ភ្ជាប់​ទៅ​គេហទំព័រ​ទាក់ទង

កម្ពុជា​នៅ​មិន​ទាន់​មាន​តម្លាភាព​ល្អ​លើ​ការ​គ្រប់​គ្រង​ថវិកា


ទិដ្ឋភាព​នៃ​ការប្រជុំ​សភា​កម្ពុជា​។​

ភ្នំពេញៈ ប្រទេស​កម្ពុជា​ មាន​ភាព​ជឿនលឿន​បន្តិចបន្តួច​នៅក្នុង​តារាង​តម្លាភាព​នៃ​ការផ្សព្វផ្សាយ​ព័ត៌មាន​ថវិកា ឆ្នាំ២០១០​សម្រាប់​សាធារណៈជន​។ ​អង្គការភាព​ជា​ដៃគូថវិកា​អន្តរជាតិ​ បាន​ដាក់​ពិន្ទុ​ឱ្យ​ប្រទេស​កម្ពុជា​ ក្នុង​ចំណាត់ថ្នាក់​លេខពីរ​ ចាប់ពី​បាត​តារាង​ក្នុង​ចំណោម​ប្រទេស​ចំនួន​ប្រាំពីរ​ក្នុង​តំបន់​។ ​រីឯ​សមាជិក​សភា​ បាន​ហៅ​ការ​ដាក់​ពិន្ទុ​នេះ​ថា​គ្មាន​តម្លាភាព​ និង​យុត្តិធម៌ចំពោះ​រដ្ឋសភា​និង​រដ្ឋាភិបាល​ទេ​ ដោយអះអាង​ថា​ ប្រទេស​កម្ពុជា​ខំ​ប្រឹងធ្វើការ​ដើម្បី​តម្លាភាព​ អភិបាលកិច្ច​ល្អ ​ប្រសិទ្ធិភាព​ និង ​ការចូលរួម​របស់​សាធារណៈជន​។

អង្គការភាព​ជាដៃគូ​ថវិកា​អន្តរជាតិ ​(International Budget Partnership) ​បាន​ចេញផ្សាយ​លទ្ធផល​នៃការអង្កេត​លើ​ការផ្សព្វផ្សាយ​ព័ត៌មាន​ថវិកា​ឆ្នាំ២០១០ ​នៅ​ថ្ងៃព្រហស្បតិ៏​នេះ​ថា​ ពិន្ទុ​របស់​ប្រទេស​កម្ពុជា​បាន​កើនឡើង​ដល់​១៥ ​ពិន្ទុ​លើ​១០០​ ក្នុង​ឆ្នាំ២០១០ ​ពី​១១ពិន្ទុ​ក្នុង​ឆ្នាំ២០០៨ ​ប្រសើរ​ជាង​ប្រទេស​វៀតណាម​។

ការអង្កេត​លើ​ការផ្សព្វផ្សាយ​ព័ត៌មាន​ថវិកា​ឆ្នាំ២០១០នេះ​ ត្រូវបាន​ធ្វើ​រួមគ្នា​ដោយ​អង្គការភាពជា​ដៃ​គូ​ថវិកា​អន្តរជាតិ​ដែល​មាន​មូលដ្ឋាន​នៅក្នុង​រដ្ឋធានី វ៉ាស៊ីនតោន​ (Washington D.C) ​សហការ​ជាមួយ​វេទិកានៃ​អង្គការ​មិន​មែន​រដ្ឋាភិបាល​ស្តីពី​កម្ពុជា​ចាប់ពី​ខែ​មិថុនា​ដល់​ខែកញ្ញា​។ ការអង្កេតនេះ​ត្រូវ​បាន​ផ្តោត​ទៅ​លើ​ប្រភពពីរ​សំខាន់​ៗ​ទាក់ទង​នឹង​ឯកសារ​រាជកិច្ច​ និងក្រសួង​សេដ្ឋកិច្ចនិង​ហិរញ្ញវត្ថុ​។

លោក​ជា គឹមសុង ​ប្រធាន​កម្មវិធី​បញ្ហា​អភិវឌ្ឍន៍​នៃ​វេទិកា​នៃ​អង្គការ​មិនមែន​រដ្ឋាភិបាល​ស្តីពី​កម្ពុជា បាន​ថ្លែងថា៖

«ពិន្ទុ​កម្ពុជា​ប្រៀបធៀប​ទៅនឹង​បណ្តា​ប្រទេស​ក្នុង​តំបន់ ​កម្ពុជា​ស្ថិត​នៅក្នុង​ចំណាត់​ថ្នាក់ទាប​ជាងគេ​ ប៉ុន្តែ​មាន​ពិន្ទុ​ខ្ពស់​ជាង​ប្រទេស​វៀត​ណាម​»។

សន្ទស្សន៍​នៃ​ការផ្សព្វផ្សាយ​ព័ត៌មាន​ថវិកា​ឆ្នាំ២០១០​ បាន​ចាត់​ចំណាត់​ថ្នាក់​ថា​ពិន្ទុ​មធ្យម​សម្រាប់​ ប្រទេស​ប្រាំពីរ​នៅ​ក្នុង​តំបន់​ គឺ​៣៦ពិន្ទុ​។ ​ប្រទេស​វៀតណាម​បាន​ពិន្ទុ១៤ ​ប្រទេស​ទីម័រ​ខាងកើត​៣៤ពិន្ទុ​ ប្រទេស​ឥណ្ឌូណេស៊ី​៥១ពិន្ទុ ​ប្រទេស​ម៉ាឡេស៊ី​៣៩ពិន្ទុ ​ប្រទេស ហ្វីលីពីន​៥៥ពិន្ទុ​ និង​ប្រទេស​ថៃ​៤២ពិន្ទុ​។

សន្ទស្សន៍​នៃ​ការផ្សព្វផ្សាយ​ព័ត៌មាន​ថវិកា​ឆ្នាំ២០១០ ​បាន​បញ្ជាក់ថា​ប្រទេស​កម្ពុជា​និង​ប្រទេស​វៀត ណាម​មិនបាន​ផ្តល់​ព័ត៌មាន​គ្រប់គ្រាន់​ជាសាធារណៈ​អំពី​ថវិកាដែល​តម្រូវ​ធ្វើ​ឱ្យ​ប្រសើរ​ឡើងនូវ​តម្លាភាព​របស់​ខ្លួន​ឱ្យ​បានឆាប់ ​ដើម្បី​ស្មើនឹង​ប្រទេស​ជិតខាង​ក្នុង​តំបន់អាស៊ាន។

របាយការណ៍​នេះ​បាន​បញ្ជាក់​ថា ​រដ្ឋសភា​កម្ពុជា​មាន​ភាព​ទន់ខ្សោយ​ ពីព្រោះ​ស្ថាប័ន​នេះ​មិនមាន​ អំណាច​ពេញលេញ​ ដើម្បី​ធ្វើការ​កែប្រែ​សំណើ​ថវិកា​របស់​រដ្ឋាភិបាល ​មិនមាន​ពេលវេលាគ្រប់គ្រាន់ ដើម្បី​ពិភាក្សា​លើ​ថវិកា​ និង​មិនធ្វើ​ការ​ប្រជុំ​ជា​សាធារណៈ​ដែល​សាធារណៈ​ជន​ និង​អង្គការ​សង្គម ស៊ីវិល ​អាច​ដឹង​ពី​អាទិភាព​នៅក្នុង​សំណើ​ថវិកា​របស់​រដ្ឋាភិបាល​។

លោក​ជាម យៀប ​ប្រធាន​គណៈកម្មការ​សេដ្ឋកិច្ច​ និង​ហិរញ្ញវត្ថុ​នៃ​រដ្ឋសភា ​បាន​ហៅ​របាយការណ៍ នេះ​ថា​គ្មានយុត្តិធម៌​ចំពោះ​រដ្ឋសភា ​និង​រដ្ឋាភិបាល​ទេ។

«យើង​ធ្វើការ​ឈរ​នៅលើ​ច្បាប់​។ យើង​មិន​លាក់​លៀមព័ត៌មាន​អំពី​ថវិកាទេ​។ ប្រទេស​កម្ពុជា​ខំ​ប្រឹង ធ្វើការ​ដើម្បី​តម្លាភាព ​ការទទួលខុសត្រូវ​ សមធម៌​ អភិបាល​កិច្ចល្អ​ ប្រសិទ្ធិភាព​ និង​ការចូលរួម​របស់​សាធារណៈជន​»។

លោកស្រី​ Leah April ​អ្នកឯកទេស​ជាន់ខ្ពស់​ផ្នែក​គ្រប់គ្រង​វិស័យ​សាធារណៈ​នៃ​ធនាគារ​ពិភព លោក​ប្រចាំ​កម្ពុជា​បាន​ថ្លែងថា ​រដ្ឋាភិបាល​កម្ពុជា​មាន​គោលដៅ​សំខាន់​ណាស់​ ដើម្បី​ធ្វើ​ឱ្យ​មាន​តម្លា ភាព​បន្ថែម​ទៀត​នៅក្នុង​ការគ្រប់គ្រងហិរញ្ញវត្ថុ​សាធារណៈ ​និង​ការអភិវឌ្ឍ​ប្រព័ន្ធ​ព័ត៌មាន​សម្រាប់​ ការគ្រប់គ្រង​ហិរញ្ញវត្ថុ​ដែល​នឹង​ជួយ​ជំរុញ​តម្លាភាព​ ការទទួល​បាន​ព័ត៌មាន​ទាន់ពេល​ និង​ការគ្រប់ គ្រង​ហិរញ្ញវត្ថុ​៕

XS
SM
MD
LG