ភ្ជាប់​ទៅ​គេហទំព័រ​ទាក់ទង

វៀតណាម​សុំឲ្យ​កម្ពុជា​ជួយ​ជំរុញ​វិនិយោគ​វៀតណាម​នៅ​កម្ពុជា​


លោក​នាយក​រដ្ឋ​មន្ត្រី​វៀតណាម ង្វៀន​ តាន់ ស៊ុង (Nguyen Tan Dung) និង​លោក​នាយករដ្ឋ​មន្ត្រី​ខ្មែរ​ ហ៊ុន​ សែន

ប្រទេស​វៀតណាម ​បាន​ស្នើ​ប្រទេស​កម្ពុជា​ នៅ​ថ្ងៃនេះ​ឲ្យ​ជួយ​ការពារ​និង​ផ្ដល់​ផល​ប្រយោជន៍​ដល់​អ្នកវិនិយោគ​របស់​ខ្លួន​នៅក្នុង​ប្រទេស​កម្ពុជា។ សំណើ​នេះ​ធ្វើឡើង​នៅក្នុង​ដំណើរ​ទស្សនកិច្ច​ចំនួន​មួយ​ថ្ងៃ​របស់​លោក​នាយករដ្ឋមន្ដ្រី​វៀតណាម​ ង្វៀន តាន់ ស៊ុង​ (Nguyen Tan Dung) ​នៅ​កម្ពុជា។

នាយក​រដ្ឋមន្ដ្រី​វៀតណាម ​លោក ង្វៀន ​តាន់ ស៊ុង ​នៅ​ថ្ងៃច័ន្ទនេះ​ បាន​អំពាវនាវ​ដល់​ប្រទេស​កម្ពុជា​ឲ្យ​ផ្ដល់​ការអនុគ្រោះ​ឲ្យ​បាន​ច្រើន​ដល់​អ្នក​បណ្ដាក់ទុន​មកពី​ប្រទេស​ខ្លួន ​ខណៈ​ដែល​ការ​បណ្ដាក់ទុន​មកពី​ប្រទេស​វៀតណាម​ បាន​កើន​ដល់ ​៦០០ ​លា​នដុល្លារ​មុន​ដំណាច់​ឆ្នាំ ២០១០​នេះ។

លោក​ ខៀវ កញ្ញារិទ្ធ ​រដ្ឋមន្ដ្រី​ក្រសួង​ព័ត៌មាន​ និង​ជា​អ្នកនាំពាក្យ​រដ្ឋាភិបាល​បាន​ថ្លែង​នៅក្នុង​សន្និសីទ​កាសែត​ក្រោយពី​ជំនួប​រយៈពេល​ជាង​មួយម៉ោង​រវាង​ លោក​ប្រមុខ​រដ្ឋាភិបាល​វៀតណាម​ ជាមួយ​សមភាគី​កម្ពុជា​ លោក​ ហ៊ុន សែន​ ថា ​វៀតណាម​ចង់​ឲ្យ​កម្ពុជា​ផ្ដល់​ការអនុគ្រោះ​ដល់​ការរកស៊ី​របស់​វៀតណាម​ទាំង​ក្នុង​វិស័យ​អាកាសចរ​ណ៍ និង​ផ្នែក​កសិកម្ម​ផងដែរ។

“គណៈប្រតិភូ​វៀតណាម​ក៏​បាន​ស្នើសុំ​ឲ្យ​រដ្ឋាភិបាល​កម្ពុជា​បន្ដ​ជួយ​លើក​ទឹកចិត្ត ​និង​ផ្ដល់​ភាពអនុគ្រោះ​ដល់​អ្នក​វិនិយោគ​វៀតណាម ​ក៏ដូច​ជា​អាជីវករ​វៀតណាម​ដែល​កំពុង​តែ​រកស៊ី​នៅក្នុង​ប្រទេស​កម្ពុជា ​ជាពិសេស​នៅលើ​ផ្នែក​អាកាសចរណ៍​ ធនាគារ​ និង​កៅស៊ូ"។

លោក​ ង្វៀន តាន់ ស៊ុង​ ​បាន​មក​ដល់​ប្រទេស​កម្ពុជា​ កាលពី​ព្រឹកថ្ងៃ​ច័ន្ទ ដើម្បី​បំពេញ​ដំណើរ​ទស្សនកិច្ច​ចំនួន​មួយថ្ងៃ ​មុននឹង​ចូលរួម​កិច្ច​ប្រជុំកំ​ពូល​នៃ​ប្រទេស​វៀតណាម ​ឡាវ ​កម្ពុជា​ និង​ប្រទេស​ភូមា​ និង​កិច្ច​ប្រជុំ​កំពូល​ស្តីពី​យុទ្ធសាស្ដ្រ​សហប្រតិបត្តិការ​សេដ្ឋកិច្ច ​តំបន់​ទន្លេ​មេគង្គ​ ចៅប្រាយ៉ា ​ដែល​កិច្ច​ប្រជុំ​ទាំងនេះ​ នឹង​ប្រព្រឹត្តទៅ​នៅ​ថ្ងៃអង្គារ៍ ​និង​ថ្ងៃពុធ ​សប្ដាហ៍​នេះ។

ជាមួយ​គ្នានេះ ​លោក​នាយករដ្ឋមន្ដ្រី​ខ្មែរ ​ហ៊ុន សែន​ បាន​កោត​សរសើរ​ដល់​ការ​វិនិយោគទុន​មកពី​ប្រទេស​វៀតណាម​។ នេះ​បើយោង​តាម​លោក​ ខៀវ កញ្ញារិទ្ធ។

“សម្ដេច​បាន​មាន​ប្រសាសន៍ថា ​នៅពេល​ដែល​ប្រទេស​មួយ​ចំនួន​បង្កក​ទុន​វិនិយោគ ​គឺ​វៀតណាម​បាន​បង្កើន​ទុន​វិនិយោគ​ចូល​កម្ពុជា​។ នេះ​ជា​ឱកាស​មួយ​ដែល​ធ្វើ​ឲ្យ​កម្ពុជា​ មាន​ការងារ​ធ្វើ​ផង ​និងក៏​ជា​ការ​ផ្ទេរ​បច្ចេកវិទ្យា​មួយ​ចំនួន​មក​កម្ពុជា​ផង។ ​បើ​មាន​ (ការវិនិយោគកាន់​តែច្រើន​ ) យើង​កាន់តែ​ស្វា​គម"។

ប្រទេស​កម្ពុជា ​និង​ប្រទេស​វៀតណាម ​បាន​ប្ដេជ្ញា​រួមគ្នា​ថា ​នឹង​ជំរុញ​ការ​ធ្វើពាណិជ្ជកម្ម​រវាង​គ្នា​ឲ្យ​កើន​ដល់​២.០០០​លាន​ដុល្លារ​នៅក្នុង​ឆ្នាំ​នេះ។

បន្ថែមពី​លើ​ការវិនិយោគ​ក្នុង​វិស័យ​ធនាគារ ​វិស័យ​អគ្គិសនី ​និង​វិស័យ​ទូរគមនាគម​ន៍ និង​ធ្វើការ​រុករក​ប្រេងកាត​ និង​ឧស្ម័ន ​ប្រទេស​វៀតណាម​បច្ចុប្បន្ន​ក៏មាន​វិនិយោគ​លើ​ដំណាំ​កៅស៊ូ​សរុប​ចំនួន​ ១០០.​០០០ ហិចតា​ផងដែរ​។ ការវិនិយោគ​នេះ​ ដែល​ធ្វើ​ឲ្យ​មាន​ការប្រឆាំង​តវ៉ា​ពី​ក្រុម​ប្រជាជន​ដែល​ទទួល​រង​ផលប៉ះពាល់​។ ក៏ប៉ុន្ដែ​នៅក្នុង​ជំនួប​ជាមួយ​លោក​នាយករដ្ឋមន្ដ្រី ​ហ៊ុន សែន ​លោក ​ង្វៀន តាន់​ ស៊ុង​ ចង់​បង្កើន​ការវិនិយោគ​របស់​ប្រទេសវៀត​ណាម​លើ​ការដាំកៅស៊ូ​ជា​បន្ថែម​ទៀត។

លោក​ សុន ឆ័យ ​តំណាងរាស្ដ្រ​គណបក្ស​ជំទាស់ ​សម រង្ស៊ី ​មាន​ប្រសាសន៍​ថា​ការវិនិយោគ​ពី​ប្រទេស​ វៀតណាម ​នឹង​ធ្វើ​ឲ្យ​ប៉ះពាល់​ដល់​ផល​ប្រយោជន៍​របស់​ប្រទេស​កម្ពុជា។

“ខ្ញុំថា ការវិនិយោគ​ជាមួយ​ប្រទេស​វៀតណាម​ហាក់​ដូចជា ​មាន​លក្ខណៈ​ដែលមិន​ទទួល​យក​បាន​។ ជា​ពិសេស​លើ​ផ្នែក​ចំការ​កៅស៊ូ ​ដែល​យើង​ឃើញ​ថា មាន​ការប៉ះពាល់​ដល់​ផលប្រយោជន៍​ប្រទេស​ជាតិ ​ជាច្រើន។ ផ្នែក​ទូរគមនាគម​ន៍​ក៏​យើង​ឃើញថា​ មាន​ការរកស៊ី​ដែល​ពុំមាន​លក្ខណៈ​ប្រណាំង​ប្រជែង​ត្រឹមត្រូវ ​ធ្វើ​ឲ្យ​មាន​ការព្រួយបារម្ភ​ថា​ អាចនឹង​ធ្វើ​ឲ្យ​បាត់បង់​ផលប្រយោជន៍​របស់​ប្រទេស​យើង"។

សូម​បញ្ជាក់ថា ​នៅក្នុង​ជំនួប​ជាមួយ​លោក ​ហ៊ុន សែន ​លោក ​ង្វៀន តាន់ ស៊ុង ​បាន​អរគុណ​ប្រទេស​កម្ពុជា​ក្នុង​ការជួយ​ទប់ស្កាត់​អ្វី​មួយ​ដែល​លោក​ហៅថា ​ជាចលនា​អមិត្ត​ប្រឆាំង​ទៅនឹង​ប្រទេស​វៀត​ណាម ​ហើយ​លោក​ក៏​ចង់បាន​ការបោះបង្គោល​ព្រំដែន​រួម​រវាង​ប្រទេស​ទាំងពីរ​ចប់​សព្វគ្រប់​នៅមុន​ដំណាច់​ឆ្នាំ ២០១២។ ការបោះបង្គោល​ព្រំដែន​ដែល​ជា​ចំណោទ​ធ្វើ​ឲ្យ​លោក​ សម រង្ស៊ី ​មេដឹកនាំ​គណបក្សជំទាស់​ទទួល​ការផ្ដន្ទាទោស​ឲ្យ​ជាប់​ពន្ធនាគារ​ចំនួន​១២ ឆ្នាំ៕

XS
SM
MD
LG