ភ្ជាប់​ទៅ​គេហទំព័រ​ទាក់ទង

សហរដ្ឋ​អាមេរិក​ដឹកនាំ​ធ្វើ​ពហិការ​ការពិភាក្សា​ដ៏​ចម្រូងសម្រាស​នៅ​អសប


លោក​ Vuk Jeremic ប្រធាន​នៃ​មហាសន្និបាត​អង្គការ​សហប្រជាជាតិ។
ដោយ​ម៉ាហ្ការ៉េត ប៊េសសៀ
បូរី​ញ៉ីវយ៉ក៖ សហរដ្ឋ​អាមេរិកបាន​ដឹកនាំ​មុខ​ក្នុង​ការ​ធ្វើ​ពហិការ​កាលពីថ្ងៃ​ពុធ​ប្រឆាំង​នឹងការពិភាក្សាដ៏​ចម្រូង​ចម្រាស​មួយ​នៅ​ឯ​មហាសន្និបាត​អង្គការ​សហប្រជាជាតិ​អំពី​តួរនាទី​របស់​តុលាការ​ឧក្រិដ្ឋកម្ម​អន្តរជាតិក្នុង​ការ​ផ្សះផ្សារជាតិ។

មាន​អ្នក​ការទូត​ខ្លះ​បាន​រិះគន់​ការពិភាក្សា​នេះ​ដោយ​និយាយ​ថា​គឺ​មាន​គោល​បំណង​បន្តុះ​បង្អាប់​ដល់​តុលាការ​ឧក្រិដ្ឋកម្ម​អន្តរជាតិ​កាត់​ទោស​នៅអតីតយូហ្កោ​ស្លាវីដែល​មាន​មូលដ្ឋាន​នៅ​ទីក្រុងឡាអេ ហើយ​បើ​និយាយ​ជារួម​ទៅ​គឺ​បង្អាប់​ដល់​តុលាការ​អន្តរជាតិ​ដទៃ​ទៀត។

កិច្ច​ប្រជុំ​នេះ​គឺ​ជា​គំនិត​របស់​លោក​ Vuk Jeremic ប្រធាន​នៃ​មហាសន្និបាត​អង្គការ​សហប្រជាជាតិ។ លោក​ជា​អតីត​រដ្ឋ​មន្ត្រី​ការបរទេស​ស៊ែប ​ហើយ​អ្នក​ការទូត​ខ្លះ​និយាយ​ថា​លោក​កំពុង​សម្លឹង​មើល​ទៅ​រក​តំណែង​ប្រធានាធិបតី​នៅ ក្នុង​ប្រទេស​របស់​លោក។

អ្ន​ក​នាំ​ពាក្យ​ម្នាក់​របស់​សហរដ្ឋ​អាមេរិក​បាន​បញ្ជាក់​នៅក្នុង​សេចក្តី​ថ្លែង​ការណ៍ថា​អ្នក​ការទូត​សហរដ្ឋ​អាមេរិក​មិន​ចូលរួម​ក្នុង​ការពិភាក្សា​ដេញ​ដោល​ណាមួយ​ដែល​រដ្ឋ​បាល​ក្រុង​វ៉ាស៊ីនតោន​មាន​អារម្មណ៍​ថា​មិន​មាន​«តុល្យភាព» និង​«មានលក្ខណៈអុចអាល»។

ប្រធាន​តុលាការ​អន្តរជាតិ​ទាំងអស់​មិន​ចូលរួម​ក្នុង​ការពិភាក្សា​នោះ​ទេ ហើយ​ប្រទេស​កាណាដា​និង​ហ្សកដានី​ក៏​មិនចូលរួម​ដែរ។​

ឯកអគ្គរាជទូត​ប្រទេស​ហ្សកដានី​ប្រចាំ​អង្គការ​សហប្រជាជាតិ គឺ​ព្រះ​អង្គម្ចាស់​ Zeid Ra'ad Zeid Al Hussein បាន​ប្រាប់​ក្រុម​អ្នក​សារព័ត៌មាន​ថា​ព្រះអង្គ​សង្ឃឹមថា​លោក​Jeremic ​គួរ​តែ​គិត​គូ​មែនទែនអំពី​ភាព​រសើប​នៃ​បញ្ហា​នេះ​ក្នុង​ការ​រៀបចំ​កិច្ច​ប្រជុំ​នេះ​ឡើង និង​ពិភាក្សា​ថែម​ទៀត​ជាមួយ​នឹង​រដ្ឋ​ជា​សមាជិក​ដទៃ​ទៀត​អំពី​បញ្ហា​នេះ។​

«នៅពេល​ដែល​យើង​ដឹង​ច្បាស់​ថា​មាន​របៀបវារៈ​ផ្សេង​សម្រាប់​កិច្ច​ប្រជុំ​នេះ​ គឺ​ការ​ដឹង​ពី​រស់​ជាតិ​មួយ​នៃ​កិច្ច​ប្រជុំ​នេះ​ ចំពោះ​ខ្ញុំ​យល់​ថា​លោក​ប្រធាន​មហាសន្និបាទ​កំពុងតែ​កេង​ចំណេញពីតួរនាទី​របស់​លោក​ដើម្បី​សម្រេច​គោល​ដៅ​តូច​មួយ​ដែល​មិន​អាច​ទទួល​យក​បាន​សម្រាប់​យើង​ទាំងអស់​គ្នា»។​

លោក​បាន​ គីមូន​អគ្គ​លេខាធិការ​អង្គការ​សហ​ប្រជាជាតិ​បាន​ចូលរួម​ក្នុង​ពេល​ប្រជុំ​នោះ​តែ​បន្តិច​ដោយ​ធ្វើ​ការ​ទទូច​ឱ្យ​គ្រប់​ប្រជាជាតិ​ទាំងអស់​គោរព​និង​គាំទ្រ​តុលាការ​អន្តរជាតិ។ លោក​បាន​គីមូន និយាយ​ថា​គ្មាន​អ្នកណា​ម្នាក់​គួរ​មើលងាយ​ដល់​តុលាការ​ «ដោយសារ​តែ​ហេតុផល​ដែល​ទាក់​ទង​នឹង​នយោបាយ​ជាង​យុត្តិធម៌​ទេ»។​

នៅក្នុង​សុន្ទរកថា​បើក លោក​Jeremic ​មិនបាន​រិះគន់​ដោយ​ចំៗ​ដល់​តុលាការ​ក្រុង​ឡាអេ​ទេ ប៉ុន្តែ​លោក​ប្រធានាធិបតី​ស៊ែប Tomislav Nikolic ​បាន​រិះគន់​អស់​រយៈ​ពេល​៤០នាទី។​

«យើង​ឆ្ងល់​ថា​តើ​ភាពមិន​លម្អៀង​យ៉ាង​ម៉េច​ទៅ នៅ​ពេល​ដែល​មាន​បរិយាកាស​ជាប្រព័ន្ធ​មួយ​ក្នុង​ការ​«វាយប្រហារអនាធិបតេយ្យ»​លើ​អ្វីៗ​ទាំង​អស់​ដែល​ជា​របស់​ស៊ែប...​បណ្តាញ​ព័ត៌មាន​បស្ចិម​ប្រទេស​ដ៏ មាន​ឥទ្ធិពល​នានា​បាន​បង្កើត​នូវ​រូបភាព​មួយ​ដែល​កំណត់​ជាមុន​ថា​ស៊ែប​ជាអ្នក​មាន​កំហុស»។​

វាគ្មិន​ផ្សេងទៀ​ត​រួមមាន​ប្រធានាធិបតីស៊ែបបូស្នី​នៃ​ប្រទេស​បូស្នី​ហេហ៊្សេ​ហ្កោវីណា​ Nebojsa Radmanovic​។ នៅ​ក្នុងពិធី​ដោយឡែក​មួយ​ លោក​Lewis MacKenzie ឧត្តម​សេនីយ៍​ចូលនិវត្តន៍​ដែល​មាន​រឿង​ចម្រូង​ចម្រាស​ច្រើន​របស់​កាណា​ដាបាន​គ្រោង​ថា​នឹង​ឡើង​ថ្លែង​ដែរ។ កាលពី​ពេល​មុន​លោក​បាន​ចោទ​សួរ​ថា​តើ​ពិតជាមាន​អំពើ​ប្រល័យពូជសាសន៍​កើត​មាន​ឡើង​នៅ​ក្រុងSrebrenica ​មែន​ឬទេ​នៅ​ឆ្នាំ​១៩៩៥​ពេល​ដែល​ក្រុម​បុរសៗ​និង​កុមារា​បូស្នី​កាន់​សាសនា​អ៊ីស្លាម​ជិត​៨០០០​នាក់​ត្រូវ​បាន​សម្លាប់​រង្គាល​បន្ទាប់ពី​កងកម្លាំង​ស៊ែប​វាយ​យក​បាន​ទីក្រុង​នោះ។ ​ ​

ចាប់​តាំង​ពី​ត្រូវ​បាន​បង្កើតឡើង​ក្នុង​ឆ្នាំ​១៩៩៣​ តុលាការ​នៅ​ទីក្រុង​ឡាអេ​នេះ​បាន​ចេញ​ដីការ​ចោទ​ប្រកាន់​មនុស្ស​១៦១​នាក់​ពី​បទ​ឧក្រិដ្ឋកម្ម​និង​មាន​១៥​នាក់​ត្រូវ​បាន​តុលាការ​ទម្លាក់​ចោល​លែង​ចោទប្រកាន់។ មាន​ជន​សង្ស័យ​រាប់​សិប​នាក់​កំពុង​ទទួលការ​កាត់​ទោស​នៅ​ឡើយ៕
ប្រែសម្រួល​ដោយ​លោក​ម៉ែន គឹមសេង
XS
SM
MD
LG