ភ្នំពេញ៖ កុ្រមអ្នកជំនាញផ្នែកសេដ្ឋកិច្ចជាតិ និងអន្ដរជាតិបានពិភាក្សាគ្នាអំពីការចរាចរប្រាក់រៀលនិងប្រាក់ដុល្លារអាមេរិកដ៏ប្រទាញប្រទង់នៅក្នុងប្រទេសកម្ពុជាស្របពេលដែលប្រាក់ដុល្លារបានគ្របដណ្ដប់ ការចរាចរក្នុងទីផ្សារក្នុងស្រុកស្ទើរតែទាំងស្រុង។ កិច្ចពិភាក្សារយៈពេលពីរថ្ងៃដែលគាំទ្រដោយធនាគារជាតិនិងស្ថានទូតបារាំងបានបញ្ចប់នៅល្ងាចថ្ងៃសុក្រនេះក្នុងទីក្រុងភ្នំពេញ។
លោកហង់ ជួនណារ៉ុន រដ្ឋលេខាធិការក្រសួងសេដ្ឋកិច្ចបានថ្លែងថាប្រាក់ដុល្លារតំណាងឲ្យ៩០ភាគរយក្នុងចំណោមការចរាចរសាច់ប្រាក់នៅប្រទេសកម្ពុជា។
លោក ហួត ពុំ អគ្គនាយករងនៃគណៈកម្មការមូលប័ត្រកម្ពុជាបានកត់សម្គាល់ថា ប្រាក់រៀលកម្ពុជាត្រូវ គេនិយមប្រើសម្រាប់តែក្នុងការទូទាត់នូវទំហំទឹកប្រាក់កម្រិតតូចតែប៉ុណ្ណោះ។
«អត្រានៃការប្រើប្រាស់ប្រាក់រៀលនៅក្នុងប្រទេសកម្ពុជា គឺថាចាប់ពីមួយម៉ឺនឬពីរម៉ឺនរៀលឡើងទៅ ប្រជាពលរដ្ឋកម្ពុជា ឬក៏ជនបរទេសផងដែរមាននិន្នាការចាយវាយលុយដុល្លារ។ មានន័យថាបើទោះជាប្រាក់រៀលអាចប្រើជាមធ្យោបាយសម្រាប់ការចាយវាយក៏ប៉ុន្ដែវាត្រូវប្រើសម្រាប់ការទូទាត់ក្នុងទំហំទឹក លុយតូចៗ»។
ទោះជាយ៉ាងណាលោក ហួត ពុំ បានលើកឡើងថា ការប្រើប្រាស់ប្រាក់ដុល្លារអាចនឹងនាំឲ្យមានភាពងាយស្រួលសម្រាប់អ្នកវិនិយោគផ្ទុយទៅវិញការពឹងផ្អែកលើការចរាចរប្រាក់ដុល្លារអាមេរិកខ្លាំងពេកនឹងធ្វើឲ្យបាត់បង់អធិបតេយ្យភាពនៃប្រាក់រៀលរបស់ខ្មែរដែរ។
ប្រទេសកម្ពុជាកំពុងប្រឈមនឹងការប្រើប្រាស់សាច់ប្រាក់ជាច្រើនប្រភេទក្នុងពេលបច្ចុប្បន្ននេះ។ គេសង្កេតឃើញបា្រក់ដុល្លារមានឥទ្ធិពលក្នុងទីផ្សារកម្ពុជា ប្រាក់បាតថៃ ប្រាក់គីបរបស់ឡាវនិងប្រាក់ដុង របស់វៀតណាមក៏មានឥទ្ធិពលក្នុងការទូទាត់ថ្លៃទំនិញនៅតាមតំបន់ព្រំដែនជាប់ប្រទេសទាំងនោះដែរ។ ក៏ប៉ុន្ដែក្រុមអ្នកសេដ្ឋកិច្ចបានផ្ដោតកង្វល់លើការប្រើប្រាស់និងចរាចរណ៍ប្រាក់ដុល្លារអាមេរិកក្នុងទីផ្សារ ប្រទេសកម្ពុជាច្រើនជាងគេ។
ការប្រើប្រាស់ប្រាក់ដុល្លារអាមេរិកយ៉ាងច្រើនសន្ធឹកសន្ធាប់ក្នុងទីផ្សាររបស់ប្រទេសកម្ពុជាបានធ្វើឲ្យប្រទេសនេះទទួលខាតបង់ចន្លោះពី២០ ទៅ ៩០លានដុល្លារជារៀងរាល់ឆ្នាំពីការបោះពុម្ពប្រាក់រៀលថ្មីៗសម្រាប់ចរាចរបន្ថែមទៀត។ នេះបើយោងតាមក្រុមអ្នកសេដ្ឋកិច្ច។
លោក Jayant Menon អ្នកសេដ្ឋកិច្ចជាន់ខ្ពស់របស់ធនាគារអភិវឌ្ឍន៍អាស៊ី លើកឡើងថារដ្ឋាភិបាលកម្ពុជាគួរតែទប់ទល់នឹងសម្ពាធរបស់ប្រាក់ដុល្លារអាមេរិក និងបន្ដការប៉ុនប៉ងបដិដុល្លារូបនីយកម្ម។
ជាមួយគ្នានេះដែរ លោក Michel Dabadie អគ្គត្រួតពិនិត្យរបស់ធនាគារកណ្ដាលប្រទេសបារាំងឲ្យយោបល់ថា ដើម្បីធ្វើបដិដុល្លារូបនីយកម្មបានប្រទេសកម្ពុជាត្រូវតែធ្វើឲ្យប្រាក់រៀលរបស់ខ្លួនមានស្ថេរភាព ហើយ ប្រព័ន្ធធនាគារក្នុងស្រុកត្រូវតែលើកដម្កើងដល់ប្រាក់រៀលជាដើម។
សូមបញ្ជាក់ថា ការចរាចរប្រាក់ដុល្លារអាមេរិកត្រូវបានពេញនិយមចាប់តាំងពីអំឡុងមានវត្តមានអង្គការសហប្រជាជាតិចូលមកជួយរៀបចំការបោះឆ្នោតដោយសេរីនៅកម្ពុជាជាលើកដំបូងនៅឆ្នាំ ១៩៩៣។
លោកស្រីនាវ ចន្ថាណា ទេសាភិបាលរងធនាគារជាតិកម្ពុជា ហាក់ដូចជាយល់ស្របជាមួយលោក Michel Dabadie ដែរថា នៅពេលដែលប្រទេសកម្ពុជាពង្រឹងទំនុកចិត្តលើប្រាក់រៀលក្នុងចំណោមប្រជា ពលរដ្ឋ នៅពេលនោះឥទ្ធិពលរបស់ប្រាក់ដុល្លារនឹងថយចុះជាបណ្ដើរៗជាស្វ័យប្រវត្តិ៕