មន្ត្រីសង្គមស៊ីវិល នៅថ្ងៃព្រហស្បតិ៍នេះ បានបង្ហាញការភ្ញាក់ផ្អើលចំពោះប្រតិកម្មរបស់លោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ដោយនិយាយថា ប្រតិកម្មរបស់លោករដ្ឋមន្ត្រីរូបនេះ កាលពីថ្ងៃអង្គារបង្ហាញថា រដ្ឋាភិបាលហាក់ដូចជា មិនមានសុឆន្ទៈក្នុងការទទួលយកការរិះគន់ស្ថាបនាពីសង្គមស៊ីវិល។
លោក កែម ឡី អ្នកវិភាគឯករាជ្យអំពីបញ្ហាសង្គម បានរំឭកប្រាប់ VOA ថាការដំឡើងឋានន្តរសក្ដិមន្ត្រីប៉ូលិស និងយោធាច្រើនពេក ធ្វើឲ្យប៉ះពាល់ដល់សេដ្ឋកិច្ច និងកិត្តិយសនៃឋានន្តរសក្ដិមន្ត្រីនគរបាល និងយោធាទាំងមូល ដូចកាលពីអំឡុងពេលធ្វើសមាហរណកម្មកាលពីឆ្នាំ១៩៩៣ ដែលក្រោយមកមានការទម្លាក់សក្ដិមន្ត្រីប៉ូលិស និងយោធាមកវិញ ដោយសារចំនួននាយទាហានជាន់ខ្ពស់មានច្រើនជាងកូនទាហាន។
លោកបន្ថែមថា ការតែងតាំងដោយបក្ខពួកនិយម មិនគិតពីអតីតភាពការងារ ធ្វើឲ្យបាត់ប្រសិទ្ធភាពការងារ និងបាក់ទឹកចិត្ត។
«ម៉្យាងវិញទៀត ការតែងតាំងបក្ខពួកនិយមច្រើនជាង។ អ្នកខ្លះធ្វើការម្ភៃ សាមសិបឆ្នាំ បានតែត្រឹមសក្ដិបី សក្ដិបួន ហើយអ្នកខ្លះទៀត ឲ្យតែកូនអ្នកធំ ជួនកាលឡើងផ្កាយ»។
ក្រោយពីធ្វើជាអធិបតីនៃមហាសន្និបាតបូកសរុបការងារប្រចាំឆ្នាំនៅក្រសួងមហាផ្ទៃ លោកឧបនាយករដ្ឋមន្ត្រី ស ខេង បានបញ្ចេញប្រតិកម្មចំពោះមតិរិះគន់ឥតសំចៃមាត់របស់អង្គការសង្គមស៊ីវិល អ្នកវិភាគនៅកម្ពុជា និងសាធារណជនដែលថា ការដំឡើងបុណ្យស័ក្ដិនេះ ធ្វើឡើងភាគច្រើនសម្រាប់តែមន្ត្រី ដែលការពាររាជរដ្ឋាភិបាល។
«អស់លោក មានយោបល់ជាសិទ្ធិសេរីភាពរបស់អស់លោកទេ ប៉ុន្តែ លោកត្រូវមើលថា គេធ្វើការបានអីខ្លះ? កុំមើលឃើញតែខ្មៅពេក សុខសន្តិភាពប៉ុណ្ណេះមិនមែនជារឿងសាមញ្ញទេ»។
លោក ស ខេង បាននិយាយការពារការដំឡើងឋានន្តរសក្ដិនេះ ដោយនិយាយថា ការដំឡើងស័ក្ដិនេះជារឿងយុត្តិធម៌ ព្រោះសុទ្ធតែជាអ្នកមានស្នាដៃ ហើយមន្ត្រីមួយចំនួន ជិតចូលនិវត្តន៍ទៅហើយ ហើយមិនប៉ះពាល់សេដ្ឋកិច្ច និងកិត្តិយសនៃឋានន្តរសក្ដិទេ។
រូបឯកសារ៖ លោកបណ្ឌិត កែម ឡី អ្នកវិភាគសង្គមឯករាជ្យ និងជាវាគ្មិនក្នុងវេទិកាសាធារណៈនេះ កំពុងពិភាក្សាលើប្រធានបទអំពី បញ្ហាប្រឈមនានាក្នុងការអភិវឌ្ឍនៅក្នុងប្រទេសកម្ពុជា និងប្រទេសក្នុងអនុតំបន់ទន្លេមេគង្គ។ (រូបថត៖ នូវ ពៅលក្ខិណា/VOA)
«អស់លោកមួយចំនួនជិតចូលនិវត្តន៍ទៅហើយ មួយឆ្នាំពីរចូលនិវត្តន៍អស់ទៅហើយ ហើយគ្នាធ្វើការកន្លះជីវិតទៅហើយ។ គ្រាន់តែបានផ្កាយប៉ុណ្ណឹង ច្រណែន អាហ្នឹងខ្ញុំថា ដូចជាមិនមានការសមរម្យប៉ុន្មានទេ»។
ទោះជាយ៉ាងណាក្តី លោក កែម ឡី អ្នកវិភាគឯករាជ្យម្នាក់ដែលបានរិះគន់ការតែងតាំងនោះ បានសម្ដែងការភ្ញាក់ផ្អើលចំពោះប្រតិកម្មលោក ស ខេង ដែលវាយបកមកលើការរិះគន់របស់សង្គមស៊ីវិល។
«រឿងច្រណែន មិនមែនរឿងច្រណែនទេ។ គេមិនទៅចង់ធ្វើការងាររដ្ឋហ្នឹងទេ។ គេធ្វើការងារសង្គមស៊ីវិល ធ្វើការងារសិទ្ធិមនុស្ស ឬធ្វើការងាររឿងរកស៊ីទៅណា៎។ ប៉ុន្តែគ្រាន់តែថា យើងធ្វើការងាររដ្ឋ វាតំណាងឲ្យរដ្ឋ។ អញ្ចឹងតំណាងខ្លួនគេផង តំណាងឲ្យប្រជាជនផង។ អញ្ចឹង គេត្រូវមានសិទ្ធិធ្វើការរិះគន់ហើយ។ វា មិនមែនរឿងច្រណែនទេ ហើយយើងធ្វើការងារអនុវត្ត។ វាតែងមានខុស មានត្រូវណា៎ បាទ»។
លោកបន្ថែមថា ប្រតិកម្មរបស់លោករដ្ឋមន្ត្រីក្រសួងមហាផ្ទៃ ធ្វើឲ្យលោកខកចិត្ត។
លោកបន្តថា ការដំឡើងឋានន្តរសក្ដិខ្ពស់ពេកហួសពីសមត្ថភាព នឹងធ្វើឲ្យបាត់បង់តម្លៃឋានន្តរសក្ដិ ជាពិសេសពេលមន្ត្រីឧត្ដមសេនីយ៍ខ្មែរ ជួបសមភាគីមកពីប្រទេសផ្សេង មានសក្ដិទាប តែមានសមត្ថភាពខ្ពស់។
កាលពីថ្ងៃ១៩ ខែកុម្ភៈ ព្រះមហាក្សត្រព្រះបរមនាថ នរោត្តម សីហមុនី បានប្រោសព្រះរាជទាន ត្រាស់បង្គាប់ការដំឡើងឋានន្តរសក្ដិ នាយឧត្ដមសេនីយ៍ចំនួន៦រូប ក្នុងក្របខ័ណ្ឌនគរបាលជាតិកម្ពុជានៃក្រសួងមហាផ្ទៃ។
មន្ត្រីទាំង៦រូប ដែលទទួលបានការដំឡើងឋានន្តរសក្ដិផ្កាយបួននោះ មានលោក មាស វិរិទ្ធ លោក សួស អង្គារ៍ លោក ជួន សុវណ្ណ លោក គៀត ច័ន្ទថារិទ្ធ លោក ថោង លីម និងលោក ឆៃ ស៊ីណារិទ្ធ។
VOA បានព្យាយាមទាក់ទងលោក ជួន សុវណ្ណ ស្នងការនគរបាលរាជធានី និងលោក គៀត ច័ន្ទថារិទ្ធ អ្នកនាំពាក្យអគ្គស្នងការនគរបាលជាតិ តែមិនអាចទាក់ទងបានទេនៅថ្ងៃនៅព្រហស្បតិ៍នេះ និងកាលពីថ្ងៃពុធ។
នៅមុនការដំឡើងឋានន្តរសក្ដិនាយឧត្ដមសេនីយ៍ទាំងនេះ ក៏មានការតែងតាំងមន្ត្រីនគរបាលថ្នាក់ទាបជាច្រើនរូបផងដែរ ក្នុងអំឡុងសន្និបាតបូកសរុបការងារឆ្នាំ២០១៥ និងលើកទិសដៅការងារឆ្នាំ២០១៦របស់ក្រសួងមហាផ្ទៃនោះ៕