ភ្នំពេញ៖ មន្ត្រីជាន់ខ្ពស់នៃគណៈកម្មការទន្លេមេគង្គក្នុងប្រទេសឡាវបានបញ្ជាក់អះអាងថា ទំនប់វារីអគ្គិសនី សាយ៉ាប៊ូរី ដ៏ចម្រូងចម្រាស់កំពុងបន្តសាងសង់មែនហើយទំនប់នេះនឹងនាំឲ្យមានផលប៉ះពាល់យ៉ាងធ្ងន់ធ្ងរខាងផ្នែកបរិស្ថានដល់អ្នករស់នៅពឹងលើផលនៃទន្លេនេះ។
សេចក្ដីអះអាងនេះស្របគ្នាទៅនឹងលោកភ្លូ ទ្រីស្វីសវ៉ាវ៉េត(Plew Trisvisvavet) នាយកប្រតិបត្តិនៃក្រុមហ៊ុន ឆ កានឆាង (Ch Karnchang Plc) របស់ប្រទេសថៃដែលវិនិយោគរួមជាមួយរដ្ឋាភិបាលឡាវ បានប្រាប់សារព័ត៌មាននានាកាលពីពីរសប្តាហ៍មុនថា ការសាងសង់ទំនប់វារីអគ្គិសនីXayaburi លើដងទន្លេមេគង្គបានចាប់ផ្តើមហើយ។
លោក ស៊ូរ៉ាសាក់ ហ្គ្លាហាន (Surasak Glahan) មន្ដ្រីផ្នែកទំនាក់ទំនងនៃលេខាធិការដ្ឋាន គណៈកម្មការទន្លេមេគង្គក្នុងទីក្រុងវៀងច័ន្ទ បានប្រាប់វីអូអេខេមរៈភាសាថា«មានជំហានរៀបចំជឿនលឿនទៅមុខ»ក្នុងការបង្កើតទីតាំងសំខាន់របស់ទំនប់វារីអគ្គិសនីនិងការជីកកកាយដីក្នុងអាងទន្លេនិងជុំវិញទន្លេមេគង្គបានចប់រួចរាល់ហើយ។
ការបញ្ជាក់របស់លោកដោយផ្អែកលើរបាយការណ៍នៃដំណើរទស្សនកិច្ចទៅកាន់ការដ្ឋានសាងសង់ទំនប់វារីអគ្គិសនីកាលពីពាក់កណ្តាលខែកក្កដារបស់គណៈប្រតិភូចំរុះរៀបចំដោយរដ្ឋាភិបាលប្រទេសឡាវដែលក្នុងនោះមានអ្នកការទូត មន្ដ្រីនៃលេខាធិការដ្ឋានគណៈកម្មការទន្លេមេគង្គក្នុងទីក្រុងវៀងច័ន្ទនិងដៃគូភាគហ៊ុននៃការវិនិយោគលើទំនប់វារីអគ្គិសនីនេះ។
លោក ស៊ូរ៉ាសាក់ ហ្គ្លាហាន ឲ្យដឹងតាមសារអេឡិកត្រូនិកកាលពីចុងសប្តាហ៍មុនថា មានការកសាងនិងជួសជុលហេដ្ឋារចនាសម្ព័ន្ធផ្លូវថ្នល់នៅជុំវិញនិងទៅកាន់ទំនប់នោះ។
លោកPlew Trisvisvavet នាយកប្រតិបត្តិនៃក្រុមហ៊ុន ឆ កានឆាងនៅតែមិនអាចធ្វើទំនាក់ទំនងបានដោយសារតែលោកមិនឆ្លើយតបនឹងសារអេឡិកត្រូនិករបស់វីអូអេជាខេមរភាសាដែលបានផ្ញើជូនលោករយៈពេលមួយសប្តាហ៍មកហើយ។
លេខាម្នាក់របស់លោកប្រាប់តាមទូរស័ព្ទថាលោកកំពុងជាប់រវល់។
«ឥឡូវនេះមិនទាន់មានចម្លើយទេ។ គាត់កំពុងតែគិតពិចារណា។ គាត់មិននៅក្នុងការិយាល័យទេ»។
ការសាងសង់ទំនប់វារីអគ្គិសនី Xayaburi នឹងត្រូវចំណាយនូវទឹកប្រាក់ចំនួន៣.៥០០ លានដុល្លារអាមេរិក។ វានឹងក្លាយជាទំនប់វារីអគ្គិសនីដ៏ធំមួយក្នុងចំណោមទំនប់វារីអគ្គិសនីសរុបចំនួន១១ ដែលស្ថិតក្នុងគម្រោងសាងសង់នៅតាមដងទន្លេមេគ្គង។ ទំនប់វារីអគ្គិសនីនេះអាចនឹងផ្តល់ថាមពលចំនួន១២៨៥ មេហ្គាវ៉ាត់ ហើយវានឹងធ្វើឲ្យប្រទេសឡាវមានគម្រោងទំនប់វារីអគ្គិសនីរហូតទៅដល់ចំនួនប្រាំពីរក្នុងដែនទឹករបស់ខ្លួនគម្រោងពីរទៀតស្ថិតនៅតាមតំបន់ព្រំដែននៃប្រទេសថៃនិងឡាវ រីឯគម្រោងទំនប់វារីអគ្គិសនីពីរស្ថិតនៅដងទន្លេមេគង្គកម្ពុជា។
ទន្លេដ៏វែងប្រចាំតំបន់អាស៊ីនេះហូរកាត់ប្រទេសចិន ភូមា ថៃ ឡាវ វៀតណាម និងប្រទេសកម្ពុជា។ ប្រទេសកម្ពុជានិងប្រទេសវៀតណាមបានប្រឆាំងជំទាស់ទៅនឹងការសាងសង់ទំនប់នេះដោយភ័យខ្លាចទទួលរងផលប៉ះពាល់ជាច្រើនមកលើផ្នែកខាងក្រោមនៃទន្លេមេគង្គដែលជាផ្នែកហូរឆ្លងកាត់ប្រទេសទាំងពីរ។ ដោយឡែកក្រុមអ្នកការពារបរិដ្ឋានបានវាយតម្លៃថា សំណង់ទំនប់វារីអគ្គិសនីដ៏ធំនេះនឹងបំផ្លាញដល់បម្លាស់ទីរបស់ត្រី បម្រែបម្រួលប្រព័ន្ធបរិដ្ឋាន (ecology) រួមទាំងប៉ះពាល់ដល់ ការរស់នៅរបស់ប្រជាពលរដ្ឋជាច្រើននៅខ្សែទឹកខាងក្រោមទំនប់។
លោក ស៊ូរ៉ាសាក់ ហ្គ្លាហាន មន្ដ្រីផ្នែកទំនាក់ទំនងនៃលេខាធិការដ្ឋានគណៈកម្មការទន្លេមេគង្គនៃប្រទេសឡាវបានស្រង់របាយការណ៍នៃលេខាធិការដ្ឋានរបស់លោកកាលពីខែមិនា ឆ្នាំ២០១១ ថា ពូជត្រីពី២៣ ទៅ១០០ ប្រភេទទំនងជានឹងទទួលរងផលប៉ះពាល់ពីព្រោះតែល្បាក់ទឹកនៃទំនប់វារីអគ្គិសនីចំនួនប្រាំមួយនៅខ្សែទឹកខាងលើនៃទីក្រុងវៀងច័ន្ទដោយរាប់ទាំងទំនប់វារីអគ្គិសនីសាយ៉ាប៊ូរីផងដែរ។ ផលត្រីនឹងធ្លាក់ចុះរហូតដល់៦៦.០០០តោនក្នុងមួយឆ្នាំ។ជាងនេះទៀត ៣៩ភាគរយនៃជម្រកត្រីរបស់គាត់ដែលតែងតែធ្វើការបម្លាស់ទីនឹងត្រូវរាំងខ្ទប់ហើយប្រជាពលរដ្ឋចំនួនប្រមាណ៤៥០.០០០ នាក់អាចទទួលរងហានិភ័យ។
កាលពីខែធ្នូ ឆ្នាំកន្លងទៅប្រទេសកម្ពុជា វៀតណាម ឡាវ និងថៃ បានព្រមព្រាងគ្នាឲ្យប្រទេសជប៉ុននិងដៃគូអភិវឌ្ឍន៍ដទៃទៀតជួយធ្វើការសិក្សាលើផលប៉ះពាល់មុននឹងធ្វើការសាងសង់ទំនប់នេះ។ ក៏ប៉ុន្តែរហូតមកទល់ពេលនេះគម្រោងការនោះមិនទាន់បានចាប់ផ្តើមនៅឡើយ។
លោកលឹម គានហោ រដ្ឋមន្ដ្រីក្រសួងធនធានទឹកនិងជាប្រធានគណៈកម្មាធិការជាតិទន្លេមេគង្គកម្ពុជា គ្រោងនឹងធ្វើដំណើរទៅត្រួតពិនិត្យការដ្ឋានសាងសង់ទំនប់វារីអគ្គិសនីសាយ៉ាប៊ូរីដ៏ចម្រូងចម្រាស់នេះនៅមុនដំណាច់ឆ្នាំ២០១២នេះហើយលោកគ្រោងនឹងជំរុញឲ្យមានការដោះស្រាយជម្លោះដែនទឹកទន្លេមេគង្គនេះនៅកម្រិតប្រមុខដឹកនាំរដ្ឋាភិបាលផងដែរ៕