ភ្នំពេញ៖ សាលក្រមកាត់ទោសឌុច ត្រូវបានបោះពុម្ព ហើយនឹងត្រូវចាប់ផ្តើមចែកចាយ និងផ្សព្វផ្សាយដោយឥតគិតថ្លៃនៅសប្តាហ៍ក្រោយ។ ក្រុមសិស្ស និស្សិត បញ្ញវ័ន្ត និងអ្នកស្រាវជ្រាវបានស្វាគមន៍ការបោះពុម្ពសាលក្រមនេះ ដែលនឹងផ្តល់ផលប្រយោជន៍យ៉ាងសំខាន់សម្រាប់ការសិក្សាស្រាវជ្រាវ និងការប្រើប្រាស់ជាយុទ្ធសាស្ត្រសម្រាប់ការកាត់ក្តី នៅពេលអនាគតក្នុងករណីឧក្រិដ្ឋកម្មប្រហាក់ប្រហែលនឹងករណីឌុចនេះ។
នៅថ្ងៃព្រហស្បតិ៍នេះ សាលាក្តីខ្មែរក្រហមបានចាប់ផ្តើមបោះពុម្ពសាលក្រមកាត់ទោសឌុច អតីតប្រធានមន្ទីរស-២១ ចំនួន ២២០០០ច្បាប់ សម្រាប់ចែកផ្សព្វផ្សាយជាសាធារណៈដល់ប្រជាពលរដ្ឋខ្មែរ ដើម្បីស្វែងយល់ពីការកាត់ទោសមេដឹកនាំខ្មែរក្រហម និងអំពើឃោរឃៅរបស់របបខ្មែរក្រហម។
កាំង ហ្គេកអ៊ាវ ហៅឌុច ត្រូវបានកាត់ទោសឱ្យជាប់ពន្ធនាគារចំនួន៣៥ឆ្នាំកាលពីខែមុន ពីបទឧក្រិដ្ឋកម្មសង្គ្រាម ឧក្រិដ្ឋកម្មប្រឆាំងមនុស្ស ការធ្វើទារុណកម្ម និងការសម្លាប់ ក្នុងតួនាទីជាប្រធានមន្ទីរស-២១ ហៅថា គុកទួលស្លែង ជាកន្លែងដែលមនុស្សជាង ១២០០០នាក់ត្រូវបានធ្វើទារុណកម្ម និងសម្លាប់។
លោករាជ សម្បត្តិ ប្រធានកិច្ចការសាធារណៈរបស់សាលាក្តីខ្មែរក្រហម បានថ្លែងប្រាប់ក្រុមអ្នកយកព័ត៌មាននៅរោងពុម្ពក្នុងទីក្រុងភ្នំពេញថា សាលាក្តីខ្មែរក្រហមកំពុងតែបោះពុម្ពសាលក្រមសង្ខេបចំនួន ១៧០០០ច្បាប់ ដែលក្នុងមួយច្បាប់មានចំនួន៣០ទំព័រ និងសាលក្រមទាំងមូលចំនួន ៥០០០ច្បាប់ ដែលក្នុងមួយច្បាប់មាន ៤៥០ទំព័រ ដើម្បីចែកផ្សព្វផ្សាយដល់ ឃុំ ស្រុក ខេត្ត សាលារៀន និង បណ្ណាល័យផ្សេងៗនៅទូទាំងប្រទេស។
«គោលបំណងធំ គឺដើម្បីឱ្យប្រជាពលរដ្ឋខ្មែរ ជាពិសេសជនរងគ្រោះក្នុងរបបខ្មែរក្រហមនិងនិស្សិត បញ្ញវ័ន្តខ្មែរ មានឱកាសសិក្សា ស្វែងយល់ឱ្យបានស៊ីជម្រៅអំពីកិច្ចការ ដែលតុលាការបានធ្វើទាក់ទងនឹងកាំង ហ្គេកអ៊ាវ ហៅឌុច ហើយនេះគឺជាឯកសារប្រវត្តិសាស្ត្រសម្រាប់សិស្សនិស្សិតយកទៅរៀន ពីព្រោះសាលក្រម ដែលចេញដោយតុលាការ គឺជាសាលក្រមដែលសម្រេចស្ថាពរ»។
លោកជុំ ស៊ីវឌ្ឍធិន និស្សិតឆ្នាំទី៤ផ្នែកនីតិសាស្ត្រនៃសាកលវិទ្យាល័យចំរើនពហុបច្ចេកវិទ្យាបានថ្លែងថា ការបោះពុម្ពសាលក្រមកាត់ទោសឌុចនេះ នឹងផ្តល់ផលប្រយោជន៍យ៉ាងសំខាន់ណាស់ សម្រាប់ការសិក្សាស្រាវជ្រាវ និងការប្រើប្រាស់ជាយុទ្ធសាស្ត្រសម្រាប់ការកាត់ក្តីនៅពេលអនាគត ក្នុងករណីឧក្រិដ្ឋកម្មប្រហាក់ប្រហែលនឹងឌុចនេះ។
«ខ្ញុំទទួលបានសៀវភៅសាលក្រមកាត់ទោសឌុច។ នៅពេលខ្ញុំអាន ខ្ញុំស្វែងយល់ពីដំណើរកាត់ក្តី។ ដូច្នេះ ពេលដែលខ្ញុំយល់ហើយ ខ្ញុំអាចប្រើប្រាស់សៀវភៅនេះបាន។ ជាពិសេសនៅពេលខ្ញុំបានចូលធ្វើការងារ មានរឿងក្តីណាមួយបានកើតឡើងស្រដៀងករណីឌុច ហើយខ្ញុំអាចប្រើប្រាស់សៀវភៅនេះ ដើម្បីដំណើរការកាត់ក្តី»។
លោកប៊ូ បេង មេឃុំកោះជីវាំង ស្រុកឯកភ្នំ ខេត្តបាត់ដំបង បាននិយាយថា សៀវភៅសាលក្រម កាត់ទោសឌុចនេះ ពិតជាជួយបង្កើនការយល់ដឹងអំពីដំណើរការកាត់ទោសពួកមេដឹកនាំខ្មែរ។ ការប្រព្រឹត្តអំពើឧក្រិដ្ឋមិនអាចជៀសផុតពីការផ្តន្ទាទោស និងមធ្យោបាយល្អសម្រាប់អប់រំមនុស្សទូទៅកុំឱ្យ ប្រព្រឹត្តឧក្រិដ្ឋកម្មផ្សេងៗនៅក្នុងសង្គម។
លោកស្រីលី រត្ន័មុន្នី អនុប្រធានបណ្ណាល័យនៅព្រឹទ្ធសភា បានបញ្ជាក់ថា ការបោះពុម្ពសាលក្រម នេះនឹងជួយដល់សិស្ស និស្សិត បញ្ញវ័ន្ត សាស្ត្រាចារ្យសាកលវិទ្យាល័យ អ្នកស្រាវជ្រាវ និងមន្ត្រី នៅក្នុងស្ថាប័នជាតិផ្សេងៗ ដើម្បីស្វែងយល់ពីការកាត់ទោសឌុច ពីព្រោះនិស្សិតសាកលវិទ្យាជាច្រើនបានមកសួររកសៀវភៅ និងឯកសារទាក់ទងនឹងការកាត់ទោសខ្មែរក្រហម។
«បើសិនជាសៀវភៅនេះកើតមានមែន វាផ្តល់ចំណេះដឹងច្រើនទៅដល់សិស្ស និស្សិតស្រាវជ្រាវ ដើម្បីស្វែងយល់អំពីរបបប្រល័យពូជសាសន៍ខ្មែរក្រហម។ សិស្សស្រាវជ្រាវជាក្រុមបានសួររកសៀវ ភៅទាក់ទងនឹងការកាត់ក្តីពួកមេដឹកនាំខ្មែរក្រហម»។
លោកអ៊ុង សុភាព នាយករងវិទ្យាល័យព្រះបិតាជាតិ នៅក្នុងស្រុងកំពង់ត្រាច ខេត្តកំពត បានថ្លែង ថា លោកត្រូវការសាលក្រមកាត់ទោសឌុច សម្រាប់តម្កល់ទុកក្នុងសាលារបស់លោក ដើម្បីឱ្យកូន ខ្មែរជំនាន់ក្រោយយល់ដឹងពីរបបខ្មែរក្រហាម និងកុំឱ្យុប្រព្រឹត្តខុសដូចឌុច។
«វាមានផលប្រយោជន៍សម្រាប់កូនខ្មែរឱ្យចងចាំថា បើសិនជាអ្នកធ្វើអំពើខុស គេនឹងអាចកាត់ទោសយើងហើយ។ សាលក្រមនេះត្រឹមត្រូវ និងអាចឱ្យកូនសិស្សស្វែងយល់បាន»។
របបខ្មែរក្រហមបានកាប់សម្លាប់ប្រជាពលរដ្ឋខ្មែរអស់ជិត២លាននាក់រវាងពីឆ្នាំ១៩៩៧៥និង ឆ្នាំ១៩៧៩ ដោយការបង្អត់ចំណីអាហារ ការបង្ខំឱ្យធ្វើការធ្ងន់ហួសកម្លាំង ការធ្វើទារុណកម្ម ការ សម្លាប់និងជម្ងឺជាដើម៕