វីដេអូខ្លី៖ កោះ Christmas Island នៅអូស្រ្តាលីប្រែជាពណ៌ក្រហមឆ្អៅ ខណៈក្តាមក្រហមបម្លាស់ទី
Your browser doesn’t support HTML5
ផ្លូវនានានៅលើកោះ Christmas Island នៅអូស្រ្តាលី ត្រូវបានបិទ ខណៈដែលក្តាមពណ៌ក្រហមដូចអណ្តាតភ្លើង (red flame crabs) រាប់ពាន់ក្បាល បានវារចេញពីព្រៃនៅលើកោះនៅក្បែរឆ្នេរសមុទ្រភាគខាងលិចនៃប្រទេសអូស្ត្រាលី ដើម្បីធ្វើការបម្លាស់ទីប្រចាំឆ្នាំរបស់ពួកវាទៅកាន់មហាសមុទ្រ។ យោងតាមទីភ្នាក់ឧទ្យានជាតិអូស្រ្តាលី Parks Australia បានឲ្យដឹងថា ការបម្លាស់ទីប្រចាំឆ្នាំរបស់ក្តាមទាំងនេះ ចាប់ផ្តើមនៅពេលមានទឹកភ្លៀងដំបូងនៃរដូវភ្លៀងធ្លាក់ ដែលជាធម្មតាគឺនៅខែតុលា ឬខែវិច្ឆិកា ប៉ុន្តែជួនកាលអាចដល់ចុងខែធ្នូ ឬដើមខែមករា។ ក្តាមក្រហមបានវារនៅពាសពេញកោះដែលមានចំនួនរហូតដល់រាប់លានក្បាល។ ពួកវា ចាកចេញពីរូងរបស់ពួកវាក្នុងពេលតែមួយ ហើយចាប់ផ្តើមវារឆ្ពោះទៅសមុទ្រដើម្បីរកគូ និងភ្ញាស់ពង ដែលនេះបង្កើតបានជាទស្សនីយភាពមួយដែលមានពណ៌ក្រហមនៅពាសពេញលើកោះ។ បន្ថែមពីលើការបិទផ្លូវ ស្ពានបណ្តោះអាសន្នក៏ត្រូវបានស្ថាបនាឡើងផងដែរ ដើម្បីជួយដល់ការបម្លាស់ទីរបស់ក្តាមទាំងនេះផងដែរ៕