អត្រាឆ្លងរាលដាលមេរោគកូរ៉ូណាថ្មីនៅប្រទេសអ៊ីតាលីបានថយចុះកាលពីថ្ងៃព្រហស្បតិ៍សប្ដាហ៍មុនដែលជាថ្ងៃទី ៤ នៃការថយចុះនេះ។ ការណ៍នេះធ្វើឲ្យមនុស្សម្នាជាច្រើនសង្ឃឹមថា ការបិទទីក្រុងឲ្យប្រជាជនស្នាក់នៅក្នុងផ្ទះរយៈពេលយូរកំពុងតែផ្ដល់លទ្ធផលល្អ ដូចអ្វីដែលប្រជាជនបន់ស្រន់ចង់បាន។
ទោះបីជាយ៉ាងនេះក្ដី ក្រុមអាជ្ញាធរមានការប្រុងប្រយ័ត្ន ដោយបានស្នើប្រជាពលរដ្ឋអ៊ីតាលីកុំឲ្យធ្វេសប្រហែស និងឲ្យបន្តគោរពច្បាប់។
អ្នកជំងឺ COVID-19 ម្នាក់ដែលបានសម្រាកព្យាបាលនៅមន្ទីរពេទ្យបានរៀបរាប់អំពីបទពិសោធន៍ផ្ទាល់ខ្លួនរបស់លោក។ លោក Fausto Rossi អាយុ ៣៨ ឆ្នាំ ដំបូងចាប់ផ្ដើមមានអាការៈក្ដៅខ្លួនកាលពីថ្ងៃទី ៥ ខែមីនា ហើយ ៤ ថ្ងៃក្រោយមក លោកត្រូវបានគេបញ្ចូនទៅមន្ទីរពេទ្យ Santa Maria Goretti នៅក្នុងទីក្រុង Latina ដែលជាកន្លែងដែលលោកត្រូវបានគេពិនិត្យឃើញថាបានឆ្លងមេរោគកូរ៉ូណាថ្មី។
លោកបាននិយាយថា៖ «បញ្ហានៃមេរោគនេះ គឺនៅពេលដែលវាចូលទៅក្នុងសួតរបស់អ្នក ព្រោះវាវាយលុកសួតយ៉ាងខ្លាំង និងបណ្ដាលឲ្យមានជំងឺរលាកសួតធ្ងន់ធ្ងរ ជាមួយនឹងភាគរយនៃបាត់បង់ជីវិតខ្ពស់»។ លោកក៏បានសង្កត់ធ្ងន់ថា ជំងឺរលោកសួតនេះមានគ្រោះថ្នាក់ខ្លាំងណាស់។
លោកបានថ្លែងដូច្នេះថា៖ «វាសាហាវណាស់ ហើយអត្រាបាត់បង់ជីវិតក៏ខ្ពស់ដែរ»។ លោកបន្ថែមថា បើសិនជាលោកឆ្លងជំងឺនេះនៅពេលដែលលោកកំពុងមានជំងឺផ្សេងទៀត ឬមានអាយុច្រើន លោកប្រហែលជាមិនរស់មកដល់ពេលនេះនោះទេ។ លោកថា៖ «វាពិតជាវេទនាណាស់ ដែលមិនអាចដកដង្ហើមបាន»។
លោក Rossi កំពុងសម្រាកព្យាបាលនៅក្នុងមន្ទីរពេទ្យនៅឡើយ ប៉ុន្តែត្រូវបានគេបញ្ជូនចេញពីកន្លែងព្យាបាលដិតដល់ និងសង្ឃឹមថានឹងបានត្រឡប់ទៅផ្ទះជួបជុំគ្រួសាររបស់លោកវិញក្នុងពេលឆាប់ៗនេះ។ លោកបាននិយាយថា មនុស្សគ្រប់គ្នានៅក្នុងប្រទេសអ៊ីតាលី បានមើលស្រាលមេរោគនេះ។ លោកបញ្ជាក់ថា លោកសង្ឃឹមថា ការឆ្លងមេរោគរាតត្បាតនេះនឹងបញ្ចប់ក្នុងពេលឆាប់ៗ ដូច្នេះមនុស្សគ្រប់គ្នាអាចត្រឡប់ទៅរស់នៅតាមជីវភាពប្រចាំថ្ងៃដូចមុនវិញបាន។
លោកបានផ្ដល់ដំបូន្មានដូច្នេះថា៖ «ប្រជាពលរដ្ឋត្រូវតែគោរពតាមវិធានការណ៍តឹងរ៉ឹងដែលអាជ្ញាធរបានកំណត់ ដូចជាការចេញពីផ្ទះ តែពេលណាចាំបាច់បំផុត។ ពួកគេត្រូវតែស្នាក់នៅក្នុងផ្ទះ និងជៀសវាងការប្រាស្រ័យទាក់ទងជាមួយអ្នកដទៃ ព្រោះថា «មេរោគនេះអាចមាននៅក្នុងខ្លួនអ្នកជំងឺ ប៉ុន្តែមិនបង្ហាញរោគសញ្ញាណាមួយ ដូច្នេះមនុស្សគ្រប់គ្នាអាចផ្ទុកមេរោគនេះ»។
លោក Rossi សម្ដែងការដឹងគុណដល់ក្រុមគ្រូពេទ្យដែលបានថែទាំ និងព្យាបាលលោក។
លោក Rossi បានបញ្ជាក់ដូច្នេះថា៖ «ខ្ញុំសូមថ្លែងអំណរគុណដល់ក្រុមគ្រូពេទ្យ និងគិលានុបដ្ឋាយិកាទាំងអស់ក្នុងផ្នែកជំងឺឆ្លងប្រចាំមន្ទីរពេទ្យ។ អ្នកទាំងនោះគឺជាវីរបុរសពិតនៅក្នុងសមរភូមិនេះ។ រាល់ថ្ងៃពួកគាត់ធ្វើការក្នុងស្ថានភាពយ៉ាប់យ៉ឺន រងសំពាធផ្លូវចិត្ត និងមានអារម្មណ៍ភ័យខ្លាចជាប់ជានិច្ចខ្លាចឆ្លងមេរោគកូរ៉ូណាថ្មីនេះ និងខ្លាចមិនបានត្រឡប់ទៅផ្ទះជួបជុំគ្រួសារ។
អ្នកជំងឺ COVID-19 ជនជាតិអ៊ីតាលីរូបនេះ និយាយថា លោកបានចំណាយពេលនៅក្នុងមន្ទីរពេទ្យយ៉ាងឯកោ ដោយគ្មានសមាជិកគ្រួសារនៅក្បែរ ឬគាំទ្រលើកទឹកចិត្តឡើយ។ លោកបាននិយាយថា បទពិសោធន៍នេះបានផ្លាស់ប្ដូរជីវិតលោក និងបានបង្រៀនលោកឲ្យចេះឲ្យតម្លៃរឿងតូចតាចដូចជា «ការរស់នៅ ការដកដង្ហើម ការដើរ ការឱប ស្រាមួយកែវ និងសេរីភាព» ដែលលោកមិនសូវយកចិត្តទុកដាក់កាលពីមុន៕