រូបភាពជុំវិញពិភពលោក ៣០ មិថុនា ២០១៧
ប៉ូលិសបោសសម្អាតរបាំងភ្លើងដែលកំពុងឆេះនៅលើមហាវិថីមួយទៅកាន់ក្រុង Brasilia ប្រទេសប្រេស៊ីល។ សហជីពនានាដែលតំណាងឲ្យកម្មករផ្នែកដឹកជញ្ជូន និងកម្មករដទៃទៀតតវ៉ាឲ្យលុបចោលសំណើដែលដាក់ទៅសភាដើម្បីបន្ធូរបន្ថយបញ្ញត្តិការងារ និងកាត់បន្ថយអត្ថប្រយោជន៍សោធននិវត្តន៍នៅក្នុងប្រទេសដ៏ធំមួយក្នុងតំបន់អាមេរិកឡាទីន។
យុវជនអ៊ីរ៉ាក់ម្នាក់បីក្មេងនៅពេលជម្លៀសចេញពីក្រុង Mosul នៅពេលដែលកងកម្លាំងរដ្ឋាភិបាលបន្តវាយប្រយុទ្ធដើម្បីដណ្តើមយកក្រុងនេះពីយុទ្ធជនរដ្ឋឥស្លាមមកវិញ។
នំអាពាហ៍ពិពាហ៍ដែលមានពណ៌ឥន្ទធនូ និងតុបតែងជាមួយនឹងរូបស្ត្រីពីរនាក់ និងបុរសពីរនាក់នៅក្នុងក្រុងបែរឡាំង។ សភាអាល្លឺម៉ង់សម្រេចផ្តល់ភាពស្របច្បាប់ដល់អាពាហ៍ពិពាហ៍នៃមនុស្សភេទដូចគ្នា ប៉ុន្មានថ្ងៃបន្ទាប់ពីលោកស្រីអធិការបតី Angela Merkel បាននិយាយថា លោកស្រីនឹងអនុញ្ញាតឲ្យតំណាងរាស្ត្ររបស់លោកស្រីបោះឆ្នោតតាមការយល់ឃើញរបស់ពួកគេ។
អ្នកជួយសង្គ្រោះ និងអ្នកស្រុកស្មឹងស្មាត នៅពេលពួកគេចូលរួមក្នុងកម្មវិធីកាន់ទុក្ខជាសាធារណៈសម្រាប់ជនរងគ្រោះនៃការបាក់ដីនៅក្នុងភូមិ Xinmo ខេត្ត Sichuan ប្រទេសចិន។
សមាជិកនៃសហភាពសហព័ន្ធពាណិជ្ជកម្មកូរ៉េបោះមួករបស់ពួកគេទៅលើអាកាស ក្នុងពេលប្រមូលផ្តុំមួយមួយប្រឆាំងនឹងគោលនយោបាយការងាររបស់រដ្ឋាភិបាលក្នុងក្រុងសេអ៊ូល ប្រទេសកូរ៉េខាងត្បូង។ ពលកររាប់ពាននាក់បានប្រមូលផ្តុំគ្នាដើម្បីទាមទារឲ្យមានស្ថានភាពការងារល្អជាងមុន និងជំរុញឲ្យក្រុមហ៊ុនបញ្ឈប់ការប្រើប្រាស់និយោជិតបណ្តោះអាសន្ន។
ក្មេងប្រុសម្នាក់លោតចូលទៅក្នុងសមុទ្រខ្មៅពីផែមួយនៅក្នុងក្រុង Sochi ប្រទេសរុស្ស៊ី។
សមាជិកនៃក្រុមប្រណាំងកង់ BMC Racing របស់អាមេរិកជិះកង់ក្នុងពេលហ្វឹកហាត់មួយនៅក្នុងក្រុង Dusseldorf ប្រទេសអាល្លឺម៉ង់ មួយថ្ងៃមុនចាប់ផ្តើមការប្រណាំងកង់ Tour de France លើកទី១០៤។ ការប្រណាំងកង់នេះចាប់ផ្តើមនៅថ្ងៃទី១ ខែកក្កដា នៅលើផ្លូវនានានៃក្រុង Dusseldorf និងបញ្ចប់នៅថ្ងៃទី២៣ ខែកក្កដា ឆ្នាំ២០១៧ ក្នុងក្រុងប៉ារីស។
អ្នកសម្តែងរាំក្នុងកម្មវិធីមួយ ដោយមានការអញ្ជើញចូលរួមដោយលោកប្រធានាធិបតី Xi Jinping ក្នុងក្រុងហុងកុង។ លោកប្រធានាធិបតី Xi Jinping បានសរសើរក្រុងហុងកុងចំពោះតួនាទីរបស់ខ្លួនក្នុងការអភិវឌ្ឍសេដ្ឋកិច្ចចិន។
ក្មេងស្រីម្នាក់រាំនៅពីមុខកញ្ចក់មួយ ក្នុងក្រុង Milan ប្រទេសអ៊ីតាលី។
រូបភាពដែលចេញផ្សាយដោយអង្គការណាសាកាលពីថ្ងៃសុក្របង្ហាញរូបភាពមួយដែលថតបានដោយម៉ាស៊ីន JunoCam នៅលើយន្តអវកាស Juno របស់ណាសាកាលពីថ្ងៃទី១៩ ខែឧសភា ឆ្នាំ២០១៧។
អ្នកបង្ហាញម៉ូដម្នាក់ដើរនៅលើផ្លូវដើរក្នុងកម្មវិធីបង្ហាញម៉ូដ Red Point Spring/Summer 2017-2018 នៅក្នុងក្រុង Barcelona ប្រទេសអេស្ប៉ាញ។
អ្នកជិះក្តារលើទឹកដើរចូលទៅក្នុងទឹកនៅឆ្នេរ Punta Roca ក្នុងក្រុង La Libertad ប្រទេសអែលសាល់វ៉ាឌ័រ។