្ដិនុយក្លេអ៊ែរនៅក្នុងប្រទេសជបុននឹងនាំឲ្យចំណេញដល់ប្រទេសរុស្ស៊ី ដោយគេទម្លាក់ថាមពលនុយក្លេអ៊ែរចោល និងងាកមករកថាមពលឧស្ម័នធម្មជាតិវិញ។ ប្រទេសអាល្លឺម៉ង់ទិញចូលឧស្ម័នពីប្រទេសរុស្ស៊ីសឹងតែពាក់កណ្ដាលនៃឧស្ម័នដែលខ្លួនប្រើប្រាស់។
សូម្បីនៅមុនវិបត្ដិក៏ដោយ ក៏រុស្ស៊ីបានធ្វើការវិនិយោគទៅលើការបង្កើនផលិតកម្មឧស្ម័នរហូតដល់៥០ភាគរយ ក្នុងរយៈពេល២០ឆ្នាំខាងមុខ។ ផលវិបាកគឺតម្លៃខ្ពស់របស់ប្រេងបានធ្វើឲ្យធូរស្បើយដល់វិធានការបំបាត់អំពើពុករលួយ ការធ្វើឲ្យមានភាពសម្បូរបែបនៅក្នុងសេដ្ឋកិច្ច និងការបន្ថយការជាប់ទាក់ទងរបស់រដ្ឋាភិបាលនៅក្នុងវិស័យពាណិជ្ជកម្ម។
ប្រែសម្រួលដោយ អ៊ូ ធួក