ក្រុមមេធាវី និងដើមបណ្តឹងក្នុងសំណុំរឿងប្រឆាំងនឹងលោកឧត្តមសេនីយ៍ ហ៊ុន ម៉ាណែត និងរាជរដ្ឋាភិបាលកម្ពុជា បានប្តេជ្ញាថា នឹងបន្តក្តីក្តាំរហូតដល់តុលាការសហព័ន្ធនៅរដ្ឋធានីវ៉ាស៊ីនតោន បើសិនជាការសម្រេចរបស់ចៅក្រមនៅរដ្ឋកាលីហ្វញ៉ាមិនបានតាមការចង់បានរបស់ខ្លួន។
តុលាការសហព័ន្ធនៅតំបន់ភាគកណ្តាលនៃរដ្ឋកាលីហ្វញ៉ា បានបើកសវនាការស្តាប់ភស្តុតាងបន្ថែមទៀតពីសាក្សីកាលពីថ្ងៃព្រហស្បតិ៍ ហើយនឹងសម្រេចចេញសាលក្រមនៅសប្តាហ៍ក្រោយថា ការប្រគល់ដីកាកោះឱ្យលោក ហ៊ុន ម៉ាណែត នាយរងសេនាធិការចម្រុះនៃកងយោធពលខេមភូមិន្ទមានសុពលភាព ឬទេ។
នៅក្នុងសវនាការនោះមានសាក្សីសំខាន់ៗចំនួនបីនាក់ ដែលចូលមកឆ្លើយបំភ្លឺក្នុងនោះមានលោក សាន គឹមហុង និងលោក នួន ខាវី ដែលជាពលរដ្ឋខ្មែរអាមេរិកាំងរស់នៅក្នុងរដ្ឋកាលីហ្វញ៉ា។
សាក្សីទាំងពីរដែលមានវត្តមាននៅក្នុងពិធីជប់លៀងនៅភោជនីយដ្ឋានឡាលូន កាលពីយប់ថ្ងៃទី៩ ខែមេសា ឆ្នាំ២០១៦ បានបដិសេធថាពួកគេមិនបានដឹងពីការព្យាយាមប្រគល់ដីកាកោះឱ្យលោកឧត្តមសេនីយ៍ ហ៊ុន ម៉ាណែត ទេ។ ហើយមានសាក្សីម្នាក់ថែមទាំងបដិសេធថា ខ្លួនមិនដែលស្គាល់លោក ហ៊ុន ម៉ាណែត ផងដែរ។ នេះបើតាមការបញ្ជាក់របស់លោកមេធាវី អ៊ុច បូ ដែលតំណាងឱ្យដើមបណ្តឹង។
លោក ប៉ូល ហេយ ជាអ្នកប្រគល់ដីកាកោះ ត្រូវបានគេវាយឱ្យរបួសពេលដែលលោកព្យាយាមប្រគល់ឯកសារតុលាការដល់លោក ហ៊ុន ម៉ាណែត។
លោក អ៊ុច បូ បានបញ្ជាក់បន្ថែមថា៖
«យើងសួរច្រើនដែរជាពិសេស សាន គឹមហុង តើទាក់ទងខាងអង្គរក្សសមត្ថកិច្ចថាអ្នកណាអ្នកវាយលោក ប៉ូល ហេយ ហើយធម្មតា គេបដិសេធហើយ ព្រោះប៉ូលិសស៊ើបអង្កេតនៅទីនោះ»។
លោក អ៊ុច បូ បានបន្ថែមថា លោក ដេវីត ថឺនណូឡូ ប៉ូលិសទីក្រុងឡុងប៊ិច និងអ្នកស៊ើបអង្កេតក៏បានផ្តល់សក្ខីកម្មដែរ ដោយបញ្ជាក់ថា សំណុំរឿងវាយលោក ប៉ូល ហេយ នៅបន្តការស៊ើបអង្កេតនៅឡើយទេ ដែលអាចនឹងមានជាសំណុំរឿងព្រហ្មទណ្ឌថ្មីមួយទៀត ដែលនឹងត្រូវដាក់ប្តឹងទៅតុលាការនៅពេលក្រោយ។
លោកមាជ សុវណ្ណារ៉ា (ឆ្វេង) ប្រធាននាយកដ្ឋានព័ត៌មាននៃគណបក្សសង្គ្រោះជាតិ និងលោកញ៉យ ចំរើន តំណាងរាស្ត្រគណបក្សសង្គ្រោះជាតិ។
លោក មាជ សុវណ្ណារ៉ា និងភរិយា ជេមី មាជ ព្រមទាំងកូនស្រីទាំងបីនាក់របស់លោក បានដាក់ពាក្យបណ្តឹងប្រឆាំងនឹងលោក ហ៊ុន ម៉ាណែត និងរាជរដ្ឋាភិបាលកម្ពុជាកាលពីថ្ងៃទី៨ ខែមេសា ឆ្នាំ២០១៦ នៅតុលាការរដ្ឋកាលីហ្វញ៉ា។ បណ្តឹងនោះចោទប្រកាន់ពីការធ្វើទារុណកម្ម អំពើភេរវកម្ម ការឃុំឃាំងដោយខុសច្បាប់ និងការវាយធ្វើបាបជាដើម។
ក្រុមដើមបណ្តឹងកំពុងតែរង់ចាំការសម្រេចរបស់តុលាការ ប៉ុន្តែក៏ត្រៀមលក្ខណៈប្តឹងបន្តដែរ បើសិនជាលទ្ធផលមិនបានដូចការរំពឹងទុក។
លោក អ៊ុច បូ បានបន្ថែមថា៖
«រឿងហ្នឹង បើសិនជាចៅក្រមគាត់សម្រេចថា ការហុចបណ្តឹងហ្នឹងអត់មានសុពលភាពដោយសារអត់បានហុចទៅ ហ៊ុន ម៉ាណែត ផ្ទាល់ដៃ ក៏ប៉ុន្តែភាគីខាងយើង យើងដឹងថាការប្រគល់ដីកាមានសុពលភាពហើយ...។ បើសិនជាគាត់សម្រេចអីចឹងមែន យើងត្រូវទទួល ហើយយើងនឹងដាក់ញត្តិស្នើសុំផ្ទេរសំណុំរឿងយើងដូរដែនយុត្ថាធិការទៅវ៉ាស៊ីនតោនវិញ»។
អ្នកស្រី ជេមី មាជ ភរិយារបស់លោក មាជ សុវណ្ណារ៉ា ដែលមានវត្តមាននៅក្នុងបន្ទប់សវនាការបានបញ្ជាក់ប្រាប់ វីអូអេ ថា៖
«ចំណែកពាក្យបណ្តឹងដែលត្រូវចៅក្រមបដិសេធថា សំណុំរឿងនាងខ្ញុំមិនបានហុចដល់ដៃលោក ហ៊ុន ម៉ាណែត នោះ គឺនាងខ្ញុំមិនតក់ស្លុត ហើយក៏មិនអស់សង្ឃឹមទេហើយពួកយើងនឹងបន្តដាក់ពាក្យបណ្តឹងរហូតដល់តុលាការនៅវ៉ាស៊ីនតោនឌីស៊ី»។
លោក ញ៉យ ចំរើន អ្នកតំណាងរាស្ត្រគណបក្សសង្គ្រោះជាតិ ក៏បានដាក់ឈ្មោះបញ្ចូលជាដើមបណ្តឹងក្នុងសំណុំរឿងនេះដែរ បន្ទាប់ពីលោករងការវាយប្រហារពីក្រុមបាតុកររបស់គណបក្សប្រជាជនកម្ពុជា និងជាអង្គរក្សលោកនាយករដ្ឋមន្ត្រី ហ៊ុន សែន កាលពីខែតុលាឆ្នាំ២០១៥។
លោក ញ៉យ ចំរើន បានបញ្ជាក់ថា៖
«បើសិនសាលក្រមចេញមកថា យើងប្រគល់ក្រដាសមិនសមរម្យ។ អីចឹងឧត្តមសេនីយ៍ ហ៊ុន ម៉ាណែត មកដល់ជាន់ដីសហរដ្ឋអាមេរិកពេលណាដីកាត្រូវដល់ពេលហ្នឹង»។
ការណ៍ដែលក្រុមដើមបណ្តឹងគ្រោងនឹងដាក់ពាក្យសុំប្តូរដែនយុត្ថាធិការមករដ្ឋធានីវ៉ាស៊ីនតោន គឺដោយសារជនចុងចម្លើយអាចនឹងនៅសល់តែរាជរដ្ឋាភិបាលកម្ពុជាដែលតម្រូវឱ្យឆ្លងកាត់តាមប្រព័ន្ធការទូតរវាងប្រទេសទាំងពីរ។ នេះបើតាមការបញ្ជាក់របស់ក្រុមមេធាវី។
ពួកគេក៏បញ្ជាក់ផងដែរថា រដ្ឋាភិបាលកម្ពុជាបានទទួលយកឯកសារបណ្តឹងនោះជាផ្លូវការកាលពីចុងឆ្នាំមុន ដែលចុះហត្ថលេខាទទួលដោយលោក ប្រាក់ សុខុន រដ្ឋមន្ត្រីក្រសួងការបរទេសកម្ពុជា។
រហូតមកដល់ពេលនេះ នៅមិនទាន់មានប្រតិកម្មតបយ៉ាងណាពីក្រុមមេធាវីរបស់លោក ហ៊ុន ម៉ាណែត ដែលជាចុងចម្លើយនៅឡើយទេ៕