ភ្នំពេញ៖ ប្រជាពលរដ្ឋនៅក្នុងទីក្រុងភ្នំពេញនិងជនរងគ្រោះនៅគុកទួលស្លែងផ្ទាល់ក្នុងរបបខ្មែរក្រហម រំពឹងដូចៗគ្នាថា ឌុចនឹងត្រូវតុលាការកាត់ឲ្យជាប់ទោស នៅពេលសាលក្រមរបស់គាត់នឹងត្រូវប្រកាសនៅថ្ងៃច័ន្ទស្អែកនេះ។ ប៉ុន្តែជនរងគ្រោះទាំងនោះរំពឹងខុសៗគ្នាទៅលើកម្រិតនៃទោសរបស់ឌុច។
បើទោះជាក្រុមជនរងគ្រោះនៅក្នុងរបបខ្មែរក្រហមនិងជាពិសេសអតីតអ្នកទោសដែលរួចជីវិតពីគុកទួលស្លែងផ្ទាល់ មានការរំពឹងទុកដូចៗគ្នាថា លោកកាំង ហ្កេកអ៊ាវ ហៅឌុចនឹងត្រូវកាត់ឲ្យជាប់ទោសក៏ដោយ ក៏ពួកគេរំពឹងខុសៗគ្នាទៅលើកម្រិតនៃការដាក់ទោសលើអតីតមេគុកទួលស្លែងរូបនេះដែរ ពោលគឺអ្នកខ្លះរំពឹងថា ឌុចនឹងត្រូវកាត់ទោសឲ្យជាប់គុកពី២០ទៅ៣០ឆ្នាំ និងខ្លះទៀតថា យ៉ាងតិចក៏៤០ឆ្នាំ ឬរហូតដល់មួយជីវិតដែរ។
លោកសរ ខេមរ័ត្ន វ័យ៤៨ឆ្នាំ ប្រជាពលរដ្ឋម្នាក់រស់នៅអែបនឹងរបងសារមន្ទីរប្រល័យពូជសាសន៍ទួលស្លែង ហើយដែលអ៊ុំប្រុសរបស់លោកម្នាក់បានស្លាប់នៅក្នុងអតីតគុកដែលឌុចធ្លាប់គ្រប់គ្រងនេះ បានមានប្រសាសន៍ថា លោករំពឹងថា សាលក្រមរបស់ឌុច ដែលនឹងត្រូវប្រកាសនៅថ្ងៃច័ន្ទស្អែកនេះ នឹងកំណត់ទោសឌុចឲ្យជាប់ពន្ធនាគារអស់មួយជីវិត។
«បើតាមតែចិត្តយើងខឹងវិញអ្ហា៎។ បើស្រុកអត់មានច្បាប់ យើងត្រូវសងសឹកវាដោយដៃឬដោយអីផ្ទាល់អញ្ចឹងវិញ។ ប៉ុន្តែដល់ឥឡូវ បើនិយាយពីរឿងច្បាប់ យើងរំពឹងថា ច្បាប់ដាក់ទោសវាមួយជីវិតមិនអញ្ចឹង? ព្រោះវាសម្លាប់គេច្រើនណាស់។ ទោះបីជាវាធ្វើដោយសារអំណាចឥទ្ធិពលមេបញ្ជាចុះ ក៏បាតដៃវាប្រឡាក់ឈាមដែរ»។
ការកាត់ទោសលើករណី០០១ដែលជាប់ពាក់ព័ន្ធនឹងជនជាប់ចោទកាំង ហ្កេកអ៊ាវហៅឌុច អតីតមេគុកទួលស្លែងនៅក្នុងរបបខ្មែរក្រហម បានចប់សព្វគ្រប់កាលពីឆ្នាំមុន បន្ទាប់ពីការបើកសវនាការរយៈពេល៧៧ថ្ងៃ ចន្លោះពីថ្ងៃទី៣០ខែមីនារហូតដល់ថ្ងៃទី២៧ខែវិច្ឆិកា ឆ្នាំ២០០៩។
ឌុចត្រូវបានអង្គជំនុំជម្រះវិសាមញ្ញក្នុងតុលាការកម្ពុជា ឬហៅថា សាលាក្តីខ្មែរក្រហមដែលគាំទ្រដោយអង្គការសហប្រជាជាតិ នាំខ្លួនយកមកកាត់ទោសចំពោះការស្លាប់បុរស ស្រ្តី និងកុមារយ៉ាងតិចចំនួន១២៣៨០នាក់ ដោយសារការធ្វើទារុណកម្មនិងការកាប់សម្លាប់នៅក្នុងមន្ទីរសន្តិសុខស២១ ឬ គុកទួលស្លែងដែលគាត់បានគ្រប់គ្រងនៅចន្លោះឆ្នាំ១៩៧៦ដល់១៩៧៩។
នៅក្នុងពេលសវនាការកាលពីឆ្នាំមុន ឌុចបានសារភាពទទួលខុសត្រូវចំពោះការស្លាប់បាត់បង់ជីវិតប្រជាជនជាង១ម៉ឺននាក់នេះ ហើយក៏បានសម្ដែងការសោកស្ដាយចំពោះឧក្រិដ្ឋកម្មដែលគាត់បានប្រព្រឹត្តទៅលើជនរងគ្រោះទាំងនោះផងដែរ។ ប៉ុន្តែនៅមុនពេលបិទបញ្ចប់សវនាការជាស្ថាពរ ឌុចបានស្នើសុំឲ្យតុលាការដោះលែងរូបលោកឲ្យមានសេរីភាពឡើងវិញ ដោយសំអាងថា លោកត្រូវបានចាប់ដាក់គុកអស់រយៈពេលជាង១០ឆ្នាំ ដោយគ្មានការជំនុំជម្រះនៅក្នុងតុលាការយោធា ហើយថា លោកក៏បានសហការបានយ៉ាងល្អជាមួយសាលាក្តីខ្មែរក្រហមដែរ។
លោក ញឹក សូផាត អាយុ៦១ឆ្នាំ ប្រជាពលរដ្ឋម្នាក់ទៀត ដែលរស់នៅអែបនឹងសារមន្ទីរប្រល័យពូជសាសន៍ទួលស្លែងដែរនោះ មានប្រសាសន៍ថា ការសម្រេចដោះលែង ឌុចឲ្យមានសេរីភាពគឺជាទង្វើដែលលោកមិនអាចទទួលយកបានទេ ដោយសារលោកលើកឡើងថា ឌុចមិនត្រឹមតែជាអ្នកបញ្ជាឲ្យមានការធ្វើទារុណកម្ម និងសម្លាប់អ្នកទោសប៉ុណ្ណោះទេ គឺឌុចថែមទាំងជាអ្នកធ្វើសកម្មភាពទាំងនេះដោយខ្លួនឯងផ្ទាល់ផងដែរ។
ប៉ុន្តែ លោកញឹក សូផាត ដែលជាមន្ត្រីរាជការចូលនិវត្តន៍ហើយនោះ មានប្រសាសន៍បន្ថែមថា លោករំពឹងថា នៅក្នុងសាលក្រមសម្រេចទោសនោះ សាលាក្តីខ្មែរក្រហមនឹងកំណត់ទោសឌុចឲ្យជាប់ពន្ធនាគារយ៉ាងតិចត្រឹម៤០ឆ្នាំ ដោយសារឌុចបានទទួលស្គាល់កំហុសរបស់ខ្លួននិងបានសហការយ៉ាងល្អជាមួយតុលាការនៅក្នុងដំណើរការកាត់ទោសគាត់តាំងពីដើមរហូតមក។
«៤០ឆ្នាំទៀត វាល្មមដល់ពេលស្លាប់ហើយ។ គាត់មិនអាចមានអាយុដល់១០០ជាងទេ។ ឥឡូវគាត់ចូល៦៧ អញ្ចឹង៤០ឆ្នាំហ្នឹង វាល្មមបញ្ចប់ជីវិតទៅហើយ។ អញ្ចឹង៤០ហ្នឹងវាគ្រប់គ្រាន់ដែរទៅហើយ។ យើងមិនចាំបាច់ទាមទារឲ្យច្រើនទៀតទេ។ តែប៉ុណ្ណឹងគាត់ល្មមដល់ពេលវេលាដែលគាត់ធ្វើដំណើរទៅវិញហើយ»។
លោក វ៉ាន់ ណាត អតីតអ្នកទោសម្នាក់ដែលបានរួចជីវិតពីគុកទួលស្លែង បានមានប្រសាសន៍ថា លោករំពឹងថា សាលាក្តីខ្មែរក្រហមអាចនឹងសម្រេចដាក់ទោសឌុចឲ្យជាប់ពន្ធនាគារពី២០ទៅ៣០ឆ្នាំ នៅក្នុងពេលប្រកាសសាលក្រមនោះ ដោយលោកលើកហេតុផលថា តុលាការអាចនឹងពិចារណា ទុកពេលឲ្យឌុចកែប្រែខ្លួននៅក្នុងដំណាក់កាលចុងក្រោយនៃជីវិតរបស់អតីតមេគុកទួលស្លែងនោះ។
«ខ្ញុំដូចជាមិនសង្ឃឹមថា គាត់ជាប់ច្រើនប៉ុន្មានទេ។ យ៉ាងណាក៏គេទុកពេលឲ្យគាត់កែខ្លួនក្នុងរយៈពេលបួនឬប្រាំឆ្នាំចុងក្រោយនៃជីវិតរបស់គាត់ដែរ»។
លោក ជ័យ ធារ៉ា អនុប្រធានសមាគមជនរងគ្រោះនៃរបបខ្មែរក្រហមបានមានប្រសាសន៍ថា ថ្វីត្បិតតែការរំពឹងទុករបស់ជនរងគ្រោះទៅលើកម្រិតនៃទោសរបស់ឌុចផ្សេងៗពីគ្នាក៏ដោយ ក៏ជនរងគ្រោះទាំងអស់នៃរបបនោះ រំពឹងថា សាលក្រមរបស់តុលាការនឹងសម្រេចដាក់ទោសឌុចដែរ៕