រូបភាពជុំវិញពិភពលោក ១៤ វិច្ឆិកា ២០១៦
ព្រះចន្ទពេញវង់នៅពីលើអគារកំពុងសាងសង់មួយក្នុងក្រុងហុងកុង។
ព្រះចន្ទពេញវង់នៅពីលើយានអវកាស Soyuz MS-03 ដែលស្ថិតនៅលើកន្លែងបង្ហោះ នៅស្ថានីយអវកាស Baikonur ជួលដោយប្រទេសរុស្ស៊ី ក្នុងប្រទេសកាហ្សាស្តង់។
ព្រះចន្ទពេញវង់នៅពីអគារប្រវត្តិសាស្រ្ត Galata Tower ក្នុងក្រុងអ៊ីស្តង់ប៊ូល ប្រទេសតួកគី។
ព្រះចន្ទរះពីលើវិមាន U.S. Capitol ក្នុងរដ្ឋធានីវ៉ាស៊ីនតោន កាលពីថ្ងៃទី១៣ ខែវិច្ឆិកា ឆ្នាំ២០១៦។ លោក Bill Workinger នៃ VOA ថតរូបព្រះចន្ទនេះនៅចម្ងាយបីម៉ាយ (៤,៨២ គីឡូម៉ែត្រ) នៅក្រុង Arlington រដ្ឋ Virginia។
បុរសម្នាក់កាន់លុយដែលខ្លួនរកបានពីការលក់របស់របរច្នៃឡើងវិញ ដែលនៅសេសសល់ពីផ្ទះរងការខូចខាតដោយអគ្គីភ័យនៅសង្កាត់ Addition Hills ក្នុងតំបន់ Mandaluyong ក្រុងម៉ានីល ប្រទេសហ្វីលីពីន។
សត្វឆ្មារបស់លោក Julian Assange អង្គុយនៅមាត់បង្អួចនៃស្ថានទូតប្រទេសអេក្វាឌ័រ ស្របពេលដែលព្រះរាជអាជ្ញាលោក Ingrid Isgren ពីប្រទេសស៊ុយអែតជួបសម្ភាសន៍ជាមួយលោក Assange ក្នុងក្រុងឡុងដ៍ ប្រទេសអង់គ្លេស។
កុមារីមូស្លីមដើរកាត់វិហារ Pattani ខណៈពេលរង់ចាំការយាងមកដល់របស់រជ្ជទាយាទថៃព្រះបាទ Maha Vajiralongkorn អំឡុងពេលដំណើរព្រះរាជទស្សនកិច្ចនៅខេត្ត Narathiwat ភាគខាងត្បូងប្រទេសថៃ។
ស្រ្តីម្នាក់ឱបកូន ខណៈពេលធ្វើដំណើរឆ្លងកាត់ពីផ្នែកនៃក្រុង Mosul ដែលគ្រប់គ្រងដោយពួកសកម្មប្រយុទ្ធរដ្ឋឥស្លាមចូលទៅក្នុងតំបន់មួយទៀតនៃក្រុងនេះ ដែលគ្រប់គ្រងដោយកងទាហានពិសេសអ៊ីរ៉ាក់។
អ្នកនេសាទម្នាក់លើកត្រីច្រមុះស្រួច(sailfish) តម្រង់ទៅផ្សារក្នុងក្រុង Aden បន្ទាប់ពីចាប់ត្រីនោះបាននៅក្រុងកំពង់ផែ ភាគខាងត្បូងប្រទេសយេម៉ែន។
ក្រុមសកម្មជនដុតភ្លើងពណ៌អំឡុងពេលបាតុកម្មប្រឆាំងនឹងការពន្យាបន្ថែមនៃការគ្រប់គ្រងដោយកងសមត្ថកិច្ច នៅក្រុងកៀវ ប្រទេសអ៊ុយក្រែន។
រដ្ឋមន្រ្តីការបរទេសអាមេរិកលោក John Kerry និងរដ្ឋមន្រ្តីការបរទេសអូម៉ង់លោក Yusuf bin Alawi សម្លឹងមើលភូគោលកំពុងវិលមួយនៅក្រសួងការបរទេសក្នុងក្រុងមូស្កាត់ ប្រទេសអូម៉ង់។
ប្រជាពលរដ្ឋណូវែលសេឡង់មើលទៅការខូចខាតបង្កឡើងដោយគ្រោះរញ្ជួយដី តាមបណ្តោយផ្លូវជាតិ State Highway One ជិតក្រុង Ward ភាគខាងត្បូងក្រុង Blenheim នៅកោះ South Island។
មេបក្សប្រឆាំងលោក Yuriy Boyko (ខាងឆ្វេង) និងមេដឹកនាំគណបក្សរ៉ាឌីកាល់លោក Oleh Lyashko ប្រតាយប្រតប់គ្នាអំឡុងពេលជំនួបមេដឹកនាំគណបក្សនានាក្នុងក្រុងកៀវ ប្រទេសអ៊ុយក្រែន។
មនុស្សម្នាបង្ហោះចង្គៀងគោមអំឡុងពេលពិធីបុណ្យ Yee Peng នៅក្រុង Chiang Mai ភាគខាងជើងប្រទេសថៃ។
បុរសម្នាក់ធាក់កង់កាត់បដាដែលមានសរសេរឈ្មោះប្រធានាធិបតីជាប់ឆ្នោតអាមេរិកលោក Donald Trump នៅក្រុង Tel Aviv ប្រទេសអ៊ីស្រាអែល។