ក្នុងទិវាទីក្រុងពិភពលោកលើកទី៩ អង្គការយូណេស្កូបានដាក់បញ្ចូលទីក្រុងបាត់ដំបង ជាទីក្រុងច្នៃប្រឌិតផ្នែកម្ហូបអាហារដំបូងគេក្នុងចំណោមក្រុងនានានៅកម្ពុជា។
យោងតាមសេចក្តីប្រកាសព័ត៌មានរបស់អង្គការយូណេស្កូចេញនៅថ្ងៃទី៣១ ខែតុលា ឆ្នាំ២០២៣ បង្ហាញថា ទីក្រុងបាត់ដំបងត្រូវបានដាក់បញ្ចូលជាបណ្ដាញទីក្រុងច្នៃប្រឌិតមួយក្នុងចំណោមទីក្រុង៥៤នៅបណ្ដាប្រទេសផ្សេងទៀតលើពិភពលោក។
ក្នុងសេចក្តីប្រកាសព័ត៌មានដដែលបន្ថែមថា៖ «ការដាក់បញ្ចូលខេត្តបាត់ដំបងជាទីក្រុងច្នៃប្រឌិតរបស់អង្គការយូណេស្កូក្នុងប្រភេទវិស័យម្ហូបអាហារមិនត្រឹមតែបង្ហាញពីមុខម្ហូបដ៏ពិសេសរបស់ខ្លួនប៉ុណ្ណោះទេ ប៉ុន្តែវាថែមទាំងមានឥទ្ធិពលលើវិស័យម្ហូបអាហារដើម្បីបង្កើនការអភិវឌ្ឍក្នុងស្រុក និងការផ្លាស់ប្តូរវប្បធម៌ពិភពលោកផងដែរ។ នេះបើយោងតាមការចុះផ្សាយរបស់អង្គការយូណេស្កូ»។
មុខម្ហូបល្បីប្រចាំខេត្តបាត់ដំបងរួមមាន ណែមបាត់ដំបង ប្រហុកបាត់ដំបង អាម៉ុកបាត់ដំបង ក្រឡានបាត់ដំបង សង្វាក់បាត់ដំបង បុកល្ហុងបាត់ដំបង កន្ទុយហេសបាត់ដំបង អង្ករសំរូបបាត់ដំបង។ បើតាមអង្គការយូណេស្កូ គិតមកដល់ពេលនេះ ទីក្រុងដែលជាទីក្រុងច្នៃប្រឌិតរបស់អង្គការយូណេស្កូ មានចំនួន៣៥០ទីក្រុង ក្នុងបណ្ដាប្រទេសជាង១០០។
ទីក្រុងទាំងនោះតំណាងឱ្យវិស័យច្នៃប្រឌិតចំនួនប្រាំពីររួមមាន សិប្បកម្ម និងសិល្បៈប្រជាប្រិយ ការរចនា ភាពយន្ត ម្ហូបអាហារ អក្សរសាស្ត្រ សិល្បៈ និងប្រព័ន្ធផ្សព្វផ្សាយ និងតន្ត្រី៕