ភ្ជាប់​ទៅ​គេហទំព័រ​ទាក់ទង

ធនាគារ​ពិភព​លោក​ផ្តល់​​២៣​លាន​ដុល្លារ​ដល់​កម្ពុជា​ដើម្បី​ពង្រឹង​គុណភាព​​​ឧត្តម​សិក្សា


គុណ​ភាព​អប់រំ​នៅ​ថ្នាក់​ឧត្តម​សិក្សា​ ដែល​ប្រឈម​នឹង​ការ​ធ្លាក់​ចុះ​យ៉ាង​ខ្លាំង​នឹង​ត្រូវ​បាន​លើក​កម្ពស់។ ​ហើយ​នឹង​មាន​ការផ្តល់​អាហារូបករណ៍​ដល់​និស្សិត​ក្រីក្រ​ ដែល​បាត់បង់​ឱកាស​សិក្សា​ ​ខណៈ​ដែល​ធនាគារ​ពិភព​លោក​បាន​ផ្តល់​ជំនួយ​សម្រាប់​គម្រោង​បង្កើន​ឱ្យ​មាន​គំនិត​ផ្តួច​ផ្តើម​ថ្មីៗ​មួយ​ចំនួន​នៅក្នុង​ប្រព័ន្ធ​គ្រប់គ្រង​ការ​ចូល​រៀន​របស់​និស្សិត​ ​ការ​គ្រប់គ្រង​ស្ថាប័ន​ ​ការ​សិក្សា​និង​ការ​បង្រៀន​ និង​ការ​សិក្សា​ស្រាវជ្រាវ​នៅ​ក្នុង​ស្ថាប័ន​ឧត្តម​សិក្សា។

ធនាគារ​ពិភព​លោក​បាន​ផ្តល់​ទឹក​ប្រាក់​ចំនួន​២៣​លានដុល្លារ​អាមេរិក​ដល់​ប្រទេស​កម្ពុជា​សម្រាប់​ អនុវត្ត​គម្រោង​ថ្មី​មួយ​សំដៅ​ជួយ​ពង្រឹង​ស្ថាប័ន​អប់រំ​ថ្នាក់​ឧត្តម​សិក្សា​នៅ​ក្នុង​ប្រទេស​កម្ពុជា។

ទឹក​ប្រាក់​ចំនួន​២៣​លាន​ដុល្លារ​អាមេរិក​នេះ​មាន​គោល​បំណង​ជួយ​លើក​កម្ពស់​គុណភាព​បង្រៀន​ សមត្ថភាព​គ្រប់គ្រង​និង​ការ​សិក្សា​ស្រាវជ្រាវ​ ​ហើយ​ផ្តល់​អាហារូបករណ៍​ដល់​និស្សិត​ក្រីក្រ​ ដែល​បាត់បង់​ឱកាស​សិក្សា។

សមាគម​អភិវឌ្ឍន៍​អន្តរជាតិ​ ដែល​ជា​ផ្នែក​មួយ​របស់​ធនាគារ​ពិភព​លោក​បាន​ផ្តល់​ជំនួយ​ទឹក​ប្រាក់ចំនួន​២៣​លាន​ដុល្លារ​អាមេរិក​នេះ​ ដែល​រួម​មាន​ហិរញ្ញ​ប្បទាន​ជំនួយ​ឥត​សំណង​១១,៥​លាន​ដុល្លារអាមេរិក​ និង​ហិរញ្ញប្បទានឥណទាន​ពុំមាន​ការប្រាក់​១១,៥​លាន​ដុល្លារ​អាមេរិក​សម្រាប់​គម្រោង​ដែលមាន​រយៈ​ពេល​៥ឆ្នាំ។

លោក​គាត ឈន់ ​រដ្ឋមន្ត្រី​ក្រសួង​សេដ្ឋកិច្ច​និង​ហិរញ្ញ​វត្ថុ ​បាន​ថ្លែង​ថា​ ​គោល​ដៅ​សំខាន់​របស់​យើង​គឺ​បង្កើន​គុណភាព​ដល់​ហត្ថពលិក​ទាំង​ក្នុង​វិស័យ​សាធារណៈ​ និង​វិស័យ​ឯកជន​ ​រួម​ទាំង​វិធាន​គ្រប់​គ្រង​អ្នក​ឯកទេស​បច្ចេក​ទេស ​និង​សាស្ត្រាចារ្យ​កម្រិត​ឧត្តម​សិក្សា​ដើម្បី​គាំទ្រ​ដល់​គោល​ដៅ​អភិវឌ្ឍន៍​ជាតិរបស់​រាជ​រដ្ឋាភិបាល។

លោកស្រី​ Annette Dixon​ នាយក​ធនាគា​រពិភព​លោក​ប្រចាំ​ប្រទេស​កម្ពុជា​ ​បាន​ថ្លែង​ថា​ ​គុណភាពឧត្តម​សិក្សា​គឺជា​គន្លឹះ​មួយ​ដ៏​សំខាន់​ដើម្បី​កសាង​ទុន​មនុស្ស​ដែល​វា​ជា​ផ្នែក​ដ៏​ពិសេស​សម្រាប់​ការអភិវឌ្ឍ​ប្រកប​ដោយ​និរន្តរភាព​ និង​ការ​កាត់​បន្ថយ​ភាព​ក្រីក្រ។

លោកស្រី​សង្ឃឹម​ថា​ ​គម្រោង​ថ្មី​នឹង​ជួយ​ប្រទេស​កម្ពុជា​ដើម្បី​ពង្រឹងបទដ្ឋាន​គុណភាព​របស់​ខ្លួន​សម្រាប់​វិស័យ​អប់រំ​ ​ក៏​ដូច​ជា​កសាង​សមត្ថភាព​ជំនាញ​ដែល​ជា​តម្រូវ​ការ​របស់​វិស័យ​សាធារណៈ ​និង​វិស័យ​ឯកជន។

លោក​អ៊ឹម ​សិទ្ធី ​រដ្ឋមន្ត្រី​ក្រសួង​អប់រំ​ ​បាន​បញ្ជាក់​ថា​ ​គម្រោង​លើក​កម្ពស់​គុណភាព​អប់រំ​និង​សមត្ថ​ភាព​ឧត្តម​សិក្សា​មាន​បំណង​លើក​កម្ពស់​គុណភាព​ ​ប្រសិទ្ធិភាព ​និង​ប្រសិទ្ធិ​ផល​នៃ​ប្រព័ន្ធ​អប់រំ​ឧត្តម​សិក្សា​នៅ​កម្ពុជា។​ វា​នឹង​បង្កើន​ឥទ្ធិពល​ដល់​ប្រព័ន្ធ​អប់រំ​លើ​ការ​អភិវឌ្ឍសង្គម ​និង​សេដ្ឋ​កិច្ច​តាម​រយៈ​ការ​បង្កើន​ជំនាញ​លើ​ធនធាន​មនុស្ស។

លោក​អ៊ឹម សិទ្ធី​បាន​បន្ត​ថា​ ​គម្រោង​នេះ​នឹង​បង្កើន​ឱ្យ​មាន​គំនិត​ផ្តួច​ផ្តើម​ថ្មីៗ​មួយ​ចំនួន​នៅ​ក្នុង​ប្រព័ន្ធគ្រប់​គ្រង​ការ​ចូល​រៀន​របស់​និស្សិត​ ​ការ​គ្រប់គ្រង​ស្ថាប័ន​ ​ការ​សិក្សា​ និង​ការ​បង្រៀន ​និង​ការ​សិក្សា​ ស្រាវជ្រាវ​នៅ​ក្នុង​ស្ថាប័ន​ឧត្តម​សិក្សា។

លោក​រ៉ុង ឈុន ​ប្រធាន​សមាគម​គ្រូ​បង្រៀន​កម្ពុជា​ឯករាជ្យ​ ​បាន​បញ្ជាក់​ថា​ ​បើ​ជំនួយ​នេះ​ប្រើ​ប្រាស់​ចំ​គោលដៅ​ និង​គ្មាន​អំពើ​ពុករលួយ​ ​វា​នឹង​ផ្តល់​ផល​ប្រយោជន៍​ដល់​វិស័យ​អប់រំ​នៅ​ថ្នាក់​ឧត្តម​សិក្សា។

«យើង​ចង់​ឱ្យ​ធនាគារ​ពិភព​លោក​ត្រូវតែ​ចូលរួម​ពិនិត្យ​ឃ្លាំមើល​នូវ​រាល់​ការ​ប្រើ​ប្រាស់​ថវិកា​នេះឱ្យចំ​គោល​ដៅ​ដើម្បី​ជៀស​វាង​កុំ​ឱ្យ​មាន​អំពើ​ពុក​រលួយ​នៅ​ក្នុង​ប្រាក់​ជំនួយ​នេះ»។

លោក​ឈាង សុខា ​នាយក​ប្រតិបត្តិ​កម្ម​វិធី​អភិវឌ្ឍន៍​ធនធាន​មនុស្ស​ ​បាន​ថ្លែង​ថា​ ​ជំនួយ​នេះ​មិនប្រាកដ​ជា​ធានា​ឱ្យ​មាន​គុណ​ភាព​អប់រំ​នៅ​ថ្នាក់​ឧត្តម​សិក្សា​ទេ​ ​ប៉ុន្តែ​សំខាន់​ប្រព័ន្ធ​នៃ​ការ​ប្រើប្រាស់​ជំនួយ​នេះ​មាន​លក្ខណៈ​ច្បាស់​លាស់​ក្នុង​ការ​ផ្សព្វផ្សាយ​ជា​សាធារណៈ​ការ​ផ្តល់​អាហារូបករណ៍​ តម្លា​ភាព និង​គ្មាន​អំពើ​ពុក​រលួយ។

«មិន​មែន​ឱ្យ​តែ​មាន​ប្រាក់​សុទ្ធ​តែ​ធានា​បាន​អំពី​គុណភាព​ទេ។​ បើ​ការ​ប្រើ​ប្រាស់​ជំនួយ​នេះ​មិន​មាន​ប្រព័ន្ធ​ជាក់លាក់​ ​ហើយ​ប្រព័ន្ធ​នោះ​មិន​ធានា​បាន​ពី​តម្លាភាព​ក្នុង​ការ​ផ្តល់​អាហារូបករណ៍​ដល់​និស្សិត»។

ប្រទេស​កម្ពុជា​ប្រឈម​មុខ​យ៉ាង​ខ្លាំង​នូវ​ការ​ធ្លាក់​ចុះ​នៃ​គុណភាព​អប់រំ​ ​ទោះ​ជាសាកល​វិទ្យាល័យបាន​កើត​មាន​យ៉ាង​ច្រើនក៏ដោយ៕

XS
SM
MD
LG