ភ្នំពេញ — រដ្ឋាភិបាលកម្ពុជាបាននិងកំពុងចាប់ផ្តើមរឹតបន្តឹងសេរីភាពបញ្ចេញមតិទាក់ទងនឹងវិធានការប្រឆាំងនឹងការរាតត្បាតវីរុសកូរ៉ូណា ក្នុងនោះមានការចាប់ខ្លួនចាងហ្វាងសារព័ត៌មានTVFB គឺលោក សុវណ្ណ រិទ្ធីកាលពីថ្ងៃពុធ ដែលនេះនាំឲ្យមានការព្រួយបារម្ភកាន់តែខ្លាំងលើសេរីភាពនៃការបញ្ចេញមតិ។
លោកសុវណ្ណ រិទ្ធីដែលតែងតែផ្សព្វផ្សាយព័ត៌មានទាន់ហេតុការណ៍លើបណ្តាញសង្គមហ្វេសប៊ុកនិងមានហ្វេសប៊ុកផ្ទាល់ខ្លួនដែលមានអ្នកចុច Likes ដល់ទៅជាង ៦៦ម៉ឺននាក់ ត្រូវបានចាប់ខ្លួនដោយសារការបង្ហោះសារនៅលើហ្វេសប៊ុករបស់លោកដោយដកស្រង់សម្តីមួយផ្នែករបស់លោកនាយករដ្ឋមន្រ្តី ហ៊ុន សែន ដែលបានថ្លែងកាលពីថ្ងៃអង្គារ។
លោក សុវណ្ណ រិទ្ធី បានដកស្រង់ពាក្យសម្តីរបស់នាយករដ្ឋមន្រ្តីថា៖ «បើអ្នករត់ម៉ូតូឌុបក្ស័យធនលក់ម៉ូតូចាយសិនទៅ! រដ្ឋាភិបាលគ្មានលទ្ធភាពជួយនោះទេ»។
នគរបាលដែលចាប់ខ្លួនលោក សុវណ្ណ រិទ្ធី បានប្រាប់អ្នកសារព័ត៌មានថា «នេះជាការបំប៉ោងនិងបំពុលសង្គម»ហើយធ្វើឲ្យមានការយល់ច្រឡំលើនាយករដ្ឋមន្រ្តី។
អ្នកនាំពាក្យអយ្យការសាលាដំបូងរាជធានីភ្នំពេញលោក គុជ គីមឡុង បានបញ្ជាក់ថា លោក សុវណ្ណ រិទ្ធី ត្រូវបានចោទប្រកាន់ពីបទ «ញុះញង់ប្រព្រឹត្តបទឧក្រិដ្ឋជាអាទិ៍» ដែលអាចប្រឈមនឹងការជាប់ពន្ធនាគារពី៦ខែ ទៅ២ឆ្នាំ។ បទចោទប្រកាន់នេះត្រូវបានក្រុមសិទ្ធិមនុស្សរិះគន់ថាប្រើប្រាស់ដើម្បីចោទប្រកាន់ក្រុមមតិប្រឆាំង។ លោកត្រូវបានបញ្ជូនទៅឃុំខ្លួននៅពន្ធនាគារប៉ូលិសយុត្តិធម៌(PJ)នៅរាជធានីភ្នំពេញ។
រូបឯកសារ៖ លោកនាយករដ្ឋមន្ត្រី ហ៊ុន សែន ថ្លែងអំពីស្ថានភាពនៃការរីករាលដាលនៃមេរោគកូរ៉ូណាវីរុស ដែលផ្ទុះឡើងនៅប្រទេសចិន នៅថ្ងៃទី៣០ ខែមករា ឆ្នាំ២០២០។ លោកបានជំរុញឲ្យពលរដ្ឋកុំចលាចលអំពីការឆ្លងមេរោគនេះ ដែលនៅកម្ពុជាទើបតែមានមួយករណីប៉ុណ្ណោះ។
ក្នុងសន្និសីទសារព័ត៌មានមួយកាលពីថ្ងៃអង្គារ លោក ហ៊ុន សែន ត្រូវបានអ្នកសារព័ត៌មានសួរអំពីគោលនយោបាយរបស់រដ្ឋាភិបាលក្នុងការជួយដល់អ្នករងគ្រោះដែលធ្វើការក្រៅប្រព័ន្ធក្នុងនោះមានអ្នករត់ម៉ូតូឌុបផងដែរ។
លោក ហ៊ុន សែន បានថ្លែងថា៖ «រដ្ឋាភិបាលទៅមិនរួចទេ និយាយដោយត្រង់។ គ្រាន់តែអ្នកសេដ្ឋកិច្ចក្នុងប្រព័ន្ធនេះ រដ្ឋាភិបាលស្ទើរតែរកលុយមិនបានទៅហើយ។ បន្ថែមទៅដោយទាំងពីអ្នករត់ម៉ូតូឌុបទាំងពីអ្នកឡានឈ្នួលអីទៀត ងាប់រដ្ឋាភិបាលហើយ»។
លោក ហ៊ុន សែន ក៏បានថ្លែងជាមួយសំណើចបន្តិចថា៖ «ហើយបើក្ស័យធន់លក់ម៉ូតូសិនទៅ និយាយគ្នាចឹងម្មងទុកម៉ូតូសង្សារធ្វើអី!»
បន្ទាប់មកលោកនាយករដ្ឋមន្រ្តីក៏បានពន្យល់រឿងរ៉ាវទាក់ទងផ្សេងទៀតហើយលោកក៏ថ្លែងបន្តថា៖ «ដូចដែលក្មួយសួរមកពូថាអ្នករត់ម៉ូតូឌុប គាត់ត្អូញត្អែរ តើមានរដ្ឋប៉ះប៉ូវទេ ? លក់ម៉ូតចាយសិនទៅទិញអង្ករស៊ីសិនព្រោះបើមកឲ្យរដ្ឋប៉ះប៉ូវទាំងអស់ ងាប់បាត់។ រដ្ឋឯណាមានលុយ»។
ភ្លាមៗបន្ទាប់ពីការចាប់ខ្លួនចាងហ្វាងសារព័ត៌មាន TVFB នោះ រដ្ឋមន្រ្តីក្រសួងព័ត៌មានលោក ខៀវ កាញារីទ្ធ បានសម្រេចលុបចោលអាជ្ញាប័ណ្ណដែលផ្តល់ឲ្យលោកសុវណ្ណ សុខាបើកដំណើរការផ្សាយគេហ ទំព័រ www.tvfb.com.kh និងគេហទំព័រ www.tvfb.new ក្រោមហេតុផលថា«ម្ចាស់អាជ្ញាប័ណ្ណបានផ្សព្វផ្សាយព័ត៌មានដែលមានចរិតញុះញង់បង្កឲ្យប៉ះពាល់ដល់សន្តិសុខសណ្តាប់ធ្នាប់និងសុវត្ថិភាពសង្គម»។
លោក ផុស សុវណ្ណ អគ្គនាយកនៃអគ្គនាយកដ្ឋានព័ត៌មាននិងសោតទស្សន៍ និងជាអ្នកនាំពាក្យក្រសួងព័ត៌មានបានការពារចំណាត់ការរបស់ក្រសួងនៅក្នុងសន្និសីទសារព័ត៌មានមួយ នៅថ្ងៃព្រហស្បតិ៍នេះ ដែលមានការចោទសួរដោយអ្នកសារព័ត៌មាន។
លោកបានការពារការដកអាជ្ញាប័ណ្ណដោយមិនទាន់រកឃើញកំហុសពីតុលាការ។
លោកបានថ្លែងថា៖ «មិនមែនលឿនពេកទេ។ច្បាប់របបសារព័ត៌មានឲ្យតែយើងធ្វើទៅប៉ះពាល់ដល់សន្តិសុខសណ្តាប់ធ្នាប់ ដែលថាធ្វើម៉េចធ្វើឲ្យវាព្យសនកម្មទៅដល់សង្គមមួយទាំងមូលគឺគេឲ្យសិទ្ធិមករដ្ឋាភិបាល»។លោកសុវណ្ណ សុខា ឪពុករបស់សុវណ្ណ រិទ្ធី បានបង្ហោះសារលើហ្វេសប៊ុកនិងសុំការអធ្យាស្រ័យឲ្យមានការដោះលែងកូនប្រុសរបស់លោក។
លោកមានប្រសាសន៍ថា៖ «កូនប្រុសខ្ញុំសុវណ្ណ រិទ្ធីមានកំហុសខុសឆ្គងដ៏ធ្ងន់ធ្ងរដែលខ្ញុំជាឪពុកអត់បានប្រៀនប្រដៅឲ្យគ្រប់ជ្រុងជ្រោយបែរជាកូនទៅធ្វើបែបនេះ ។ ខ្ញុំមានការសោកស្តាយខ្លាំងណាស់។មានតែលើកម្រាមដៃ១០សុំទោសថ្នាក់ដឹកនាំមេត្តាសន្តោសប្រណីកូនប្រុសខ្ញុំ»។
អង្គការអ្នកសារព័ត៌មានគ្មានព្រំដែន (Reporters without Borders) បានទាមទារឲ្យមានការដោះលែងអ្នកកាសែតរូបនោះនិងផ្តល់អាជ្ញាប័ណ្ណឲ្យស្ថាប័ននេះវិញ។
កាលពីថ្ងៃទី២៤ខែមីនា អង្គការ Human Rights Watch ដែលមានមូលដ្ឋាននៅអាមេរិកបានចេញសេចក្តីថ្លែងការណ៍មួយដោយលើកឡើងថារដ្ឋាភិបាលកម្ពុជាបានបង្រ្កាបលើសេរីភាពនៃការបញ្ចេញមតិចំពេលមានការរាតត្បាតវីរុសកូរ៉ូណា។ អង្គការបានលើកឡើងថាចាប់តាំងពីចុងខែមករាមកយ៉ាងតិចមនុស្ស ១៧នាក់ត្រូវបានចោទប្រកាន់ពីការចែករំលែកព័ត៌មានក្លែងក្លាយអំពីវីរុសកូរ៉ូណានៅកម្ពុជាក្នុងនោះក៏មានសកម្មជនគណបក្សប្រឆាំងផងដែរ។
លោក Phil Robertson នាយករងផ្នែកតំបន់អាស៊ីនៃអង្គការឃ្លាំមើលសិទ្ធិមនុស្ស Human Rights Watch បញ្ជាក់នៅក្នុងសេចក្តីថ្លែងការណ៍ថា៖ «រដ្ឋាភិបាលកម្ពុជាកំពុងតែប្រើប្រាស់ខុសនូវការរាតត្បាតជំងឺកូវីដ១៩ដើម្បីដាក់ពន្ធនាគារសកម្មជនបក្សប្រឆាំង និងអ្នកផ្សេងទៀតដែលបង្ហាញការព្រួយបារម្ភអំពីវីរុសនិងការឆ្លើយតបរបស់រដ្ឋាភិបាល»។
នាយកផ្នែកប្រព័ន្ធផ្សព្វផ្សាយនៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) លោកណុប វី មានប្រសាសន៍ថា៖ «វាគឺជាការអនុវត្តមួយដែលអាចឈានទៅដល់ការរឹតបន្តឹងការគំរាមកំហែងចំពោះការអនុវត្តតួនាទីសារព័ត៌មាននៅក្នុងប្រទេសកម្ពុជា»។
លោកបានថ្លែងថា៖ «ខ្ញុំមើលទៅអាចថា រដ្ឋាភិបាលគាត់មានការព្រួយបារម្ភជ្រុលពេក ជ្រុលហួសហេតុ ។ ហើយអ្វីដែលជាការចាត់វិធានការចំពោះបុគ្គលតែម្នាក់អីហ្នឹង វាជាការគំរាមកំហែងមួយទៅដល់អ្នកសារព័ត៌មានផ្សេងៗទៀត»។
លោកបន្ថែមថា អាជ្ញាធរគួរតែដោះលែងលោក សុវណ្ណ រិទ្ធី ហើយការអប់រំប្រសើរជាងចំណាត់ការផ្លូវច្បាប់។
មួយរយៈចុងក្រោយនេះ លោក ហ៊ុន សែន បានព្រមានសេរីភាពបញ្ចេញមតិនៅកម្ពុជាទាក់ទងនឹងវីរុសកូរ៉ូណាដោយលោកថាត្រូវមានការប្រុងប្រយ័ត្ន។
កាលពីថ្ងៃអង្គារលោក ហ៊ុន សែន បានព្រមានចាប់ខ្លួនអ្នកដែលរិះគន់លោកពីខាងក្រៅប្រទេសទៅលើការរៀបចំច្បាប់ដាក់ប្រទេសក្នុងភាពអាសន្នប្រឆាំងនឹងវីរុសកូរ៉ូណា។
លោកបានថ្លែងថា៖ «តែវាអត់យល់! វានិយាយឲ្យខានតែឮ! ប៉ុន្តែអានេះអាងតែនៅក្រៅប្រទេស បើនៅក្នុងប្រទេសជាប់ខ្នោះព្រោះអ្ហែងនិយាយខុសរឿង...ឲ្យវាត្រូវមានការទទួលខុសត្រូវ មិនមែនបំបិទសិទ្ធិបញ្ចេញមតិទេ»។
គួរបញ្ជាក់ថា លោកនាយករដ្ឋមន្រ្តី ហ៊ុន សែន និងរដ្ឋមន្រ្តីការបរទេសអាមេរិកលោក Mike Pompeo បានទូរស័ព្ទពិភាក្សាគ្នាកាលពីថ្ងៃពុធ ដោយមានការ «ពិភាក្សាអំពីសារៈសំខាន់នៃអធិបតេយ្យជាតិរបស់កម្ពុជាក៏ដូចជាមធ្យោបាយដើម្បីពង្រឹងអភិបាលកិច្ចតាមបែបប្រជាធិបតេយ្យដោយបញ្ចូលទាំងសារៈសំខាន់នៃសេរីភាពបញ្ចេញមតិជាពិសេសអំឡុងពេលនេះនៅពេលដែលត្រូវការសំឡេងទាំងអស់ដើម្បីប្រយុទ្ធប្រឆាំងនឹងការរាតត្បាតនេះ»៕