ភ្នំពេញ៖ រដ្ឋាភិបាលបានទទួលយកអនុសាសន៍ភាគច្រើនរបស់អង្គការសង្គមស៊ីវិលសម្រាប់ដាក់បញ្ចូលនៅក្នុងសេចក្តីព្រាងច្បាប់សមាគម និង អង្គការមិនមែនរដ្ឋាភិបាល។ អង្គការមិនមែនរដ្ឋាភិបាលបានព្រួយបារម្ភអំពីការគំរាមកំហែងដល់សិទ្ធិសេរីភាពរបស់ពួកគេនៅក្នុងប្រតិបត្តិការនៅកម្ពុជា។ ប៉ុន្តែ ឥឡូវនេះ អង្គការសង្គមស៊ីវិលបានហៅការទទួលយកការទាមទាររបស់ពួកគេថាជាជំហានល្អឆ្ពោះទៅមុខនិងបង្ហាញពីសុឆន្ទៈទាំងរដ្ឋាភិបាលនិងទាំងអង្គការមិនមែនរដ្ឋាភិបាល។
អនុសាសន៍ទាំងនោះរួមមានការទាមទារឱ្យមានការកែប្រែមាត្រាចំនួន២១នៅក្នុងច្បាប់សមាគមនិងអង្គការមិនមែនរដ្ឋាភិបាលដើម្បីបញ្ចៀសផលអវិជ្ជមានដល់ការអភិវឌ្ឍកម្ពុជា។
អង្គការមិនមែនរដ្ឋាភិបាលបានព្រួយបារម្ភអំពីការគំរាមគំហែងដល់សកម្មភាពការងារ ការរឹតបន្តឹងសេរី ភាព និងសិទ្ធិបុគ្គល និងលក្ខខណ្ឌមួយចំនួនទៀត ខណៈដែលអង្គការសង្គមស៊ីវិលមិនធ្វើតាមការណែ នាំរបស់រដ្ឋាភិបាលនោះ។
លោកនុត សាអាន រដ្ឋលេខាធិការក្រសួងមហាផ្ទៃបានជួបពិភាក្សាជាមួយតំណាងអង្គការមិនមែនរដ្ឋា ភិបាល កាលពីសប្តាហ៍មុនដើម្បីបញ្ជាក់ពីការទទួលយកអនុសាសន៍របស់អង្គការសង្គមស៊ីវិលសម្រាប់ដាក់បញ្ចូលនៅក្នុងសេចក្តីព្រាងច្បាប់។
លោកស៊ិន សុមុន្នី នាយកប្រតិបត្តិនៃអង្គការ Medicam បានបញ្ជាក់ថាក្រសួងមហាផ្ទៃយល់ព្រមមិន រាប់បញ្ចូលអង្គការឬក្រុមសហគមន៍តូចៗនៅតាមតំបន់ជនបទនៅក្នុងច្បាប់សមាគមនិងអង្គការមិន មែនរដ្ឋាភិបាលនេះទេ។
លោកស៊ិន សុមុន្នី បានបន្ថែមថាក្រសួងមហាផ្ទៃបានយល់ព្រមផ្លាស់ប្តូរការតម្រូវឱ្យមានសមាជិកស្ថាបនិកពីចំនួន២១ នាក់ចុះមកនៅត្រឹមចំនួន១១នាក់វិញ និងថ្នាក់ដឹកនាំពីចំនួន៧នាក់ចុះមកនៅត្រឹម៥នាក់វិញសម្រាប់លក្ខខណ្ឌនៃការបង្កើតសមាគម។
លោកស៊ិន សុមុន្នី បានបន្តថាអង្គការមិនមែនរដ្ឋាភិបាលមិនចាំបាច់រាយការណ៍ទៅក្រសួងមហាផ្ទៃអំពីការផ្លាស់ប្តូរឬបណ្តេញបុគ្គលិកទេលើកលែងតែការផ្លាស់ប្តូរប្រធានអង្គការហើយបានយល់ព្រមឱ្យអង្គការសង្គមស៊ីវិលផ្ញើរបាយការណ៍ប្រចាំឆ្នាំទៅក្រសួងមហាផ្ទៃរហូតដល់ចុងខែមិនានៃឆ្នាំ។
លោកស៊ិន សុមុន្នី បានបន្ថែមថាក្រសួងមហាផ្ទៃបានយល់ព្រមឱ្យអាជ្ញាធរសវនកម្មជាតិអាចធ្វើសវន កម្មលើអង្គការមិនមែនរដ្ឋាភិបាលបាននៅពេលដែលអង្គការនោះមានភាពមិនប្រក្រតី។
លោកស៊ិន សុមុន្នី បានថ្លែងថានៅមានភាពមិនច្បាស់លាស់ចំពោះអង្គការមិនមែនរដ្ឋាភិបាលក្នុងស្រុកថាមិនអាចចងសម្ព័ន្ធជាមួយអង្គការមិនមែនរដ្ឋាភិបាលបរទេស។
«បើសេចក្តីព្រាងច្បាប់នេះសម្រេចបែបនេះមែនមានការប៉ះពាល់ដល់ការអភិវឌ្ឍដោយផ្ទាល់។ អង្គការ អន្តរជាតិជួយអង្គការក្នុងស្រុកច្រើនទាំងថវិកា ការកសាងសមត្ថភាព និងធនធានមនុស្សផ្លាស់ប្តូរនូវ បច្ចេកទេសជាមួយគ្នា ជួយត្រួតពិនិត្យតាមដានអំពីការអនុវត្តសកម្មភាព ដើម្បីឱ្យមានប្រសិទ្ធភាពក្នុង ការចំណាយថវិកាសម្រាប់ចូលរួមការអភិវឌ្ឍជាដើម»។
ក្នុងន័យនេះ អង្គការមិនមែនរដ្ឋាភិបាលក្នុងស្រុក និងអន្តរជាតិទាំងអស់មានការព្រួយបារម្ភយ៉ាងខ្លាំង អំពីផលវិបាកដែលអាចនឹងកើតមានឡើង នៅពេលដែលច្បាប់នេះត្រូវបានអនុម័ត និងចូលជាធរមាន ប្រសិនបើគ្មានការកែប្រែនោះទេ។
លោកឈិត សំអាត នាយកប្រតិបត្តិនៃវេទិកានៃអង្គការមិនមែនរដ្ឋាភិបាលស្តីពីកម្ពុជាបានថ្លែងថា អង្គការសង្គមស៊ីវិលត្រូវការចងសម្ព័ន្ធភាពរវាងអង្គការបរទេសនិងអង្គការក្នុងស្រុកដើម្បីធានាថាអង្គការសង្គមស៊ីវិលនិយាយនៅក្នុងសំឡេងតែមួយសម្រាប់បង្កភាពងាយស្រួលដល់រដ្ឋាភិបាលក្នុងការអភិវឌ្ឍ។
«បើសិនជាមិនមានការកែប្រែ វាជាកង្វល់មួយដែរ។ អញ្ចឹងទេ យើងទាមទារឱ្យមាននិយមន័យនៃ សម្ព័ន្ធអង្គការក្នុងស្រុក និងអង្គការអន្តរជាតិឱ្យបានច្បាស់លាស់ ដើម្បីឱ្យមានលទ្ធភាពក្នុងការបន្តធ្វើ ការតទៅមុខទៀត ដើម្បីជួយប្រទេសជាតិយើង និងជួយរដ្ឋាភិបាល»។
លោកនុត សាអាន រដ្ឋលេខាធិការក្រសួងមហាផ្ទៃ បានថ្លែងថាក្រសួងមហាផ្ទៃ និងក្រសួងការបរទេស នឹងធ្វើការពិភាក្សាគ្នាលើបញ្ហានេះបន្ថែមទៀត។
លោកស៊ិន សុមុន្នី នាយកប្រតិបត្តិនៃអង្គការ Medicam បានបញ្ជាក់ថាអង្គការមិនមែនរដ្ឋាភិបាលបាន កោតសរសើររដ្ឋាភិបាល ចំពោះការអនុញ្ញាតឱ្យអង្គការមិនមែនរដ្ឋាភិបាលពិភាក្សាក្នុងកម្រិតបច្ចេក ទេស និងផ្តល់អនុសាសន៍ទៅលើចំណុចសំខាន់ៗរបស់សេចក្តីព្រាងច្បាប់។
«ខ្ញុំថាវាជាជំហានល្អឆ្ពោះទៅមុខ ដោយសារគាត់ (រដ្ឋាភិបាល) ទទួលយកនូវអនុសាសន៍របស់អង្គការ មិនមែនរដ្ឋាភិបាល ហើយដែលបង្ហាញពីសុឆន្ទៈទាំងរដ្ឋាភិបាល និងទាំងអង្គការមិនមែនរដ្ឋាភិបាល។ អញ្ចឹង យើងសង្ឃឹមថាសេចក្តីព្រាងច្បាប់ស្តីពីសមាគមនិងអង្គការមិនមែនរដ្ឋាភិបាលទីពីរនឹងឆ្លុះ បញ្ចាំងចេញអំពីអ្វីដែលតំណាងអង្គការមិនមែនរដ្ឋាភិបាលជាមួយនឹងតំណាងរបស់រាជរដ្ឋាភិបាល ដែលបានជជែកគ្នានោះ»។
រដ្ឋាភិបាលនិងអង្គការមិនមែនរដ្ឋាភិបាលបានពិភាក្សាសេចក្តីព្រាងច្បាប់សមាគម និងអង្គការមិនមែន រដ្ឋាភិបាលយ៉ាងតឹងតែងកាលពីថ្ងៃទី១០ ខែមករាកន្លងមក៕