ភ្ជាប់​ទៅ​គេហទំព័រ​ទាក់ទង

ទេសចរណ៍​នៅ​ខេត្ត​ព្រះ​សីហនុ​ឆ្លាក់​ចុះ​ដោយ​សារ​ចោរ​កម្ម​កំប៉ិក​​កំប៉ុក


ទោះ​ជា​មាន​ការ​ពង្រីក​កំពង់​ផែ​សមុទ្រ​និង​ការ​ដាក់​ឱ្យ​ដំណើរ​ការ​ព្រលាន​យន្ត​ហោះ​អន្តរ​ជាតិ​ខេត្តព្រះ​សីហនុ​ក៏​ដោយ ​ ក៏​ភ្ញៀវ​ទេស​ចរណ៍​បរទេស​ដែល​ទៅ​កំសាន្ត​នៅ​ក្នុង​ខេត្ត​នោះ​បាន​ធ្លាក់​ចុះ​ដែរ។

ការ​ធ្លាក់​ចុះ​ចំនួន​ភ្ញៀវ​ទេស​ចរណ៍​បរទេស​នេះ​ត្រូវ​បាន​អាជ្ញាធរ​ពន្យល់​ថា​ ​បណ្តាល​មក​ពី​ឥទ្ធិ​ពល​នៃ​វិបត្តិ​សេដ្ឋ​កិច្ច​ពិភព​លោក​ ប៉ុន្តែ​ក្រុម​អាជីវ​ករ​និង​ប្រតិ​បត្តិករ​សេវា​កម្ម​ទេស​ចរណ៍​វិញ​ អះ​អាង​ថា​ ​ការ​ ធ្លាក់​ចុះ​នោះ​អាច​បណ្តាល​មក​ពី​ការ​ផ្ទុះ​ឡើង​ខ្លាំង​នូវ​អំពើ​លួច​ឆក់​និង​ឧក្រិដ្ឋ​កម្ម​ផ្សេង​ទៀត​នៅ​ក្នុងខេត្ត។

លោក​ ពេជ្រ​ សំណាង​ រាយ​ការណ៍​ពិស្តារ​អំពី​រឿង​នេះ​ពី​ខេត្ត​ព្រះ​សីហនុ​ជូន​ដូច​ត​ទៅ៖

កុមារី​ ប៊ុន​ ណេត​កំពុង​ទូល​ថាស​នំ​គម​និង​កន្តៀត​វត្ថុ​អនុស្សាវ​រីយ៍​ ដូច​ជា​ខ្សែ​ដៃ ​ខ្សែ​ក​និង​កាបូប​យូរ​ដៃ​តូចៗ​ធ្វើ​ពី​អំបោះ​ចម្រុះ​ពណ៌​ ក្រហម ​លឿង ​ខៀវ ​ដើរ​លក់​ជូន​ភ្ញៀវ​ទេស​ចរណ៍​អឺរ៉ុប​ដែល​កំពុង​អង្គុយ​និង​ខ្លះ​ដេក​សម្រាក​កាយ​នៅ​លើ​កៅអី​វែងៗ​ នៅ​តាម​បណ្តោយ​ឆ្មេរ​អូរ​ឈើ​ទាល​ក្នុង​ក្រុង​ព្រះ​សីហនុ។

ស្ថិត​ក្នុង​វ័យ​១៥​ឆ្នាំ​ ប៊ុន ​ណេត ​ដែល​ដើរ​លក់​នំ​និង​វត្ថុ​អនុស្សាវរីយ៍​ជូន​ភ្ញៀវ​ទេស​ចរណ៍​ជា​រៀង​រាល់​ថ្ងៃ​ជា​មួយ​អ្នក​ដើរ​លក់​វត្ថុ​អនុស្សាវ​រីយ៍​ផ្សេង​ទៀត​នៅ​តាម​បណ្តោយ​ឆ្នេរ​នេះ​ បាន​ប្រាប់​ឱ្យ​ដឹង​ថា បច្ចុប្បន្ន​ការ​លក់​ដូរ​របស់​នាង​ពុំ​សូវ​ដាច់​ទេ​ ដោយ​សារ​តែ​ពុំ​មាន​ភ្ញៀវ​ទេស​ចរណ៍​បរទេស​មក​កំសាន្ត​ច្រើន​ដូច​ពេល​មុន។

“អត់​សូវ​មាន​ទេ​ឥឡូវ​ហ្នឹង។​ អ្នក​លក់​អី​ក៏​លក់​ខាត​ដែរ។​ លក់​មិន​សូវ​ដាច់​ទេ ​មាន​អ្នក​ខ្លះ​អត់​ទាន់​បាន​មួយ​រៀល​ផង​ថ្មើរ​ហ្នឹង”។

ចំនួន​ភ្ញៀវ​ទេស​ចរណ៍​បរទេស​ដែល​មក​កំសាន្ត​នៅ​ក្នុង​ខេត្ត​ព្រះ​សីហនុ​នេះ​បាន​ធ្លាក់​ចុះ​ជាង​២% ​ គឺ​ពី​ចំនួន​ជាង៦១០០០​ពាន់​នាក់​ក្នុង​២០០៩​ មក​នៅ​ជាង​៥​៩០០០​ពាន់​នាក់​ក្នុង​ឆ្នាំ​២០១០ ​នេះ​បើ​គិត​ក្នុង​រយៈ​ពេល​៤​ខែ​ដើម​ឆ្នាំ​ដូច​គ្នា។​ នេះ​បើ​យោង​តាម​មន្ទីរ​ទេស​ចរណ៍​ខេត្ត​ព្រះ​សីហនុ។

សូម​បញ្ជាក់​ថា ​ខេត្ត​ព្រះ​សីហនុ​គឺ​ជា​តំបន់​ទេស​ចរណ៍​ដ៏​សំខាន់​បំផុត​មួយ​របស់​កម្ពុជា​ដែល​បាន​រួម​ ចំណែក​យ៉ាង​ធំ​ដល់​កំណើន​សេដ្ឋ​កិច្ច​របស់​ប្រទេស​នេះ​ ដោយ​បាន​ទាក់​ទាញ​ភ្ញៀវ​ទេស​ចរណ៍​បរទេសសរុប​ចំនួន​ជាង​១​សែន​នាក់​ក្នុង​ចំណោម​ភ្ញៀវ​ទេស​ចរណ៍​បរទេស​ដែល​មក​ធ្វើ​ទស្សន​កិច្ច​នៅ​ក្នុង​ប្រទេស​កម្ពុជា​ជាង​២​លាន​នាក់​កាល​ពី​ឆ្នាំ​ទៅ​មិញ។

ក្រៅ​ពី​មាន​កំពង់​ផែ​និង​ព្រលាន​យន្ត​ហោះ​អន្តរ​ជាតិ​ហើយ​នោះ ​ ខេត្ត​ព្រះ​សីហនុ​មាន​ឆ្មេរ​ខ្សាច់​ដ៏​ល្អ​ប្រណិត​ប្រវែង​ជាង​១០០​គីឡូម៉ែត្រ​ដែល​ឆ្មេរ​សំខាន់ៗ​នោះ​មាន​ចំនួន​៨​កន្លែង​ រួម​មាន​ឆ្មេរ​ឯក​រាជ្យ​ ឆ្មេរ​ជ័យ​ជំនះ​ ឆ្មេរ​អូរ​ឈើទាល ​ឆ្មេរ​លំហែ​កាយ​ ឆ្មេរ​អូរ​ត្រេះ​ ឆ្មេរ​សុខា ​ឆ្មេរ​ឧទ្យាន​ជាតិរាម​ និង​ឆ្មេរ​ព្រែក​ត្រែង។

តែ​ទោះ​ជា​យ៉ាង​នេះ​ក្តី ​ប៊ុន​ណេត​និង​អ្នក​ដើរ​លក់​វត្ថុ​អនុស្សាវ​រីយ៍​ផ្សេង​ទៀត​ពុំ​ដឹង​ថា តើ​ហេតុ​អ្វី​បាន​ជា​ចំនួន​ភ្ញៀវ​ទេស​ចរណ៍​បរទេស​មក​កំសាន្ត​លេង​ក្នុង​ខេត្ត​ព្រះ​សីហនុ​នេះ​ធ្លាក់​ចុះ​នោះ​ទេ។

លោក ​សោម ​ចិន្តា ​ប្រធាន​មន្ទីរ​ទេស​ចរណ៍​ខេត្ត​នេះ​បាន​អះអាង​ថា ​ការ​ធ្លាក់​ចុះ​ចំនួន​ភ្ញៀវ​ទេស​ចរណ៍​បរទេស​នេះ​គឺ​បណ្តាល​មក​ពី​ឥទ្ធិ​ពល​នៃ​វិបត្តិ​សេដ្ឋ​កិច្ច​ពិភព​លោក។

“ពីព្រោះ​យើង​ដឹង​ហើយ​ថា​ ក្នុង​រង្វង់​បួន​ខែ​ដើម​ឆ្នាំ​២០០៩​ យើង​បាន​មាន​ឥទ្ធិ​ពល​ខ្លះ​ពី​វិបត្តិ​សេដ្ឋ​កិច្ច​ ពិភព​លោក”។

ប៉ុន្តែ​អ្នក​គ្រប់​គ្រង​ភោជ​នីយ​ដ្ឋាន​ ម្ចាស់​ផ្ទះ​សំណាក់​និង​មន្ត្រី​អង្គការ​ក្រៅ​រដ្ឋា​ភិបាល​មួយ​ចំនួន​នៅ​ក្នុង​ខេត្ត​ជាប់​មាត់​សមុទ្រ​នេះ ​អះ​អាង​ថា ​ការ​ធ្លាក់​ចុះ​ចំនួន​ភ្ញៀវ​ទេស​ចរណ៍​បរទេស​នេះ​គឺ​អាច​បណ្តាល​មក​ពី​ការ​ផ្ទុះ​ឡើង​ខ្លាំង​នូវ​អំពើ​លួច​ឆក់​ប្លន់​និង​ឧក្រិដ្ឋ​កម្ម​ផ្សេងៗ​នៅ​ក្នុង​ខេត្ត​នេះ។

លោក​ ថម​ សោ ​អ្នក​មើល​ការ​ខុស​ត្រូវ​ភោជ​នីយ​ដ្ឋាន​យីហោ ​៥៥៥​ នៅ​តាម​បណ្តោយ​ឆ្មេរ​អូរ​ឈើ​ទាល​ មាន​ប្រសាសន៍​ថា​ ភ្ញៀវ​មួយ​ចំនួន​លែង​ហ៊ាន​មក​លេង​នៅ​តាម​តំបន់​ឆ្នេរ​នេះ​ត​ទៅ​ទៀត​ ដោយ​សារតែ​មាន​ក្មេង​លួច​ឥវ៉ាន់​របស់​ពួក​គេ​ នៅ​ពេល​ដែល​ពួក​គេ​ចុះ​មុជ​ទឹក​សមុទ្រ​កំសាន្ត​លេង។

“ភ្ញៀវ​ខ្លះ​ដូច​ថា ​គាត់​ខ្លាច។ ​មក​អង្គុយ​អញ្ចឹង​គាត់​ខ្លាច​រអា​ថា​ បាត់​សម្ភារៈ ​គាត់​អញ្ចឹង។​ ដូច​ថា​ អ្នក​ខ្លះ​បាត់ ​កាបូប​លុយ​ អី​អញ្ចឹង​អស់​រលីង​តែ​ម្តង។​ ដល់​ក្មេង​យក​បាត់​ទៅ ​អស់​តែ​ម្តង។​ អ្នក​ខ្លះ​បាត់​ទូរ​ស័ព្ទ​ បាត់​ខោអាវ ។​ ស្បែក​ជើង​អីហ្នឹង​ក៏​វា​យក​ដែរ​ យក​ទាំង​អស់ ​ក្មេង​ហ្នឹង”។

លោក​ ថម​ សោ ​មាន​ប្រសាសន៍​បន្ថែម​ថា ​ក្មេង​ដែល​លួច​ឥវ៉ាន់​របស់​ភ្ញៀវ​ភាគ​ច្រើន​ជា​ក្មេង​ហិត​កាវ​និង​ក្មេង​ដែល​បន្លំ​ខ្លួន​ជា​អ្នក​ដើរ​រើស​សំបក​កំប៉ុង​ស្រាបៀ​ឬ​ទឹក​ក្រូច​ដែល​គេ​បោះ​ចោល​ជា​ដើម។​ នៅ​ចម្ងាយ​ប្រមាណ​៥០០​ម៉ែត្រ​ពី​ហាង​របស់​លោក​ថម ​សោ ​គឺ​ជា​ផ្ទះ​សំណាក់​G.S.T​ដែល​ទទួល​ភ្ញៀវ​បរទេស​ភាគ​ច្រើន​ឱ្យ​ស្នាក់​នៅ។ ​លោក ​មាស ​សំអាត អ្នក​គ្រប់​គ្រង​ផ្ទះ​សំណាក់​នេះ​បាន​ប្រាប់​ឱ្យ​ដឹង​ថា ​ចំនួន​ភ្ញៀវ​បរទេស​ដែល​ចូល​មក​ស្នាក់​នៅ​ក្នុង​ផ្ទះ​សំណាក់​របស់​លោក​បាន​ធ្លាក់​ចុះ​ពី​ជាង​១០០​នាក់​ក្នុង​មួយ​ថ្ងៃ​កាល​ពី​ឆ្នាំ​មុន​ មក​នៅ​ត្រឹម​ពី​៤០​ទៅ​៦០​នាក់​ប៉ុណ្ណោះ​ក្នុង​ឆ្នាំ​នេះ។

លោក ​មាស​ សំអាត ​មាន​ប្រសាសន៍​ថា​ ការ​ធ្លាក់​ចុះ​នេះ​អាច​ដោយ​សារ​អំពើ​លួច​ឆក់​ឥវ៉ាន់​ភ្ញៀវ​នៅ​តាម​ផ្លូវ​ជាដើម​ ដែល​ធ្វើ​ឱ្យ​ភ្ញៀវ​ខ្លះ​លែង​ហ៊ាន​មក​លេង​នៅ​ក្នុង​ទី​ក្រុង​មាត់​សមុទ្រ​នេះ​ត​ទៅ​ទៀត។

ក្រុម​ហ៊ុន​មគ្គុទេស​ទេស​ចរណ៍​ដ៏​ធំ​មួយ​ឈ្មោះ ​Lonely ​Planet ​ដែល​មាន​ទី​ស្នាក់​ការ​ធំ​នៅ​ក្នុង​ប្រទេស​ អូស្ត្រាលី ​បាន​ទម្លាក់​កម្រិត​កេរ្តិ៍​ឈ្មោះ​នៃ​ក្រុង​ព្រះ​សីហនុ​នេះ​ដោយ​ពិពណ៌នា​វា​ថា​ ជា​ទី​ក្រុង​មួយ​ដែល​លែង​សូវ​មាន​សុវត្ថិ​ភាព​ដូច​ដែល​វា​ធ្លាប់​មាន​ពី​មុន ​ពោល​គឺ​បទ​ឧក្រិដ្ឋ​ ដូច​ជា​ការ​លួច​ ឆក់ ​ប្លន់​អំពើ​ហិង្សា​ និង​ការ​ចាប់​រំលោភ​សេព​សន្ទវៈ​បាន​ផ្ទុះ​ឡើង​នៅ​ក្នុង​រយៈ​ពេល​ប៉ុន្មាន​ឆ្នាំ​ចុង​ក្រោយ​នេះ។

មន្រ្តី​គម្រោង​នៃ​អង្គការ​សកម្ម​ភាព​ដើម្បី​កុមារ​ប្រចាំ​ខេត្ត​ព្រះ​សីហនុ។ គាត់​មាន​ឈ្មោះ​ក្រៅ​ថា​"ដេន"​ហើយ​ដែល​ជា​អ្នក​តាម​ដាន​ការ​រំលោភ​បំពាន​ផ្លូវ​ភេទ​លើ​កុមារ​នៅ​ក្នុង​ខេត្ត​នេះ​ មាន​ប្រសាសន៍​នៅ​ក្នុង​បទ​សម្ភាសន៍​មួយ​ថា ​នៅ​ក្នុង​រយៈ​ពេល​៤​ខែ​ដើម​ឆ្នាំ​២០១០​នេះ ​មាន​ករណីរំលោភ​ផ្លូវ​ភេទ​កុមារ​ពី​សំណាក់​ភ្ញៀវ​ទេស​ចរណ៍​បរទេស​ចំនួន​៦​ករណី​ហើយ។ ​នៅ​ក្នុង​រយៈ​ពេល​ពេញ​មួយ​ឆ្នាំ​២០០៩​កន្លង​ទៅ ​ករណី​រំលោភ​ផ្លូវ​ភេទ​កុមារ​ដោយ​ជន​បរទេស​នេះ ​មាន​ចំនួន​សរុប​៨​ករណី។

“យើង​ឃើញ​មាន​ការ​រំលោភ​បំពាន​កុមារ​នៅ​តាម​ថ្នល់​តែ​ម្តង។ ​នៅ​តាម​សួន​ច្បារ​នៅ​ពេល​យប់​ស្ងាត់​គឺ ​យើង​ឧស្សាហ៍​ជួប​ប្រទះ​ដែរ​នៅ​ពេល​ភ្លើង​រឹមៗឬ​អត់​ភ្លើង​ មើល​ឃើញ​គ្នា​តិចៗ​ ងងឹតៗ​ គឺ​គេ​រំលោភ​បំ ពាន​នៅ​ទី​ហ្នឹង។ ​ហើយ​ថ្មីៗ​ យើង​សង្កេត​ឃើញ​ថា​ មាន​ការ​រំលោភ​បំពាន​នៅ​ក្នុង​ព្រៃ​របោះ​។ អញ្ចឹង​នេះ​គឺ​ជា​ពិធី​ថ្មី​ឬ​កន្លែង​ថ្មី​ដែល​គេ​ជ្រើស​រើស​យក​ក្មេង​ទៅ​រំលោភ​បំពាន​នៅ​ទី​ហ្នឹង”។

អ្នក​នាង​ Jodie​ Hall​ អ្នក​ទេស​ចរណ៍​ម្នាក់​មក​ពី​ប្រទេស​អូស្រ្តាលី​មាន​ប្រសាសន៍​នៅ​ផ្ទះ​សំណាក់​ G.S.T​ ​ដែល​អ្នក​នាង​កំពុង​ស្នាក់​នៅ​ថា​ អ្នក​នាង​បាន​ដឹង​អំពី​បទ​ឧក្រិដ្ឋ​ទាំង​នេះ​ដែរ​ តាម​រយៈ​ការ​អាន​សៀវភៅ​មគ្គុទេស​ទេស​ចរណ៍ ​មុន​ពេល​ដែល​អ្នក​នាង​មក​កំសាន្ត​នៅ​ទី​នេះ​ ដូច្នេះ​អ្នក​នាង​ត្រូវ​បង្កើន​ការ​ប្រុង​ប្រយ័ត្ន​ខ្ពស់​នៅ​ពេល​ដើរ​លេង​កំសាន្ត​ក្នុង​ក្រុង​ជាប់​មាត់​សមុទ្រ​នេះ។

“ខ្ញុំ​នឹង​មិន​ដើរ​លេង​នៅ​ពេល​យប់​តែ​ម្នាក់​ឯង​ទេ​ ហើយ​ខ្ញុំ​ក៏​មិន​យក​របស់​របរ​ដែល​ខ្ញុំ​មិន​ចង់​ឱ្យ​បាត់ ​ជាប់​ខ្លួន​ដែរ​ ពេល​ខ្ញុំ​ចេញ​ទៅ​ក្រៅ​នោះ"។

លោក ​សោម ​ចិន្តា ​ប្រធាន​មន្ទីរ​ទេស​ចរណ៍​ខេត្ត​ព្រះ​សីហនុ ​មាន​ប្រសាសន៍​ថា ​បញ្ហា​ឧក្រិដ្ឋ​កម្ម​និង​ អសន្តិ​សុខ​នៅ​ក្នុង​ខេត្ត​នេះ ​ពិត​ជា​កើត​មាន​មែន​ ប៉ុន្តែ​លោក​បញ្ជាក់​ថា ​អាជ្ញាធរ​បាន​ចាត់​វិធាន​ការបង្រ្កាប​ជា​បន្ត​បន្ទាប់​ហើយ។

លោក​ សោម​ ចិន្តា​ មាន​ប្រសាសន៍​បន្ថែម​ថា​ អាជ្ញាធរ​មាន​សមត្ថ​កិច្ច​ក៏​បាន​ពង្រឹង​ការ​ផ្សព្វ​ផ្សាយ​ដល់​ប្រជា​ពល​រដ្ឋ​ក្នុង​មូល​ដ្ឋាន​ឱ្យរួម​គ្នា​ជួយ​ទប់​ស្កាត់អំពើ​ល្មើស​ច្បាប់​ទាំង​អស់​នេះ​ផង​ដែរ។

“ក្នុង​រង្វង់​ប៉ុន្មាន​ឆ្នាំ​ចុង​ក្រោយ​នេះ​គឺ​ថា ​បញ្ហា​នេះ​ត្រូវ​បាន​កែ​លម្អ​ច្រើន​មែន​ទែន​ដោយ​សារ​តែ​យើង​ បាន​យក​ចិត្ត​ទុក​ដាក់​ពង្រឹង​យុទ្ធនា​ការ​ផ្សព្វ​ផ្សាយ​ខ្លាំង​ដល់​ប្រជា​ពល​រដ្ឋ​ក្នុង​ខេត្ត​ដល់​ប្រតិ​បត្តិករ​ ទេស​ចរណ៍ ​ម្ចាស់​អ្នក​គ្រប់​គ្រង​អាជីវ​កម្ម ​សេវា​កម្ម​ទាំង​អស់ ​ពិសេស​គឺ​ប្រជា​ជន​យើង​បាន​ជ្រួត​ជ្រាប​ អំពី​បញ្ហា​នេះ” ។

ទាក់​ទង​នឹង​ការ​ធ្លាក់​ចុះ​ចំនួន​ភ្ញៀវ​ទេស​ចរណ៍​បរទេស​មក​ក្នុង​ខេត្ត​នេះ​ដែរ​ លោក​ សោម ​ចិន្តា​ អះ​អាង​ថា ​បញ្ហា​នេះ​អាច​បណ្តាល​មក​ពី​ភ្ញៀវ​ខ្លះ​មិន​ចង់​មក​លេង​កន្លែង​ដដែលៗ។

ក្រៅ​ពី​មាន​ឆ្មេរ​ចំនួន​៨កន្លែង​ហើយ​នោះ ​ខេត្ត​ព្រះ​សីហនុ​នេះ​មាន​កោះ​ចំនួន​៣៤​កោះ ​ដែល​នៅ​ក្នុង​នោះ​មាន​ប្រមាណ​១០​កោះ​បាន​និង​កំពុង​អភិវឌ្ឍ​ រួម​មាន​កោះ​ដែក​គោល ​កោះ​រ៉ុង ​កោះ​រ៉ុង​សន្លឹម​ កោះ​តាកៀវ​ កោះ​ពោះ​និង​កោះ​ឫស្សី​ជា​ដើម។

លោក​ប្រធាន​មន្ទីរ​ទេស​ចរណ៍​ខេត្ត​ព្រះ​សីហនុ​នេះ​បញ្ជាក់​ថា ​មន្ទីរ​របស់​លោក​បាន​រៀប​ចំ​យុទ្ធ​សាស្រ្ត​ពង្រីក​គោល​ដៅ​ទេស​ចរណ៍​បន្ថែម​ទៀត​ដើម្បី​ទាក់​ទាញ​ភ្ញៀវ​ទេស​ចរណ៍​បរទេស​ឱ្យ​ចូល​មក​កំសាន្ត​នៅ​ក្នុង​ខេត្ត​នេះ​ឱ្យ​បាន​ច្រើន​ថែម​ទៀត​ហើយ។

ការ​ពង្រីក​គោល​ដៅ​ទេស​ចរណ៍​នោះ​ រួម​មាន​ការ​កែ​លម្អ​ហេដ្ឋា​រចនា​សម្ព័ន្ធ​និង​សោ​ភ័ណ​ភាព​តំបន់​ ឆ្មេរ​ដែល​មាន​ស្រាប់​និង​ការ​អភិវឌ្ឍ​តំបន់​កោះ​បន្ថែម​ទៀត។

XS
SM
MD
LG