ភ្ជាប់​ទៅ​គេហទំព័រ​ទាក់ទង

ចៅក្រម​ស៊ើប​អង្កេត​ផ្នែក​អន្តរជាតិ​នៃ​សាលាក្តី​ខ្មែរក្រហម​​ប្រកាស​​ចូលនិវត្តន៍


សហ​ចៅក្រម​ស៊ើប​អង្កេត​អន្ដរជាតិ​ ​លោក​ ម៉ាកសែល​ ឡឺម៉ុង​ ​បាន​ប្រកាស​ថា​ ​លោក​នឹង​ចូល​និវត្តន៍​បន្ទាប់​ពី​លោក​ឈប់​ធ្វើការ​ក្នុង​សាលាក្ដី​ខ្មែរក្រហម។

សហ​ចៅក្រម​ស៊ើប​អង្កេត​សញ្ជាតិ​បារាំង​ ​លោក​ម៉ាកសែល ឡឺម៉ុង​ (Marcel Lemonde) ​នឹង​ចូល​និវត្តន៍ក្នុង​បរិបទ​ដែល​សំណុំ​រឿង​០០៣ ​និង​០០៤​កំពុង​ស្ថិត​ក្នុង​ភាព​ចម្រូង​ចម្រាស់​ ​មិនទាន់​ដោះស្រាយ​បាន​ជាក់លាក់​នៅ​ឡើយ។

លោក​ម៉ាកសែល ឡឺម៉ុងបាន​ប្រកាស​ថា​ ​លោក​នឹង​លាឈប់​ពី​ការងារ​ជា​សហ​ចៅក្រម​ស៊ើប​អង្កេត​ក្នុង​សាលាក្ដី​ខ្មែរ​ក្រហម​ ​នៅ​ថ្ងៃទី​១​ខែ​ធ្នូខាង​មុខ​នេះ។​ នៅ​ក្នុង​បទ​សម្ភាសន៍​ទល់​មុខ​ជាមួយ​ VOA​ សម្លេង​សហ​រដ្ឋ​អាមេរិក​កាល​ពី​ថ្ងៃ​ព្រហស្បតិ៍​សប្ដាហ៍​មុន​ ​លោក​ឡឺម៉ុង​បញ្ជាក់​ថា​ ​លោក​ចង់​យក​ឱកាស​នោះ​សម្រាក​កាយ​ និង​សរសេរ​សៀវភៅ​ឲ្យ​បាន​ច្រើន។

“ប្រកដ​ហើយ​ ​ខ្ញុំ​ចូល​និវត្តន៍។ ​គឺជា​ការ​ចូល​និវត្តន៍​ដ៏​មមាញឹក​សម្រាប់​ខ្ញុំ។​ ខ្ញុំ​មាន​គម្រោង​ការ​ជាច្រើន។​ ខ្ញុំ​បាន​រៀបចំ​ផែនការ​តាំង​តែ​ពី​យូរយារ​ណាស់​មក​ហើយ​ថា​ ​ខ្ញុំ​ត្រូវ​ធ្វើ​អ្វី​ទៀត​ ​បន្ទាប់​ពី​ខ្ញុំ​លាឈប់​ពី​ការងារ​នៅ​ប្រទេស​កម្ពុជា​ទៅ។ ​ខ្ញុំ​នឹង​ធ្វើ​ដំណើរ​កម្សាន្ត។ ​ ខ្ញុំ​នឹង​សរសេរ​សៀវភៅ ​ហើយ​ខ្ញុំ​ក៏​នឹង​មាន​គម្រោង​មួយ​ចំនួន​សម្រាប់​ផ្ទាល់​ខ្លួន​ផង​ដែរ។ ​ខ្ញុំ​នឹង​មិន​ចូល​និវត្តន៍​ដោយ​នៅ​ស្ងៀម​ទំនេរ​នោះ​ទេ។​ លោក​ចាំតែ​មើល​ទៅ"។

លោក​ម៉ាកសែល ឡឺម៉ុង​បញ្ជាក់​ថា​ ​លោក​នឹង​មិន​បន្ដ​ការងារ​ជា​ចៅក្រម​នៅ​ប្រទេស​បារាំង​ត​ទៅ​ទៀត​នោះ​ទេ។

លោក​ម៉ាកសែល ​ឡឺម៉ុង​ នឹង​ត្រូវ​ជំនួស​ដោយ​លោក​ស៊ារិដ ប៊្លុម ​(Siegried Blumk)​ ជនជាតិ​អាល្លឺម៉ង់​ដែល​បច្ចុប្បន្ន​ជា​សហ​ចៅក្រម​ស៊ើប​អង្កេត​បម្រុង។

លោក​ម៉ាកសែល ឡឺម៉ុង​បាន​ចូល​បំពេញ​ការងារ​ជា​សហ​ចៅក្រម​ស៊ើប​អង្កេត​ក្នុង​សាលាក្ដី​ខ្មែរ​ក្រហម​ចាប់​តាំង​ពី​ឆ្នាំ​២០០៦​មក​ម្ល៉េះ។

លោក​បាន​ក្លាយ​ទៅ​ជា​គោល​ដៅ​នៃ​ការ​វាយ​ប្រហារ​របស់​ក្រុម​មេធាវី​ការពារ​ជន​ជាប់​ចោទ​ ​ដែល​ជាអតីត​មេដឹកនាំ​កំពូល​នៃ​របប​ខ្មែរ​ក្រហម​នៅ​ក្នុង​រយៈ​ពេល​ចុង​ក្រោយ​នេះ​ពាក់ព័ន្ធ​ទៅ​នឹង​ការ​ចោទ​ប្រកាន់​ពី​ភាព​លំអៀង​ក្នុង​ការ​ស៊ើប​អង្កេត​របស់​លោក។

ក៏​ប៉ុន្ដែ​លោក​ក៏​ជា​ភាគី​តែ​ម្ខាង​គត់​នៅ​ក្នុង​សាលាក្ដី​ចម្រុះ​កម្ពុជា​ និង​អង្គការ​សហ​ប្រជាជាតិ​ក្នុង​ការ​ចេញ​ដីកា​កោះ​ហៅ​ថ្នាក់​ដឹកនាំ​ជាន់ខ្ពស់​រដ្ឋា​ភិបាល​បច្ចុប្បន្ន​ដែល​ធ្លាប់​ត្រូវ​បាន​គេ​លើក​ថា​ ​ជា​កម្មាភិបាល​ខ្មែរ​ក្រហម​នោះ​ ​ឲ្យ​ចូល​បំភ្លឺ​ក្នុង​សាលាក្ដី​នេះ។​ ថ្នាក់​ដឹកនាំ​រដ្ឋាភិបាល​ទាំង​នោះ​រួមមាន​ ឧប​នាយក​រដ្ឋមន្ដ្រី​ចំនួន​ពីរ​រូប​ គឺ​លោក​គាត ឈុន​ រដ្ឋមន្ដ្រី​ក្រសួង​សេដ្ឋ​កិច្ច ​និង​ហិរញ្ញ​វត្ថុ​ និង​លោក​ ហោ ណាំហុង​ ​រដ្ឋមន្ដ្រី​ក្រសួង​ការបរទេស​ ​លោក​ជា ស៊ីម​ ​ប្រធាន​គណបក្ស​ប្រជាជន​កម្ពុជា​ ​និង​ជា​ប្រធាន​ព្រឹទ្ធ​សភា​ ​លោក​ហេង សំរិន​ ​ប្រធាន​រដ្ឋសភា​ ​រួមទាំង​សមាជិក​ព្រឹទ្ធ​សភា​ពីរ​រូប​ទៀត​គឺ​លោក​ ស៊ឹម កា ​និង​លោក​អ៊ុក ប៊ុនឈឿន។​ ​ក៏​ប៉ុន្ដែ​ការ​កោះហៅ​នេះ​បាន​ជួប​នឹង​បរាជ័យ​ ​ដោយ​ការជំទាស់​ពី​ខាង​ភាគី​រដ្ឋាភិបាល​ និង​ការ​មិន​គាំទ្រ​ ​ដោយ​សម​ភាគី​កម្ពុជា​ ​លោក​យូ ប៊ុនឡេង។

ចាប់​តាំង​ពី​ពេល​ថ្មីៗ​នេះ​ ​លោក​សហ​ចៅក្រម​ស៊ើប​អង្កេត​ម៉ាកសែល ឡឺម៉ុង​បាន​សម្រេច​ធ្វើការ​ស៊ើប​អង្កេត​ជា​ឯកតោ​ភាគី​លើ​ជន​សង្ស័យ​បន្ថែម​ចំនួន​ប្រាំនាក់​ទៀត​ ​ដែល​ជាប់​ទាក់ទិន​នឹង​អំពើ​សម្លាប់​រង្គាល​ប្រជា​ពលរដ្ឋ​កម្ពុជា​ក្នុង​សម័យ​ខ្មែរ​ក្រហម។ ​នោះ​គឺ​ជន​សង្ស័យ​ក្នុង​សំណុំ​រឿង​០០៣​ និង​០០៤​ ដែល​មាន​ការជំទាស់​ពី​លោក​សហ​ចៅក្រម​ខ្មែរ​លោក​យូ ប៊ុនឡេង ​និង​ការ​ជំទាស់​ពី​រាជ​រដ្ឋា​ភិបាល​ខ្មែរ​ទៀត​ផង។

ទោះ​ជា​យ៉ាង​នេះ​ក្ដី​ ​នៅ​ក្នុង​សន្និសីទ​កាសែត​កាល​ពី​សប្ដាហ៍​មុន​ ​លោក​ម៉ាកសែល ឡឺម៉ុង​មាន​ប្រសាសន៍​ថា​ ​លោក​រីករាយ​នឹង​ជោគ​ជ័យ​របស់​លោក​ក្នុង​ការ​ស៊ើប​អង្កេត​ក្នុង​សំណុំ​រឿង​០០២​កន្លង​មក​ជា​មួយ​លោក​យូ ប៊ុនឡេង។​ ក៏​ប៉ុន្ដែ​កង្វល់​ថា​ ​តើ​ការ​ចាក​ចេញ​ពី​ការងារ​របស់​លោក​ម៉ាកសែល​ ឡឺម៉ុង​ នឹង​ធ្វើ​ឲ្យ​មាន​ការ​ប៉ះពាល់​ដល់​ការ​ស៊ើប​អង្កេត​បន្ដ​ក្នុង​សំណុំ​រឿង​០០៣ ​និង​០០៤​ដែរឬ​យ៉ាង​ណា។​ លោក​ឡាស អលសិន​ ​មន្ដ្រី​ផ្នែក​កិច្ច​ការច្បាប់​របស់​សាលាក្ដី​ខ្មែរ​ក្រហម​ ​មាន​ប្រសាសន៍​ថា​ ​លោក​ឡឺម៉ុង​នឹង​ធ្វើ​ការ​រួមគ្នា​រយៈ​ពេល​មួយ​ខែ​នៅ​ខែវិច្ឆិកា​ ​ជាមួយ​លោក​ស៊ារិដ ប៊្លុម​ ​ដើម្បី​ធានា​ដល់​ការ​ស៊ើប​អង្កេត​បន្ដ​ទៀត។

"ពួក​គាត់​នឹង​ធ្វើការ​ជា​មួយ​គ្នា​ក្នុង​រយៈ​ពេល​មួយ​ខែ​ ​ដើម្បី​ធានា​ពី​ការងារ​បន្ដ​របស់​សហ​ចៅក្រម​ស៊ើប​អង្កេត"។

លោកឆាំង យុ ​នាយក​មជ្ឈ​មណ្ឌល​ឯកសារ​កម្ពុជា ​មាន​ប្រសាសន៍​ថា​ ​ការ​លាលែង​ពី​ការងារ​របស់​លោក​ម៉ាកសែល ​ឡឺម៉ុង​អាច​នឹង​ធ្វើ​ឲ្យ​ការិយាល័យ​សហ​ចៅក្រម​ស៊ើប​អង្កេត​កែ​សម្រួល​ឲ្យ​ប្រសើរ​ឡើង​វិញ​នូវ​អ្វី​ដែល​ជា​បញ្ហា​ចម្រូង​ចម្រាស់​កន្លង​មក។

“ការ​ចាក​ចេញ​របស់​គាត់​នេះ ​ក៏​មិន​បាន​ធ្វើ​ឲ្យ​ប៉ះពាល់​ដល់​ដំណើរ​ការ​តុលាការ​ដែរ។​ ហើយ​ប្រហែល​ជា​វា​ធ្វើ​ឲ្យ​ដំណើរ​ការ​កាន់​តែ​ល្អ​ប្រសើរ​ជាង​មុន​ ​ដោយសារ​ថា​ ​រយៈ​កាល​កន្លង​មក​យើង​បាន​ឃើញ​ថា​ការិយាល័យ​មួយ​នេះ​ ធ្លាប់​មាន​បញ្ហា​មួយ​ចំនួន​ដែល​បាន​បង្ក​ជា​ភាព​ចម្រូង​ចម្រាស់"។

ក៏​ប៉ុន្ដែ​លោក​ឡុង បញ្ញាវុធ​ ​មន្ដ្រី​គម្រោង​របស់​អង្គការ​គម្រោង​យុត្តិធម៌​នៅ​កម្ពុជា​ ​មិន​រំពឹង​ដូច​គ្នា​នេះ​ឡើយ។ ​លោក​មាន​ប្រសាសន៍​ថា​ ​គឺ​ដោយសារ​តែ​លោក​ម៉ាកសែល ឡឺម៉ុង​មិន​បាន​បង្ហាញ​ពី​ភាព​អវិជ្ជមាន​ណា​មួយ​ដែល​ត្រូវ​កែ​តម្រូវ​ មុនពេល​លោក​លាលែង​ពី​ការងារ​នោះ​ទេ៕

XS
SM
MD
LG