តុលាការខេត្តឧត្តមានជ័យបានចោទប្រកាន់ស្ដ្រីម្នាក់ពីបទសញ្ចាកម្ម និងបើកគ្រឹះស្ថានបម្រើសេវាផ្លូវភេទនៅថ្ងៃអង្គារនេះ ប៉ុន្ដែបានសម្រេចមិនតាមស៊ើបអង្កេតលើមន្ដ្រីយោធាមួយរូបដែលត្រូវសង្ស័យថាមានជាប់ពាក់ព័ន្ធក្នុងបញ្ហានេះ។
កាលពីថ្ងៃច័ន្ទប៉ូលីសប្រឆាំងការជួញដូរស្ដ្រី និងកុមាររបស់ខេត្តឧត្តមានជ័យបានចុះឆ្មក់ក្នុងផ្ទះបនមួយក្នុងស្រុកអន្លង់វែង ភាគខាងកើតទីរួមខេត្តនៅពេលដែលមន្ដ្រីយោធាដែលគេសង្ស័យថា ស្ថិតនៅពីក្រោយខ្នងផ្ទះបននោះកំពុងស្ថិតនៅទីនោះដែរ ហើយស្ដ្រីម្ចាស់ផ្ទះត្រូវឃាត់ខ្លួន។
មន្ដ្រីប៉ូលីសខេត្តបានអះអាងថា មានភាពតានតឹងជាមួយកងកម្លាំងយោធាមួយសន្ទុះ ហើយក្រោយមកបានធូរស្រាលមកវិញបន្ទាប់ពីតុលាការសម្រេចភ្លាមៗថា មន្ដ្រីយោធារូបនោះមិនបានពាក់ព័ន្ធក្នុងជំនួញខុសច្បាប់នេះ។
ជនរងគ្រោះចំនួនប្រាំមួយនាក់ត្រូវបានសង្គ្រោះ ក្នុងនោះមានស្ដ្រីជនជាតិវៀតណាមចំនួនបីនាក់ និងកម្ពុជាបីនាក់។ ក្នុងចំណោមជនជាតិវៀតណាមទាំងបីមានជនជាតិវៀតណាមម្នាក់អាយុក្រោម១៨ ឆ្នាំ។
ព្រះរាជអជ្ញានៃតុលាការខេត្តឧត្តមានជ័យ លោក កូយ កាន់យ៉ា បញ្ជាក់ថា លោកបានធ្វើការចោទប្រកាន់លើអ្នកស្រីយឹម សូរីតា ដែលជាម្ចាស់ផ្ទះបននៅល្ងាចនេះ។
«(ចោទ)ពីបទបើកសញ្ចាកម្ម និងបើកគ្រឹះស្ថានបម្រើសេវាផ្លូវភេទ»។
យោងតាមច្បាប់កម្ពុជា បទចោទនេះប្រឈមនឹងការជាប់ពន្ធនាគាររហូតដល់ដប់ឆ្នាំ ក៏ប៉ុន្ដែប្រសិនបើមានការជាប់ពាក់ព័ន្ធនឹងការធ្វើអាជីវកម្មផ្លូវភេទលើអនីតិជន ទោសនេះនឹងកើនឡើងទ្វេដង។
លោកវរៈសេនីយ៍ត្រី ឡាំ ប៉ូលី ប្រធានការិយាល័យប្រឆាំងការជួញដូរស្រ្ដីនិងកុមាររបស់ខេត្តឧត្តមានជ័យបញ្ជាក់ថាមន្ដ្រីយោធាដែលត្រូវសង្ស័យនោះ បានសារភាពថា គាត់គ្រាន់តែមានទំនាក់ទំនងជាមួយម្ចាស់បនតែប៉ុណ្ណោះ។
«គាត់ថា គាត់ចេញចូលតាមរបៀបជាមួយម្ចាស់ផ្ទះតាមរយៈការស្រឡាញ់ ការទាក់ទងគ្នាទេ តែគាត់មិនបានចូលរួមក្នុងសញ្ចាកម្មនោះទេ»។
ការចុះទៅបង្ក្រាបផ្ទះបននេះស្ថិតក្រោមការសហការរវាងប៉ូលីសប្រឆាំងការជួញដូរស្ដ្រីនិងកុមារនៃខេត្តឧត្តមានជ័យ ជាមួយនឹងអង្គការ អាហ្វ៊ីស៊ីប (Afesip)។
លោក សៅ ច័ន្ទធៀត អ្នកសម្របសម្រួលរបស់អង្គការអាហ្វ៊ីស៊ីបមានប្រសាសន៍ថា ការបង្រ្កាបផ្ទះបន នេះបានបង្ហាញពីការប្ដេជ្ញាចិត្តក្នុងការប្រឆាំងការជួញដូរមនុស្ស។
«គឺជាការប្ដេជ្ញាចិត្តរបស់អង្គការយើងក៏ដូចជារដ្ឋាភិបាលក្នុងការលុបបំបាត់ការជួញដូរស្ដ្រីនិងកុមារ»។
រដ្ឋាភិបាលសហរដ្ឋអាមេរិកកាលពីថ្ងៃសុក្រសប្ដាហ៍មុនបានផ្តល់ជំនួយថវិកាចំនួន៥,៤លានដុល្លារអាមេរិកដល់អង្គការWinrock អន្តរជាតិដែលកំពុងប្រតិបត្តិការនៅកម្ពុជាដើម្បីជួយជ្រោមជ្រែងដល់សកម្មភាពប្រឆាំងការជួញដូរមនុស្ស។
កម្ពុជាទទួលបានចំណាត់ថ្នាក់មិនល្អក្នុងរបាយការណ៍ចុងក្រោយរបស់ក្រសួងការបរទេសអាមេរិកចំពោះការប្រយុទ្ធប្រឆាំងនឹងការជួញដូរមនុស្ស៕