រូបភាពជុំវិញពិភពលោក ២០ តុលា ២០១៥
លោក Chae Hun Sik ជនជាតិកូរ៉េខាងជើង វ័យ៨៨ឆ្នាំ (រូបឆ្វេង) ជួបជាមួយលោក Chae Hee-yang វ័យ៦៥ឆ្នាំ ដែលជាកូនប្រុសរបស់គាត់ និងជាជនជាតិកូរ៉េខាងត្បូង នៅក្នុងការជួបជុំគ្រួសារដែលឃ្លាតឆ្ងាយពីគ្នា (Separated Family Reunion Meeting) នៅរមណីយដ្ឋាន Diamond Mountain ក្នុងប្រទសកូរ៉េខាងត្បូង។ ជនជាតិកូរ៉េចាស់ៗរាប់រយនាក់មកពីកូរ៉េខាងជើង និងខាងត្បូងបានចាប់ផ្តើមការជួបជុំគ្នាឡើងវិញជាមួយនឹងមនុស្សជាទីស្រឡាញ់ដែលពួកគេមិនបានទាក់ទងគ្នា ចាប់តាំងពីពេលដែលមានសង្រ្គាមរវាងប្រទេសទាំងពីរជាង៦០ឆ្នាំមុន។
សិល្បករតាមផ្លូវម្នាក់សម្តែងជាមួយពពុះសាប៊ូនៅពីមុខព្រះវិហារ Duomo នៅក្នុងក្រុង Milan ប្រទេសអ៊ីតាលី។
ប៉ូលិសដែលជិះលើខ្នងសេះដឹកនាំជនទេសន្តរប្រវេសន៍១ក្រុមនៅក្បែរក្រុង Dobova ប្រទេសស្លូវេនី (Slovenia)។ សភាស្លូវេនីត្រូវបានគេរំពឹងថា នឹងអនុម័តលើវិសោធនកម្មច្បាប់ (ការកែប្រែច្បាប់) ដើម្បីធ្វើឲ្យកងទ័ពអាចជួយប៉ូលិសនៅតាមព្រំដែន នៅពេលជនទេសន្តរប្រវេសន៍រាប់ពាន់នាក់សម្រុកចូលទៅក្នុងប្រទេសនេះពីប្រទេសក្រូអាស៊ី (Croatia) បន្ទាប់ពីប្រទេសហុងគ្រីបានបិទព្រំដែនរបស់ខ្លួន។
រូបភាពចម្រុះរបស់ភពភ្លុយតុង (Pluto) និងភពព្រះចន្ទ Charon ដែលរចនាឡើងដោយកុំព្យូទ័រ។ រូបភាពចម្រុះនោះប្រមូលផ្តុំទៅដោយរូបភាព #PlutoTime ប្រមាណជា២.១០០សន្លឹកដែលគេចែកចាយនៅក្នុងប្រព័ន្ធផ្សព្វផ្សាយសង្គម។ អង្គការ NASA កំពុងតែបង្ហាញរូបភាពរបស់ភពភ្លុយតុង និងភពព្រះចន្ទ Charon ដែលធំជាងគេ។ នេះតំណាងឲ្យការឆ្លើយតបជាសាកលទៅនឹងយុទ្ធនាការក្នុងប្រព័ន្ធផ្សព្វផ្សាយសង្គមក៏ល្បីរបស់ខ្លួនដែលមានឈ្មោះថា «#PlutoTime»។
លោក Justin Trudeau ប្រធានគណបក្សសេរីនិយមថើបភរិយារបស់លោក គឺលោកស្រី Sophie Gregoire នៅពេលដែលលោកទៅដល់កន្លែងដែលលោកថ្លែងសុន្ទរកថាជោគជ័យ នៅក្រោយការបោះឆ្នោតសហព័ន្ធរបស់កាណាដានៅក្នុងក្រុង Montreal ខេត្ត Quebec កាលពីថ្ងៃទី១៩ ខែតុលា ឆ្នាំ២០១៥។
យានមួយរបស់កងទ័ពជើងទឹកអាមេរិកទៅដល់ឆ្នេរសមុទ្រ នៅពេលចាប់ផ្តើមនៃការហ្វឹកហ្វឺនដែលមានឈ្មោះថា NATO Trident Juncture សម្រាប់ឆ្នាំ២០១៥ នៅឆ្នេរ Raposa Media នៅ Pinheiro da Cruz ភាគខាងត្បូងនៃក្រុងលីសបោន (Lisbon) ប្រទេសព័រទុយហ្គាល់។ សម្ព័ន្ធណាតូ (NATO) និងប្រទេសជាដៃគូ នឹងសហការគ្នាក្នុងរយៈពេល៣សបា្តហ៍សម្រាប់ការហ្វឹកហ្វឺនយោធា Alliance's Trident Juncture ដែលនឹងផ្សាយបន្តផ្ទាល់ និងមានយោធាចំនួន៣៦.០០០នាក់ចូលរួម មកពីជាង៣០ប្រទេស នៅទូទាំងព័រទុយហ្គាល់ អ៊ីតាលី និងអេស្ប៉ាញ។
លោក Christian Eckmann ដែលជាអ្នកអភិរក្សនិយមជនជាតិអាល្លឺម៉ង់ម្នាក់ធ្វើការដើម្បីស្តារឡើងវិញនូវស្រោមមុខមាសរបស់សេ្តច Tutankhamun នៅសារមន្ទីរអេហ្ស៊ីប នៅក្នុងក្រុងគែរ (Cairo) កាលពីថ្ងៃទី២០ ខែតុលា ឆ្នាំ២០១៥។
យន្តហោះដ្រូនហោះក្នុងពេលជាមួយគ្នា ក្នុងពេលបើកសន្និសីទឌីជីថលផ្សាយបន្តផ្ទាល់ដែលមានឈ្មោះថា Wall Street Journal Digital Live (WSJDLive) តាមរយៈប្រព័ន្ធទូរស័ព្ទ Montage នៅឆ្នេរ Laguna រដ្ឋ California កាលពីថ្ងៃទី១៩ ខែតុលា ឆ្នាំ២០១៥។
ទាមួយហ្វូងហែលទឹកទៅកន្លែងរស់នៅបណ្តោះអាសន្ន នៅក្រោយការជម្លៀសចេញដោយសារទឹកជំនន់នៅក្នុងក្រុង Jaen ខេត្ត Nueva Ecija ភាគខាងជើងនៃប្រទេសហ្វីលីពីន បន្ទាប់ពីខ្យល់ព្យុះ Typhoon Koppu បោកបក់ទៅលើខេត្តនេះ។
ទិដ្ឋភាពទូទៅនៃរោងចក្រចម្រាញ់របស់ក្រុមហ៊ុនគីមី LyondellBasell របស់អាមេរិកនៅក្នុងសង្កាត់ Berre នៅក្បែរក្រុង Marseille ប្រទេសបារាំង កាលពីថ្ងៃទី១៩ ខែតុលា ឆ្នាំ២០១៥។
ការចម្លងតួអង្គ Stormtroopers ក្នុងភាពយន្ត Star Wars ចំនួន៥០០រូបត្រូវបានគេប្រទះឃើញនៅលើជណ្តើរនៃផ្លូវ Juyongguan ទៅមហាកំផែងចិន ក្នុងព្រឹត្តិការណ៍ផ្សព្វផ្សាយសម្រាប់ភាពយន្ត Star Wars: The Force Awakens នៅជាយក្រុងប៉េកាំង ប្រទេសចិន។
ស្រ្តីម្នាក់ជិះសេះនៅតាមបណ្តោយឆ្នេរមួយនៅក្នុងក្រុង Cadiz ភាគខាងត្បូងនៃប្រទេសអេស្ប៉ាញ កាលពីថ្ងៃទី១៩ ខែតុលា ឆ្នាំ២០១៥។
សម្លៀកបំពាក់គួរឲ្យខ្លាចត្រូវបានគេតាំងបង្ហាញនៅហាងមួយក្នុងតំបន់ Springfield រដ្ឋ Virginia សម្រាប់មនុស្សពេញវ័យដែលចង់មើលសម្លៀកបំពាក់ចម្លែកៗសម្រាប់បុណ្យ Halloween ដែលនឹងចូលមកដល់នៅថ្ងៃទី៣១ ខែតុលា ឆ្នាំ២០១៥នេះ។