ទស្សនារូបភាពជុំវិញពិភពលោក ពីប្រទេសអ៊ុយក្រែន អង់គ្លេស បារាំង អ៊ីរ៉ង់ និង សហរដ្ឋអាមេរិក៕
រូបភាពជុំវិញពិភពលោក៖ ៥ តុលា ២០២២
រូបថតបង្ហាញពីរថក្រោះនិងយាន្តយោធារុស្ស៊ីដែលត្រូវបានបំផ្លាញ ក្នុងអំឡុងពេលការឈ្លានពានរបស់រុស្ស៊ីនៅអ៊ុយក្រែន នៅក្រុង Lyman ដែលទើបនឹងត្រូវបានរំដោះកាលពីពេលថ្មីៗនេះ ក្នុងតំបន់ Donetsk ប្រទេសអ៊ុយក្រែន។
នាយករដ្ឋមន្ត្រីអង់គ្លេសអ្នកស្រី Liz Truss និងស្វាមីលោក Hugh O'Leary បក់ដៃទៅកាន់ក្រុមប្រតិភូដែលទះដៃអបអរសាទរ បន្ទាប់ពីអ្នកស្រីធ្វើសុន្ទរកថានាថ្ងៃចុងក្រោយនៃកិច្ចប្រជុំប្រចាំឆ្នាំរបស់គណបក្ស Conservative Party នៅក្រុង Birmingham ប្រទេសអង់គ្លេស។
រូបថតពីអាកាសបង្ហាញពីអេស្កាវ៉ាទ័រមួយកំពុងចូកគំនរសំរាម នៅកន្លែងចាក់សំរាមឯកជនមួយក្នុងក្រុង Viggianello ជិតក្រុង Propriano ភាគនិរតីកោះ Corsica តំបន់សមុទ្រមេឌីទែរ៉ានេនៃប្រទេសបារាំង។
អ្នកតវ៉ាក្នុងយុទ្ធនាការ «Just Stop Oil» ម្នាក់ បង្ខាំងផ្លូវមួយទៅកាន់តំបន់ Westminster ក្នុងក្រុងឡុងដ៍ ប្រទេសអង់គ្លេស។
ពលរដ្ឋអ៊ីរ៉ង់ចូលរួមក្នុងការប្រមូលផ្តុំមួយដើម្បីបង្ហាញការគាំទ្រដល់រដ្ឋាភិបាលអ៊ីរ៉ង់ នៅទីលាន Tajrish ភាគខាងជើងក្រុងតេរ៉ង់ ដោយថ្កោលទោសបាតុកម្មប្រឆាំងនឹងរដ្ឋាភិបាលអ៊ីរ៉ង់កាលពីពេលថ្មីៗនេះ ពាក់ព័ន្ធនឹងការស្លាប់របស់ស្រ្តីឈ្មោះ Mahsa Amini អំឡុងពេលស្ថិតក្រោមការឃុំឃាំងរបស់ប៉ូលិសផ្នែកក្រមសីលធម៌អ៊ីរ៉ង់។
រ៉ុក្កែត SpaceX Falcon 9 ត្រូវបានបង្ហោះចេញពីទីតាំងបង្ហោះ Pad-39A ក្នុងបេសកកម្មដែលមានផ្ទុកមនុស្ស ៥ នាក់ ទៅកាន់ស្ថានីយអវកាសអន្តរជាតិ ពីមជ្ឈមណ្ឌលអវកាស Kennedy Space Center ក្នុងក្រុង Cape Canaveral រដ្ឋ Florida សហរដ្ឋអាមេរិក។
លោក Yuri Shapovalov ចែវទូកមួយផ្ទុកទៅដោយទំនិញផ្សេងៗ ស្របពេលរូបលោក និងយោធាអ៊ុយក្រែនម្នាក់ឆ្លងកាត់ទន្លេ Siverskyi-Donets ក្រោមស្ពានដែលត្រូវបានបំផ្លាញមួយនៅក្រុង Staryi-Saltiv ក្នុងប្រទេសអ៊ុយក្រែន។ លោក Shapovalov ជួយពលរដ្ឋក្នុងស្រុក ដើម្បីឆ្លងកាត់ទន្លេជារៀងរាល់ថ្ងៃ ខណៈស្ពានបានរងការខូចខាតមួយភាគធំអំឡុងពេលការប្រយុទ្ធគ្នា។
សំណល់បាក់បែកពីភោជនីយដ្ឋាន ហាងលក់ និងអាជីវកម្មដទៃទៀត បន្ទាប់ពីព្យុះសង្ឃរា Ian បានបង្កការបំផ្លិចបំផ្លាញ ក្នុងក្រុង Fort Myers Beach រដ្ឋ Florida សហរដ្ឋអាមេរិក កាលពីថ្ងៃទី៤ ខែតុលា ឆ្នាំ២០២២។
សាស្រ្តាចារ្យសាកលវិទ្យាល័យ Stanford អ្នកស្រី Carolyn Bertozzi សញ្ជឹងអារម្មណ៍បន្តិច អំឡុងពេលហៅទូរសព្ទមួយ ក្រោយពីដឹងថា អ្នកស្រីទទួលបានពានរង្វាន់ណូបែលផ្នែកគីមីវិទ្យា ក្នុងក្រុង Palo Alto រដ្ឋ California សហរដ្ឋអាមេរិក។