រដ្ឋាភិបាលក្រុងប៉េកាំងកាលពីថ្ងៃអង្គារបានចោទថា សហរដ្ឋអាមេរិកបានធ្វើសកម្មភាពក្នុងអវកាសដោយគ្មានការទទួលខុសត្រូវនិងគ្មានសុវត្ថិភាពដោយសារ«ការជិតប៉ះគ្នា»ចំនួនពីរលើករវាងស្ថានីយអវកាសចិននិងផ្កាយវិទ្យាសាស្ត្រនៃក្រុមហ៊ុន SpaceX របស់លោក Elon Musk។ នេះបើតាមទីភ្នាក់ងារសារព័ត៌មាន AFP។
Tiangong ដែលជាស្ថានីយអវកាសថ្មីរបស់ចិនត្រូវប្រើយុទ្ធបច្ចេកទេសដើម្បីបញ្ចៀសការប៉ះទង្គិចជាមួយផ្កាយវិទ្យាសាស្ត្រមួយរបស់ប្រព័ន្ធ Starlink កាលពីខែកក្កដា និងមួយទៀតកាលពីខែតុលា។ នេះបើយោងតាមកំណត់ហេតុរបស់ក្រុងប៉េកាំងបញ្ជូនទៅទីភ្នាក់ងារអវកាសអង្គការសហប្រជាជាតិក្នុងខែនេះ។
កំណត់ហេតុបានសរសេរថាឧបទ្ទវហេតុនេះ«អាចនាំឱ្យគ្រោះថ្នាក់ដល់អាយុជីវិតឬសុខភាពរបស់អវកាសយានិកនៅលើស្ថានីយអវកាសចិន» ។ អ្នកនាំពាក្យក្រសួងការបរទេសចិនលោក Zhao Lijian បាននិយាយនៅក្នុងសន្និសីទសារព័ត៌មានកាលពីថ្ងៃអង្គារថា «សហរដ្ឋអាមេរិកមិនអើពើនឹងកាតព្វកិច្ចរបស់ខ្លួនតាមសន្ធិសញ្ញាអន្តរជាតិ ដោយបង្កការគំរាមកំហែងយ៉ាងធ្ងន់ធ្ងរដល់អាយុជីវិតនិងសុវត្ថិភាពរបស់អវកាសយានិក»។
ប្រព័ន្ធ Starlink នៃក្រុមហ៊ុន SpaceX បញ្ជាផ្កាយវិទ្យាសាស្ត្រជិត២ពាន់ដែលមានបំណងផ្តល់សញ្ញាអ៊ីនធឺណិតមកកាន់ផ្នែកភាគច្រើននៃផែនដី។ SpaceX គឺជាក្រុមហ៊ុនឯកជនរបស់អា មេរិកដែលឯករាជ្យពី NASA ដែលទីភ្នាក់ងារអវកាសយោធានិងស៊ីវិលរបស់សហរដ្ឋអាមេ រិក។
ប៉ុន្តែចិនបាននិយាយនៅក្នុងកំណត់ហេតុបញ្ជូនទៅកាន់អង្គការសហប្រជាជាតិថា សមាជិកនៃសន្ធិសញ្ញាអវកាស Outer Space Treaty ដែលជាគ្រឹះនៃច្បាប់អវកាសអន្តរជាតិក៏ទទួលខុសត្រូវចំពោះសកម្មភាពរបស់អង្គភាពក្រៅរដ្ឋាភិបាលដែរ។
ថ្លែងប្រាប់អ្នកសារព័ត៌មាន អ្នកនាំពាក្យក្រសួងការបរទេសសហរដ្ឋអាមេរិកលោកNed Price បានបដិសេធមិនឆ្លើយតប ជាពិសេសចំពោះការចោទប្រកាន់របស់ចិន។ លោកPriceបាននិយាយថា «យើងបានលើកទឹកចិត្តប្រទេសទាំងអស់ដែលមានកម្មវិធីអវកាសឲ្យមានទំនួលខុសត្រូវដើម្បីបញ្ចៀសទង្វើដែលអាចបង្កគ្រោះថ្នាក់ដល់អវកាសយានិក អវកាសចរ មនុស្សផ្សេងទៀតដែលកំពុងធ្វើដំណើរជុំវិញផែនដី»។
ក្រុមហ៊ុន SpaceX មិនបានឆ្លើយតបសំណើសុំការអត្ថាធិប្បាយទេ។
លោក Jonathan McDowellមកពីមជ្ឈមណ្ឌលរូបវិទ្យាតារាសាស្ត្រនៃ Harvard-Smithsonianបាននិយាយថា យុទ្ធបច្ចេកទេសគេចដើម្បីកាត់បន្ថយហានិភ័យនៃការប៉ះទង្គិចគ្នាក្នុងលំហត្រូវប្រើកាន់តែញឹកញាប់នៅពេលដែលវត្ថុកាន់តែច្រើនក្នុងគន្លងផែនដី។
លោកបានប្រាប់ទីភ្នាក់ងារព័ត៌មានAFP ថា «យើងពិតជាបានកត់សម្គាល់ឃើញកំណើននៃការហោះយ៉ាងជិតគ្នាចាប់តាំងពីចាប់ផ្តើមដាក់ពង្រាយប្រព័ន្ធStarlink»។
លោក McDowell បានបន្ថែមទៀតថា ការប៉ះទង្គិចទំនងជានឹង«បំផ្លាញ»ស្ថានីយអវកាសចិនទាំងស្រុងនិងសម្លាប់មនុស្សទាំងអស់នៅទីនោះ។ ម៉ូឌុលស្នូលនៃស្ថានីយTiangong របស់ចិនដែលមានន័យថា «វិមានសួគ៌» បានចូលគន្លងផែនដីនៅដើមឆ្នាំនេះ ហើយរំពឹងថា នឹងដំណើរការពេញលេញនៅឆ្នាំក្រោយ៕