និស្សិតម្នាក់ស្លាប់ក្នុងឧបទ្ទវហេតុនៃពិធីខួប១០ឆ្នាំការឡើងគ្រងរាជ្យសម្បត្តិមហាក្សត្រ

វ៉ាស៊ីនតោន —

ក្នុងព្រះរាជពិធីខួប១០ឆ្នាំនៃការឡើងគ្រងរាជ្យសម្បត្តិរបស់ព្រះរមនាថនរោត្តមសីហមុនីនៅថ្ងៃពុធម្សិលមិញ មានឧបទ្ទវហេតុគ្រោះថ្នាក់ក្នុងការបាញ់កាំជ្រួចអបអរពិធីនេះ ដែលក្នុងនោះមាននិស្សិតម្នាក់បានស្លាប់ និងយ៉ាងតិចមនុស្ស៧នាក់ទៀតរងរបួស។ មន្ត្រីសាលាក្រុងភ្នំពេញបានឲ្យដឹងថា គ្រោះថ្នាក់នេះបណ្តាលមកពីគ្រាប់កាំជ្រួចដែលគេបាញ់នោះ បានផ្ទុះនៅនឹងកន្លែង គឺមិនហោះទៅផ្ទុះនៅលើអាកាសទេ។ ការផ្ទុះនៅនឹងកន្លែងបាញ់នោះបានជ្រះកម្ទេចដែក និងកម្ទេចផ្សេងទៀតទៅលើអ្នកដើរលេងក្បែរនោះដែលជាជនរងគ្រោះ។ គ្រោះថ្នាក់នេះកើតមាននៅសង្កាត់ជ្រោយចង្វានៅត្រើយម្ខាងទល់មុខព្រះបរមរាជវាំង។ មន្ត្រីអាជ្ញាធរសង្កាត់ជ្រោយចង្វាប្រាប់បណ្តាញព័ត៌មានក្នុងស្រុកថា ឧបទ្ទវហេតុដែលបានកើតមាននៅជិតសណ្ឋាគារសុខានោះ បណ្តាលមកពីបញ្ហាបច្ចេកទេស ហើយវាបានសម្លាប់និស្សិតសាកលវិទ្យាល័យ Setec ម្នាក់ឈ្មោះណាគ្រី ដារ៉ូ អាយុ២២ឆ្នាំ មកពីខេត្តកណ្តាល។ ក្នុងចំណោមអ្នករបួស៧នាក់នោះ មានពីរនាក់របួសធ្ងន់ តែមិនអាចប៉ះពាល់ដល់អាយុជីវិតទេ។ អ្នករបួសម្នាក់ជាក្មេងប្រុសអាយុ១២ឆ្នាំ ដែលរបួសជង្គង់។ ឧបទ្ទវហេតុនេះបានបញ្ចប់ព្រះរាជពិធីខួប១០ឆ្នាំនៃការឡើងគ្រងរាជ្យសម្បត្តិនេះមុនគ្រោងទុកនៅពេលយប់ ក្រោយពីមានការអបអរពេញមួយថ្ងៃ ដោយមានអ្នកចូលរួមជាងមួយម៉ឺននាក់។ នៅពេលព្រឹក មុនពេលឧបទ្ទវហេតុនេះកើតឡើង  ព្រះមហាក្សត្របរមនាថនរោត្តមសីហមុនីបានមានព្រះរាជបន្ទូលសរសើរលោកនាយករដ្ឋមន្ត្រីហ៊ុន សែនថា ជាមនុស្សឆ្លាត ដែលរៀបចំនយោបាយសមស្រប កសាងសន្តិភាព និងស្ថិរភាព។ ព្រះអង្គមានបន្ទូលទៅកាន់មហាជនថា៖ «សមិទ្ធផលដ៏ធំធេងទាំងឡាយដែលយើងសម្រេចបាននេះពិតជាបានមកតាមរយៈការខិតខំពង្រីកនូវវប្បធម៌សន្តិភាព ការផ្សះផ្សាបង្រួបបង្រួមជាតិ ការលើកស្ទួយប្រជាធិបតេយ្យ សេរីពហុបក្ស ការគោរពសិទ្ធិសេរីភាពនិងសេចក្តីថ្លៃថ្នូរបស់មនុស្ស»។ លោកឃាង មុន្នីរដ្ឋា គ្រូបង្រៀនមកពីសាលាបាក់ទូកមានប្រសាសន៍ថា៖ «គុណសម្បត្តិរបស់ព្រះអង្គគឺមានគុណសម្បត្តិច្រើនអនេក ត្រង់ដែលថា ព្រះអង្គមានគោលការបង្រួបបង្រួមជាតិ ផ្សះផ្សាជាតិ នាំមកនូវសន្តិភាពសម្រាប់ប្រជាពលរដ្ឋខ្មែរ»។ ចំណែកអ្នកស្រីចាន់ បុប្ផាគ្រូបង្រៀនមកពីសាលាប៊ុនរ៉ានី ហ៊ុន សែនបន្ទរថា៖ «ក្រោមម្លប់ដ៏ត្រជាក់របស់ព្រះមហាក្សត្រជំនាន់នេះ ធ្វើឲ្យប្រទេសជាតិយើងមានភាពរុងរឿង ថ្កំថ្កើងសម្បូរសប្បាយ ហើយមានសុខសន្តិភាព»៕

និស្សិតម្នាក់ស្លាប់ក្នុងឧបទ្ទវហេតុនៃពិធីខួប១០ឆ្នាំការឡើងគ្រងរាជ្យសម្បត្តិមហាក្សត្រ

អត្ថបទទាក់ទង

ព្រះសង្ឃជាង១០០អង្គទូលសុំព្រះមហាក្សត្រឲ្យពន្យារពេលការកោះប្រជុំសភាលើកដំបូង

ព្រះមហាក្សត្របើកសម័យប្រជុំសភាឯកបក្ស

កិច្ចប្រជុំក្នុងវាំងរវាងគណបក្សប្រឆាំងនិងគណបក្សកាន់អំណាចអត់លទ្ធផល

និស្សិតម្នាក់ស្លាប់ក្នុងឧបទ្ទវហេតុក្នុងពិធីខួប១០ឆ្នាំការគ្រងរាជ្យសម្បត្តិមហាក្សត្រ

អ្នកវិភាគ៖ ព្រះបរមនាថ នរោត្តម សីហមុនីគ្រងរាជ្យសម្បត្តិតាមរដ្ឋធម្មនុញ្ញ១០ឆ្នាំកន្លងមក

ខួបលើកទី១០ឆ្នាំនៃព្រះរាជពិធីឡើងគ្រងរាជសម្បត្តិរបស់ព្រះមហាក្សត្រ

អត្ថបទ​ទាក់ទង

ព្រះសង្ឃ​ជាង​១០០​អង្គ​ទូល​សុំ​ព្រះ​មហាក្សត្រ​ឲ្យ​ពន្យារ​ពេល​ការកោះ​ប្រជុំ​សភា​លើក​ដំបូង

ព្រះ​មហាក្សត្រ​បើក​សម័យ​ប្រជុំ​សភា​ឯកបក្ស

កិច្ច​ប្រជុំ​ក្នុង​វាំង​រវាង​គណបក្ស​ប្រឆាំង​និង​គណបក្ស​កាន់​អំណាច​​អត់​លទ្ធផល

និស្សិត​ម្នាក់​ស្លាប់ក្នុង​ឧបទ្ទវហេតុ​ក្នុង​ពិធី​ខួប​១០​ឆ្នាំ​ការ​គ្រងរាជ្យ​សម្បត្តិ​មហាក្សត្រ

ខួប​លើក​ទី​១០​ឆ្នាំ​នៃ​ព្រះ​រាជ​ពិធី​ឡើង​គ្រង​រាជ​សម្បត្តិ​របស់​ព្រះ​មហាក្សត្រ