ភ្ជាប់​ទៅ​គេហទំព័រ​ទាក់ទង

សាលាក្តី​ខ្មែរ​ក្រហម​តែង​តាំង​មន្ត្រី​ពីរ​រូប​ក្នុង​​ផ្នែក​គាំពារ​ជនរងគ្រោះ


សាលាក្ដី​ខ្មែរ​ក្រហម​នៅ​ថ្ងៃនេះ​ បាន​តែង​តាំង​មន្រ្ដី​ផ្លូវការ​របស់​ខ្លួន​ចំនួន​ពីរ​រូប​សម្រាប់​ភាគី​កម្ពុជា​ ដើម្បី​បំពេញ​មុខងារ​ពេញ​ម៉ោង​នៅ​ក្នុង​អង្គភាព​គាំពារ​ជនរងគ្រោះ​។ ប៉ុន្ដែ​មន្ដ្រី​សង្គម​ស៊ីវិល​មួយ​ចំនួន​មិនពេញចិត្ត​ចំពោះ​ការ​តែង​តាំង​នេះ​ទេ។

សាលាក្ដី​ខ្មែរ​ក្រហម​នៅ​ថ្ងៃពុធ​នេះ​បាន​ធ្វើ​ការ​តែងតាំង​ជា​ផ្លូវការ​លោក​រោង ឈង​ ឲ្យ​ធ្វើ​ជា​ប្រធាន​ផ្នែក​គាំពារ​ជនរងគ្រោះ ​និង​តែងតាំង​លោក​អ៊ឹម សុភា ​ឲ្យ​ធ្វើ​ជាអ្នក​សម្របសម្រួល​ផ្នែក​ផ្សព្វផ្សាយ​ព័ត៌មាន​របស់​អង្គភាព​ដដែល​នេះ ស្រប​ពេល​ដែល​ការ​កាត់ទោស​ក្នុង​សំណុំ​រឿង​០០២ ​នឹង​មក​ដល់​នៅ​ដើមឆ្នាំ​ក្រោយ។

លោក​រាជ សម្បតិ្ត ​ប្រធាន​ផ្នែក​កិច្ចការ​សាធារណៈ​របស់​សាលាក្ដី​ខ្មែរ​ក្រហម មាន​ប្រសាសន៍​ថា ​មន្ដ្រី​ទាំង​ពីររូប​នឹង​ចាប់ផ្ដើម​ បំពេញ​ការងារ​របស់​ខ្លួន​នៅថ្ងៃនេះ​។

«គាត់​ចាប់​ផ្ដើម​ធ្វើការ​ពី​ថ្ងៃ​ទី​មួយ ខែ​ប្រាំបួន​ហ្នឹង​ទៅ ​គឺ​ពេញសិទ្ធិ​ជា​ប្រធាន​ហើយ​និង​ជា​អ្នក​សម្រប​សម្រួល​ពេញ​សិទ្ធិ។ »

លោក​រោង ឈង ​ជា​មន្រ្ដី​ជាន់ខ្ពស់​មួយ​រូប​នៅ​ទីស្ដីការ​គណៈរដ្ឋមន្រ្ដី ​និង​ជា​ប្រធាន​ផ្នែក​បុគ្គលិក​របស់​សាលាក្ដី​ខ្មែរ​ក្រហម​។ មុន​នឹង​ត្រូវ​បាន​តែងតាំង​ជា​ផ្លូវការ​នៅថ្ងៃនេះ​ លោក​ រោង ឈង​បាន​កាន់​មុខ​តំណែង​ជា​ប្រធាន​ផ្នែក​គាំពារ​ជនរងគ្រោះ​អស់​រយៈពេល​ពីរខែ​ ដើម្បី​ជំនួស​លោកស្រី ​ហេឡែន ចាវិស​ ដែល​លាលែង​ពី​តំណែង​ ដើម្បី​ចូល​និវត្តន៍។ ដោយ​ឡែក​ លោក​ អ៊ឹម សុភា ​ធ្លាប់​ធ្វើ​ជា​នាយករង​មជ្ឈមណ្ឌល​អភិវឌ្ឈន៍​សង្គម​ និង​ជា​សហ​នាយក​មជ្ឈមណ្ឌល​យុត្តិធម៌​ និង​ផ្សះផ្សារ​។

លោក​រាជ សម្បត្តិ ​មាន​ប្រសាសន៍​ថា មន្ដ្រី​ទាំង​ពីរ​នេះ​មាន​បទពិសោធន៍​ និង​មាន​សមត្ថភាព​គ្រប់គ្រាន់​ ក្នុង​ការបំពេញ​តួនាទី​របស់ខ្លួន​។

កាលពី​ថ្ងៃចន្ទ័​ ប្រភព​ដែល​ស្និទ្ធ​នឹង​សាលាក្ដី​ខ្មែរ​ក្រហម​ បាន​ឲ្យ​ដឹងថា ​សាលាក្ដី​ពិសេស​នេះ អាច​នឹង​ធ្វើ ការ​តែងតាំងលោក​រោង ឈង ​និង​លោក​ អ៊ឹម សុភា ជា​កញ្ចប់​ ​ដំណាល​គ្នា​ជាមួយ​នឹង​លោក​ពេជ្រ អង់​ បច្ចុប្បន្ន​ជា​មេធាវី​តំណាង​ឲ្យ​ដើម​បណ្ដឹង​រដ្ឋប្ប​វេណី​របស់​សាលាក្ដី​ខ្មែរ​ក្រហម​ ឲ្យធ្វើ​ជា​សហ​មេធាវី​នាំ មុខ​ខាង​ភាគី​កម្ពុជា​។

សហ​មេធាវី​នាំមុខ​ ដែល​នឹង​មាន​ចំនួន​ពីររូប​ គឺ​មួយ​រូប​មក​ពី​ភាគី​អង្គការ​សហប្រជាជាតិ ​និង​មួយ​រូប​ទៀត​មក​ពី​ខាង​ភាគី​កម្ពុជា។

លោក​រាជ សម្បត្តិ ​មាន​ប្រសាសន៍​ថា​ សាលាក្ដី​ខ្មែរ​ក្រហម​ បាន​រើស​បាន​មេធាវី​នាំមុខ​រួច​ហើយ ក៏​ប៉ុន្ដែ លោក​ មិន​បាន​បង្ហាញ​មេធាវី​រូប​នោះ​ទេ គឺ​លោក​គ្រាន់​តែ​បង្ហាញ​ថា ​មេធាវី​រូប​នោះ​នឹង​ត្រូវ​តែងតាំង​ជា​ផ្លូវការ​ដំណាល​គ្នា​នឹង​សហ​មេធាវី​នាំមុខ​អន្ដរជាតិ​ដែរ។ ហើយ​ការ​តែងតាំង​នេះ អាច​នឹង​ធ្វើ​ឡើង​នៅ​មុន​ខែតុលា​ខាង​មុខ។

សូម​បញ្ជាក់​ថា ​ការតែងតាំង​មន្ដ្រី​សាលាក្ដី​ខ្មែរ​ក្រហម​ទាំង​ពីរ​រូប​ខាង​លើ​ធ្វើ​ឡើង​ស្រប​ពេល​ដែល​លោក​ គ្លីន វិលាមសុន​ អ្នក​ជំនាញការ​ពិសេស​របស់​អង្គកា​សហប្រជាជាតិ​ គ្រោង​នឹង​បំពេញ​ទស្សន​កិច្ច​នៅ​ក្នុង​ សប្ដាហ៍​នេះ​ នៅ​ក្នុង​ប្រទេស​កម្ពុជា។ គឺ​ជា​ដំណើរ​ទស្សនកិច្ច​ដើម្បី​ជជែក​អំពី​ការវិវត្ត​នៃ​សាលាក្ដី​ខ្មែរ​ ក្រហម​ និង​ស្វែងរក​ការ​គាំទ្រ​ផ្នែក​ធនធាន​សម្រាប់​សាលាក្ដី​នេះ​ផង​ដែរ។

លោក​រោង ឈង ​មាន​ប្រសាសន៍​ថា​ វា​មាន​សារៈសំខាន់​សម្រាប់​រូប​លោក​ខ្លាំង​ណាស់​ក្នុង​ការ​ដឹកនាំ​ផ្នែក​គាំពារ​ជនរងគ្រោះ​នេះ។

“វា​សំខាន់​ណាស់​ ពីព្រោះ​ខ្ញុំ​ជា​ជនរងគ្រោះ​ក្នុង​របប​ខ្មែរ​ក្រហម​ហ្នឹង​ដែរ ហើយ​ខ្ញុំ​មាន​ឱកាស​បំពេញ​តួនាទី​ ដើម្បី​ជា​តំណាង​ឲ្យ​ជនរងគ្រោះ​ទាំងអស់ ដើម្បី​ធ្វើ​ឲ្យ​តំណាង​ផ្លូវច្បាប់​របស់​គាត់​ត្រូវ​បាន​គេ​ទទួល​ស្គាល់

និង​ការ​ចូលរួម​ឲ្យ​បាន​សកម្ម​ជាងមុន»។

លោក ​ឡាត គី ​អ្នក​សម្របសម្រួល​កម្មវិធី​សាលាក្ដី​ខ្មែរ​ក្រហម​របស់​អង្គការ​ការពារ​សិទ្ធិ​មនុស្ស​អាដហុក​ បាន​ស្វាគមន៍​ ចំពោះ​ការតែងតាំង​មន្ដ្រី​ទទួល​ខុសត្រូវ​ទាំង​ពីររូប​របស់​ផ្នែក​គាំពារ​ជនរងគ្រោះ​នេះ។

ដោយឡែក​លោក ហង់ ឆាយា ​នាយក​វិទ្យាសា្ថន​ខ្មែរ​ដើម្បី​លទ្ធិប្រជាធិបតេយ្យ​ មាន​ប្រសាសន៍​ថា​ ការតែងតាំង​នេះ​ធ្វើ​ឲ្យ​លោក​ខកចិត្ត​ ដោយសារ ​មិនមាន​ឆ្លងកាត់​ការប្រកួតប្រជែង​នោះ​ឡើយ។

«យើង​ត្រូវការ​មាន​ការជ្រើសរើស​គ្រប់​ពេញ​លក្ខណៈ​។ ហើយនេះ​ វា​បាត់​នូវ​ភាព​មួយ​ដែល​អាច​ទទួល​ យក​បាន​។ ចេះ​តែ​ធ្វើ​អញ្ចឹងទៅ​វា​ប៉ះពាល់​នូវ​អ្វី​ ដែល​ជាស្ដង់​ដារ​អន្ដរជាតិ​ដែល​យើង​ចង់បាន»។

យ៉ាង​ណា​ក៏​ដោយ​ លោក​រាជ សម្បត្តិ ​ប្រធាន​ផ្នែក​ទំនាក់ទំនង​កិច្ចការ​សាធារណៈ​របស់​សាលាក្ដី​ខ្មែរ ក្រហម​បាន​ឆ្លើយ​តប​ថា ​តាម​គោលការណ៍​ច្បាប់​ ភាគី​កម្ពុជា​ក្នុង​សាលាក្ដី​ខ្មែរ​ក្រហម​អាច​ធ្វើការ​តែងតាំង​មន្រ្ដី​របស់​ខ្លួន​ដូច្នេះ​បាន។

XS
SM
MD
LG