ភ្ជាប់​ទៅ​គេហទំព័រ​ទាក់ទង

ការ​វាយ​កម្ទេច​អាងស្តុក​ទឹក​ជុំវិញ​បឹង​ទន្លេសាប​ប៉ះពាល់​ជីវភាព​ពលរដ្ឋ


កំពង់ធំ៖ ម្ចាស់​អាង​ស្តុក​ទឹក​មួយ​ចំនួន​នៅ​ជុំវិញ​បឹង​ទន្លេសាប​បាន​លើក​ឡើង​ថា​ ​ការ​វាយ​កម្ទេច​អាង​របស់​ពួក​គាត់​ចោល​ បាន​ធ្វើ​ឲ្យ​ប៉ះពាល់​យ៉ាង​ខ្លាំង​ដល់​ជីវភាព​រស់នៅ​របស់​ពួក​គាត់​ ​ប៉ុន្តែ​អាជ្ញាធរអះអាង​ថា​ ​ការបំផ្លាញ​អាង​ទឹក​ទាំង​នោះ​គឺ​ដើម្បី​រក្សា​ព្រៃ​លិច​ទឹក​នៅ​ជុំវិញ​បឹង​ដ៏​ធំ​នោះ។

«វា​អាក់​អន់​ចិត្ត​ដែរ​ ​មិន​មែន​ថា​ ​មិន​អាក់​អន់​ចិត្ត​នោះ​ទេ​ របស់​គេ​នៅ​ ​របស់ឯង​អស់នោះ។ បើ​ឯង​អ្នក​មាន​ទៅ​មិនថាទេ​ ​នេះ​ឯង​អ្នក​ក្រ។​ គេ​ទារ​ព្រឹក​ ​ទារ​ល្ងាច​ ​មិន​ជា​ស្រួល​ឯណា? ​ប៉ុន្តែ​មិន​ដឹង​ធ្វើ​យ៉ាង​ម៉េច»។

នេះ​គឺ​ជា​ការ​សម្តែង​អារម្មណ៍​អាក់អន់​ស្រពន់​ចិត្តយ៉ាង​ខ្លាំង​របស់​លោក​គង់​ ហ៊ៅ ​វ័យ​៦៧​ឆ្នាំ​ ជា​កសិករ​នៅក្នុង​ភូមិ​គោក​ទ្រា ​ឃុំ​ម្សាក្រង ​ស្រុក​ស្ទោង​ ខេត្ត​កំពង់ធំ ​ចំពោះ​ការ​វាយ​កម្ទេច​អាង​ទឹក​របស់​លោក​ចោលដោយ​អាជ្ញាធរ​ទន្លេសាប​កាល​ពី​ខែ​មុន​ ​នៅ​ក្នុង​យុទ្ធនាការ​បំផ្លាញ​អាង​ស្តុក​ទឹក​នៅ​ជុំវិញ​បឹង​ទន្លេសាប​នេះ។

ការ​បំផ្លាញ​គឺ​ដោយសារ​អាជ្ញាធរ​លើក​ឡើង​ថា​ ​អាង​ស្តុក​ទឹក​ទាំង​នេះ​ ​បាន​ធ្វើ​ឲ្យ​ប៉ះពាល់​ដល់​ប្រព័ន្ធ​អេកូឡូស៊ី ​និង​ជីវ​ចម្រុះ​របស់​បឹង​ទន្លេសាប​ទាំងមូល​ ​ជា​ពិសេស​គឺ​ព្រៃ​លិច​ទឹក​ដែល​ជា​ទី​ជម្រក​ដ៏​សំខាន់​សម្រាប់​ត្រី​ពង​ ​ត្រីកូន​នៅ​រដូវ​វស្សា​នេះ។

អង្គុយ​នៅ​លើ​ទំនប់​អាង​ទឹក​ដែល​ត្រូវ​បាន​ឈូស​ឆាយ​រាប​ដល់​ដី​ហើយ​នោះ​ ​លោក​គង់ ហ៊ៅ ​មាន​ប្រសាសន៍​ថា​ ​លោក​បាន​ចំណាយ​ប្រាក់​អស់៥​៥០០​ដុល្លារ​សហ​រដ្ឋ​អាមេរិក​ ដើម្បី​សាង​សង់​អាង​ទឹក​ ទំហំ​១​ហិកតា​ ៧០​អា​ ​ដែល​ស្ថិតនៅ​ចម្ងាយ​ប្រមាណ​១០​គីឡូ​ម៉ែត្រ​ពី​មាត់​បឹង​ទន្លេសាប​ សម្រាប់​ស្តុក​ទឹកទុក​ស្រោច​ស្រព​ស្រែ​ប្រាំង​របស់​លោក​ទំហំ​៦​ហិក​តា​ដែល​នៅ​ជាប់​នឹង​អាង​ទឹក​នេះ។

លោក​គង់ ហ៊ៅ ​បាន​អះអាង​ថា​ ​ការ​បំផ្លាញ​អាង​ស្តុក​ទឹក​របស់​លោក​នេះ​ បាន​ធ្វើ​ឲ្យ​ជីវភាព​របស់​លោក​កាន់​តែ​ដុនដាប​ ​ដោយសារ​លោក​មិន​អាច​ធ្វើ​ស្រែ​នៅ​ជាប់​នឹង​អាង​ទឹក​នេះ​ ដើម្បី​រក​ចំណូល​សង​ថ្លៃ​ជំពាក់​ធនាគារ​ ដែល​លោក​បាន​ខ្ចី​ប្រាក់​ ​សម្រាប់​សាងសង់​អាង​ស្តុក​ទឹក​នេះ​កាល​ពី​ឆ្នាំ​២០០៨​នោះ​ទេ។

«វា​នឹក​ឃើញ​ថា​ ​ វា​ក្រ​ទៅ​ហើយ​ ​វា​ជំពាក់​គេ​ទៅ​ទៀត។​ វា​មិន​ដឹង​បាន​អី​ដោះ​ស្រាយ​ឲ្យ​គេ​ទេ។​ គ្រាន់​តែ​ធ្វើ​បាន​តែ​មួយ​ឆ្នាំ​ពីរ ​បាន​បន្តិច​បន្តួច​ក៏​មិន​ដឹង​បាន​អី​ដោះ​ស្រាយ​ជាមួយ​គេ​ទេ»។

សូម​បញ្ជាក់​ថា​ ​អាជ្ញាធរ​ទន្លេសាប​ដែល​បាន​បង្កើត​ឡើង​កាល​ពី​ខែ​មិថុនា​ឆ្នាំ​២០០៩​ បាន​បើក​យុទ្ធ​នាការ​រំលាយ​អាង​ស្តុក​ទឹក​នៅ​តំបន់​ជុំវិញ​បឹង​ទន្លេ​សាប​ តាំង​ពី​ចុង​ខែ​មិថុនា​ឆ្នាំ​២០១០​ ដើម្បី​រក្សា​ព្រៃ​លិចទឹក​នៅ​តំបន់​នោះ​ ​បន្ទាប់​ពី​ព្រៃ​លិចទឹក​ចំនួន​ជិត​៤០​ម៉ឺន​ហិកតា​ក្នុង​ចំណោម​ព្រៃ​លិច​ទឹក​សរុប​ប្រមាណ​១​លាន​ហិកតា​ ​ត្រូវ​បាន​កាប់ ឬ​ដុត​បំផ្លាញ​ដោយ​ប្រជាជន​និង​ឈ្មួញ​ខ្លះ​នៅ​ក្នុង​តំបន់​ជុំវិញ​បឹង​ទន្លេសាប​នេះ។​ បឹង​ទន្លេសាប​ព័ទ្ធ​ជុំវិញ​ដោយ​ខេត្ត​ចំនួន​ប្រាំមួយ​ ​រួម​មាន​ ខេត្ត​កំពង់​ឆ្នាំ ​ពោធិ៍សាត់​ បាត់​ដំបង​ បន្ទាយ​មាន​ជ័យ​ ​ សៀមរាប​ និង​ខេត្ត​កំពង់​ធំ​នេះ។

រហូត​មកដល់​ពេល​នេះ​ ​អាជ្ញាធរ​បាន​រំលាយ​អាង​ស្តុក​ទឹក​ចំនួន​៣៥​ ហើយ​ក្នុង​ចំណោម​អាង​សរុប​ទាំង​តូច​ទាំង​ធំ​ចំនួន​ ២៣៩​ ​នៅក្នុង​ខេត្ត​ទាំង​៦​ជុំវិញ​បឹង​ទន្លេសាប។​ អាង​ទាំងនេះ​ត្រូវ​បាន​សាងសង់​ចាប់​ពី​ទសវត្ស១៩៥០​មក​ ​ដោយ​ប្រជាជន​និង​ឈ្មួញ​មួយ​ចំនួន​ ​ដើម្បី​ស្តុក​ទឹក​សម្រាប់​ធ្វើ​ស្រែ​ប្រាំង​និង​ដើម្បី​ចាប់​ត្រី​នៅ​ក្នុង​អាង​ទាំងនេះ​ ​នៅពេល​ដែល​ទឹក​ទន្លេសាប​ចាប់​ផ្តើម​ស្រក​ទៅវិញ​ ​នេះ​បើ​យោង​តាម​អាជ្ញាធរ​ទន្លេសាប។

ប៉ុន្តែ​ លោកទ្រី ហ៊ន​ មេឃុំ​ម្សាក្រង ​មាន​ប្រសាសន៍​ថា​ ​ការ​រំលាយ​អាង​ស្តុក​ទឹក​ទាំងនេះ​បាន​ធ្វើ​ឲ្យ​ប៉ះពាល់​យ៉ាង​ខ្លាំង​ដល់​ជីវភាព​ប្រជា​ពលរដ្ឋ​ក្រីក្រ​នៅ​ក្នុង​ឃុំ​របស់​លោក។

«លុយ​គ្នា​ខ្ចី​ពី​ធនាគារ​ ​ដូចជា​អេស៊ីលីដា អីហ្នឹង​ ​មិន​មែន​លុយ​គ្នា​ផ្ទាល់​ទេ។ ខ្លះ​អង្គុយ​យំ​ ​ខ្លះ​សឹង​នឹង​ចង​ក​សម្លាប់​ខ្លួនឯង​ក៏​មាន​ដែរ។​ គ្នា​ជំពាក់​គេ​ដល់​ថ្នាក់​ហើយ។​ អា​ហ្នឹង​យក​លុយ​ចងការ​មក​ធ្វើ»។

លោក ទ្រី​ ហ៊ន​ មាន​ប្រសាសន៍​ថា​ ​ការ​រំលាយ​អាង​ស្តុក​ទឹក​ធំៗ​នៅ​ក្នុង​តំបន់​បឹង​ទន្លេសាប​នេះ​គឺ​ជា​ការ​ត្រឹមត្រូវ​ដើម្បី​ការ​ពារ​ព្រៃ​លិចទឹក​ ​ក៏ប៉ុន្តែ​លោក​បន្ថែម​ថា​ ​វា​ជា​ការ​សោក​ស្តាយ​ដែល​អាង​តូចៗ​របស់​កសិករ​តូចតាច​ត្រូវ​បាន​រំលាយ​ដែរ​នោះ​ ​ដោយ​លោក​ទ្រី ហ៊ន​លើក​ហេតុ​ផល​ថា​ ​ប្រជា​ពលរដ្ឋ​ភាគ​ច្រើន​ក្នុង​ចំណោម​ប្រជា​ពលរដ្ឋ​សរុប​ជាង​១៧០០​គ្រួសារ​ ​ឬ​ស្មើនឹង​មនុស្ស​ចំនួន​ជាង ​៩០០០​នាក់​ក្នុង​ឃុំ​របស់​លោក​នេះ​ គឺ​ជា​ប្រជា​កសិករ​សុទ្ធ​សាធ​ ​ដែល​ពឹង​ផ្អែក​តែ​ទៅ​លើ​របរ​ធ្វើ​ស្រែ​ចម្ការ​នេះ​ឯង។

តែ​ទោះជា​យ៉ាង​នេះ​ក្តី​ ​លោក​លឹម គាន​ហោ​ រដ្ឋមន្ត្រី​ក្រសួង​ធនធាន​ទឹក​និង​ឧតុនិយម​ និង​ជា​ប្រធាន​អាជ្ញាធរ​ទន្លេសាប​ ​មាន​ប្រសាសន៍បន្ទាប់​ពី​បើក​យុទ្ធនាការ​រំលាយ​អាង​ស្តុក​ទឹក​ទាំងនេះ​កាល​ពី​ខែ​មុន​ថា​ ​ក្រៅ​ពី​ដើម្បី​ស្តុក​ទឹក​សម្រាប់​ធ្វើ​ស្រែប្រាំង​ហើយ​នោះ​ ​អាង​ទឹក​ដែល​ត្រូវ​បាន​សាងសង់​នៅ​ជុំវិញ​បឹង​ទន្លេសាប​នេះ​ក៏​ដើម្បី​ចាប់​ត្រី​ផង​ដែរ។

លោក​លឹម គាន​ហោ ​ក៏​មាន​ប្រសាសន៍​បន្ថែម​ទៀត​ថា​ ​អាង​ស្តុក​ទឹក​ខ្លះ​ ​ជាពិសេស​នៅ​ក្នុង​ខេត្ត​កំពង់​ធំ​នេះ​តែម្តង​ ​ត្រូវ​បាន​សាងសង់​ជាប់ៗ​គ្នា​យ៉ាង​វែង​ ដែល​បណ្ដាល​ឲ្យ​ស្ទះ​ផ្លូវ​ទឹក​នៅពេល​ដែល​ទឹក​ចាប់​ផ្តើម​ឡើង​និង​ស្រក​វិញ​នោះ។

«អាង​ដែល​គាត់​ធ្វើ​នេះ​ ​ពិសេស​នៅ​ខេត្ត​កំពង់​ធំ​នេះ​ ​គឺ​អាង​ជាប់ៗ​គ្នា​តែ​ម្តង​ ​ជាប់​គ្នា​ដដឹក​តែ​ម្តង។​ ដូច្នេះ​ធ្វើ​ឲ្យ​ចរន្ត​ទឹក​ ​មាន​ន័យ​ថា​ ​ ​របប​ជលសាស្រ្ត​មិន​អាច​បែក​វាល​ចូល​ទៅ​ខាង​លើ​បាន​ល្អ​ប្រសើរ​ទេ​ ​ហើយ​ទឹក​ធ្លាក់​ពី​លើ​មក​វិញ​ ពី​ផ្លូវ​ជាតិ​មក​វិញ​ តាម​បណ្តា​ស្ទឹង​ ​បណ្តា​ព្រែក​ ​ក៏​អត់​ទូលាយ​ដូច​មុនដែរ​ ​មាន​ន័យ​ថា​ ​វា​ស្ទះ​មុខ​ទឹក»។

ប្រជា​កសិករ​តូចតាច​ ​ដែល​ជា​ម្ចាស់​អាង​ទឹក​នៅក្នុង​ឃុំ​ម្សាក្រង ​ខេត្ត​កំពង់ធំ​នេះ​ បាន​អះអាង​ថា​ ពួកគេ​មិន​ប្រឆាំង​នឹង​គោល​នយោបាយ​របស់​រដ្ឋា​ភិបាលក្នុង​ការ​រំលាយ​អាង​ស្តុក​ទឹក​នេះ​ទេ​ ​ប៉ុន្តែ​ ពួក​គេ​លើក​ឡើង​ថា​ ​រដ្ឋា​ភិបាល​គួរ​តែ​គិត​គូរ​អំពី​សំណង​សមស្រប​ណាមួយ​សម្រាប់​ពួកគេ​ ដើម្បី​ឲ្យ​ពួក​គេ​អាច​មាន​លទ្ធភាព​ដោះស្រាយ​បំណុល​របស់​ពួកគេ​បាន។

ប៉ុន្តែ​លោកចាន់​ យុត្ថា ​អគ្គ​លេខាធិការ​នៃ​អាជ្ញាធរ​ទន្លេសាប ​មាន​ប្រសាសន៍​ថា​ ​រដ្ឋាភិបាល​ពុំ​មាន​គោល​ការណ៍​ផ្តល់​សំណង​ចំពោះ​ការ​បាត់​បង់​អាង​ស្តុក​ទឹក​ទាំង​នេះ​ទេ​ ​ដោយ​លោក​ពន្យល់​ថា​ ​អាង​ទាំង​នេះ​ត្រូវ​បាន​សាង​សង់​ឡើង​ដោយ​ខុស​ច្បាប់។

លោក​ចាន់ យុត្ថា​មាន​ប្រសាសន៍​បន្ថែម​ថា​ ​អាជ្ញាធរ​ទន្លេសាប​ក៏​នឹង​បន្ត​រំលាយ​អាង​ស្តុក​ទឹក​ធំៗនៅ​ជុំវិញ​បឹង​ទន្លេសាប​នេះ​ឲ្យ​អស់​ ​បន្ទាប់​ពី​ទឹក​ទន្លេសាប​ចាប់​ផ្តើម​ស្រក​ទៅ​វិញ​នោះ៕

XS
SM
MD
LG