ភ្នំពេញ៖ លោកម៉ម សុណង់ដូ នៅតែមានភាពរឹងមាំទាំងរាងកាយនិងស្មារតី។ មន្ដ្រីសិទ្ធិមនុស្សនិងភរិយារបស់លោកម៉ម សុណង់ ដូ បានអះអាងយ៉ាងដូច្នេះបន្ទាប់ពីបានចូលសួរសុខទុក្ខលោកម៉ម សុណង់ដូ ដាច់ដោយឡែកពីគ្នានៅថ្ងៃព្រហស្បតិ៍នេះ។
លោក អ៊ូ វីរៈ នាយកមជ្ឈមណ្ឌលសិទ្ធិមនុស្សកម្ពុជាដែលបានចូលសួរសុខទុក្ខនាយកវិទ្យុសំបុក្រឃ្មុំនៅរសៀលថ្ងៃនេះឲ្យដឹងថា លោកម៉ម សុណង់ដូ មិនបានបាក់ស្មារតីនោះទេ។
«ទី១គាត់មានសុខភាពរឹងមាំ។ ទីពីរខ្ញុំឃើញស្មារតីគាត់គឺនៅរឹងមាំមែនទែន។ គាត់ប្រាប់ខ្ញុំថា យើងទាំងអស់គ្នានៅតែត្រូវធ្វើការតស៊ូមតិ។ គាត់នៅតែថែរក្សាគោលជំហរដដែលថា គាត់មិនបានធ្វើអ្វីខុសទាល់តែសោះ។ គាត់ប្រាប់ខ្ញុំថា ការពិតនៅតែជាការពិត»។
លោកម៉ម សុណង់ដូ អាយុ៧១ឆ្នាំត្រូវសាលាដំបូងរាជធានីភ្នំពេញផ្តន្ទាទោសឲ្យជាប់ពន្ធនាគារចំនួន២០ឆ្នាំកាលពីថ្ងៃទី១ខែតុលានេះហើយជនជាប់ចោទចំនួន១៣នាក់ផ្សេងទៀតត្រូវផ្តន្ទាទោសឲ្យជាប់គុកពីដប់ខែរហូតដល់៣០ឆ្នាំ។
លោកស្រី ឌិន ផាន់ណារ៉ា ភរិយាលោកម៉ម សុណង់ដូ ដែលបានចូលសួរសុខទុក្ខស្វាម៉ីរបស់ខ្លួននៅព្រឹកថ្ងៃនេះលើកឡើងដូចលោកអ៊ូ វីរៈដែរ។
«បើនិយាយពីសុខភាពគាត់ មិនអីទេបច្ចុប្បន្ននេះ។ បើនិយាយពីស្មារតីគាត់វិញនៅតែរឹងមាំធម្មតាដដែលក្នុងន័យថាគាត់អត់បានធ្វើអ្វីខុស»។
មន្ដ្រីអង្គការសិទ្ធិមនុស្ស ប្រទេសបារាំង អាមេរិក គណៈកម្មការអឺរ៉ុប រួមទាំងអង្គការអន្តរជាតិមួយចំនួនសុទ្ធតែបានប្រតិកម្មចំពោះការផ្តន្ទាទោសលោកម៉ម សូណង់ដូ ហើយសហរដ្ឋអាមេរិកបានទាមទារឲ្យរដ្ឋាភិបាលដោះលែងលោកម៉ម សុណង់ដូ ជាបន្ទាន់។
ក្រុមមន្ដ្រីសិទ្ធិមនុស្សបានហៅការផ្តន្ទាទោសលោកម៉ម សុណង់ដូ ថាជាចេតនារបស់រដ្ឋាភិបាល។ ក៏ប៉ុន្តែក្រសួងការបរទេសបានច្រានចោលសេចក្ដីអះអាងនោះ។
កាលពីថ្ងៃចន្ទសមាគមអ្នកប្រជាធិបតេយ្យរបស់លោកម៉ម សុណង់ដូ បានថ្វាយលិខិតជូនអតីតព្រះមហាក្សត្រនរោត្តម សីហនុ និងព្រះមហាក្សត្រនរោត្តម សីហមុនី ដើម្បីទូលថ្វាយសុំព្រះរាជអន្តរាគមន៍ឲ្យដោះលែងលោកម៉ម សូណង់ដូ។ ក៏ប៉ុន្តែព្រះអង្គម្ចាស់ស៊ីសុវត្ថិ ធម្មិកោ សមាជិករាជវង្សមួយអង្គមានព្រះបន្ទូលថា អតីតព្រះមហាក្សត្រមិនមានព្រះរាជអំណាចអន្តរាគមន៍នោះទេ។
លោកស្រី ឌិន ផាន់ណារ៉ា មានប្រសាសន៍ថា លោកស្រីនឹងដាក់ពាក្យប្តឹងទាស់ទៅកាន់សាលាឧទ្ធរណ៍នៅក្នុងខែនេះប្រឆាំងនឹងការសម្រេចរបស់តុលាការក្រុងភ្នំពេញ។
លោកសុខ សំអឿន មេធាវីរបស់លោកម៉ម សុណង់ដូ មិនអាចទាក់ទងបានទេនៅថ្ងៃនេះ៕