កម្ចី​ពី​គ្រឹះស្ថាន​មីក្រូ​ហិរញ្ញ​វត្ថុ​នាំឲ្យ​កសិករ​បាត់បង់​ផ្ទះ​សម្បែង​ ដី​ និង​ត្រូវចំណាក​ស្រុក​

អង្គការ​​​សិទ្ធិ​មនុស្ស​​​ពីរ​​​ក្នុង​​​ស្រុក​​​បាន​​​រក​​​ឃើញ​​​ថា​​​ គ្រឹះស្ថាន​មីក្រូ​ហិរញ្ញ​វត្ថុ​​​មួយ​​​ចំនួន​​​បាន​​​ធ្វើ​​​ឲ្យ​​​ប្រជា​ពលរដ្ឋ​​​ធ្លាក់​​​ក្នុង​​​ការ​​​ជំពាក់​​​បំណុល​​​ ដែល​​​នាំ​​​ឲ្យ​​​ប្រជាពលរដ្ឋ​​​ខ្លះ​​​ត្រូវ​បង្ខំ​​​ចិត្ត​​​លក់​​​ដី​​ ​ខ្លះ​​​ទៀត​​​ចាក​ចេញ​​​ពី​​​ស្រុក​​​ភូមិ​​​ទៅ​​​ធ្វើ​​​ការ​​​នៅ​​​ថៃ និង​​​ខ្លះ​​​ទៀ​ត​ឲ្យ​​​កុមារ​ធ្វើការ​​​ដើម្បី​​​ជួយ​​​រក​​​ប្រាក់​​​ដោះ​​​បំណុល។​ អ្នក​​​ជំនាញ​​​ព្រមាន​​​ថា ​​​ប្រសិន​​​បើ​​​គ្រឹះស្ថាន​មីក្រូ​ហិរញ្ញវត្ថុ​​​ទាំង​នេះ​​​បន្ត​​​ផ្តល់​​​កម្ចី​​​ដោយ​​​មិន​​​បាន​​​សិក្សា​​​ពី​​​លទ្ធភាព​​​នៃ​​​ការ​​​សង​បំណុល​​​របស់​​​ប្រជា​ពលរដ្ឋ​​​ វិស័យ​​​មីក្រូ​​​ហិរញ្ញវត្ថុ​​​អាច​​​នឹង​​​ត្រូវ​​​ដួល​រលំ៕ ​​