ចុងភៅណាក់ ឬត្រូវបានមនុស្សទូទៅស្គាល់ថា Chef Nak ដែលមានឈ្មោះពិតថា រស់ រតនៈ បានទទួលពាន«សៀវភៅធ្វើម្ហូបល្អបំផុតនៅលើពិភពលោក» នៅក្នុងទីក្រុងរីយ៉ាដ (Riyahd) ប្រទេសអារ៉ាប៊ីសាអូឌីត។ នេះបើតាមការបង្ហោះនៅលើបណ្តាញសង្គមក្នុងទំព័រហ្វេសប៊ុកផ្លូវការរបស់ចុងភៅណាក់កាលពីថ្ងៃពុធ។
អ្នកស្រី រស់ រតនៈ បានសរសេរសារភ្ជាប់ជាមួយវីដេអូដែលបង្ហោះនៅលើបណ្តាញសង្គមថា៖ «ខ្មែរធ្វើបានហើយ!!! យើងទទួលបានជ័យលាភី«សៀវភៅធ្វើម្ហូបល្អបំផុតនៅលើពិភពលោក» ដែលនេះជាមោទនភាពដ៏អស្ចារ្យសម្រាប់ប្រជាជនកម្ពុជាយើងទាំងអស់គ្នា។ ខ្ញុំមានសេចក្តីសោមនស្សរីករាយដែលសៀវភៅធ្វើម្ហូបខ្មែររបស់យើង«សោយ» ដែលជាស្នាដៃរបស់ខ្មែរ បានទទួលពានរង្វាន់ Gourmand Award ដែលសារព័ត៌មានអន្តរជាតិដាក់រហស្សនាមថាជា «ពានរង្វាន់អូស្ការ»ក្នុងវិស័យពានរង្វាន់ធ្វើម្ហូបអាហារ»។
សៀវភៅធ្វើម្ហូបរបស់ចុងភៅណាក់ដែលមានឈ្មោះថា «សោយ»នេះត្រូវបានចំណាយរយៈពេល៤ឆ្នាំក្នុងការចងក្រង ដោយសៀវភៅមួយក្បាលនេះ ពុំគ្រាន់តែជាសៀវភៅធ្វើម្ហូបធម្មតានោះទេ តែវាជាបញ្ជីសារពើភណ្ឌផ្នែកវប្បធម៌អរូបីរបស់ប្រទេសកម្ពុជា ដែលបង្ហាញពីមរតករសជាតិ រូបមន្ត និងគ្រឿងផ្សំ មកពីព្រះរាជដំណាក់ខ្មែរ ដែលបានបន្សល់ទុកជាយូរឆ្នាំមកហើយ។
រូបមន្តទាំងនេះក៏ធ្លាប់បានបោះពុម្ពផ្សាយ និងបង្រៀននៅតាមសាលាក្នុងទីក្រុងភ្នំពេញរវាងទសវត្សរ៍ឆ្នាំ១៩៥០ និង១៩៦០ ដោយសម្តេចព្រះរាជ កន្និដ្ឋា នរោត្តម រស្មីសោភ័ណ។ រូបមន្តចម្អិនភោជនាហារដ៏វិសេសក្រៃលែងនេះ បានកប់ទុកអស់ជាច្រើនទសវត្សរ៍ដោយសារតែសង្រ្គាម និងការវិវឌ្ឍរបស់សម័យកាល។ នេះបើតាមព័ត៌មានលើគេហទំព័ររបស់ចុងភៅណាក់។
អ្នកស្រី រស់ រតនៈ ថ្លែងសុន្ទរកថា ក្រោយឈ្នះពានរង្វាន់សម្រាប់ជ័យលាភី Best of the Best របស់កម្មវិធីពានរង្វាន់ Gourmand ពិភពលោក លើកទី ២៩ នៅប្រទេសអារ៉ាប៊ីសាអូឌីត កាលពីថ្ងៃទី២៩ ខែវិច្ឆិកា ឆ្នាំ២០២៣។ (Facebook/Chef Nak)
ចុងភៅណាក់បានថ្លែងនៅពេលដែលឡើងលើវេទិកាទទួលពានរង្វាន់នោះជាភាសាអង់គ្លេស និងបានប្រែសម្រួលជាភាសាខ្មែរថា៖ «យើងធ្វើនេះដោយសារតែមោទនភាពរបស់យើង ដោយសារតែប្រវត្តិសាស្រ្តដ៏សម្បូរបែបរបស់យើង ហើយខ្ញុំនៅទីនេះដើម្បីប្រាប់អ្នកថា យើងមានអ្វីជាច្រើនណាស់ដែលមិនមែនត្រឹមតែប្រាសាទអង្គរវត្តដ៏ស្រល់ស្អាត ប្រាសាទរបស់យើង ឬខ្សែភាពយន្តរបស់យើងទៅទៀត។ ប៉ុន្តែប្រជាជនកម្ពុជាគឺជាមនុស្សអស្ចារ្យ យើងជាជាតិដែលបានបង្រៀនខ្ញុំថាខ្ញុំជានរណាមានមោទនភាព ហើយឈប់មើលរំលងអ្វីដែលយើងមាន»។
សៀវភៅធ្វើម្ហូប «សោយមរតករសជាតិពីព្រះរាជដំណាក់ខ្មែរ» ជាស្នាដៃទី២ បន្ទាប់ពីសៀវភៅដំបូង«ញ៉ាំ» ហើយសៀវភៅនេះ មានតម្លៃ៣៩ដុល្លារ ជាភាសាខ្មែរ ហើយចំណែកភាសាអង់គ្លេសមានតម្លៃ៤៥ដុល្លារ។
សៀវភៅធ្វើម្ហូប«សោយមរតករសជាតិពីព្រះរាជដំណាក់ខ្មែរ» ក៏រួមចំណែកក្នុងការអភិរក្សការផ្សព្វផ្សាយវប្បធម៌ និងម្ហូបខ្មែរ ដែលជាសេដ្ឋភណ្ឌរបស់ប្រជាជាតិកម្ពុជា និងពិភពលោកទាំងមូលផងដែរ។ នេះបើតាមគេហទំព័ររបស់ចុងភៅណាក់៕