អគ្គនាយកដ្ឋានពន្ធដារព្រមានចាត់វិធានការផ្លូវច្បាប់លើឧកញ៉ា ស៊ី គង់ទ្រីវ អ្នករកស៊ីមុខជំនួញច្រើននៅកម្ពុជា ប្រសិនបើមិនចូលមកទូទាត់បំណុលពន្ធក្នុងរយៈពេល ១៥ ថ្ងៃ។ នេះបើតាមលិខិតមួយច្បាប់ចុះថ្ងៃទី ១៩ ខែឧសភារបស់អគ្គនាយកដ្ឋានពន្ធដារ ដែល VOA ទទួលបាន។
លិខិតបញ្ជាក់ថា អគ្គនាយកដ្ឋានធ្លាប់បានអញ្ជើញក្រុមហ៊ុនឲ្យមកបង់ពន្ធម្តងហើយ តែក្រុមហ៊ុនមិនទាន់ចូលមកដោះស្រាយនៅឡើយទេ។ លិខិតដែលត្រូវបានបង្ហោះលើទំព័រហ្វេសប៊ុករបស់អគ្គនាយកដ្ឋានពន្ធដារឲ្យដឹងថា អគ្គនាយកដ្ឋានពន្ធដារអញ្ជើញលោកឧកញ៉ា ស៊ី គង់ទ្រីវ នាយកក្រុមហ៊ុន ខេ ធី ប៉ាស៊ីហ្វិកគ្រុបលីមីធីត ដើម្បីដោះស្រាយបំណុលពន្ធរបស់ក្រុមហ៊ុនម្តងទៀត។
អគ្គនាយកដ្ឋានមិនបានបញ្ជាក់អំពីទឹកប្រាក់នៃបំណុលពន្ធ និងមិនបានបង់ពន្ធលើការរកស៊ីអ្វីខ្លះនោះទេ ហើយក៏មិនបានបញ្ជាក់ថា តើឧកញ៉ា ស៊ី គង់ទ្រីវ ដែលគេស្គាល់ថាជាម្ចាស់មជ្ឈមណ្ឌលម៉ុងឌីយ៉ាល់ មិនបានបង់ពន្ធតាំងពីពេលណានោះទេ។
នៅក្នុងលិខិតនោះ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារ លោក គង់ វិបុល បានកំណត់ឲ្យលោកឧកញ៉ា ស៊ី គង់ទ្រីវ ដែលធ្លាប់ជាសមាជិកព្រឹទ្ធសភាគណបក្សប្រជាជនកម្ពុជា កាលពីឆ្នាំ ២០០៦ ចូលទៅដោះស្រាយបំណុលពន្ធរដ្ឋនៅអគ្គនាយកដ្ឋានពន្ធដារមិនឲ្យលើសពី ១៥ ថ្ងៃ។
លិខិតដដែលបញ្ជាក់តាមន័យដើមថា៖ «ក្នុងករណីមិនបានអញ្ជើញមកតាមកាលកំណត់ខាងលើនេះទេ ឧកញ៉ានាយកត្រូវចាត់ទុកថាបានប្រព្រឹត្តបទល្មើសព្រហ្មទណ្ឌលើបទបញ្ញត្តិស្ដីពីពន្ធដារ ដូចមានចែងក្នុងមាត្រា ១២៧ មាត្រា ១៣៥ និងមាត្រា ១៣៦ នៃច្បាប់សារពើពន្ធ ហើយអគ្គនាយកដ្ឋាននឹងចាត់វិធានការតាមផ្លូវច្បាប់ប្ដឹងទៅតុលាការ ដើម្បីផ្ដន្ទាទោសតាមច្បាប់ជាធរមាន»។
មាត្រា ១៣៥ និងមាត្រា ១៣៦ នៃច្បាប់ស្តីពីសារពើពន្ធ ចែងថា បុគ្គលគេចវេសពន្ធនឹងប្រឈមជាប់ពន្ធនាគារពី ១ ឆ្នាំទៅ ៥ ឆ្នាំ។
VOA មិនអាចទាក់ទងលោក គង់ វិបុល អគ្គនាយកនៃអគ្គនាយកដ្ឋានពន្ធដារបាននៅឡើយទេ។
VOA ក៏មិនទាន់អាចទាក់ទងលោកឧកញ៉ាស៊ី គង់ទ្រីវ បានដែរ។ ចំណែកលេខទូរស័ព្ទទំនាក់ទំនងលើគេហទំព័រក្រុមហ៊ុន ខេ ធី ប៉ាស៊ីហ្វិក គ្រុបលីមីធីត របស់លោកឧកញ៉ា ស៊ី គង់ទ្រីវ ក៏ VOA មិនអាចទាក់ទងបានដែរ។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី មានប្រសាសន៍ថា ការអនុវត្តច្បាប់ពន្ធនៅកម្ពុជាមានភាពខ្វះចន្លោះ ព្រមទាំងការអនុវត្តការបង់ពន្ធ «បែបបក្ខពួកនិយម» បណ្តាលឲ្យអ្នកមានជំនួញធំៗមួយចំនួន មិនខ្វល់ខ្វាយក្នុងការបង់ពន្ធ។ លោកបន្តថា ការគេចវេសមិនបង់ពន្ធ ជាពិសេសអ្នកជំនួញធំៗធ្វើឲ្យកម្ពុជាបាត់បង់ចំណូលថវិកាជាតិ សម្រាប់ការប្រើប្រាស់ក្នុងការអភិវឌ្ឍប្រទេស។
«ដោយសារប្រទេសយើងជាប្រទេសមួយដែលអ្នករកស៊ីក្តីអ្នកនយោបាយក្តី គាត់ធ្វើការនៅក្នុងប្រព័ន្ធមួយដែលហៅថាប្រព័ន្ធខ្សែបក្ខពួកនិយម។ អ៊ីចឹងកាលណាអ្នកដែលធ្វើអាជីវកម្មធំៗ ភាគច្រើនគាត់ព្យាយាមបញ្ចៀសការបង់ពន្ធនៅក្នុងទំហំទឹកប្រាក់ធំៗហ្នឹង ដោយគាត់ប្រើវិធីផ្សេងវិញ តាមរយៈការសម្របសម្រួលពន្ធ តាមរយៈការជួយធ្វើអន្តរាគមន៍ពីបណ្តាញខ្សែស្រឡាយប្រព័ន្ធ ដែលគាត់មានហ្នឹង»។
លោក ប៉ិច ពិសី ជំរុញឲ្យស្ថាប័នមានសមត្ថកិច្ចអនុវត្តឲ្យបានម៉ឺងម៉ាត់ និងស្មើភាពសម្រាប់អ្នកបង់ពន្ធដើម្បីផ្តល់ទំនុកចិត្តដល់អ្នកជំនួញទាំងជាតិ និងអន្តរជាតិ។
«យើងបានធ្វើការពិភាក្សាជាមួយខាងអាជីវកម្មច្រើនហ្នឹង គឺគាត់បានលើកឡើងអំពីការមិនស្មើភាពគ្នាក្នុងការបង់ពន្ធហ្នឹង។ អ្នកខ្លះគេចពន្ធបាន អ្នកខ្លះអត់អាចមានលទ្ធភាពគេចទេ។ អ៊ីចឹងបង្កើតបរិយាកាសរកស៊ីមួយដែលអត់ស្មើភាព ហើយបង្កើតជាក្រុមបក្ខពួក។ បើយើងចង់រកស៊ីដូចគេដូចឯង ទាល់តែយើងចូលក្រុមមានបក្ខមានពួក ទៅ …ធ្វើឲ្យប្រទេសយើងមិនអាចមានលទ្ធភាពទាក់ទាញវិនិយោគទុន ដែលគេរកស៊ីច្បាស់លាស់ទេ»។
អ្នកនាំពាក្យរដ្ឋាភិបាល លោក ផៃ ស៊ីផាន មានប្រសាសន៍ថា លោកមិនជឿថា អ្នករកស៊ីធំៗនៅប្រទេសកម្ពុជាមិនបង់ពន្ធនោះទេ។ លោកស្នើឲ្យសួរសំណួរនេះទៅអគ្គនាយកដ្ឋានពន្ធដារ ថាតើជាបំណុលពន្ធយូរឆ្នាំ ឬយ៉ាងណា។ ប៉ុន្តែលោកថា ម្ចាស់ជំនួញមិនអាចមិនបង់ពន្ធយូរឆ្នាំនោះទេ។
លោកមានប្រសាសន៍ថា៖ «គ្មានជនណាដែលអនុញ្ញាតមិនឲ្យបង់ពន្ធក្នុងមួយឆ្នាំទេ»។
គេហទំព័រវីគីលីកស៍ (Wikileaks) ដែលចេញផ្សាយកាលពីឆ្នាំ ២០០៧ បានរៀបរាប់អំពីឧកញ៉ា ១០ នាក់ដែលមានឥទ្ធិពលនៅកម្ពុជា ក្នុងនោះក៏មានឧកញ៉ា ស៊ី គង់ទ្រីវ ផងដែរ។ គេហទំព័រវីគីលីកស៍ក៏លើកឡើងទៀតថា លោក ស៊ី គង់ទ្រីវ ក៏មានភាគហ៊ុនក្នុងក្រុមហ៊ុនអាកាសយានដ្ឋានកម្ពុជាដែលគេស្គាល់ថា SCA។ លោកក៏មានភាគហ៊ុននៅក្នុងក្រុមហ៊ុនថ្នាំជក់ឈ្មោះ British American Tabacco និងក្រុមហ៊ុន Eastern Steel Industry Corporation ជាដើម ដែលផលិតស័ង្កសីឈ្មោះស័ង្កសីបូព៌ា។
កាលពីថ្ងៃទី២១ ខែមីនា ឆ្នាំ ២០២០ លោកនាយករដ្ឋមន្រ្តី ហ៊ុន សែន បានផ្ញើលិខិតថ្លែងអំណរគុណចំពោះលោកឧកញ៉ា ស៊ី គង់ទ្រីវ ដែលបានឧបត្ថម្ភទឹកប្រាក់ចំនួន ១០ ម៉ឺនដុល្លារអាមេរិកដល់រដ្ឋាភិបាលកម្ពុជាសម្រាប់សកម្មភាពបង្ការ និងទប់ស្កាត់ការរាតត្បាតជំងឺកូវីដ១៩។ បន្ទាប់មកក្នុងខែឧសភា ភរិយារបស់លោកនាយករដ្ឋមន្រ្តី ហ៊ុន សែន គឺលោកស្រី ប៊ុន រ៉ានី ក៏បានចេញបណ្ណថ្លែងអំណរគុណក្នុងនាមជាប្រធានកាកបាទក្រហមដល់លោកឧកញ៉ា ស៊ី គង់ទ្រីវ និងភរិយារបស់លោកគឺលោកស្រី ភូ ហុងស៊ួន ក្នុងការផ្តល់ប្រាក់ចំនួន ១០ ម៉ឺនដុល្លារទៀត ដល់កាកបាទក្រហមកម្ពុជា៕