តើរូបិយប័ណ្ណឌីជីថលរបស់ចិនដែលលេចចេញជារូបរាងហើយ នឹងផ្តួលឧត្តមភាពនៃប្រាក់ដុល្លារដែរ ឬទេ?

នៅខែឧសភាខាងមុខនេះ ទីក្រុងចំនួន ៤ នៅក្នុងប្រទេសចិន នឹងចាប់ផ្តើមកម្មវិធីសាកល្បងប្រើប្រាស់រូបិយប័ណ្ណឌីជីថល។ មានសំណួរចោទសួរឡើងថា តើរូបិយប័ណ្ណឌីជីថលរបស់ចិននេះ នឹងផ្តួលឧត្តមភាពនៃប្រាក់ដុល្លារអាមេរិកដែរ ឬ ទេ?

អស់រយៈពេលពីរថ្ងៃជាប់ៗគ្នាកាលពីសប្តាហ៍មុន ចំពេលដែលមានការធ្លាក់ចុះនៃទីផ្សារភាគហ៊ុនដោយសារវីរុសកូរ៉ូណានោះ ភាគហ៊ុននៃក្រុមហ៊ុនមួយចំនួនដែលត្រូវបានជួញដូរក្នុងផ្សារហ៊ុនសំខាន់ៗរបស់ចិន បានផ្លាស់ប្តូរយ៉ាងខ្លាំង រហូតធ្វើឲ្យការធ្វើពាណិជ្ជកម្មត្រូវបានបញ្ឈប់ដោយស្វ័យប្រវត្តិ។ ក៏ប៉ុន្តែ ការផ្អាកធ្វើពាណិជ្ជកម្មពេលនោះ មិនមែនដោយសារតែតម្លៃហ៊ុនបានធ្លាក់ចុះយ៉ាងគំហុកនោះទេ គឺដោយសារតែវាបានឡើងខ្ពស់។

ការកើនតម្លៃយ៉ាងគំហុកភ្លាមៗនៃភាគហ៊ុនដែលទាក់ទងនឹងរូបិយប័ណ្ណឌីជីថល កើតមានឡើងបន្ទាប់ពីមានព័ត៌មានថា បន្ទាប់ពីការទន្ទឹងរង់ចាំអស់រយៈពេលជាច្រើនឆ្នាំ រដ្ឋាភិបាលចិន បានកំណត់ចេញប្រើប្រាស់រូបិយប័ណ្ណឌីជីថលថ្មីរបស់ខ្លួននៅក្នុងទីក្រុងចំនួន ៤។

នៅខែឧសភាខាងមុខនេះ បុគ្គលិករដ្ឋាភិបាលនៅក្នុងទីក្រុងទាំង៤នោះ នឹងប្រើកម្មវិធីស្មាតហ្វូនដើម្បីទទួលបានយ៉ាងហោចណាស់មួយផ្នែកនៃប្រាក់បៀវត្សរ៍របស់ពួកគេក្នុងទម្រង់ជាការទូទាត់បែបប្រាក់ឌីជីថល ដែលនេះជាចំណុចសំខាន់មួយនៅក្នុងការឆ្ពោះទៅរកប្រព័ន្ធរូបិយប័ណ្ណឌីជីថលដំបូងគេបំផុតនៅក្នុងពិភពលោកដោយធនាគារកណ្តាលចិន ដែលជាធនាគារដ៏សំខាន់មួយក្នុងពិភពលោក។

ចំពោះអ្នកជំនាញខ្លះ រូបិយប័ណ្ណឌីជីថលនេះ អាចជាការគំរាមកំហែងយ៉ាងខ្លាំងដល់ធនធានហិរញ្ញវត្ថុរបស់អាមេរិកមួយ ដែលមានឧត្តមភាពគ្មានគូប្រជែងអស់ជាច្រើនទសវត្សរ៍មកហើយនោះ គឺប្រាក់ដុល្លារអាមេរិក។

បុគ្គលិកធនាគារចិនម្នាក់រាប់ក្រដាសប្រាក់ yuan និងប្រាក់ដុល្លារអាមេរិក នៅក្នុងធនាគារមួយ ក្នុងតំបន់ Nantong ខេត្ត Jiangsu ប្រទេសចិន ថ្ងៃទី៦ ខែសីហា ឆ្នាំ២០១៩។

ឧត្តមភាពនៃប្រាក់ដុល្លារ

ប្រាក់ដុល្លារអាមេរិកឈរនៅលំដាប់កំពូលក្នុងសេដ្ឋកិច្ចពិភពលោក។ ជិត ៩០ភាគរយ នៃការធ្វើប្រតិបត្តិការអន្ដរជាតិក្នុងឆ្នាំ ២០១៩ គឺគិតជាប្រាក់ដុល្លារអាមេរិក ហើយប្រមាណជា ៦០ ភាគរយនៃប្រាក់បម្រុងសម្រាប់ការប្តូរប្រាក់បរទេសទាំងអស់នៅលើពិភពលោក គឺគិតជាដុល្លារអាមេរិក បើប្រៀបធៀបទៅនឹងប្រាក់យន់ចិន ដែលមានតែ ប្រមាណជា ២ ភាគរយប៉ុណ្ណោះនៃការទូទាត់ និងប្រាក់បម្រុងជាសាកល។

ឧត្តមភាពនៃប្រាក់ដុល្លារនេះ ផ្តល់អំណាចដល់រដ្ឋាភិបាលក្រុងវ៉ាស៊ីនតោនយ៉ាងខ្លាំង សូម្បីតែនៅក្នុងបញ្ហាដែលមិនទាក់ទងនឹងហិរញ្ញវត្ថុក៏ដោយ។ ដោយសារតែប្រព័ន្ធហិរញ្ញវត្ថុពិភពលោក ដែលជាប្រព័ន្ធទូទាត់ជាប្រាក់ដុល្លារធ្វើប្រតិបត្តិការក្នុងទឹកប្រាក់រាប់ពាន់លានដុល្លារអាមេរិក មានទីតាំងនៅក្នុងទីក្រុងញូវយ៉កនោះ រដ្ឋាភិបាលសហរដ្ឋអាមេរិកមានអំណាចជាសកល ក្នុងការអនុវត្តការដាក់ទណ្ឌកម្មទៅលើប្រទេសផ្សេងៗ។

ដោយសារមានប្រទេសជាច្រើននៅក្នុងពិភពលោកពឹងផ្អែកលើធនាគារអាមេរិកនោះ វាអាចមានន័យថា សូម្បីតែក្រុមហ៊ុនដែលមិនមានប្រតិបត្តិការក្នុងសហរដ្ឋអាមេរិក ក៏នៅតែពឹងផ្អែកលើប្រព័ន្ធហិរញ្ញវត្ថុអាមេរិកដែរ។

លោក Jarrett Blanc សមាជិកស្រាវជ្រាវជាន់ខ្ពស់មួយរូបនៅឯវិទ្យាស្ថានស្រាវជ្រាវឈ្មោះថា Carnegie Endowment for International Peace បានប្រាប់ទស្សនាវដ្តី The Atlantic កាលពីឆ្នាំមុនថា៖

«សូម្បីតែក្រុមហ៊ុនដែលគ្មានពាណិជ្ជកម្មនៅសហរដ្ឋអាមេរិកក៏ដោយ ក៏ធនាគាររបស់ពួកគេធ្វើពាណិជ្ជកម្មនៅអាមេរិកដែរ»។

ដោយសារតែអំណាចពិសេសនេះហើយ ទើបអង្គភាពដូចជាឆ្មាំបដិវត្តអ៊ីរ៉ង់ និងប្រទេសផ្សេងៗទៀតដូចជាកូរ៉េខាងជើងជាដើម បានរងប៉ះពាល់នៅពេលពួកគេរងការដាក់ទណ្ឌកម្មពីសំណាក់ក្រុងវ៉ាស៊ីនតោន។

រីឯនៅក្នុងស្រុកវិញ ប្រាក់ដុល្លារ ក៏ជាទ្រព្យសម្បត្តិដ៏សំខាន់សម្រាប់ពលរដ្ឋអាមេរិកផងដែរ ជាពិសេសនៅពេលមានវិបត្តិ។ នៅពេលដែលតម្រូវការប្រាក់ដុល្លារអាមេរិកបានកើនឡើងក្នុងអំឡុងពេលមានជំងឺរាតត្បាតកូវីដ១៩នេះ សហរដ្ឋអាមេរិកផ្តល់ការខ្ចីប្រាក់ដល់ពលរដ្ឋក្នុងអត្រាការប្រាក់ទាប ដើម្បីជាការជួយសង្គ្រោះផ្នែកហិរញ្ញវត្ថុ។

លោក Ross Darrell Feingold ជាមេធាវីនិងជាអ្នកវិភាគអំពីហានិភ័យនយោបាយដែលមានបទពិសោធន៍ជាង ២០ ឆ្នាំក្នុងការផ្តល់ប្រឹក្សាដល់អតិថិជនក្នុងការធ្វើអាជីវកម្មនៅអាស៊ី។ លោកបានប្រាប់ VOA ថា៖

«នេះគឺជាគុណសម្បត្តិដ៏សំខាន់របស់អ្នកតាក់តែងគោលនយោបាយនៅសហរដ្ឋអាមេរិកក្នុងការឆ្លើយតបយ៉ាងឆាប់រហ័សចំពោះវិបត្តិ ដែលអ្នកតាក់តែងគោលនយោបាយនៅក្នុងប្រទេសមានសេដ្ឋកិច្ចសំខាន់ៗមួយចំនួនផ្សេងទៀត មិនមាន»។

ក៏ប៉ុន្តែ នេះគឺជាគុណវិបត្តិមួយសម្រាប់ប្រទេសដទៃទៀតដែលរូបិយប័ណ្ណរបស់ខ្លួនប្រែប្រួលទាក់ទងនឹងប្រាក់ដុល្លារអាមេរិក ដែលធ្វើឲ្យការព្យាករណ៍ថវិការយៈពេលយូរកាន់តែពិបាក។

ដូចឃ្លាដ៏ល្បីដែលលោក John Connally រដ្ឋមន្រ្តីក្រសួងហិរញ្ញវត្ថុនៅក្នុងជំនាន់លោក Richard Nixon ជាប្រធានាធិបតី ថ្លែងទៅកាន់រដ្ឋមន្រ្តីហិរញ្ញវត្ថុមួយក្រុមក្នុងពិភពលោកនៅឆ្នាំ ១៩៧១ ថា៖ «ប្រាក់ដុល្លារជារូបិយប័ណ្ណរបស់យើង ប៉ុន្តែវាជាបញ្ហាសម្រាប់លោកអ្នក»។

ប្រធានាធិបតីសហរដ្ឋអាមេរិក លោក ដូណាល់ ត្រាំ (ឆ្វេង) និងប្រធានាធិបតីចិន លោក ស៊ី ជីនពីង (ស្តាំ) ដើរចេញពីកិច្ចប្រជុំក្រុមមេដឹកនាំសេដ្ឋកិច្ចនៅឯវិមានប្រជាជន ក្នុងទីក្រុងប៉េកាំង ប្រទេសចិន ថ្ងៃទី៩ ខែវិច្ឆិកា ឆ្នាំ២០១៧។

ការប្រឈមពីចិន

អស់រយៈពេលជាច្រើនទសវត្សរ៍មកនេះ រដ្ឋាភិបាលចិន រុស្ស៊ី និងប្រទេសជាច្រើនទៀត បានជំរុញយ៉ាងខ្លាំងដើម្បីបង្កើតប្រព័ន្ធរូបិយប័ណ្ណបម្រុង។ ក៏ប៉ុន្តែ គ្មានប្រទេសណាមួយ បានទទួលជោគជ័យជាដុំកំភួននោះទេ។

រូបិយប័ណ្ណរបស់ប្រទេសចិន ត្រូវបានប្រើប្រាស់ជាធម្មតានៅក្នុងប្រទេសអាស៊ីមួយចំនួន ហើយដោយសារតែការដាក់ទណ្ឌកម្មរបស់សហរដ្ឋអាមេរិកនោះ នៅក្នុងប្រតិបត្តិការមួយចំនួនដូចជាការទិញប្រេងឆៅពីប្រទេសអ៊ីរ៉ង់ ធ្វើឲ្យអ៊ីរ៉ង់មានការលំបាកក្នុងការទទួលយកការទូទាត់ជាប្រាក់ដុល្លារ។

ក៏ប៉ុន្តែ ទោះបីជាមានការត្អូញត្អែរពីប្រទេសចិនទាក់ទងនឹងឧត្តមភាពនៃប្រាក់ដុល្លារនេះក៏ដោយ ក៏ទីក្រុងប៉េកាំងបានកសាងសេដ្ឋកិច្ចមួយដែលទទួលបានជោគជ័យយ៉ាងខ្លាំងនេះ ដោយសារប្រាក់ដុល្លារនេះផងដែរ។ ប្រទេសចិន ទទួលបានប្រាក់ដុល្លារភាគច្រើនតាមរយៈការនាំទំនិញចេញទៅលក់នៅសហរដ្ឋអាមេរិក។ ក្រុមហ៊ុនចិនទទួលយកប្រាក់ដុល្លារទាំងនោះ ហើយប្តូរទៅជាប្រាក់យន់ជាមួយធនាគារកណ្តាលចិន ដើម្បីទូទាត់ប្រាក់ឈ្នួលឲ្យកម្មកររបស់ពួកគេ។ ធនាគារកណ្តាលចិនរក្សាប្រាក់ដុល្លារទាំងនោះទុកជាប្រាក់បម្រុង។ គិតត្រឹមខែមីនាឆ្នាំនេះ ប្រទេសចិន ត្រូវបានគេប៉ាន់ស្មានថា កំពុងកាន់កាប់រូបិយប័ណ្ណរបស់សហរដ្ឋអាមេរិកចំនួន ៣ លាន លានដុល្លារ។

នៅឆ្នាំ ២០១៤ ប្រទេសចិន ចាប់ផ្តើមមើលឃើញរូបិយប័ណ្ណឌីជីថលថាជាមធ្យោបាយមួយ ដើម្បីងាកចេញពីប្រាក់ដុល្លារអាមេរិក។ ចាប់តាំងពីពេលនោះមកប្រទេសចិន បានធ្វើឲ្យបច្ចេកវិទ្យារូបិយប័ណ្ណឌីជីថល ក្លាយជាគោលដៅយុទ្ធសាស្ត្រជាតិសំខាន់មួយ។

ផែនការសេដ្ឋកិច្ចជាតិក្នុងឆ្នាំ ២០១៦ មាននិយាយអំពីភាពជឿនលឿននៃបច្ចេកវិទ្យា blockchain ដែលជាបច្ចេកវិទ្យាទ្រទ្រង់រូបិយប័ណ្ណឌីជីថលដ៏ពេញនិយមដូចជា Bitcoin ជាដើមនោះ។

លោកប្រធានាធិបតីស៊ី ជិនពីង (Xi Jinping) បានប្រាប់ការិយាល័យនយោបាយរបស់លោកនៅខែតុលាឆ្នាំ ២០១៩ ថា ប្រទេសចិន ត្រូវតែពន្លឿនការអភិវឌ្ឍបច្ចេកវិទ្យា blockchain។

ប្រតិបត្តិការឌីជីថលពង្រីកវិសាលភាពនៃប្រាក់យន់

ឥឡូវនេះ នៅពេលដែលក្រុមហ៊ុនពីរដែលប្រើរូបិយប័ណ្ណផ្សេងគ្នាបង្កើតកិច្ចសន្យាអាជីវកម្ម តម្លៃប្រាក់ដែលត្រូវបានផ្ទេរចុះឡើងនោះ ជាធម្មតាត្រូវបានគេគិតជាប្រាក់ដុល្លារ។ ការណ៍នេះ តម្រូវឲ្យក្រុមហ៊ុនធ្វើការ «ការពារហានិភ័យ» ក្នុងករណីដែលតម្លៃរូបិយប័ណ្ណរបស់ពួកគេមានការផ្លាស់ប្តូរ ដែលវានឹងផ្លាស់ប្តូរតម្លៃកិច្ចសន្យា។ នោះមានន័យថា ជាញឹកញាប់ពួកគេត្រូវការធនាគារ ជាអ្នកនៅកណ្តាលដើម្បីធ្វើការសម្របសម្រួល ក៏ប៉ុន្តែរឿងដូចនោះ ប្រហែលជានឹងលែងមានទៀតហើយក្នុងពេលដ៏ខ្លីខាងមុខនេះ។

លោក Michael J. Casey ជាប្រធានផ្នែកខ្លឹមសារព័ត៌មាននៅបណ្តាញសារព័តមាន CoinDesk ដែលជាសារព័តមានឯកទេសខាងរូបិយប័ណ្ណឌីជីថល។ លោកបានថ្លែងថា ក្រុមហ៊ុនបរទេសនាំទំនិញចូល និងក្រុមហ៊ុននាំទំនិញចេញរបស់ចិន អាចបង្កើតកុំព្យូទ័រដែលប្រើប្រាស់បណ្តាញប្រើបច្ចេកវិទ្យា blockchain ដែលប្រើប្រាស់ប្រាក់យន់ជាគោលក្នុងការទូទាត់ប្រាក់ដែលជារូបិយប័ណ្ណឌីជីថលនេះ ជាវិធីថ្មីនៃការធ្វើជំនួញរបស់ពួកគេ។

នៅក្នុងកិច្ចសម្ភាសន៍មួយជាមួយ VOA លោក Casey បានថ្លែងថា៖ «ប្រព័ន្ធរក្សាប្រាក់បញ្ញើរដែលមិនមានស្ថាប័នកណ្តាលនេះ អាចអនុញ្ញាតឲ្យអាជីវកម្មបរទេសធ្វើកិច្ចព្រមព្រៀងពាណិជ្ជកម្មបានដោយមិនចាំបាច់ប្រើប្រាក់ដុល្លារដើម្បីការពារហានិភ័យនៃអត្រាប្តូរប្រាក់របស់ពួកគេនោះទេ»។

លោក Jeremy Allaire ជានាយកប្រតិបត្តិនៃក្រុមហ៊ុនCircle ដែលជាក្រុមហ៊ុនប្រើប្រាស់បច្ចេកវិទ្យាដើម្បីទូទាត់ប្រាក់ពីម្នាក់ទៅម្នាក់។ លោក បានថ្លែងថា រូបិយប័ណ្ណឌីជីថលរបស់ចិន អាចនាំទៅឲ្យមានការប្រើប្រាស់ប្រាក់យន់យ៉ាងទូលំទូលាយជាងមុនក្នុងពិភពលោក។

លោក Allaire បាននិយាយនៅលើបណ្តាញទូរទស្សន៍សេដ្ឋកិច្ចសហរដ្ឋអាមេរិក CNBC កាលពីខែកញ្ញាឆ្នាំ ២០១៩ នៅពេលដែលប្រទេសចិន បានប្រកាសជាលើកដំបូងថា ខ្លួននឹងចាប់ផ្តើមប្រើប្រាស់រូបិយប័ណ្ណឌីជីថលផ្ទាល់ខ្លួនដើម្បី «ការពារ» អធិបតេយ្យភាពការប្តូរប្រាក់បរទេសរបស់ខ្លួន នោះថា៖

«នេះ វាក្លាយជាយន្តការមួយដែល (ប្រាក់យន់ចិន) អាចត្រូវបានប្រើប្រាស់ក្នុងប្រតិបត្តិការប្រចាំថ្ងៃនៅជុំវិញពិភពលោក»។

ក្រុមអ្នកជំនាញបានចង្អុលបង្ហាញថា រូបិយប័ណ្ណឌីជីថលដែលបានស្នើឡើងដោយប្រទេសចិននេះ នឹងមិនឆ្លងកាត់ប្រព័ន្ធធនាគារលោកខាងលិចរួមមាន SWIFT ដែលមានមូលដ្ឋាននៅប្រទេសប៊ែលហ្សិកទេ ដែលវាជាប្រព័ន្ធទូរគមនាគមន៍អន្តរធនាគារនិងហិរញ្ញវត្ថុទូទាំងពិភពលោកសម្រាប់ឲ្យស្ថាប័នហិរញ្ញវត្ថុនានាក្នុងពិភពលោកអាចផ្ញើនិងទទួលព័ត៌មានអំពីការផ្ទេរប្រាក់ដោយសុវត្ថិភាព។

លោក Steven Mnuchin រដ្ឋមន្ត្រីក្រសួងសេដ្ឋកិច្ចអាមេរិកថ្លែងក្នុងសន្និសីទកាសែតមួយអំពីការផ្ដល់ជំនួយផ្នែកសេដ្ឋកិច្ច នៅក្នុងបន្ទប់ធ្វើសន្និសីទកាសែតនៅសេតវិមាន។

«បញ្ហាសន្តិសុខជាតិ»

កាលពីខែកក្កដាឆ្នាំមុន រដ្ឋមន្រ្តីក្រសួងហិរញ្ញវត្ថុសហរដ្ឋអាមេរិកលោក Steven Mnuchin បាននិយាយនៅក្នុងសន្និសីទសារព័ត៌មានមួយនៅឯសេតវិមានថា រូបិយប័ណ្ណឌីជីថល cryptocurrency ត្រូវបានគេកេងចំណេញរួចទៅហើយ ដើម្បីប្រើប្រាស់វាក្នុងការគាំទ្រសកម្មភាពខុសច្បាប់ដែលមានតម្លៃរាប់ពាន់លានដុល្លារ។ លោក Steven Mnuchin បានថ្លែងក្នុងសម្តីដើមថា៖

«រឿងនេះ ប្រាកដណាស់ជាបញ្ហាសន្តិសុខជាតិ»។

អ្នកវិភាគបានព្រមានកាលពីពេលថ្មីៗនេះថា ដើម្បីការពារឧត្តមភាពនៃប្រាក់ដុល្លារ សហរដ្ឋអាមេរិកមិនអាចអនុញ្ញាតឲ្យប្រទេសចិនឈានមុខគេ លើរូបិយប័ណ្ណឌីជីថល cryptocurrencies បានទេ។

លោក Tim Morrison សមាជិកស្រាវជ្រាវជាន់ខ្ពស់នៅវិទ្យាស្ថាន Hudson Institute ដែលបានបម្រើការងារជាជំនួយការពិសេសរបស់លោកប្រធានាធិបតី ដូណាល់ ត្រាំ បានប្រាប់ VOA ថា លោកជឿថា ទស្សនៈវិស័យរបស់ទីក្រុងប៉េកាំង «ក្នុងការគ្របដណ្តប់ឥទ្ធិពលលើបច្ចេកវិទ្យាហិរញ្ញវត្ថុដែលកំពុងរីកចម្រើននេះ គឺជារឿងគួរឲ្យព្រួយបារម្ភ»។

នៅសហរដ្ឋអាមេរិករូបិយប័ណ្ណឌីជីថល នៅតែស្ថិតនៅក្នុងដំណាក់កាលរៀបចំផែនការនៅឡើយ។ នៅរដូវក្តៅឆ្នាំមុន ក្រុមហ៊ុនហ្វេសប៊ុក បានប្រកាសអំពីរូបិយប័ណ្ណឌីជីថលសកលមួយដែលមានឈ្មោះថា Libra ក៏ប៉ុន្តែ នៅតែស្ថិតនៅក្នុងស្ថានភាពព្យាយាមដើម្បីទទួលការយល់ព្រមពីនិយ័តករនៅឡើយ។

កាលពីដើមខែមេសា សមាជិកសភាសហរដ្ឋអាមេរិកបានធ្វើសេចក្តីព្រាងច្បាប់មួយដែលនឹងអនុញ្ញាតឲ្យធនាគារកណ្តាលបង្កើត «គណនីកាបូបលុយដុល្លារឌីជីថល» ដែលមានឈ្មោះថា «FedAccounts» សម្រាប់ចែកចាយមូលប្បទានប័ត្រដល់អាជីវកម្ម និងពលរដ្ឋដើម្បីជាការលើកស្ទួយសេដ្ឋកិច្ច។

លោក Casey នៃក្រុមហ៊ុន CoinDesk បានថ្លែងថា ថ្វីបើកិច្ចខិតខំទាំងពីរខាងលើនេះ មានទំហំតូចតាចក្តី តែវាមានសារៈសំខាន់ខ្លាំងណាស់។ លោក Casey បានថ្លែងបន្តក្នុងសម្តីដើមថា៖

«ជ័យជម្នះរបស់ចិននៅក្នុងការប្រណាំងប្រជែងរឿងរូបិយប័ណ្ណឌីជីថលនេះ អាចជះឥទ្ធិពលអវិជ្ជមានយ៉ាងខ្លាំងដល់សហរដ្ឋអាមេរិក និងមូលធននិយមរបស់លោកខាងលិចជាទូទៅផងដែរ»។

លោក Casey បាននិយាយទៀតថា សូម្បីតែប្រទេសចិន បានឈានមុខនៅក្នុងការចាប់ផ្តើមដំបូងនេះក៏ដោយ ក៏ចិននៅតែមានកិច្ចការជាច្រើនទៀតត្រូវធ្វើដើម្បីឈ្នះនៅក្នុងការប្រណាំងប្រជែងនេះ។ ប៉ុន្តែ លោកបាននិយាយបន្ថែមទៀតថា៖ «ប្រសិនបើសហរដ្ឋអាមេរិក តាមមិនទាន់ចិនក្នុងពេលឆាប់ៗនេះទេ នោះអាមេរិកនឹងចាញ់»។

លោក Michael Hirson ជាអ្នកវិភាគនៅក្រុមហ៊ុន Eurasia Group បានសរសេរនៅក្នុងសារអេឡិចត្រូនិកមួយមកកាន់ VOA ថា ទោះបីការអភិវឌ្ឍអធិបតេយ្យភាពរូបិយប័ណ្ណឌីជីថលដោយប្រទេសចិននេះ មិនបង្កការគំរាមកំហែងដោយផ្ទាល់ចំពោះឧត្តមភាពនៃប្រាក់ដុល្លារក្តី ក៏ទីក្រុងវ៉ាស៊ីនតោនមិនគួរធ្វេសប្រហែសអំពីស្ថានភាពរូបិយប័ណ្ណបម្រុងរបស់ខ្លួនឡើយ។

លោក Hirson ដែលធ្លាប់បំរើការងារជាប្រធានតំណាងនៃក្រសួងហិរញ្ញវត្ថុសហរដ្ឋអាមេរិកនៅទីក្រុងប៉េកាំង បាននិយាយក្នុងសម្តីដើមថា៖

«ក្នុងរយៈពេលយូររូបិយប័ណ្ណឌីជីថលអាចជួយដល់ប្រទេសចិនក្នុងការជំរុញភាវូបនីយកម្មនៃរូបិយប័ណ្ណ renminbi ឬ ប្រាក់យន់»។

ទោះបីជាវាមិនអាចទៅរួចទេក្នុងការទស្សន៍ទាយថា តើពេលណាឧត្តមភាពនៃប្រាក់ដុល្លារនឹងត្រូវធ្លាក់ចុះនោះ មានអត្ថបទទស្សនៈមួយបោះពុម្ពផ្សាយឡើងវិញ ដោយក្រសួងពាណិជ្ជកម្មចិននៅលើគេហទំព័រផ្លូវការរបស់ខ្លួនកាលពី ៦ ឆ្នាំមុននៅពេលដែលប្រទេសចិនទើបតែចាប់ផ្តើមសិក្សាការអភិវឌ្ឍរូបិយប័ណ្ណឌីជីថលរបស់រដ្ឋ អាចផ្តល់ជាតម្រុយមួយថា៖ «រូបិយប័ណ្ណ renminbi ឬ ហៅកាត់ថា RMB ឬ ប្រាក់យន់ នឹងជំនួសប្រាក់ដុល្លារក្នុងរយៈពេល ១៥ ឆ្នាំខាងមុខទៀត»។

ការបង្កើតរូបិយប័ណ្ណឌីជីថល គឺជាអាទិភាពយុទ្ធសាស្ត្រកំពូលសម្រាប់ប្រទេសចិន ហើយប្រទេសចិន ហាក់ដូចជាសុខចិត្តរង់ចាំឲ្យកិច្ចការនេះ បានសម្រេច៕

ប្រែសម្រួលដោយអ្នកស្រី លី ម៉ូរីវ៉ាន់