រដ្ឋ North Carolina — ពលរដ្ឋខ្មែរអាមេរិកាំងនៅតាមបណ្តារដ្ឋមួយចំនួន សង្ឃឹមថា ប្រធានាធិបតីសហរដ្ឋអាមេរិកលោក Donald Trump អាចនឹងបានធូរស្រាលពីជំងឺកូវីដ១៩ ដែលនោះគឺការទុកចិត្តទៅលើពេទ្យ លើប្រព័ន្ធសុខាភិបាលអាមេរិក រួមទាំងការរកឃើញជំងឺក្នុងខ្លួនលោកប្រធានាធិបតីភ្លាមៗ នៅពេលដែលលោកនិងភរិយា កំពុងមានសុខភាពធម្មតា។
លោក ឡារី សេង ពលរដ្ឋខ្មែរអាមេរិកាំង រស់នៅក្នុងទីក្រុងសៀអាថុល (Seattle) រដ្ឋវ៉ាស៊ីនតោន (Washington) បានថ្លែងថា អ្នកជំងឺកូវីដ១៩ អាចជាសះស្បើយ បើដឹងទាន់ពេល បើបុគ្គលនោះមិនមានជំងឺផ្សេង គឺដូចជាសាច់ញាតិរបស់លោក ម្នាក់វ័យជាង ៥០ ឆ្នាំ ដែលបានកើតជំងឺនេះ តែបានជាសះស្បើយ និងមានសុខភាពល្អឡើងវិញដូច្នេះដែរ។
«ចំណែកប្រធានាធិបតីនិងលោកជំទាវហ្នឹង ខ្ញុំក៏មានជំនឿអីចឹងដែរ ព្រោះខ្ញុំឃើញពួកគាត់មានសុខភាពល្អបរិបូរ ហើយអាចព្យាបាលទាន់ពេលវេលា»។
លោក ឡារី មិនបានបញ្ជាក់លម្អិតអំពីស្ថានភាពសាច់ញាតិរបស់លោក ដែលធ្លាប់កើតជំងឺនេះទេ ដោយសារនេះជារឿងឯកជនរបស់សាច់ញាតិលោក ដែលលោកមិនអាចផ្តល់ព័ត៌មានជូនបាន។
លោក សេក កុសល ពលរដ្ឋម្នាក់នៅក្នុងទីក្រុងមីនីអាប៉ូលិស (Minneapolis) រដ្ឋមីនីសូតា (Minnesota) បានថ្លែងថា លោកជឿថា វេជ្ជបណ្ឌិតនិងប្រព័ន្ធសុខាភិបាលនៅសហរដ្ឋអាមេរិកដែលលោកមានការជឿជាក់ នឹងដោះស្រាយបានចំពោះជំងឺកូវីដ១៩ របស់លោក Trump និងភរិយារបស់លោក។
«ប្រព័ន្ធការពារ ប្រព័ន្ធសុខភាពនៅស្រុកនេះ គេមានអ្នកទទួលខុសត្រូវច្រើន ហើយពិសេសលោក ដូណាល់ ត្រាំ មិនមែនចង់ថាគាត់មានសិទ្ធិលើសយើងជាប្រជាពលរដ្ឋទូទៅទេ តែខ្ញុំជឿថា ប្រព័ន្ធសុខភាព ពេទ្យជុំវិញដែលថាកំពុងការពារគាត់ជុំវិញហ្នឹង គេកំពុងយកចិត្តទុកដាក់គាត់ ២៤ ម៉ោង»។
លោកប្រធានាធិបតី Donald Trump បានទៅដល់មន្ទីរពេទ្យយោធាជាតិ Walter Reed ដោយធ្វើដំណើរតាមឧទ្ធម្ភាគចក្រ Marine One ចាកចេញពីសេតវិមានកាលពីល្ងាចថ្ងៃសុក្រ ដើម្បីសម្រាកព្យាបាលជំងឺកូវីដ១៩ រយៈពេល «ពីរបីថ្ងៃ» ដែលជាវិធានការការពារ និងស្របតាមការណែនាំរបស់គ្រូពេទ្យនិងក្រុមវេជ្ជបណ្ឌិតជំនាញ។
ប្រធានាធិបតីសហរដ្ឋអាមេរិកលោក Donald Trump លើកដៃដាក់អ្នកសារព័ត៌មាន ខណៈលោកត្រៀមធ្វើដំណើរចាកចេញពីសេតវិមាន ទៅកាន់មន្ទីរពេទ្យយោធាជាតិ Walter Reed បន្ទាប់ពីលោកបានធ្វើតេស្តរកឃើញថា បានឆ្លងជំងឺកូវីដ១៩ នៅរដ្ឋធានីវ៉ាស៊ីនតោន ថ្ងៃសុក្រ ទី២ ខែតុលា ឆ្នាំ២០២០។
លោកប្រធានាធិបតី Trump បានដើរចេញពីសេតវិមាន ហើយបានលើកមេដៃឡើងលើ (ដែលបង្ហាញស្មារតីល្អ) ប៉ុន្តែលោកមិនបាននិយាយអ្វីនោះទេ។ ក្រុមអាកាសយានិក ក្រុមអង្គរក្សការពារប្រធានាធិបតី និងបុគ្គលិកសេតវិមាន បានពាក់ម៉ាស់ដើម្បីការពារពីការឆ្លងជំងឺកូវីដ១៩ នៅពេលលោកប្រធានាធិបតី Trump ឡើងឧទ្ធម្ភាគចក្រ។
នៅពេលបង្ហាញមុខដំបូងកាលពីថ្ងៃសៅរ៍ តាមរយ:វីដេអូឃ្លីបចំនួនជាង ៤ នាទី ក្រោយពេលមួយថ្ងៃនៃការសម្រាកព្យាបាលនៅមន្ទីរពេទ្យ លោក Trump បានអះអាងប្រាប់ពលរដ្ឋថា លោកបានធូរស្បើយ តែនៅរង់ចាំមើលពីរឬបីថ្ងៃទៀត ដែលជាដំណាក់កាលសំខាន់នៃជំងឺនេះ។
«ខ្ញុំកំពុងចាប់ផ្តើមមានអារម្មណ៍ស្រួល។ យើងមិនដឹងទេក្នុងរយ:ពេលប៉ុន្មានថ្ងៃទៀត។ ខ្ញុំគិតថា នោះគឺជាដំណាក់កាលសំខាន់ពិតប្រាកដ ដូច្នេះយើងនឹងឃើញអ្វីដែលនឹងកើតឡើងនៅក្នុងរយ:ពេលប៉ុន្មានថ្ងៃខាងមុខទៀតនេះ»។
ក្រៅពីបញ្ជាក់ថានឹងមានភាពអស្ចារ្យដែលជាព្រះពរពីព្រះជាម្ចាស់នោះ លោក Trump ថា លោកនឹងចេញពីមន្ទីរពេទ្យក្នុងពេលឆាប់ៗ ដើម្បីបន្តយុទ្ធនាការរកសម្លេងឆ្នោតរបស់លោក ដូចដែលបានគ្រោងទុក និងបន្តកិច្ចការរបស់លោក។
លោក ធីម៉ូធី ឈឹម មកពីក្រុងនូអិត (Nanuet) រដ្ឋញូវយ៉ក បានថ្លែងថា លោកបន់ស្រន់ជូនលោក Trump ឲ្យបានឆាប់ជាសះស្បើយ។
«គ្រាន់តែថាក្នុងនាមជាខ្មែរ ខ្ញុំឃើញគាត់បានធ្វើការមួយចំនួនធំបានច្រើន មើលទៅគាត់បានធ្វើការបានច្រើនមែន តែយើងចូលចិត្តឬមិនចូលចិត្តជារឿងយើងទេណា។ អីចឹងខ្ញុំសូម (បួងសួង) ឲ្យគ្រួសារលោកប្រធានាធិបតីហ្នឹងឆាប់ជាសះស្បើយទៅ»។
លោក ធីម៉ូធី មិនបានបញ្ជាក់ថាកិច្ចការអ្វីដែលលោក Trump បានធ្វើទេ តែលោកលើកឡើងអំពីលំនឹងសេដ្ឋកិច្ច សន្តិសុខ និងនយោបាយក្នុងសង្គមជាដើម ដែលលោក Trump ត្រូវដោះស្រាយទាំងក្នុងប្រទេស និងនៅលើពិភពលោក។
«បើឆាប់ជា ខ្ញុំថាសប្បាយជាង ដោយសារប្រទេសហ្នឹងវាអត់មានការរកាំរកូសអីចឹង»។
បដាដ៏ធំមួយបង្ហាញសារបន់ស្រន់ឲ្យប្រធានាធិបតីសហរដ្ឋអាមេរិក Donald Trump និងភរិយាគឺលោក Melania Trump ឆាប់ជាសះស្បើយពីជំងឺ នៅទិក្រុង Tel Aviv ប្រទេសអ៊ីស្រាអែល ខណៈមានការបាតុកម្មប្រឆាំងលោកប្រធានាធិបតីអ៊ីស្រាអែល Benjamin Netanyahu ថ្ងៃទី៣ ខែតុលា ឆ្នាំ២០២០។
ការថ្លែងដូច្នេះទំនងជានិយាយយោងទៅដល់បាតុកម្មពាសពេញសហរដ្ឋអាមេរិកពាក់ព័ន្ធនឹងការរើសអើងជាតិសាសន៍ ទាមទារយុត្តិធម៌ ផ្លាស់ប្តូរការដឹកនាំ និងច្បាប់ ដែលកើតឡើងជាច្រើនខែមកហើយ ក៏ដូចជាបញ្ហាអត់ការងារធ្វើដោយសារវិបត្តិកូវីដ១៩ បញ្ហានយោបាយដែលអ្នកនយោបាយអាមេរិកមានភាពរកាំរកូសជាមួយគ្នានៅមុនពេលបោះឆ្នោតថ្ងៃទី ៣ ខែវិច្ឆិកាខាងមុខ ទាក់ទិននឹងការប្រជែងយកប្រជាប្រិយភាព ជាពិសេសរវាងបេក្ខជនប្រធានាធិបតីនៃគណបក្សទាំងពីរ គឺលោកប្រធានាធិបតី Donald Trump នៃគណបក្សសាធារណរដ្ឋ និងលោកអតីតអនុប្រធានាធិបតី Joe Biden នៃគណបក្សប្រជាធិបតេយ្យ។
ប៉ុន្តែលោក ម៊ុយ ចំរើន ខ្មែរអាមេរិកាំងមកពីរដ្ឋម៉ារីឡែន (Maryland) បានថ្លែងថា លោក Trump នឹងត្រូវគេអាណិត ហើយការរិះគន់និងវាយប្រហារគ្នា ក៏នឹងកាត់បន្ថយផងដែរ ដោយបែរមកគិតគូររឿងផ្សះផ្សាវិញ។
«ម្ល៉ោះហើយគ្រាន់តែប៉ុណ្ណឹងគេបំភ្លេចចោល ហើយឥឡូវនេះគេនិយាយស្រួលជាមួយគ្នា គេសុំទោសគ្នា គេស្រណោះ(គ្នា)»។
លោក សេក កុសល មកពីរដ្ឋមីនីសូតា បានយល់ស្រប ហើយបញ្ជាក់បន្ថែមថា ពលរដ្ឋអាមេរិកាំងនឹងបង្ហាញឲ្យឃើញពីស្មារតីជាតិ ក្នុងឱកាសដែលមានបញ្ហាជាតិធំៗ ដែលត្រូវគិតគូររួមគ្នា ដូចជាជំងឺកូវីដ១៩ នេះដូច្នេះដែរ ទោះជាមានការមិនចុះសម្រុងគ្នាផ្នែកនយោបាយក្តី។
«គេនឹងមានភាពស្រឡាញ់ មានការយល់ដឹង មានការអធ្យាស្រ័យឲ្យគ្នាទៅវិញទៅមកច្រើនជាងខែមុន ច្រើនជាង ២ ឬ ៣ ខែមុនទៀត»។
លោកបន្តថា ប្រសិនបើលោក Trump បានជាសះស្បើយ នោះលោកនិងរដ្ឋបាលលោកនឹងទទួលបានការគាំទ្រកាន់តែខ្លាំង ហើយប្រព័ន្ធសុខាភិបាលនឹងកាន់តែមានការជឿជាក់លើកាន់តែខ្លាំង។
លោក ឡារី សេង មកពីទីក្រុងសៀអាថុល បានបង្ហាញពីការកោតសរសើរចំពោះលោក Trump ដែលគិតគូរដល់ពលរដ្ឋខ្លួនយ៉ាងដិតដល់ ក្នុងអំឡុងពេលដែលប្រទេសកំពុងមានវិបត្តិកូវីដ១៩។
«ខ្ញុំត្រេកអរណាស់ដូចថា សហរដ្ឋអាមេរិកដូចថាទោះនៅក្នុងពេលវេលាមួយដ៏លំបាកយ៉ាងនេះក្តី អ្នកដឹកនាំគេនៅតែគិតគូររឿងពលរដ្ឋរបស់គេហ្នឹងខ្លាំងណាស់ ដូចថាគេព្យាយាមផ្គត់ផ្គង់ពលរដ្ឋគេហ្នឹង ធ្វើម៉េចឲ្យបានរស់នៅត្រឹមត្រូវ»។
ក្រៅពីទទួលបានការបួងសួងពីមេដឹកនាំនយោបាយចម្រុះគណបក្ស លោក ត្រាំ ទទួលបានការបួងសួងជូនពរពីក្រុមមេដឹកនាំពិភពលោក រួមទាំងលោកនាយករដ្ឋមន្ត្រី ហ៊ុន សែន នៃប្រទេសកម្ពុជាផងដែរ ដើម្បីឲ្យលោកបានឆាប់ជាពីជំងឺកូវីដ១៩ ផងដែរ។
បើតាមតួលេខពីសាកលវិទ្យាល័យ John Hopkins មកទល់នឹងថ្ងៃអាទិត្យនេះ ជំងឺកូវីដ១៩ ដែលផ្ទុះឡើងដំបូងនៅក្នុងទីក្រុងវូហាន ប្រទេសចិន បានសម្លាប់មនុស្សប្រមាណ ២ សែន ១ ម៉ឺននាក់ និងបានឆ្លងដល់មនុស្សជាង ៧ លាន ៣ សែននាក់ នៅក្នុងសហរដ្ឋអាមេរិក។ ដោយឡែក ជំងឺនេះបានសម្លាប់មនុស្សជាង ១ លាននាក់ និងបានឆ្លងដល់មនុស្សជិត ៣៥ លាននាក់ នៅលើពិភពលោក៕