សហរដ្ឋអាមេរិកប្រហែលជាក្លាយជាប្រទេសទីពីរបន្ទាប់ពីប្រទេសអូស្ត្រាលីក្នុងការហាមឃាត់បច្ចេកវិទ្យាAIរបស់ក្រុមហ៊ុន DeepSeek របស់ចិនលើឧបករណ៍អេឡិចត្រូនិកនានារបស់រដ្ឋាភិបាល។
សមាជិករដ្ឋសភាអាមេរិកលោក Josh Gottheimer ខាងគណបក្សប្រជាធិបតេយ្យ និងសមាជិករដ្ឋសភាអាមេរិកខាងគណបក្សសាធារណរដ្ឋលោក Darin LaHood បានស្នើច្បាប់មួយដែលមានការគាំទ្រពីគណបក្សទាំងពីរដើម្បីហាមឃាត់បច្ចេកវិទ្យា AI របស់ក្រុមហ៊ុន DeepSeek នេះ។
នៅក្នុងលិខិតផ្ញើទៅកាន់អភិបាលរដ្ឋសហរដ្ឋអាមេរិកចំនួន ៤៧ និងអភិបាលរដ្ឋធានីវ៉ាស៊ីនតោន លោកទាំងពីរបានព្រមានថា ក្រុមហ៊ុន DeepSeek អាចបង្កហានិភ័យផ្នែកសន្តិសុខចំពោះទិន្នន័យរសើបនានារបស់រដ្ឋាភិបាល សន្តិសុខអ៊ីនធឺណិត និងឯកជនភាពរបស់ពលរដ្ឋអាមេរិក។ នេះបើយោងតាមសេចក្ដីរាយការណ៍របស់ទូរទស្សន៍ NBC កាលពីថ្ងៃទី ៣ ខែមីនា។
ប្រទេសចិនបានច្រានចោលការចោទប្រកាន់នេះ។ ទោះជាយ៉ាងនេះក្ដី អ្នកជំនាញថា ក្ដីបារម្ភដែលសមាជិករដ្ឋសភាអាមេរិកនិងមន្ត្រីថ្នាក់រដ្ឋលើកឡើងគឺមិនមែនគ្មានមូលដ្ឋានត្រឹមត្រូវនោះទេ។
រដ្ឋាភិបាលចិនត្រូវគេរាយការណ៍ថាក៏បានប្រើគំរូ AI ដូចជា DeepSeek ជាដើមដើម្បីឈ្លបយកការណ៍ទ្រង់ទ្រាយធំ ដែលក្នុងនោះរួមមានទាំងការប្រមូលទិន្នន័យជីវមាត្រនិងប្រព័ន្ធវិភាគកិច្ចសន្ទនានៅលើបណ្ដាញសង្គមអនឡាញដែលរាយការណ៍ទៅកាន់ទីភ្នាក់ងារសន្តិសុខនិងយោធារបស់ប្រទេសចិន ក៏ដូចជាដើម្បីវាយប្រហារផ្នែកព័ត៌មានលើពលរដ្ឋអាមេរិកនិងពលរដ្ឋចិននៅបរទេសផងដែរ។
ក្រុមហ៊ុនផ្នែកឈ្លបយកការណ៍និងសន្តិសុខធំៗរបស់ចិនយ៉ាងតិច ៣ ដែលនោះគឺក្រុមហ៊ុន TopSec ក្រុមហ៊ុន QAX និងក្រុមហ៊ុន NetEase បានប្រកាសអំពីការបញ្ចូលបច្ចេកវិទ្យា AI របស់ក្រុមហ៊ុន DeepSeek នេះ ដើម្បីធ្វើឲ្យសេវាកម្មរបស់ខ្លួនមានភាពប្រសើរជាងមុន។
ក្រុមហ៊ុនទាំង ៣ នេះផ្ដល់សេវាកម្មដល់រដ្ឋាភិបាលចិន ហើយក្រុមហ៊ុនខ្លះបានបញ្ជាក់យ៉ាងច្បាស់ថា DeepSeek នឹងជួយធ្វើឲ្យសមត្ថភាពត្រួតពិនិត្យនិងឈ្លបមើលតាមអ៊ីនធឺណិតមានភាពប្រសើរឡើង។ នេះគឺរួមទាំងការចាប់ទិន្នន័យជីវមាត្រដែលនាំមុខដោយ AI បច្ចេកវិទ្យាចាប់សញ្ញាមុខនិងឃ្លាំមើលដូចជា «smart cities» គម្រោង Skynet និងគម្រោង Xueliang ផងដែរ ដែលអាចតាមដានគ្រប់ទិដ្ឋភាពទាំងអស់នៃជីវិតសាធារណៈរបស់បុគ្គលនីមួយៗបាន។ នេះបើយោងតាមសេចក្ដីរាយការណ៍របស់លោក Wenhao Ma នៃ VOA សេវាភាសាចិន។
កាលពីខែមករា ក្រុមហ៊ុនសន្តិសុខអ៊ីនធឺណិត Feroot Security របស់កាណាដាបានរកឃើញកូដបង្កប់នៅក្នុងដំណើរការចូលប្រើអនឡាញរបស់ DeepSeek ដែលចែកចាយព័ត៌មានរបស់អ្នកប្រើប្រាស់ជាមួយនឹងក្រុមហ៊ុន China Mobile ដែលជាក្រុមហ៊ុនទំនាក់ទំនងដែលគ្រប់គ្រងដោយរដ្ឋាភិបាលចិន។ នេះបើយោងតាមទីភ្នាក់ងារសារព័ត៌មាន AP។
ទីភ្នាក់ងារសារព័ត៌មាន AP បានបញ្ជាក់ថា កូដនោះគឺជា«ភាសាកូដកុំព្យូទ័រដ៏ស្មុគស្មាញបំផុតដែលនៅពេលដែលផ្លាស់ប្ដូរមកជាភាសាធម្មតាវិញគឺបានបង្ហាញឱ្យឃើញនូវទំនាក់ទំនងទៅនឹងប្រព័ន្ធកុំព្យូទ័រដែលគ្រប់គ្រងដោយក្រុមហ៊ុន China Mobile»។
សហរដ្ឋអាមេរិកបានហាមឃាត់ក្រុមហ៊ុន China Mobile នេះនៅក្នុងឆ្នាំ ២០១៩ បន្ទាប់ពីរបាយការណ៍ស៊ើបការណ៍សម្ងាត់បង្ហាញថាក្រុមហ៊ុននេះដើរតួជាដៃចារកម្មរបស់យោធាចិន។
តួអង្គដែលមានមូលដ្ឋាននៅប្រទេសចិនកំពុងប្រើកម្មវិធី ChatGPT ជាមួយនឹងគំរូនានារបស់ DeepSeek ដើម្បីបង្កើតអ៊ីមែលបោកប្រាស់និងការវាយប្រហារបែបព័ត៌មានប្រឌិតលើសហរដ្ឋអាមេរិក«តាងនាមឲ្យអតិថិជនមិនជាក់ច្បាស់នៅក្នុងប្រទេសចិន»។ នេះបើយោងតាមការបញ្ជាក់របស់ក្រុមហ៊ុន OpenAI នៅក្នុងរបាយការណ៍ខែកុម្ភៈរបស់ខ្លួន។
ក្រុមហ៊ុន OpenAI បានកំណត់និងរារាំងបណ្ដុំទំព័រអនឡាញផ្ទាល់ខ្លួនជាច្រើនដែលមានប្រភពនៅប្រទេសចិនដែលពាក់ព័ន្ធនៅក្នុងសកម្មភាពទុច្ចរិតនានាដូចជា Qianyue Overseas Public Opinion AI Assistant ជាដើម ដែលគេបានរាយការណ៍ថាត្រូវបានតាក់តែងឡើងដើម្បីស្រូបយកនិងវិភាគលើសារបង្ហោះនិងការបញ្ចេញមតិពាក់ព័ន្ធនឹងនយោបាយនិងសិទ្ធិមនុស្សនៅប្រទេសចិននៅលើវេទិកាអនឡាញនានាដូចជា X, Facebook, YouTube, Instagram, Telegram និង Reddit ជាដើម។
គោលបំណងនៃប្រតិបត្តិការនេះត្រូវបានគេរាយការណ៍ថាដើម្បី«ផ្ដល់នូវការយល់ដឹងជ្រៅជ្រះដល់អាជ្ញាធរចិន»ដូចជា«ស្ថានទូតចិននៅបរទេសនិងភ្នាក់ងារស៊ើបការណ៍សម្ងាត់ដែលតាមដានមើលការតវ៉ានៅតាមបណ្ដាប្រទេសនានាដូចជាសហរដ្ឋអាមេរិក អាល្លឺម៉ង់ និងចក្រភពអង់គ្លេសជាដើម»។ នេះបើតាមការបញ្ជាក់របស់ក្រុមហ៊ុន OpenAI។
ទំព័រផ្ទាល់ខ្លួនរបស់ ChatGPT ជាច្រើនដែល OpenAI បានហាមឃាត់កាលពីខែកុម្ភៈមានការពាក់ព័ន្ធនៅក្នុងប្រតិបត្តិការជះឥទ្ធិពលរបស់ចិនដែលផ្ដោតលើការបង្កើតមតិខ្លីៗជាភាសាអង់គ្លេសនិងអត្ថបទវែងៗជាភាសាអេស្ប៉ាញរិះគន់លើសហរដ្ឋអាមេរិកដែលចេញផ្សាយនៅក្នុងប្រព័ន្ធផ្សព្វផ្សាយមូលដ្ឋាននិងថ្នាក់ជាតិនៅទូទាំងតំបន់អាមេរិកឡាទីននិងប្រទេសអេស្ប៉ាញ។
ក្រុមហ៊ុនចិនមួយដែលផ្សាយអត្ថបទទាំងនេះនៅក្នុងប្រព័ន្ធផ្សព្វផ្សាយជាភាសាអេស្ប៉ាញគឺក្រុមហ៊ុន Jilin Yousen Culture Communication Co. ដែលជាសាខារបស់រោងពុម្ព Beijing United Publishing House ដែលមានទំនាក់ទំនងជាមួយនឹងរដ្ឋាភិបាលចិន។
VOA បានពិនិត្យមើលអត្ថបទចំនួន ៩ ជាភាសាអេស្ប៉ាញដែលបង្កើតឡើងដោយ AI របស់ចិនរវាងខែតុលានិងខែវិច្ឆិកា ឆ្នាំ២០២៤ ដូចដែលក្រុមហ៊ុន OpenAI បានកំណត់។
អត្ថបទ ២ ក្នុងចំណោមនោះដែលបោះពុម្ពនៅក្នុងកាសែត El Universal ក្នុងប្រទេសម៉ិកស៊ិកនិងកាសែត El Popular ក្នុងប្រទេសប៉េរូ បានរិះគន់ការប្រើប្រាស់របស់សហរដ្ឋអាមេរិកនូវទណ្ឌកម្មប្រឆាំងនឹងរដ្ឋាភិបាលនិងបុគ្គលបរទេស។
អត្ថបទបញ្ចេញមតិនៅក្នុងកាសែត El Universal បានបញ្ជាក់ថា ទណ្ឌកម្មរបស់សហរដ្ឋអាមេរិកលើឧស្សាហកម្មប្រេងឥន្ធនៈរបស់អ៊ីរ៉ង់សម្រាប់ការគាំទ្ររបស់អ៊ីរ៉ង់លើក្រុមភេរវកម្មហាម៉ាស់និងក្រុមភេរវកម្មហេសបូឡាគឺជាការបង្ហាញនូវ«ភាពគ្មានសមត្ថភាព»របស់សហរដ្ឋអាមេរិកក្នុងការដោះស្រាយជាមួយនឹងនយោបាយសាកលនិង«ការធ្លាក់ចុះយ៉ាងលឿន»នៃ«គោលសីលធម៌»របស់ខ្លួន។
ស្រដៀងគ្នានេះដែរ កាសែត El Popular បានហៅការដាក់ទណ្ឌកម្មរបស់សហរដ្ឋអាមេរិកលើក្រុមមួយដែលពាក់ព័ន្ធនឹងក្រុមហាម៉ាស់ថា«មិនសមហេតុផល»និងជា«ការវាយប្រហារលើសិទ្ធិរបស់ប្រជាជនប៉ាឡេស្ទីន»។
អត្ថបទមួយនៅក្នុងកាសែត La Republica របស់ប្រទេសប៉េរូបានបង្ហាញថាសហរដ្ឋអាមេរិកគឺជាប្រទេសដែលទទួលបានប្រយោជន៍ធំបំផុតពីសង្គ្រាមរបស់រុស្ស៊ីនៅអ៊ុយក្រែនដូចទៅនឹងការលើកឡើងដ៏ចម្បងរបស់រដ្ឋាភិបាលរុស្ស៊ីដែរ។ អត្ថបទនេះបានរិះគន់សហរដ្ឋអាមេរិកថាបានផ្ដល់ជំនួយយោធាដល់អ៊ុយក្រែន ដោយថាការគាំទ្ររបស់សហរដ្ឋអាមេរិកនេះគឺជាការធ្វើឱ្យសង្គ្រាមនេះរីករាលដាល។
ទោះជាយ៉ាងណាក៏ដោយ ប្រទេសចិនគឺជាប្រទេសដែលផ្ដល់បច្ចេកវិទ្យាយោធានិងសព្វាវុធដ៏ចម្បងដល់រុស្ស៊ី ដែលរុស្ស៊ីប្រើប្រចាំថ្ងៃនៅក្នុងការវាយប្រហារលើជនស៊ីវិលអ៊ុយក្រែន។
អត្ថបទមួយទៀតដែលសាបព្រោះដោយប្រទេសចិននៅក្នុងកាសែត La Republica បានហៅគោលនយោបាយពន្ធគយរបស់ប្រធានាធិបតីអាមេរិកលោក Donald Trump ថា«ធ្វើឲ្យអន្តរាយដល់ជំហរដឹកនាំរបស់សហរដ្ឋអាមេរិកនៅលើពិភពលោក»។
អត្ថបទ ៣ នៅក្នុងកាសែត Wapa កាសែត El Popular និងកាសែត El Plural បានកេងចំណេញលើបញ្ហាភាពគ្មានផ្ទះសម្បែងរស់នៅ អាហារូបត្ថម្ភកុមារ និងឧក្រិដ្ឋកម្មនៅក្នុងសហរដ្ឋអាមេរិក ដោយបង្ហាញឡើងថាបញ្ហាទាំងអស់នេះមានលក្ខណៈធ្ងន់ធ្ងរនិងគ្រោះថ្នាក់ខ្លាំង។
ជាឧទាហរណ៍ អត្ថបទអំពីអាហារូបត្ថម្ភកុមារនោះបានអះអាងថាកុមារភាគច្រើននៅក្នុងសហរដ្ឋអាមេរិក«គ្មានអាហារបរិភោគនៅថ្ងៃចុងសប្ដាហ៍និងថ្ងៃឈប់សម្រាក»ដោយសារតែកង្វះការយកចិត្តទុកដាក់របស់រដ្ឋាភិបាលលើសន្តិសុខម្ហូបអាហាររបស់កុមារ។
ទោះបីជាប្រធានបទនៃអត្ថបទទាំងនេះមានផ្សេងៗគ្នាតាំងពីបញ្ហាសិទ្ធិមនុស្សនិងសង្គមនៅក្នុងសហរដ្ឋអាមេរិករហូតដល់បញ្ហានយោបាយក្នុងនិងក្រៅប្រទេសក៏ដោយ ក៏អត្ថបទទាំងអស់នេះបានបង្ហាញនូវរូបភាពនៃប្រទេសមួយដែលមិនដំណើរការត្រឹមត្រូវដែលមានការធ្លាក់ចុះនូវគុណតម្លៃសីលធម៌និងឥទ្ធិពលនៅលើឆាកអន្តរជាតិ ដែលនេះគឺដូចការលើកឡើងជាទូទៅរបស់រដ្ឋាភិបាលចិន៕
ប្រែសម្រួលដោយលោក ភី សុភាដា