រូបភាពជុំវិញពិភពលោក ០៩ វិច្ឆិកា ២០១៦
បុរសម្នាក់ក្នុងសំលៀកបំពាក់ទង់ជាតិអាមេរិក អង្គុយនៅលើចិញ្ចើមផ្លូវអំឡុងពេលបាតុកម្មប្រឆាំងនឹងប្រធានាធិបតីជាប់ឆ្នោតលោកដូណាល់ ត្រាំ នៅតំបន់ Capitol Hill ក្រុង Seattle រដ្ឋវ៉ាស៊ីនតោន។
លោកស្រីហ៊ីលឡារី គ្លីនតុនបិទភ្នែកសញ្ជឹងបន្តិច ស្របពេលលោកស្រីនិយាយទៅកាន់ក្រុមការងារ និងក្រុមអ្នកគាំទ្រអំពីលទ្ធផលនៃការបោះឆ្នោតនៅសហរដ្ឋអាមេរិក នៅសណ្ឋាគារមួយក្នុងក្រុង Manhattan នៃបុរីញូវយ៉ក។ បេក្ខជនប្រធានាធិបតីគណបក្សប្រជាធិបតេយ្យរូបនេះបានចាញ់ការបោះឆ្នោតទៅនឹងបេក្ខជនគណបក្សសាធារណរដ្ឋលោកដូណាល់ ត្រាំ បន្ទាប់ពីមានការប្រជែងគ្នាយ៉ាងសស្រាក់សស្រាំ។
ប្រធានាធិបតីជាប់ឆ្នោតលោកដូណាល់ ត្រាំស្វាគមន៍ក្រុមអ្នកគាំទ្រ ជាមួយនឹងភរិយារបស់លោកគឺ លោកស្រី Melania និងគ្រួសារ អំឡុងពេលជួបជុំក្រុមអ្នកគាំទ្រនៅយប់ថ្ងៃបោះឆ្នោតមួយក្នុងក្រុង Manhattan បុរីញូវយ៉ក។
បាតុករប្រមូលផ្តុំជិតអគារ Trump Tower ក្នុងក្រុងញូវយ៉ក។
ប្រជាពលរដ្ឋចូលរួមនៅក្នុងបាតុកម្មប្រឆាំងការប្រកាន់ពូជសាសន៍ប្រឆាំងនឹងប្រធានាធិបតីជាប់ឆ្នោតលោកដូណាល់ ត្រាំ ដែលបានឈ្នះការបោះឆ្នោត នៅខាងក្រៅស្ថានទូតអាមេរិកក្នុងក្រុងឡុងដ៍។
ឈ្មួញកណ្តាលផ្នែកមូលប័ត្រម្នាក់បង្ហាញប្រតិកម្មរបស់ខ្លួន ខណៈពេលកំពុងទស្សនាប្រធានាធិបតីជាប់ឆ្នោតលោកដូណាល់ ត្រាំ ធ្វើការថ្លែងសុន្ទរកថាជ័យជម្នះរបស់លោក នៅលើកញ្ចក់ទូរទស្សន៍មួយក្នុងផ្សារមូលប័ត្រក្នុងក្រុង Frankfurt ប្រទេសអាល្លឺម៉ង់។
ទង់ជាតិអាមេរិកអាចត្រូវបានឃើញនៅកញ្ចក់បង្អួចមួយនៃស្ថានីយអវកាសអន្តរជាតិ។
យុវនារីម្នាក់ថតរូបបេក្ខជនប្រធានាធិបតីគណបក្សសាធារណរដ្ឋលោកដូណាល់ ត្រាំនៅពីមុខ Trump House ដែលជាកម្មសិទ្ធិរបស់លោកស្រី Lisa Rossi ក្នុងក្រុង Youngstown រដ្ឋ Pennsylvania កាលពីថ្ងៃទី០៨ ខែវិច្ឆិកា ឆ្នាំ២០១៦។
ស្រ្តីម្នាក់ដើរនៅអំឡុងពេលធ្លាក់ព្រិលក្នុងក្រុង Stockholm ប្រទេសស៊ុយអែត។
អ្នកស្រី Sharbat Gula (ខាងឆ្វេង) ជា «ក្មេងស្រីអាហ្វហ្គានីស្ថានភ្នែកពណ៌បៃតង» ដែលរូបថតនៅឆ្នាំ ១៩៨៥ នោះនៅក្នុងទស្សនាវដ្តី National Geographic បានក្លាយជានិមិត្តរូបមួយនៃសង្រ្គាមនៅក្នុងប្រទេសរបស់អ្នកស្រី។ អ្នកស្រីបានទទួលសោរអគារស្នាក់នៅពីប្រធានាធិបតីអាហ្វហ្គានីស្ថានលោក Ashraf Ghani បន្ទាប់ពីអ្នកស្រីបានមកដល់ក្រុងកាប៊ុល។ មន្រ្តីប៉ាគីស្ថានបាននិយាយថា អ្នកស្រី Gula ត្រូវបានបញ្ជូនមកកាន់ប្រទេសកំណើតរបស់អ្នកស្រីវិញ។
ផ្កាជាច្រើនត្រូវបានដាក់ក្នុងស្នាមប្រេះក្នុងជញ្ជាំងមួយអំឡុងពេលរំឮកខួបលើកទី២៧ នៃការដួលរលំជញ្ជាំងប៊ែកឡាំង ក្នុងប្រទេសអាល្លឺម៉ង់។
«ត្រចៀក» មួយត្រូវបានបណ្តុះចេញពីដៃអ្នកជំងឺម្នាក់ ដែលបានបាត់បង់ត្រចៀកខាងស្តាំងរបស់ខ្លួននៅក្នុងគ្រោះថ្នាក់មួយ នៅមន្ទីរសហការមួយនៃមហាវិទ្យាល័យ Xi'an Jiaotong ក្នុងក្រុង Xi'an ខេត្ត Shaanxi ប្រទេសចិន។
ស្នាដៃសិល្បៈនៃរូបពងទាចៀនយក្ស ជាផ្នែកមួយនៃពិធីបុណ្យស្នាដៃសិល្បៈ «Hecho en Casa» ក្នុងក្រុងសាន់ត្យាហ្គោ ប្រទេសឈីលី កាលពីថ្ងៃទី០៨ ខែវិច្ឆិកា ឆ្នាំ២០១៦។
អ្នកកាន់សាសនាហិណ្ឌូអង្គុយនៅលើឥដ្ឋព្រះវិហារមួយដើម្បីប្រារព្ធពិធី Rakher Upabash ក្នុងក្រុង Narayangonj ជិតរដ្ឋធានីដាកា ប្រទេសបង់ក្លាដេស កាលពីថ្ងៃទី០៨ ខែវិច្ឆិកា ឆ្នាំ២០១៦។
សត្វអូដ្ឋដែលត្រូវបានតុបតែងធ្វើការសម្តែងរាំ អំឡុងពេលការប្រកួតមួយនៅ Pushkar Fair ទីដែលសត្វពាហនៈនានា ជាពិសេសសត្វអូដ្ឋ ត្រូវបាននាំមកយកលក់ និងជួញដូរក្នុងរដ្ឋ Rajasthan ប្រទេសឥណ្ឌា។
អាជ្ញាកណ្តាលត្រួតពិនិត្យមើលគោលដៅសម្រាប់ការប្រកួត Ruetlischiessen ក្នុងរយៈចម្ងាយ ៣០០ ម៉ែត្រ នៅទីលាន Ruetli ភាគកណ្តាលប្រទេសស្វីស។
ឧប្បត្តិហេតុដីបាក់ស្រុតមួយបានកើតឡើងនៅត្រង់ចំណុចផ្លូវបែកជាបួនជិតស្ថានីយ Hakata ក្នុងក្រុង Fukuoka ប្រទេសជប៉ុន កាលពីថ្ងៃទី០៨ ខែវិច្ឆិកា ឆ្នាំ២០១៦ នៅក្នុងរូបភាពផ្តល់ដោយទីភ្នាក់ងារព័ត៌មាន Kyodo។