អង្គការអភិវឌ្ឍន៍អន្តរជាតិមួយនៅក្នុងប្រទេសកម្ពុជាប្រកាសផ្តល់មូលនិធិជាង១លានដុល្លារសហរដ្ឋអាមេរិកដើម្បីជួយសហគមន៍ជនបទនៅក្នុងខេត្តចំនួន១៣ឲ្យបន្ស៊ាំនិងត្រៀមខ្លួនកាន់តែប្រសើរចំពោះផលប៉ះពាល់នៃការប្រែប្រួលអាកាសធាតុនៅក្នុងប្រទេស។
ទីភ្នាក់ងារសម្រាប់កិច្ចសហប្រតិបត្តិការអភិវឌ្ឍន៍អន្តរជាតិប្រទេសស៊ុយអែតហៅកាត់ថា Sida បានសម្រេចផ្តល់មូលនិធិចំនួន១,៦លានដុល្លារសហរដ្ឋអាមេរិកដល់កម្មវិធីបន្ស៊ាំទៅនឹងការប្រែប្រួលអាកាសធាតុថ្មីមួយ ដើម្បីជួយសហគមន៍ជនបទកម្ពុជាចំនួនប្រមាណ១០០សហគមន៍នៅក្នុងខេត្តចំនួន១៣ដែលងាយរងគ្រោះដោយសារការប្រែប្រួលអាកាសធាតុ។
ខេត្តទាំង១៣នោះរួមមានខេត្តកំពង់ធំ សៀមរាប បាត់ដំបង កំពង់ឆ្នាំង ពោធិសាត់ កំពង់ស្ពឺ តាកែវ ព្រៃវែង ស្វាយរៀង កណ្តាល មណ្ឌលគីរី រតនគីរី និងខេត្តស្ទឹងត្រែង។
ថ្លែងនៅក្នុងវិធីបើកសម្ពោធកម្មវិធីបន្ស៊ាំទៅនឹងការប្រែប្រួលអាកាសធាតុ ផ្អែកលើសហគមន៍មូលដ្ឋាននៅកម្ពុជាដែលបានធ្វើឡើងក្នុងទីក្រុងភ្នំពេញ នៅរសៀលថ្ងៃអង្គារ លោកស្រីអេវ៉ា អាសផ្លាន់ (Eva Asplund) នាយិកានៃទីភ្នាក់ងារ Sida ប្រចាំប្រទេសកម្ពុជា មានប្រសាសន៍ថា កម្មវិធីបន្ស៊ាំទៅនឹងការប្រែប្រួលអាកាសធាតុនេះនឹងជួយធ្វើឲ្យសហគមន៍ជនបទកម្ពុជាត្រៀមខ្លួនបានកាន់តែល្អប្រសើរជាងមុនចំពោះផលប៉ះពាល់នៃការប្រែប្រួលអាកាសធាតុនៅពេលខាងមុខ។
«យើងរំពឹងថា តាមរយៈកម្មវិធីនេះ ស្ថានភាពរស់នៅរបស់សហគមន៍ខ្មែរជាច្រើននឹងមានលក្ខណៈល្អប្រសើរឡើងនៅពេលដែលសមត្ថភាពបន្ស៊ាំទៅនឹងការប្រែប្រួលអាកាសធាតុរបស់ពួកគេត្រូវបានពង្រឹងនោះ»។
កម្មវិធីបន្ស៊ាំទៅនឹងការប្រែប្រួលអាកាសធាតុផ្អែកលើសហគមន៍មូលដ្ឋាននៅកម្ពុជា ឬកាត់ថា CCBA Program ដែលមានរយៈពេល២ឆ្នាំចាប់ពីឆ្នាំ២០១០ដល់២០១២នេះ នឹងផ្តល់ជំនួយខ្នាតតូចដល់បណ្តាអង្គការក្រៅរដ្ឋាភិបាលក្នុងស្រុក ឬសហគមន៍ដែលធ្វើការងារនៅតាមមូលដ្ឋានក្នុងខេត្តគោលដៅទាំងនោះ ដើម្បីជួយប្រជាកសិករ អ្នកនេសាទ និងអ្នកប្រកបរបរផ្សេងៗទៀតនៅតាមទីជនបទ ឲ្យបង្កើនមុខដំណាំកសិកម្ម ឬកែច្នៃមុខរបរបន្ថែមទៀតជាដើម សម្រាប់ឆ្លើយតបទៅនឹងផលប៉ះពាល់នៃការប្រែប្រួលអាកាសធាតុ។
នៅកម្ពុជា បាតុភូតធម្មជាតិដ៏កំណាច ដូចជាទឹកជំនន់និងគ្រោះរាំងស្ងួតជាដើម បានធ្វើឲ្យប្រជាជនក្រីក្រ ជាពិសេសនៅតាមទីជនបទ ក្លាយជាក្រុមដែលងាយរងគ្រោះបំផុត ដោយសារតែពួកគេគ្មានលទ្ធភាពនិងសមត្ថភាពគ្រប់គ្រាន់ក្នុងការទប់ទល់ ឬត្រៀមខ្លួនឲ្យបានល្អប្រសើរជាមុខ ចំពោះបាតុភូតទាំងនោះ ដែលអាចបណ្តាលមកពីការប្រែប្រួលអាកាសធាតុនេះ។
ជាក់ស្តែង ឥទ្ធិពលនៃខ្យល់ព្យុះកេសាណា ដែលបានវាយបក់បោកមកលើប្រទេសកម្ពុជាកាលពីឆ្នាំ២០០៩ បានធ្វើឲ្យមានមហន្តរាយយ៉ាងធំធេង ដោយបង្កឲ្យមានការខូតខាត គិតជាប្រាក់ប្រមាណ១៣២លានដុល្លារសហរដ្ឋអាមេរិកនៅពេលនោះ នេះបើផ្អែកតាមអង្គការកម្មវិធីអភិវឌ្ឍន៍សហប្រជាជាតិ ឬហៅកាត់ថា UNDP ដែលជាអ្នកចាត់ចែងគម្រោងកម្មវិធីបន្ស៊ាំទៅនឹងការប្រែប្រួលអាកាសធាតុ CCBA Program នេះ។
លោកស្រីអេលេណា ទីឆេនកូ (Elena Tischenko) នាយិកាអង្គការUNDP ប្រចាំប្រទេសកម្ពុជា មានប្រសាសន៍ថា កម្មវិធីនេះនឹងរួមចំណែកធ្វើឲ្យប្រាកដថា សហគមន៍ជនបទមានសមត្ថភាពកាន់តែច្រើនឡើងនៅក្នុងការបន្ស៊ាំទៅនឹងការប្រែប្រួលអាកាសធាតុ។
លោកឆេង គឹមស៊ុន ប្រធានរដ្ឋបាលព្រៃឈើនិងជាប្រធានគណៈកម្មាធិការជាតិដឹកនាំកម្មវិធីជំនួយខ្នាតតូច ក៏បានថ្លែងនៅក្នុងពិធីនោះផងដែរថា សមត្ថភាពឆ្លើយតបនឹងការប្រែប្រួលអាកាសធាតុរបស់កម្ពុជានៅមានកម្រិតនៅឡើយ ដូច្នេះការកាត់បន្ថយនិងការបន្ស៊ាំទៅនឹងការប្រែប្រួលអាកាសធាតុនេះគឺជាការចាំបាច់ដើម្បីធានាចីរភាពបរិស្ថាននិងលើកកម្ពស់ជីវភាពប្រជាជននៅជនបទ៕