ភ្នំពេញ៖ មន្ត្រីជាន់ខ្ពស់របស់អង្គការសហប្រជាជាតិទទួលបន្ទុកសាលាក្តីខ្មែរក្រហមនិងរដ្ឋាភិបាលកម្ពុជានៅថ្ងៃពុធនេះបានសន្យារួមគ្នាថានឹងរកដំណោះស្រាយជុំវិញបញ្ហាកង្វះខាតថវិកាសម្រាប់ទ្រទ្រង់សាលាក្តីខ្មែរក្រហមឆ្នាំ២០១៣ក្នុងគោលបំណងដើម្បីស្វែងរកយុត្តិធម៌លើបទឧក្រិដ្ឋដែលបានកើតមានឡើងក្នុងរបបកម្ពុជាប្រជាធិបតេយ្យ។
ការសន្យានេះបានកើតមានឡើងបន្ទាប់ពីជំនួបគ្នាមួយនៅក្នុងទីក្រុងភ្នំពេញ រវាងលោក ដេវិដ សេហ័្វរ ជំនាញការពិសេសរបស់អគ្គលេខាធិការអង្គការសហប្រជាជាតិ (អ.ស.ប) ទទួលបន្ទុកសាលាក្តីខ្មែរក្រហមនិងលោកឧបនាយករដ្ឋមន្ត្រី សុខ អាន រដ្ឋមន្ត្រីទីស្តីការគណៈរដ្ឋមន្ត្រីនិងជាប្រធានក្រុមការងាររបស់រដ្ឋាភិបាលសម្រាប់សាលាក្តីខ្មែរក្រហម។
នៅក្នុងសេចក្តីថ្លែងការណ៍រួមគ្នារវាងភាគីកម្ពុជានិងអង្គការសហប្រជាជាតិដែលបានចេញផ្សាយនៅថ្ងៃពុធនេះភាគីទាំងពីរបានប្តេជា្ញថានឹងរិះរកដំណោះស្រាយជុំវិញកង្វះខាតថវិកាសម្រាប់ទ្រទ្រង់សាលាក្តីខ្មែរក្រហម។
លោកឯក ថា អ្នកនាំពាក្យអង្គភាពព័ត៌មាននិងប្រតិកម្មរហ័សនៃទីស្តីការគណៈរដ្ឋមន្ត្រីមិនបានធ្វើអត្ថាធិប្បាយបន្ថែមទៀតទេជុំវិញលទ្ធផលក្រោយពីជំនួប។
ភាគីកម្ពុជានិងភាគីអន្តរជាតិត្រូវការថវិកាចំនួន៣៥លានដុល្លារសហរដ្ឋអាមេរិកដើម្បីទ្រទ្រង់សាលាក្តីខ្មែរក្រហម សម្រាប់ឆ្នាំ២០១៣ ក្នុងនោះភាគីកម្ពុជាត្រូវការថវិកាចំនួន៩,៤លានដុល្លារសហរដ្ឋអាមេរិកចំណែកភាគីអន្តរជាតិត្រូវការថវិកាចំនួន២៦លានដុល្លារសហរដ្ឋអាមេរិក។
លោកនេត្រ ភ័ត្រា អ្នកនាំពាក្យសាលាក្តីខ្មែរក្រហមបាននិយាយថាសម្រាប់ភាគីជាតិយើងទើបទទួលបានចំនួន២,៥លានដុល្លារសហរដ្ឋអាមេរិកតែប៉ុណ្ណោះ។ក្នុងនោះមានថវិកាបដិភាគរបស់រដ្ឋាភិបាលចំនួន១,៨លានដុល្លារនិងថវិកាចំនួន៧សែនដុល្លារទទួលបានពីប្រទេសអាល្លឺម៉ង់សម្រាប់ទ្រទ្រង់លើអង្គភាពគាំពារជនរងគ្រោះ។
«ដោយឡែកសម្រាប់ភាគីអន្តរជាតិគាត់មានថវិកាអាចដំណើរការរហូតទៅដល់ខែ៦ឆ្នាំ២០១៣នេះ
ចំណែកឯភាគីជាតិយើងគឺនៅខ្វះថវិកាប្រមាណ៧លានដុល្លារទៀតដើម្បីយកមកចំណាយហើយជាពិសេសទាក់ទងជាមួយនឹងប្រាក់បៀវត្សរ៍របស់មន្ត្រីបុគ្គលិកជាតិទាំង២៧០នាក់ជាង»។
កាលពីថ្ងៃទី៤ខែមីនានេះបុគ្គលិកអ្នកបកប្រែភាសាបរទេសនៅក្នុង សាលាក្តីខ្មែរក្រហមចំនួនប្រមាណ៣០នាក់បានធ្វើពហិការមិនធ្វើ ការងារដ៏គួរឲ្យភ្ញាក់ផ្អើលមួយនៅក្នុងពេលបើកសវនាការក្នុងខណៈពេល ដែលសាលាក្តីកំពុងដំណើរការលើសំណុំរឿង០០២។
ការធ្វើពហិការមិនចូលបម្រើការងារនេះដោយសារតែពួកគេមិនទាន់ទទួលបានប្រាក់បៀវត្សរ៍តាំងពីខែធ្នូឆ្នាំ២០១២ក៏ប៉ុន្តែកាលពីថ្ងៃច័ន្ទដើមសប្តាហ៍នេះពួកគេបានសម្រេចចិត្តចូលបំពេញការងាររបស់ខ្លួនវិញបន្ទាប់ពីមានការសន្យាពីការិយាល័យរដ្ឋបាលរបស់សាលាក្តីថានឹងបើកប្រាក់បៀវត្សរ៍សម្រាប់ខែធ្នូដល់ពួកគេ។
បញ្ហាកង្វះខាតសម្រាប់ទ្រទ្រង់សាលាក្តីខ្មែរក្រហមរបស់ភាគីកម្ពុជាបានធ្វើឡើងក្នុងពេលដែលសាលាក្តីប្រល័យពូជសាសន៍ដោយមានការគាំទ្រពីអង្គការសហប្រជាជាតិបានចាប់ផ្តើមដំណើរការលើសំណុំរឿង០០២ដែលមានជនជាប់ចោទចំនួន៤នាក់គឺអៀង សារីអតីតរដ្ឋមន្ត្រីក្រសួងការបរទេសដែលទើបបានស្លាប់បាត់បង់ជីវិតដោយសារជំងឺកាលពីថ្ងៃព្រហស្បតិ៍សប្តាហ៍មុន ភរិយារបស់លោកគឺអ្នកស្រី អៀង ធីរិទ្ធ អតីតរដ្ឋមន្ត្រីក្រសួងសង្គមកិច្ច លោកខៀវ សំផន អតីតប្រមុខរដ្ឋ និងមេមនោគមន៍វិជ្ជា នួន ជា អតីតប្រធានរដ្ឋសភានៅក្នុងរបបកម្ពុជាប្រជាធិបតេយ្យ។
ចាប់តាំងពីឆ្នាំ២០០៦រហូតមកដល់ឆ្នាំ២០១២សាលាក្តីខ្មែរក្រហមទាំងភាគីជាតិនិងអន្តរជាតិបានចំណាយថវិកាសរុបចំនួន១៧៣,៣លានដុល្លារក្នុងនោះភាគីអន្តរជាតិចំណាយថវិកាអស់១៣១,២លានដុល្លារហើយភាគីជាតិចំណាយអស់៤២,១លានដុល្លារ។
ប្រទេសដែលបានផ្តល់ជំនួយដល់សាលាក្តីខ្មែរក្រហមចាប់តាំងពីឆ្នាំ២០០៦មក រួមមានប្រទេសជប៉ុនបានផ្តល់វិភាគទានស្ម័គ្រចិត្តចំនួន៧៩លានដុល្លារគឺស្មើប្រមាណ៤៤%នៃថវិកាចំណាយសរុប
នៅក្នុងសាលាក្តីហើយក្រៅពីនោះមានសហរដ្ឋអាមេរិក អូស្តា្រលី អាល្លឺម៉ង់ អង់គ្លេស និងប្រទេសបារាំង៕