ក្រុមសង្គមស៊ីវិល និងប្រជាពលរដ្ឋជាង៣០០នាក់នៅថ្ងៃអាទិត្យនេះប្រារព្ធទិវានារីអន្តរជាតិលើកទី១០៩ដោយមានការកំណត់ទំហំទីធ្លាសម្រាប់ ប្រារព្ធពិធីត្រឹម៤ម៉ែត្រគុណ៦ម៉ែត្រ ព្រមទាំងមានការឃ្លាំមើលពីសមត្ថកិច្ច។
នៅថ្ងៃទី៨ ខែមីនា នេះ ក្រុមសង្គមស៊ីវិលចំនួន១៧បានប្រារព្ធទិវានារីអន្តរជាតិ នៅសួនប្រជាធិបតេយ្យ រាជធានីភ្នំពេញ ដោយមានការឃ្លាំមើលពីសមត្ថកិច្ចមួយចំនួន ទាំងស្លៀកពាក់ឯកសណ្ឋាន និងស៊ីវិល។ ក្នុងពិធីនោះមានការថ្លែងពីប្រវត្តិនារីអន្តរជាតិ ការច្រៀងចម្រៀងដែលរៀបរាប់អំពីសិទ្ធិ ការសម្តែងរឿងពាក់ព័ន្ធនឹងបញ្ហាស្រ្តី ព្រមទាំងការបង្ហាញម៉ូតអំពីការទាមទារសិទ្ធិជាដើម។
អ្នកស្រីចក់សុភាព នាយិកាប្រតិបត្តិមជ្ឈមណ្ឌលសិទ្ធិមនុស្សកម្ពុជា (CCHR) ប្រាប់ VOA ថា ក្រុមសង្គមស៊ីវិលទាំង១៧បានស្នើទៅសាលារាជធានីភ្នំពេញដើម្បីប្រារព្ធទិវានារីអន្តរជាតិ សម្រាប់ការចូលរួមមនុស្សចំនួន៥៥០នាក់និងសង់រោងសម្រាប់ ប្រារព្ធពិធីទំហំ២០ម៉ែត្រគុណ២០ម៉ែត្រលើសួនប្រជាធិបតេយ្យ។ អ្នកស្រីបន្តថា សាលារាជធានីបានអនុញ្ញាតឲ្យក្រុមសង្គមស៊ីវិលរៀបចំ ប៉ុន្តែកំណត់ចំនួនមនុស្សចូលរួមត្រឹម២០០នាក់ និងសង់រោងទំហំត្រឹម៤ម៉ែត្រគុណ៦ម៉ែត្រប៉ុណ្ណោះ។
អ្នកស្រី ចក់ សុភាព ថ្លែងថា៖ «នៅពេលដែលរដ្ឋាភិបាលគាត់មិនយល់ទាស់ចំពោះការរៀបចំនេះ គាត់ក៏គួរតែផ្តល់នូវភាពអំណោយផលសម្រាប់សង្គមស៊ីវិលក្នុងការរៀបចំឲ្យបានសមរម្យ។ ហើយយើងឃើញថាអ្នកចូលរួមថ្ងៃនេះមួយចំនួនហ្នឹងគាត់ត្រូវអង្គុយ ឬឈរហាលថ្ងៃ»។
ប្រជាពលរដ្ឋ តំណាងសហគមន៍ សហជីព កម្មករ និងតំណាងអង្គការសង្គមស៊ីវិល ចូលរួមប្រារព្ធទិវាសិទ្ធិនារីអន្តរជាតិលើកទី១០៩ នៅសួនប្រជាធិបតេយ្យ នាថ្ងៃទី៨ ខែមីនា ឆ្នាំ២០២០។ (កាន់ វិច្ឆិកា/VOA)
អ្នកស្រី ចង់ សុភាព ថ្លែងបន្ថែមថា ការកម្រិតចំនួនមនុស្សនិងទីធ្លាសម្រាប់អ្នកចូលរួមបែបនេះ ជាការបង្ហាញអំពីកង្វះខាតការសហការពីអាជ្ញាធរ និងធ្វើឲ្យការប្រារព្ធទិវាសិទ្ធិនារីនេះប្រព្រឹត្តទៅដោយមិនពេញលេញ។
អ្នកស្រី ចក់ សុភាព ថ្លែងទៀតថា៖ «ថ្ងៃនេះជាទិវាសិទ្ធិនារី ប៉ុន្តែសូម្បីតែយើងរៀបចំទិវាសិទ្ធិនារីមួយឲ្យបានសមរម្យ យើងដឹងហើយសង្គមយើងមួយរយៈគឺយើងនាំគ្នាលើកថាឲ្យគុណតម្លៃស្រ្តី អញ្ចឹងតើគុណតម្លៃស្រ្តីនៅត្រង់ណាបើសិនគ្រាន់តែយើងរៀបចំដើម្បីប្រារព្ធទិវាសិទ្ធិនារីនេះមិនបានផង»។
អ្នកស្រី ចក់ សុភាព បន្ថែមថា ការអនុញ្ញាតឲ្យប្រជាពលរដ្ឋចូលរួមប្រារព្ធនូវទិវានារីអន្តរជាតិនេះដោយសេរីនិងមានចំនួនច្រើន នោះនឹងធ្វើឲ្យប្រជាពលរដ្ឋបានដឹងកាន់តែច្បាស់អំពីសិទ្ធិនិងផ្នត់គំនិតអំពីស្រ្តី។
អ្នកស្រី ឡាយ ស្រីម៉េត ពលរដ្ឋម្នាក់ដែលចូលរួមក្នុងការប្រារព្ធទិវាសិទ្ធិនារីអន្តរជាតិនៅព្រឹកថ្ងៃអាទិត្យនេះលើកឡើងថា ការចូលរួមដើម្បីប្រារព្ធទិវានេះ អាចឲ្យប្រជាពលរដ្ឋយល់ដឹងអំពីសិទ្ធិនិងបង្ហាញអំពីបញ្ហាដែលស្រ្តីកំពុងប្រឈម។ ស្រ្តីវ័យ៣៥ឆ្នាំរូបនេះបន្ថែមថា អ្នកស្រីត្រូវបានឪពុកម្តាយឈប់ឲ្យទៅរៀនត្រឹមថ្នាក់ទីពីរដើម្បីជួយធ្វើការងារផ្ទះទៅតាមផ្នត់គំនិតរបស់មនុស្សចាស់។ អ្នកស្រីថា ការណ៍នេះជាហេតុធ្វើឲ្យអ្នកស្រីមិនមានការងារល្អធ្វើ។
អ្នកស្រី ឡាយ ស្រីម៉េត បាននិយាយយ៉ាងដូច្នេះថា៖ «ខ្ញុំប្តេជ្ញាចិត្តឲ្យកូនខ្ញុំរៀនឲ្យបានខ្ពស់ ដើម្បីកុំឲ្យដូចខ្ញុំរៀនបានថ្នាក់ទាប ដោយសារផ្នត់គំនិតស្រ្តីបង្វិលចង្ក្រានមិនជុំ»។
VOA មិនអាចទាក់ទងសុំការអត្ថាធិប្បាយពីលោក ម៉េតមាសភក្តី អ្នកនាំពាក្យសាលារាជធានីភ្នំពេញបានទេ។
ទិវានារីអន្តរជាតិប្រារព្ធឡើងនៅថ្ងៃទី៨ ខែមីនា ជារៀងរាល់ឆ្នាំ។ ទិវានេះចាប់ផ្ដើមដំបូងនៅឆ្នាំ ១៩០៨ នៅពេលដែលកម្មករកាត់ដេរជាស្ត្រីប្រហែល១ម៉ឺន៥ពាន់នាក់ ធ្វើកូដកម្មដើរតាមដងផ្លូវនានានៅក្នុងទីក្រុង New York សហរដ្ឋអាមេរិក ដើម្បីទាមទារឲ្យមានម៉ោងធ្វើការតិច ប្រាក់ខែប្រសើរជាងមុន និងសិទ្ធិបោះឆ្នោត។
អង្គការសហប្រជាជាតិបានទទួលស្គាល់ទិវានារីអន្តរជាតិនេះជាផ្លូវការលើកដំបូងបង្អស់ នៅក្នុងឆ្នាំ ១៩៧៥។ នៅក្នុងឆ្នាំ ២០១១ អតីតប្រធានាធិបតីអាមេរិកលោក Barack Obama ឈានមួយជំហានបន្ថែមពីនេះទៀត ដោយប្រកាសទទួលស្គាល់ខែមិនាថាជាខែប្រវត្តិសាស្ត្ររបស់ស្ត្រី៕