ភ្ជាប់​ទៅ​គេហទំព័រ​ទាក់ទង

រដ្ឋាភិបាល​កម្ពុជា​ឲ្យ​ឧត្តម​ស្នងការ​អ.ស.ប.​ទទួល​បន្ទុក​ជនភៀស​ខ្លួន​​បិទ​ជំរុំ​បណ្ដោះ​អាសន្ន


ក្រុម​កុលសម្ព័ន្ធ​ភ្នំ​ពី​ប្រទេស​វៀតណាម ឬ Montagnard រង់​ចាំ​វេន​ចូល​ពិនិត្យ​សុខភាព​នៅ​​មន្ទីរពេទ្យ​​ក្រុង​បានលុង​ក្នុង​ខេត្ត​រតនគីរី​​កាល​ពី​ថ្ងៃ​ទី​២០​ខែ​កញ្ញា​ឆ្នាំ​២០០៤។ ប្រទេស​កម្ពុជា​ក្នុង​ពេល​ថ្មីៗ​ចង់​ឲ្យ​អង្គការ​សហប្រជាជាតិ​បិទ​ជំរុំ​ជន​ភៀស​ខ្លួន

រដ្ឋាភិបាល​កម្ពុជា​បាន​ដាក់​កំហិត​ឲ្យ​ឧត្តម​ស្នងការ​អង្គការ​សហ​ប្រជាជាតិ​ទទួល​បន្ទុក​ជនភៀស​ខ្លួន​នៅ​កម្ពុជាបិទ​ជំរុំ​បណ្ដោះ​អាសន្ន​របស់​ខ្លួន​ក្នុង​ទីក្រុង​ភ្នំពេញ​ ​នៅ​ដើម​ខែ​ក្រោយ​នេះ។​ ក៏​ប៉ុន្ដែ​អង្គការ​សហ​ប្រជាជាតិ​ត្រូវការ​ពេល​វេលា​ច្រើន​ជាង​នេះ​ ​ដើម្បី​បញ្ចប់​ការងារ​ជាមួយ​ជន​ភាស​ខ្លួន​ ​ដែល​បាន​សិទ្ធិ​ជ្រក​កោន​នយោបាយ​ទៅកាន់​ប្រទេស​ទីបី។​ មន្រ្ដី​រដ្ឋាភិបាល​អះអាង​ថា​ ​ ការ​សម្រេច​ចិត្ត​ទៅ​លើ​សំណើ​នេះ​អាច​នឹង​ធ្វើ​នៅ​សប្តាហ៍​ក្រោយ។

មន្ដ្រី​រដ្ឋាភិបាល​បាន​ឲ្យ​ដឹង​នៅ​ថ្ងៃពុធ​នេះ​ថា​ ​ប្រទេស​កម្ពុជា​នឹង​សម្រេច​ ​ក្នុង​រវាង​សប្ដាហ៍​ក្រោយ​ ​ថាតើ​ត្រូវ​អនុញ្ញាត​ឲ្យ​ឧត្តម​ស្នងការ​អង្គការ​សហ​ប្រជាជាតិ​ទទួល​បន្ទុក​ជន​ភៀសខ្លួន​ពន្យារ​ពេល​ការ​បិទ​ជំរុំ​សម្រាប់​ជន​ជាតិ​ភាគតិច​កុលសម្ព័ន្ធ​ភ្នំ​វៀតណាម​ឬ​យ៉ាងណា​ ​បន្ទាប់ពី​មាន​សំណើ​ពី​អង្គការ​សហ​ប្រជា​ជាតិ​នោះ។

កាលពី​ថ្ងៃទី​២៩​ ខែ​វិច្ឆិកា​ ​ក្រសួង​ការ​បរទេស​កម្ពុជា​បាន​ផ្ញើ​លិខិត​មួយ​ទៅ​កាន់​ឧត្តម​ស្នងការ​អង្គការ​សហ​ប្រជាជាតិ​ទទួល​បន្ទុក​ជន​ភៀសខ្លួន​ ​(UNHCR)​ ដោយ​បង្គាប់​ឲ្យ​បិទ​ជំរុំ​បណ្ដោះ​អាសន្ន​សម្រាប់​ជនភៀស​ខ្លួន​កុលសម្ព័ន្ធ​ភ្នំ​វៀតណាម​ ​ក្នុង​ទីក្រុង​ភ្នំពេញ​នៅ​ត្រឹម​ថ្ងៃទី​១​ ខែមករា​ ឆ្នាំ​២០១១។ ​ហើយ​រដ្ឋាភិបាល​ស្នើ​ឲ្យ​អង្គការ​សហ​ប្រជាជាតិ​ដោះស្រាយ​ការ​បញ្ជូន​ជនភៀស​ខ្លួន​ដែល​ទទួល​បាន​សិទ្ធិ​ជ្រកកោន​នយោបាយ​ចេញ​ទៅកាន់​ប្រទេស​ទីបី​ឲ្យ​បាន​ឆាប់។ ​ហើយ​កម្ពុជា​នឹង​បញ្ជូន​ជនជាតិ​ភាគតិច​វៀតណាម​ដែល​មិន​បាន​ទទួល​សិទ្ធិ​ជា​ជន​ភៀស​ខ្លួន​ចំនួន​១៤នាក់​ទៅ​កាន់​ប្រទេស វៀតណាម​វិញ។

ក៏​ប៉ុន្ដែ​ ​លោក​កួយ គួង​ ​អនុរដ្ឋលេខាធិការ​ និង​ជា​អ្នក​នាំពាក្យ​ក្រសួង​ការ​បរទេស​ ​បាន​អះអាង​ថា​ ​UNHCR ​បាន​ស្នើសុំ​ពន្យារ​ពេល​ការ​បិទ​ជំរុំ​ជនភៀស​ខ្លួន​ចំនួន​បីខែ​បន្ថែម​ទៀត ​ ​ប្រយោជន៍​ដើម្បី​បញ្ចប់​នូវ​នីតិវិធី​សម្រាប់​ជន​ភៀស​ខ្លួន​ដែល​ទទួល​សិទ្ធិ​ជ្រកកោន​ទៅ​កាន់​ប្រទេស​ទីបី​រូច​ហើយនោះ ​សរុប​ចំនួន​៦២​នាក់។ ​លោក​កួយ គួង​បញ្ជាក់​ថា​ ​រដ្ឋាភិបាល​ខ្មែរ​អាច​នឹង​សម្រេច​លើ​សំណើ​នេះ​ក្នុង​អំឡុង​សប្ដាហ៍​ក្រោយ។

“ប្រហែល​ជា​ក្នុង​សប្ដាហ៍​ក្រោយ​អាច​សម្រេច​សំណើ​របស់​គេ​ហ្នឹង​ហើយ។​ យ៉ាងណា​ក៏ដោយ​ ​យើង​សម្រេច​មុន​ការ​កំណត់​នេះ។​ ឥឡូវនេះ​រាជ​រដ្ឋាភិបាល​កម្ពុជា​កំពុង​ពិចារណា​លើ​សំណើ​របស់​គាត់"។

ចាប់​តាំងពី​ឆ្នាំ​២០០១​មក​ ​ជនជាតិ​ភាគតិច​កុលសម្ព័ន្ធភ្នំ​វៀតណាម​បាន​ភៀស​ខ្លួន​ពី​ការ​ធ្វើ​ទុក្ខ​បុកម្នេញ​របស់​អាជ្ញាធរ​ក្រុង​ហាណូយ​នៅ​តំបន់​ខ្ពង់រាប​ទាក់ទង​ទៅ​នឹង​សិទ្ធិ​ដីធ្លី ​និង​សិទ្ធិ​សាសនា​របស់​ពួក​គេ​ ​ហើយ​ពួកគេ​ចូល​មក​កាន់​ប្រទេស​កម្ពុជា​ដោយ ​មាន​ការផ្ដល់​ជំរុំ​បណ្ដោះ​អាសន្ន​សម្រាប់​ពួកគេ​ស្នាក់​នៅ​ពី​ឧត្តម​ស្នងការ​អង្គការ​សហ​ប្រជាជាតិ​សម្រាប់​ជនភៀស​ខ្លួន​UNHCR​ ​មុន​នឹង​អង្គការ​សហ​ប្រជាជាតិ​ផ្ដល់​សិទ្ធិ​ជន​ភៀស​ខ្លួន​ពេញ​លក្ខណៈ​ដល់​ពួកគេ​សម្រាប់​ទៅរស់​នៅ​ប្រទេស​ទីបី​ ​ក្នុងនោះ​ ​ភាគច្រើន​ទៅកាន់​សហ​រដ្ឋ​អាមេរិក។

លោកស្រី​ Kitty Mc. Kinsey​ អ្នក​នាំពាក្យ ​UNHCR​ ​ប្រចាំ​តំបន់​អាស៊ី​ប៉ាស៊ីភិច​បាន​ឲ្យ​ដឹងថា​ ​មាន​ជន​ជាតិ​ភាគ​តិច​វៀតណាម​ចំនួន​៩៩៩​នាក់​ហើយ​បាន​ទៅ​រស់​នៅ​ប្រទេស​ទីបី ​និង​មាន​ជនជាតិ​កុលសម្ព័ន្ធ​ភ្នំ​វៀតណាម​ចំនួន​៧៥០​នាក់​ទៀត​បាន​ត្រឡប់​ទៅ​កាន់​ប្រទេស​វៀតណាម​វិញ។ ​ក្នុង​ពេលនេះ​ ​UNHCR ​កំពុងតែ​ដំណើរការ​រៀបចំ​នីតិវិធី​សម្រាប់​ជន​ភៀស​ខ្លួន​ចំនួន​៦២​នាក់​ ដែល​ទទួល​បាន​ល័ក្ខខ័ណ្ឌ​ជា​ជន​ភៀស​ខ្លួន​រួច​ហើយ។ ​ម្យ៉ាង​វិញទៀត​ ​UNHCR​ ត្រូវការ​ពេលវេលា​បន្ថែម​មុន​នឹង​បិទ​ជំរុំ​ជន​ភៀស​ខ្លួន​តាម​ការ​បង្គាប់​របស់​រដ្ឋាភិបាល​ខ្មែរ។

មន្ដ្រី​អ្នក​នាំពាក្យ ​UNHCR ​ដដែល​រំពឹង​ថា​ ​រដ្ឋាភិបាល​ខ្មែរ​នឹង​ផ្ដល់​ចម្លើយ​ជា​វិជ្ជមាន។

“យើង​សង្ឃឹមថា​ ​នឹង​ទទួល​បាន​ចម្លើយ​ប្រកប​ដោយ​ការអនុគ្រោះ​ពី​រដ្ឋាភិបាល​កម្ពុជា"។

យ៉ាងណាក៏ដោយ​ ​អ្នកស្រី​ណាលី​ ​Naly Pilorge ​នាយិកា​អង្គការ​ការពារ​សិទ្ធិ​មនុស្ស ​លីកាដូ​ ​បាន​សំដែង​ការ​ភ្ញាក់ផ្អើល​ចំពោះ​ការ​ដែល​រដ្ឋាភិបាល​កម្ពុជា​ បញ្ជា​ឲ្យ​អង្គការ​សហ​ប្រជាជាតិ​បិទ​ជំរុំ​ជន​ភៀស​ខ្លួន​នោះ។

“ប្រទេស​កម្ពុជា​បាន​ចុះ​ហត្ថលេខា​លើ​អនុសញ្ញា​ស្ដីពី​ជន​ភៀស​ខ្លួន​ ​ដូច្នេះ​កម្ពុជា​ដាច់ខាត​ ​ត្រូវតែ​ទទួល​ស្គាល់​ល័ក្ខខ័ណ្ឌ​នៃ​ជនភៀសខ្លួន។​ យើង​មាន​ការ​ភ្ញាក់ផ្អើល​ដែល​កម្ពុជា​សម្រេចចិត្ត​បិទ​មជ្ឈមណ្ឌល​នេះ។ ​យើង​ចង់​ឲ្យ​រដ្ឋាភិបាល​ពន្យល់​ច្រើន​ជាង​នេះ ​និង​បញ្ជាក់​ឲ្យច្បាស់​ថា​ ​តើ​រដ្ឋាភិបាល​សម្រេច​ចិត្ត​ដូច្នេះ​ យ៉ាង​ដូចម្ដេច​ ​នៅពេល​ដែល​ខ្លួន​ចុះ​ហត្ថលេខា​លើ​អនុសញ្ញា​ស្ដីពី​ជន​ភៀសខ្លួន​ហើយ​នោះ"។

វីអូអេ​សម្លេង​សហ​រដ្ឋ​អាមេរិក​មិនអាច​ស្វែងរក​សេចក្ដី​អត្ថាធិប្បាយ​ពី​មន្ដ្រី​ស្ថានទូត​វៀតណាម​ប្រចាំ​ក្រុង​ភ្នំពេញ​បាន​ទេ​ ​នៅ​ថ្ងៃនេះ។

ទោះជា​យ៉ាងណា​ ​លោក​កួយ គួង​ ​អ្នក​នាំពាក្យ​ក្រសួង​ការ​បរទេស​កម្ពុជា ​លើក​ឡើង​ថា​ ​រដ្ឋាភិបាល​យល់​ឃើញ​ថា​ ​ការ​បង្កើត​ជំរុំ​បណ្ដោះ​អាសន្ន​សម្រាប់​ជនភៀស​ខ្លួន​ជនជាតិ​ភាគតិច​វៀតណាម​នេះ​មាន​រយៈពេល​យូរ​គ្រប់គ្រាន់​ទៅ​ហើយ។ ​ម្យ៉ាង​វិញទៀត​ ​រដ្ឋាភិបាល​មិន​ចង់​ឲ្យ​មាន​ការ​បើក​ជំរុំ​បែប​នេះ​បន្ដ​ទៀត​ទេ​ ​ដែល​ជាហេតុ​អាចនឹង​នាំឲ្យ​មាន​លំហូរ​នៃ​ជន​ភៀស​ខ្លួន​វៀតណាម​មកកាន់​កម្ពុជា​ត​ទៅ​ទៀត។

ប្រទេស​កម្ពុជា​ធ្លាប់​ទទួល​រង​ការ​រិះគន់​ថា​ ​ ​បានទប់ស្កាត់​ការស្វែងរក​សិទ្ធិ​ជ្រកកោន​នយោបាយ​របស់​ជន​ភៀសខ្លួន​វៀតណាម​ ​ដែល​ទទួល​រង​ការ​ធ្វើទុក្ខ​បុកម្នេញ​ និង​មាន​ការ​រិះគន់​អំពី​ការ​ចាប់​បញ្ជូន​ជនជាតិ​ភាគ​តិច​ វីហ្គ័រ​ ​ដោយ​បង្ខំ​ទៅ​ឲ្យ​អាជ្ញាធរ​ចិន​វិញ​កាលពី​ចុងឆ្នាំ​២០០៩៕

XS
SM
MD
LG