កម្មកររោងចក្រកាត់ដេរបានបន្តធ្វើកូដកម្មទាមទារឱ្យថៅកែរោងចក្រទទួលយកអ្នកតំណាងរបស់ខ្លួនចូលធ្វើការវិញ បន្ទាប់ពីពួកគេបានបញ្ឈប់ការធ្វើកូដកម្មតាមការស្នើសុំរបស់រាជរដ្ឋាភិបាលដើម្បីធ្វើការចរចាអំពីការទាមទារសុំដំឡើងប្រាក់ឈ្នួលកាលពីសប្តាហ៍មុន។ ប៉ុន្តែអ្នកតំណាងកម្មករនៅក្នុងរោងចក្រទាំងនេះត្រូវបានព្យួរការងារបណ្តោះអាសន្នស្របតាមដីការក្សាការពាររបស់តុលាការខេត្តកណ្តាល។ ប្រធានសហជីពបាននិយាយថា ការចេញដីកានេះហាក់បីដូចជាជំរុញឱ្យមានជម្លោះវិញ។
នៅថ្ងៃច័ន្ទនេះ កម្មកររាប់ពាន់នាក់នៅក្នុងរោងចក្រកាត់ដេរចំនួនបីបានបន្តធ្វើកូដកម្ម ខណៈដែល តុលាការបានចេញដីកាហាមឃាត់តំណាងកម្មករមិនឱ្យចូលធ្វើការទេ រហូតដល់មានការសម្រេចរបស់តុលាការ។
ក្រុមហ៊ុនកាត់ដេរចំនួនបីបានប្តឹងតំណាងកម្មករនៅក្នុងការនាំកម្មករធ្វើកូដកម្ម និងធ្វើឲ្យខូចខាតផលប្រយោជន៍របស់ក្រុមហ៊ុននៅក្នុងស្រុកស្អាង ខេត្តកណ្តាល។
តុលាការខេត្តកណ្តាលមិនអនុញ្ញាតឱ្យតំណាងកម្មករ៥៤នាក់ពីរោងចក្រកាត់ដេរ River Rich Textile រោងចក្រកាត់ដេរ GOLDFAME Enterprise និងរោងចក្រកាត់ដេរ Winner ចូលធ្វើការ។
លោកអ៊ុច សំអាត កម្មកររោងចក្រកាត់ដេរ Goldfame Enterprise បាននិយាយថា កម្មករប្រមាណ៥.០០០នាក់ បានតវ៉ានៅមុខរោងចក្រ ដើម្បីទាមទារឱ្យតំណាង១៩នាក់ របស់ខ្លួនបានចូលធ្វើការវិញ។
«ខ្ញុំធ្វើកូដកម្មនេះ ក្នុងគោលបំណងចង់ឱ្យតំណាងសហជីព១៩នាក់ ដែលថៅកែមិនឱ្យចូលធ្វើការ ឱ្យចូលធ្វើការវិញធម្មតា»។
កញ្ញាសុខ រ័ត្ន កម្មកររោងចក្រកាត់ដេរ Winner បានបញ្ជាក់ថា កម្មករប្រមាណ២.០០០នាក់ មិនព្រមចូលធ្វើ ដើម្បីឱ្យថៅកែរោងចក្រទទួលយកតំណាង១០នាក់របស់ខ្លួនចូលធ្វើការវិញ។
«កម្មករជិត២.០០០នាក់ធ្វើកូដកម្ម ដើម្បីទាមទារឱ្យតំណាងកម្មករ១០នាក់ ដែលថៅកែអត់ឱ្យចូលធ្វើ ការវិញ ពីព្រោះពួកគាត់បានជួយធ្វើកូដកម្មជាមួយពួកខ្ញុំរឿងទាមទារដំឡើងប្រាក់ឈ្នួល»។
កញ្ញាផាន សុផា កម្មកររោងចក្រកាត់ដេរ River Rich Textile បានបញ្ជាក់ថា កម្មករប្រមាណ១.៧០០នាក់ ធ្វើកូដកម្ម រហូតដល់តំណាង កម្មករ២៥នាក់បានចូលធ្វើការវិញ។
«ពួកខ្ញុំអត់ចូលធ្វើការ ព្រោះពួកខ្ញុំចង់ឱ្យតំណាងរបស់ពួកខ្ញុំទាំង២៥នាក់ ចូលធ្វើការដែរ។ ថ្ងៃនេះ ពួកខ្ញុំអត់ចូលធ្វើការ ដោយសារតែអត់ឃើញតំណាងពួកខ្ញុំចូលធ្វើការ។ ពួកខ្ញុំ ធ្វើកូដកម្ម ដើម្បីឱ្យ តំណាងរបស់ខ្ញុំចូលធ្វើការវិញទាំងអស់»។
លោកស៊ិន វីរៈ ចៅក្រមស៊ើបសួរសាលាដំបូងខេត្តកណ្តាល បានបញ្ជាក់ថា លោកនឹងអនុវត្តតាមនីតិវិធីតុលាការ ដូចមាននៅក្នុងដីការក្សាការពារចុះថ្ងៃទី១៦ខែសីហាថា ជនទាំងអស់ដែលមានឈ្មោះនៅក្នុងដីកាមិនអនុញ្ញាតឱ្យចូលធ្វើការឬ ចូលក្នុងបរិវេណរោងចក្រជាបណ្តោះអាសន្ន រហូតដល់រឿង អង្គសេចក្តីត្រូវបានដោះស្រាយចប់ជាស្ថាពរ។
លោកជា ជីឆាយ ប្រធានរដ្ឋបាលរោងចក្រ Winner បានថ្លែងថា ក្រុមហ៊ុនបានអនុវត្តតាមដីការបស់ តុលាការ ដោយហាមឃាត់បុគ្គលទាំងនោះចូលធ្វើ ដើម្បីរង់ចាំការសម្រេចរបស់តុលាការ។ ប៉ុន្តែក្រុមហ៊ុន បានអនុញ្ញាតឱ្យកម្មករចូលធ្វើការវិញ។
«ក្រុមហ៊ុនសំណូមពរឱ្យបុគ្គលទាំងអស់ធ្វើការតតាំងគ្នាទៅតាមផ្លូវច្បាប់ទៅ ហើយអ្នកដែលមិនពាក់ព័ន្ធឱ្យចូលធ្វើការតាមធម្មតាចុះ ដើម្បីកុំប៉ះពាល់ដល់ផលប្រយោជន៍កម្មករនិងផលយោជន៍ក្រុមហ៊ុន»។
លោកអាត់ ធន់ ប្រធានសហភាពការងារកម្ពុជា បានថ្លែងថា ដីការក្សាការពារនេះជាការដាក់គំនាប ការគំរាមកំហែង ការបំភិតបំភ័យ ការបំបាក់ស្មារតីរបស់កម្មករ និងការរារាំងដល់ការចរចានៅថ្ងៃមុខ មិនឱ្យមានលទ្ធផលខ្ពស់។
«ការចេញដីកានេះមកហាក់បីដូចជាជំរុញឱ្យមានជម្លោះវិញទេ ពីព្រោះដីការក្សាការពារ បើនិយាយតាមច្បាប់ថា កម្មវត្ថុនៃដីកានេះគឺដើម្បីផ្អាកសកម្មភាព។ ឥឡូវយើងផ្អាកការធ្វើកូដកម្មហើយ។ តុលាការចេញដីកា កម្មករបានចេញមកធ្វើកូដកម្មវិញដោយសារមិនឱ្យថ្នាក់ដឹកនាំរបស់គេចូលធ្វើការ»។
ការចរចារវាងតំណាងកម្មករ តំណាងរោងចក្រ និងក្រសួងការងារគ្រោងនឹងធ្វើឡើងនៅសប្តាហ៍ក្រោយដើម្បីពិភាក្សាពីប្រាក់ឈ្នួលកម្មករ៕