បណ្តាញផ្សព្វផ្សាយរដ្ឋរបស់ប្រទេសចិនបានរាយការណ៍ថា ធនាគារកណ្តាលប្រទេសចិនបានចុះហត្ថលេខាលើកិច្ចព្រមព្រៀងសហប្រតិបត្តិការយុទ្ធសាស្រ្តជាមួយក្រុមហ៊ុនបច្ចេកវិទ្យាហិរញ្ញវត្ថុ Ant Group ដែលជាសាខារបស់ក្រុមហ៊ុន Alibaba Group ដើម្បីបង្កើតប្រព័ន្ធបច្ចេកទេសមួយសម្រាប់រូបិយវត្ថុឌីជីថលជាតិរបស់ខ្លួន។
ប្រទេសចិនកំពុងបង្កើតរូបិយវត្ថុឌីជីថលយ៉ន់ ឬ e-CNY ចាប់តាំងពីឆ្នាំ ២០១៤ មក ក្នុងគោលបំណងជំនួសសាច់ប្រាក់មួយចំនួនដែលកំពុងចរាចរណ៍នៅលើទីផ្សារ។ អាជ្ញាធរចិនបានបញ្ជាក់ថា រូបិយវត្ថុឌីជីថលនេះនឹងត្រូវប្រើប្រាស់ដំបូងសម្រាប់ការចាយវាយលើទំនិញលក់រាយតែនៅក្នុងប្រទេសចិនប៉ុណ្ណោះ មុនពេលដាក់ឲ្យប្រើប្រាស់នៅក្រៅប្រទេស។
ភាគីក្រុមហ៊ុននិងរដ្ឋាភិបាលចិននឹងសហការគ្នាជំរុញការបង្កើតរូបិយវត្ថុ e-CNY ដោយផ្អែកលើប្រព័ន្ធទិន្នន័យ Ocean Base និងប្រព័ន្ធអភិវឌ្ឍចល័ត mPaaS របស់ក្រុមហ៊ុន Ant។ នេះបើយោងតាមសេចក្ដីរាយការណ៍របស់សារព័ត៌មាន Global Times របស់ចិន។
រូបិយវត្ថុ e-CNY ដែលគ្រោងបង្កើតឡើង
ធនាគារកណ្តាលរបស់ចិនក៏បានធ្វើការផងដែរជាមួយក្រុមហ៊ុន Ant និងក្រុមហ៊ុន Tencent ក្នុងរយៈពេល ៣ ឆ្នាំកន្លងមកនេះ ដើម្បីបង្កើតរូបិយវត្ថុ e-CNY។ នេះបើយោងតាមសេចក្ដីរាយការណ៍របស់សារព័ត៌មាន Global Times ដែលបានយោងលើព័ត៌មានដែលបានផ្សព្វផ្សាយកាលពីពេលថ្មីៗនេះដោយក្រុមហ៊ុនសេវាកម្មទូទាត់ប្រាក់តាមប្រព័ន្ធឌីជីថលធំជាងគេបង្អស់ទាំងពីរនេះរបស់ប្រទេសចិន។
ការជូនដំណឹងជាសាធារណៈរបស់ក្រុមហ៊ុនទាំងពីរនេះបង្ហាញថា ក្រុមហ៊ុនទាំងពីរកំពុងបង្ហាញអំពីទំនាក់ទំនងជិតស្និទ្ធជាមួយនឹងនិយ័តករចិន បើទោះបីជាធ្លាប់បានស្ថិតនៅក្រោមការបង្រ្កាបនិងការស៊ើបអង្កេតតឹងតែងប្រឆាំងនឹងការអនុវត្តបែបផ្តាច់មុខពីសំណាក់រដ្ឋាភិបាលចិនក៏ដោយ។
អ្នកវិភាគនានាបាននិយាយថា ធនាគារកណ្តាលរបស់ចិនត្រូវការការគាំទ្រពីក្រុមហ៊ុនបច្ចេកវិទ្យាហិរញ្ញវត្ថុធំៗ និងក្រុមហ៊ុនលក់រាយធំៗនៅក្នុងប្រទេស ដើម្បីបង្កើតរចនាសម្ព័ន្ធនេះ ដែលក្នុងនោះរួមមានទាំងបណ្ដាញចែកចាយសម្រាប់រូបិយវត្ថុឌីជីថលជាតិផងដែរ ដែលបណ្ដាញនេះកំពុងត្រូវបានសាកស្បងនៅតាមទីក្រុងនានាដូចជា ទីក្រុងប៉េកាំង សៀងហៃ និង Shenzhen ជាដើម។
ទោះជាយ៉ាងណាក៏ដោយ ភាពជោគជ័យនៃរូបិយវត្ថុនេះប្រហែលជាអាចនឹងចាប់យកចំណែកទីផ្សារពីក្រុមហ៊ុនបច្ចេកវិទ្យាទាំងនេះនៅទីបំផុត។
អ្នកតាមដានស្ថានការណ៍នានាអះអាងថា ករណីនេះបង្ហាញថា រដ្ឋាភិបាលចិនបានរៀបចំនូវវិធានការមួយចំនួនដើម្បីបង្រ្កាបលើប្រព័ន្ធក្តោបយកទីផ្សារផ្តាច់មុខ និងធ្វើ «ជាតូបនីយកម្ម» លើទិន្នន័យហិរញ្ញវត្ថុរបស់អ្នកប្រើប្រាស់ដែលខ្លួនកាន់កាប់។
រូបឯកសារ៖ សា្លកសញ្ញាដែលបញ្ជាក់ថាមានការផ្ដល់សេវាបង់ប្រាក់តាមអនឡាញ Alipay របស់ក្រុមហ៊ុន Ant Group ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន Alibaba Group Holding និងសេវាបង់ប្រាក់ WeChat Pay របស់ក្រុមហ៊ុន Tencent Holdings នៅក្នុងភោជនីយដ្ឋានមួយក្នុងទីក្រុងហុងកុង ប្រទេសចិន ថ្ងៃទី១ ខែវិច្ឆិកា ឆ្នាំ២០២០។
នរណាជាចៅហ្វាយ?
លោក Francis Lun នាយកប្រតិបត្តិក្រុមហ៊ុនមូលបត្រ Geo Securities Ltd. នៅក្នុងទីក្រុងហុងកុង បានថ្លែងប្រាប់ VOA តាមទូរស័ព្ទថា៖ «អាជ្ញាធរចិនកំពុងប្រាប់ក្រុមហ៊ុន Ant ឲ្យផ្តល់ទិន្នន័យដ៏ធំរបស់ខ្លួនទៅឲ្យធនាគារកណ្តាលចិន។ ទិន្នន័យទាំងនោះនឹងមិនស្ថិតនៅក្នុងដៃរបស់ឯកជននោះទេ ដោយសារតែគណបក្សកុម្មុយនីស្តចិនគឺជាចៅហ្វាយ»។
សារព័ត៌មាន Financial Times បានរាយការណ៍ថា រដ្ឋាភិបាលក្រុងប៉េកាំងបានស្នើក្រុមហ៊ុន Ant ឲ្យប្រគល់ទិន្នន័យឲ្យក្រុមហ៊ុនវាយតម្លៃកម្រិតហានិភ័យស្នើសុំឥណទានមួយដែលគ្រប់គ្រងដោយរដ្ឋ។
ក្រុមហ៊ុនវាយតម្លៃកម្រិតហានិភ័យស្នើសុំឥណទានដែលគ្រប់គ្រងដោយរដ្ឋនេះនឹងត្រូវស្ថិតក្រោមការដឹកនាំរបស់អតីតនាយកប្រតិបត្តិធនាគារកណ្តាលមួយចំនួន ដែលកំពុងតែបម្រើការឲ្យស្ថាប័នហិរញ្ញវត្ថុដទៃទៀត ដែលក្នុងនោះរួមមានទាំងការប្រជែងជាមួយនឹងក្រុមហ៊ុនផ្តល់ប្រាក់កម្ចីនានាដែលជាសាខារបស់ក្រុមហ៊ុន Ant ផងដែរ។
ក្រុមហ៊ុន Ant ទទូចចង់ដឹកនាំក្រុមហ៊ុនខាងលើ ដោយអះអាងថា ការលូកដៃច្រើនជ្រុលពីរដ្ឋាភិបាលនឹងនាំឲ្យវិស័យនេះធ្លាក់ចុះ។ នេះបើយោងតាមសេចក្ដីរាយការណ៍ព័ត៌មាននានា។ ប៉ុន្តែ និយ័តករចិនមិនបានយល់ស្របនោះទេ ដោយនិយាយថា ការពាក់ព័ន្ធរបស់ក្រុមហ៊ុន Ant នៅក្នុងក្រុមហ៊ុនថ្មី នឹងបង្កឲ្យមានទំនាស់ផលប្រយោជន៍។
លោក Lun បានលើកឡើងថា ក្រុមហ៊ុន Ant មិនអាចរារាំងការទាមទាររបស់និយ័តករបានទេ។
ក្ដីរំពឹងសម្រាប់រូបិយវត្ថុ e-CNY
លោក Lun ក៏បានរំពឹងផងដែរថា រូបិយវត្ថុ e-CNY នឹងត្រូវបានដាក់ឲ្យប្រើប្រាស់យ៉ាងទូលំទូលាយ ដោយសារតែធនាគារទាំងអស់នៅក្នុងប្រទេសចិននឹងត្រូវសម្របតាមនិយ័តករ។
លោក Lun បាននិយាយថា នៅក្នុងប្រទេសចិន រូបិយវត្ថុឌីជីថលយ៉ន់នឹងអនុញ្ញាតឲ្យរដ្ឋាភិបាលតាមដានរាល់ប្រតិបត្តិការទិញដូររបស់អ្នកប្រើប្រាស់ «ដូចជាបងធំ» អញ្ចឹង។ ហើយការប្រើប្រាស់រូបិយវត្ថុនេះនៅក្រៅប្រទេសនឹងអាចឲ្យចិនគេចផុតពីប្រព័ន្ធទូទាត់ប្រាក់អន្តរជាតិដែលគ្របដណ្ដប់ដោយប្រាក់ដុល្លារអាមេរិក។ នេះជាអ្វីដែលលោក Lun ហៅថាជាការប៉ុនប៉ងបំបាត់ចោលការប្រើប្រាស់ប្រាក់ដុល្លារអាមេរិកសម្រាប់ការទិញដូរក្នុងស្រុក។
លោក Jerry Lin នាយកវិទ្យាស្ថានស្រាវជ្រាវហិរញ្ញវត្ថុនៃបណ្ឌិតសភាតៃវ៉ាន់ផ្នែកធនាគារនិងហិរញ្ញវត្ថុ (Taiwan Academy of Banking and Finance) នៅក្នុងទីក្រុងតៃប៉ិ មានមន្ទិលសង្ស័យថា វិស័យឯកជនប្រហែលជាមិនទទួលយករូបិយវត្ថុឌីជីថលយ៉ន់នេះទេ ដោយសារតែអាជីវកម្មឯកជនភាគច្រើនចាត់ទុកលំហូរសាច់ប្រាក់ថាជារឿងសំខាន់ដែលទាមទារឲ្យមានការប្រយ័ត្នប្រយែងបំផុត។
លោកបាននិយាយថា នៅពេលដែលប្រព័ន្ធបច្ចេកទេសត្រូវបានរៀបចំឡើងពេញលេញ ធនាគារកណ្តាលរបស់ប្រទេសចិននឹងធ្វើការជាមួយនឹងក្រុមហ៊ុនលក់រាយនានា ដើម្បីពង្រីកការប្រើប្រាស់រូបិយវត្ថុឌីជីថលយ៉ន់ ដែលនេះជាជំហានចម្បងមួយដែលនឹងកំណត់ថាតើរូបិយវត្ថុឌីជីថលនេះនឹងត្រូវគេទទួលស្គាល់ទូលំទូលាយប៉ុណ្ណា។
ធនាគារកណ្តាលរបស់ចិនចាត់ទុកកិច្ចប្រឹងប្រែងថ្មីចុងក្រោយបង្អស់នានារបស់ខ្លួននៅក្នុងការដាក់ឲ្យប្រើប្រាស់រូបិយវត្ថុឌីជីថលយ៉ន់នេះ ថាជាយុទ្ធសាស្រ្តឈ្នះឈ្នះសម្រាប់ខ្លួនឯងនិងសម្រាប់ក្រុមហ៊ុនបច្ចេកវិទ្យាហិរញ្ញវត្ថុធំៗរបស់ចិន។ នេះបើតាមការបញ្ជាក់របស់លោក Lin។
លោក Lin បានថ្លែងប្រាប់ VOA ថា៖ «តាមរយៈការសហការជាមួយនឹងធនាគារកណ្តាលរបស់ចិន [ដើម្បីដាក់ឲ្យប្រើប្រាស់នូវរូបិយវត្ថុឌីជីថលយ៉ន់] នេះ ក្រុមហ៊ុនបច្ចេកវិទ្យាហិរញ្ញវត្ថុធំៗទាំងនេះនឹងបានធូរស្បើយពីសម្ពាធនៃការស៊ើបអង្កេតរបស់និយ័តករប្រឆាំងនឹងការក្តោបក្ដាប់ទីផ្សារផ្តាច់មុខ។ ការក្តោបក្ដាប់ទីផ្សារផ្តាច់មុខរបស់ក្រុមហ៊ុនទាំងនេះគឺពិបាកនឹងបំបែកបានណាស់ ដរាបណាមានការលេចឡើងនូវគូប្រជែងដែលខ្លាំងដូចទៅនឹងរូបិយវត្ថុឌីជីថលយ៉ន់ ដើម្បីទាញយកចំណែកទីផ្សារយ៉ាងតិចមួយភាគបី»។
ក្រុមហ៊ុន Ant គ្រប់គ្រងទីផ្សារដែលទូទាត់សាច់ប្រាក់តាមប្រព័ន្ធអេឡិចត្រូនិចចំនួន ៥៤% ចំណែកឯក្រុមហ៊ុន Tencent វិញ ចំនួន ៤០%។
រូបឯកសារ៖ ក្រដាសប្រាក់ ១០០ យ៉ន់ត្រូវបានដាក់ចូលក្នុងម៉ាស៊ីនរាប់ប្រាក់នៅក្នុងឯធនាគារមួយក្នុងទីក្រុងប៉េកាំង ប្រទេសចិន ថ្ងៃទី៣០ ខែមីនា ឆ្នាំ២០១៦។
ការដោះដូរ
លោក Lin បាននិយាយថា នៅក្នុងរយៈពេលខ្លីនិងមធ្យម ការសហការជាមួយនឹងធនាគារកណ្ដាលរបស់ចិនក៏ជាផលប្រយោជន៍របស់ក្រុមហ៊ុនបច្ចេកវិទ្យាហិរញ្ញវត្ថុផងដែរដើម្បីដោះដូរចំណែកទីផ្សាររបស់ខ្លួននៅក្នុងទីផ្សារទូទាត់តាមប្រព័ន្ធអេឡិចត្រូនិចរបស់ចិនជាមួយនឹងការសម្រួលរបស់និយ័តករដល់ប្រតិបត្តិការកម្ចីមីក្រូអនឡាញ ប្រតិបត្តិការគ្រប់គ្រងហិរញ្ញវត្ថុបុគ្គល និងប្រតិបត្តិការធានារ៉ាប់រង ដែលផ្តល់ប្រាក់ចំណេញខ្ពស់ជាងមុន។
លោក Lin បានបន្ថែមថា ទោះបីជាយ៉ាងណាក៏ដោយ នៅក្នុងរយៈពេលវែង ប្រទេសចិននឹងទំនងជាព្យាយាមធ្វើ «ជាតូបនីយកម្ម» លើសេវាកម្មហិរញ្ញវត្ថុភាគច្រើនដូចជាការទូទាត់សាច់ប្រាក់តាមប្រព័ន្ធអេឡិចត្រូនិច ការវាយតម្លៃលើកម្រិតហានិភ័យស្នើសុំឥណទាន ឬក៏ការគ្រប់គ្រងហិរញ្ញវត្ថុជាដើម ដែលឥឡូវនេះកំពុងក្តោបក្តាប់ដោយក្រុមហ៊ុនបច្ចេកវិទ្យាហិរញ្ញវត្ថុឯកជននានា។
គ្មានការបែងចែកច្បាស់លាស់
អ្នកខ្លះយល់ថា ការពន្លឿនផ្នែកឌីជីថលយ៉ាងឆាប់រហ័សរបស់ចិនលើរូបិយវត្ថុយ៉ន់របស់ខ្លួនគឺជាការគំរាមកំហែងមួយដើម្បីបង្កើនការជំរុញឲ្យមានការធ្លាក់ចុះនៃឥទ្ធិពលគ្របដណ្ដប់របស់ប្រាក់ដុល្លារអាមេរិក ដែលជារូបិយប័ណ្ណបម្រុងឈានមុខគេនៅលើពិភពលោក។
ប៉ុន្តែ អ្នកស្រី Anne Stevenson-Yang ដែលជាសហស្ថាបនិកនិងជាប្រធានផ្នែកស្រាវជ្រាវនៃក្រុមហ៊ុន J Capital Research មិនយល់ស្របនោះទេ។
អ្នកស្រីបានថ្លែងថា៖ «ខ្ញុំគិតថា មានការផ្តោតច្រើនជ្រុលលើគំនិតដែលថារូបិយវត្ថុឌីជីថលយ៉ន់ជារូបិយវត្ថុខុសប្លែកទាំងស្រុងមួយនិងដែលមានការប្រជែង។ ខ្ញុំចង់មានន័យថា មិនមានភាពខុសគ្នារវាងរូបិយវត្ថុឌីជីថលយ៉ន់នេះនិងរូបិយវត្ថុយ៉ន់ផ្លូវការនោះទេ»។
អ្នកស្រី Anne បានថ្លែងប្រាប់ VOA តាមទូរស័ព្ទថា៖ «ទោះបីជាមានការប្រកាសជាច្រើនពីរដ្ឋាភិបាលចិនអំពីការបើកគណនីមូលធនដែលជាមូលហេតុដែលរូបិយវត្ថុឌីជីថលយ៉ន់នេះមិនត្រូវបានប្រើប្រាស់ជាអន្តរជាតិក៏ដោយ ក៏វានៅតែមានចំនួនតិចជាង ២% នៃការទូទាត់សាច់ប្រាក់តាមប្រព័ន្ធទូរគមនាគមន៍ហិរញ្ញវត្ថុអន្តរធនាគារពិភពលោកដដែល បើគិតជាតម្លៃ។ មូលហេតុគឺដោយសារតែប្រទេសចិនមិនចង់ដាក់ឲ្យប្រើប្រាស់»។
អ្នកស្រីបានបន្តថា អ្នកស្រីជឿថា រូបិយវត្ថុឌីជីថលយ៉ន់ដែលរដ្ឋាភិបាលចិនគ្រោងដាក់ឲ្យប្រើប្រាស់នេះ គឺសម្រាប់ហេតុផលគ្រប់គ្រងតែប៉ុណ្ណោះ មិនមែនសម្រាប់គំនិតច្នៃប្រឌិតថ្មី ឬក៏សម្រាប់ការប្រជែងជាមួយនឹងប្រាក់ដុល្លារអាមេរិកនោះទេ។
អ្នកស្រី Anne បានបន្ថែមថា សាធារណជនចិននឹងមិនកត់សម្គាល់ឃើញការប្រែប្រួលណាមួយនោះទេ ដោយសារតែប្រព័ន្ធទូទាត់ប្រាក់ Alipay របស់ក្រុមហ៊ុន Ant និងប្រព័ន្ធទូទាត់ប្រាក់ WeChat Pay របស់ក្រុមហ៊ុន Tencent នៅបន្តស្ថិតនៅក្នុងក្រសែភ្នែករបស់អ្នកប្រើប្រាស់ដដែល ចំណែកឯធនាគារកណ្តាលរបស់ចិននឹងទំនងជាដើរតួជាម៉ាស៊ីននៅពីក្រោយប្រព័ន្ធទូទាត់ប្រាក់របស់ក្រុមហ៊ុនទាំងពីរនេះតែប៉ុណ្ណោះ៕
ប្រែសម្រួលដោយលោក ណឹម សុភ័ក្រ្តបញ្ញា