ក្រុមកម្មករបានវិលត្រឡប់ទៅធ្វើការវិញ បន្ទាប់ពីបានបញ្ចប់ការធ្វើកូដកម្មចំនួន៤ថ្ងៃ ក៏ប៉ុន្តែយ៉ាងតិចមានកម្មករចំនួនជាង១០០នាក់ត្រូវបានបណ្តេញចេញពីការងារ។ លោកអាត់ ធន់ បានព្រមានថា ប្រសិនបើកម្មករនៅតែត្រូវរោងចក្របណ្តេញចេញពីការងារជាបន្តបន្ទាប់ នោះអាចនឹងមានការធ្វើកូដកម្មសារជាថ្មីម្តងទៀត។ ការធ្វើកូដកម្មរយៈពេល៤ថ្ងៃនេះបានខាតបង់ទឹកប្រាក់ចំនួនជាង៧លានដុល្លារ។
បន្ទាប់ពីបានបញ្ចប់ការធ្វើកូដកម្មអស់រយៈពេលចំនួនបួនថ្ងៃ ក្រុមកម្មករកាត់ដេរសម្លៀកបំពាក់បានវិលត្រឡប់ចូលទៅកន្លែងធ្វើការរបស់ខ្លួនរៀងៗខ្លួនវិញហើយ ក៏ប៉ុន្តែយ៉ាងតិចមានកម្មករនិងមេដឹកនាំសហជីពប្រមាណជាង១០០នាក់ត្រូវបានបញ្ឈប់ពីការងារ។
ក្រុមកម្មករនៅតាមបណ្តារោងចក្រមួយចំនួនបានចាប់ផ្តើមធ្វើកូដកម្មកាលពីថ្ងៃចន្ទដើម្បីទាមទារដំឡើងប្រាក់បៀវត្សរ៍រហូតដល់៩៣ដុល្លារនិងប្រាក់រង្វាន់ផ្សេងៗមួយចំនួនទៀត។ ក៏ប៉ុន្តែការធ្វើកូដកម្មនេះបានបញ្ចប់ទៅវិញកាលពីថ្ងៃព្រហស្បតិ៍ បន្ទាប់ពីរដ្ឋាភិបាល និងមេដឹកនាំកូដកម្មបានយល់ព្រមថា នឹងមានការចរចាគ្នាមួយដែលធ្វើឡើងនៅថ្ងៃទី២៧ខាងមុខនេះ។
លោកអាត់ ធន់ ប្រធានសហភាពការងារកម្ពុជា បានបញ្ជាក់ថា ឥឡូវនេះក្រុមកម្មករបានវិលត្រឡប់ទៅកន្លែងធ្វើការរបស់ខ្លួនវិញហើយ។ ក៏ប៉ុន្តែមានកម្មករមួយចំនួនត្រូវបានបញ្ឈប់ពីការងារ។
លោកបាននិយាយថា ការបញ្ឈប់កម្មករនេះគឺជារឿងខុសច្បាប់ ហើយប្រសិនណាបើពុំមានដំណោះស្រាយឲ្យពួកគេចូលធ្វើការនៅកន្លែងដើមវិញទេនោះ អាចនឹងមានកូដកម្មសារជាថ្មីម្តងទៀត។
«ក្រុមហ៊ុននៅតែបង្កឲ្យមានបញ្ហា។ អាហ្នឹងកម្មករយើងវាពិបាកនៅក្នុងការទ្រាំណាស់។ អញ្ចឹងវាអាចនឹងមានកូដកម្មឡើងវិញយ៉ាងម៉េចៗ»។
លោកភិន សុភា អាយុ៣១ឆ្នាំ ប្រធានសហជីពស៊ីខៅឌូ ប្រចាំរោងចក្ររីវើរិច ដែលមានទីតាំងនៅក្នុងស្រុកស្អាង ខេត្តកណ្តាល បានមានប្រសាសន៍ថា យ៉ាងតិចមានកម្មករចំនួន២៥នាក់នៅក្នុងរោងចក្រនេះត្រូវបានបញ្ឈប់ពីការងារក្រោយពីពួកគេចូលរួមធ្វើកូដកម្ម។
លោកភិន សុភា បានបញ្ជាក់បន្ថែម៖
«សំណូមពរឲ្យក្រុមហ៊ុនក៏ដូចជាសមាគមកាត់ដេរ GMAC ហ្នឹង ពិចារណាឡើងវិញ នៅពេលឲ្យពួកខ្ញុំនៅក្រៅរោងចក្រ ឬក៏អាចដកពាក្យបណ្តឹងហ្នឹង ឲ្យទទួលពួកខ្ញុំចូលធ្វើការវិញ នៅថ្ងៃស្អែកនេះ។ ហើយបើមិនអញ្ចឹងទេ តាមកម្មករដែលគាត់ចូលធ្វើការ គាត់អត់សុខចិត្តទេ បើសិនអត់មានពួកខ្ញុំចូលធ្វើការ»។
កាលពីថ្ងៃព្រហស្បតិ៍ម្សិលមិញនេះ ក្រសួងសង្គមកិច្ចនិងអតីតយុទ្ធជននិងយុវនីតិសម្បទា បានចេញសេចក្តីប្រកាសព័ត៌មានមួយ ឲ្យក្រុមកម្មករបញ្ឈប់ការធ្វើកូដកម្ម ហើយបានអះអាងថា ក្រុមការងារទំនាក់ទំនងវិជ្ជាជីវៈនឹងកោះប្រជុំនៅថ្ងៃទី២៧ខាងមុខនេះ ដើម្បីដោះស្រាយវិបត្តិនេះ។
ការធ្វើកូដកម្មរយៈពេលបួនថ្ងៃកន្លងមកនេះ បើតាមការបញ្ជាក់របស់លោកជាតិ ខេមរា មន្ត្រីជាន់ខ្ពស់នៃសមាគមកាត់ដេរកម្ពុជា បានមានប្រសាសន៍ថា យ៉ាងតិចមានរោងចក្រចំនួន២០បានទទួលរងនូវផលប៉ះពាល់ និងបានខាតបង់ទឹកប្រាក់ជាងប្រាំពីរលានដុល្លារអាមេរិក។
លោកជាតិ ខេមរាបានមានប្រសាសន៍ទៀតថា ប្រសិនបើជនរងគ្រោះមិនសុខចិត្ត គេអាចដាក់ពាក្យបណ្តឹងទៅតុលាការបាន ដើម្បីទាមទារសំណងខូចខាតទាំងនេះ។
«វាអាច ប្រសិនបើរកឃើញថា អ្នកទាំងអស់ហ្នឹងមានការពាក់ព័ន្ធទៅលើនេះ នោះគេអាចទទួលខុសត្រូវរឿងនេះ នៅពេលដែលយើងរកឃើញថា មានភស្ថុតាងជាក់ស្តែងថា បានប្រព្រឹត្ត បានបង្កអញ្ចឹងមែន»។
អ្នកស្រីម៉ម ញឹម ប្រធានសម្ព័ន្ធសហព័ន្ធសហជីពការងារជាតិកម្ពុជា បាននិយាយថា កម្មករមិនអាចទទួលខុសត្រូវចំពោះការខាតបង់របស់និយោជកបានទេ។
អ្នកស្រីបានមានប្រសាសន៍ទៀតថា ការធ្វើកូដកម្មរបស់កម្មករ គឺធ្វើទៅតាមនីតិវិធីត្រឹមត្រូវដើម្បី ទាមទារឲ្យមានការចរចាទ្វេភាគីរវាងសមាគមកាត់ដេរនិងសម្ព័ន្ធសហជីពទាំងពីររបស់កម្មករ។ ក៏ប៉ុន្តែកន្លងមកមិនមានការឆ្លើយតបណាមួយជាផ្លូវការទេ៕