ភ្នំពេញ៖ លោកឯម សំអាន រដ្ឋមន្ត្រីស្តីទីរបស់ក្រសួងមហាផ្ទៃ នៅថ្ងៃច័ន្ទនេះបានចុះហត្ថលេខាលើសេចក្តីប្រកាសមួយដើម្បីសម្រេចបណ្តេញចេញជនជាតិចិនតៃវ៉ាន់ និងចិនដីគោគចំនួន៥៣នាក់ជាលើកដំបូងចេញពីកម្ពុជា បន្ទាប់ពីបានចាប់ខ្លួនកាលពីសប្តាហ៍មុន។ នេះបើតាមការបញ្ជាក់ពីមន្ត្រីជាន់ខ្ពស់ក្រសួងមហាផ្ទៃ។
អាជ្ញាធររដ្ឋាភិបាលកម្ពុជា កាលពីថ្ងៃសៅរ៍ បានឆ្មក់ចូលចាប់ជនជាតិចិនតៃវ៉ាន់ និងចិនដីគោកប្រមាណ៨០នាក់នៅក្នុងខ័ណ្ឌចំនួនបួនគឺខ័ណ្ឌចំការមន ឬស្សីកែវ ទួលគោក និងខ័ណ្ឌមានជ័យ កណ្តាលក្រុងភ្នំពេញពីបទសង្ស័យថា ជាប់ពាក់ព័ន្ធការចាប់ជម្រិតជនរងគ្រោះតាមរយៈប្រព័ន្ធអ៊ីនធីណែតឆ្លងដែន។
លោកឧត្តមសេនីយ៍ឯកខៀវ សុភ័គ្រ អ្នកនាំពាក្យក្រសួងមហាផ្ទៃបាននិយាយថា ជនជាតិចិនដីគោក១២នាក់ និងចិនតៃវ៉ាន់៤១នាក់ត្រូវបានលោកឯម សំអាន រដ្ឋមន្ត្រីស្តីទីនៃក្រសួងមហាផ្ទៃបានចុះហត្ថលេខា ជាលើកដំបូងបណ្តេញចេញពីកម្ពុជាហើយនៅថ្ងៃច័ន្ទនេះ។
លោកបាននិយាយថា ចំពោះជនជាតិចិនដែលនៅសេសសល់២៧នាក់ទៀត លោកនឹងចុះហត្ថលេខាបណ្តេញចេញជាបន្តបន្ទាប់នាពេលខាងមុខនេះ។
លោកមានប្រសាសន៍ថា មន្ត្រីសមត្ថកិច្ចកោះតៃវ៉ាន់ និងចិនដីគោកបានមកដល់ប្រទេសកម្ពុជាហើយដើម្បីនាំខ្លួនជនជាតិចិនទាំងនោះទៅទទួលទោសនៅក្នុងប្រទេសសាម៉ីរបស់ពួកគេ ក៏ប៉ុន្តែលោកមិនបានបញ្ជាក់ថា កម្ពុជានឹងបញ្ជួនពួកគេនៅពេលណាទេ។ លោកគ្រាន់តែបានអះអាងថា តាមច្បាប់រយៈពេលតែពីរថ្ងៃប៉ុណ្ណោះបន្ទាប់ពីបានចុះហត្ថលេខា។
«ទៅប្រទេសសាម៉ីរបស់គេវិញ តៃវ៉ាន់គាត់ទទួលទៅហើយ ចិនដីគោកក៏ទទួលទៅ ពីព្រោះមន្ត្រីតៃវ៉ាន់បានធ្វើកិច្ចការងារហ្នឹងជាមួយភាគីតៃវ៉ាន់ដែរក្នុងនាមគាត់ជាអ្នកប្រចាំការអចិន្ត្រៃយ៍របស់តៃវ៉ាន់នៅក្នុងប្រទេសវៀតណាមដែលគាត់មកធ្វើការជាមួយយើង»។
ប្រទេសកម្ពុជា និងសារធារណរដ្ឋប្រជាមានិតចិនមានទំនាក់ទំនងយ៉ាងជិតស្និទ្ធជាមួយគ្នាជាយូរមកហើយពាក់ព័ន្ធនឹងការបង្ក្រាបឧក្រិដ្ឋកម្មឆ្លងដែន ទំនាក់ទំនងការទូត និងសេដ្ឋកិច្ច។
កន្លងមក កម្ពុជាធ្លាប់បានចាប់បញ្ជូនជនជាតិតៃវ៉ាន់ប្រមាណជិត២០០នាក់កាលពីអំឡុងឆ្នាំ២០១១ ពាក់ព័ន្ធនឹងការចាប់ជម្រិតតាមប្រព័ន្ធអ៊ីនធឺណេតហើយជនរងគ្រោះភាគច្រើនរស់នៅកោះវ៉ាន់ និងប្រទេសចិនដីគោគ។
កន្លងមក កម្ពុជាធ្លាប់បានចាប់បញ្ជូនជនជាតិតៃវ៉ាន់ប្រមាណជិត២០០នាក់កាលពីអំឡុងឆ្នាំ២០១១ ពាក់ព័ន្ធនឹងការចាប់ជម្រិតតាមប្រព័ន្ធអ៊ីនធឺណេតហើយជនរងគ្រោះភាគច្រើនរស់នៅកោះវ៉ាន់ និងប្រទេសចិនដីគោគ។
ជនជាតិចិនដីគោគ និងចិនតៃវ៉ាន់ដែលធ្លាប់បានប្រព្រឹត្តអំពើឆបោកតាមរយៈ ប្រព័ន្ធអ៊ីធឺណិត ដែលហៅកាត់ថា VoIPភាគច្រើនបានកើតមានឡើងនៅតាមបណ្តាប្រទេសអាស៊ានមួយចំនួន ដែលរួមមានកម្ពុជា ហ្វ៊ីលីពីន ឥណ្ឌូនេស៊ី ម៉ាឡេស៊ី និងថៃ។
យ៉ាងតិចមានមនុស្សប្រមាណជាងមួយពាន់នាក់ ដែលភាគច្រើនជាជនជាតិចិនដីគោក និងចិនតៃវ៉ាន់ត្រូវបានអាជ្ញាធរនៃបណ្តាប្រទេសអាស៊ានមួយចំនួនចាប់ខ្លួនពីបទពាក់ព័ន្ធនឹងអំពើឆបោក និងឧក្រិដ្ឋកម្មឆ្លងដែន៕