ភ្ជាប់​ទៅ​គេហទំព័រ​ទាក់ទង

ខ្មែរ​៧​នាក់​បាន​រួចផុត​ពី​ទាសភាព​លើ​ទូក​ថៃ


ពលករ​ទេសន្តរប្រវេសន៍ខ្មែរ​មួយ​ក្រុម។ នៅ​ពេល​ថ្មីៗ​នេះ ​មាន​ពលករ​​៧​នាក់​​ដែល​មក​​ពី​ខេត្ត​៥​ ត្រូវបាន​មេខ្យល់​បោក​យក​ទៅ​លក់ឱ្យ​ធ្វើជា​អ្នក​នេសាទ​នៅ​ប្រទេស​ថៃ​​អស់រយៈ​ពេល​​ពី​៨​ខែ​ដល់​ជាង​១ឆ្នាំ។

ពលករ​ចំណាក​ស្រុក​កម្ពុជា​សរុប​ចំនួន​ប្រាំពីរ​នាក់​បាន​ត្រឡប់​មកដល់​ក្រុង​ភ្នំពេញ​វិញ​នៅ​រសៀល​ថ្ងៃសុក្រ​នេះ​បន្ទាប់​ពី​ត្រូវ​គេ​បោក​យក​ទៅ​លក់​ធ្វើ​ជា​កម្មករ​នេសាទ​ខុស​ច្បាប់នៅ​ប្រទេស​ថៃ​អស់​ជា​ច្រើន​ខែ​រួចមក។

ពួកគេ​ត្រូវ​បាន​រំដោះ​ក្រោម​ការ​ជួយជ្រោម​ជ្រែង​របស់​អង្គការ​ក្រៅ​រដ្ឋាភិបាល​និង​ស្ថានទូត​កម្ពុជា​នៅ​ប្រទេស​ម៉ាឡេស៊ី​បន្ទាប់​ពី​ពលករ​ទាំងនេះ​បាន​រត់គេចខ្លួន​ពី​នាវា​នេសាទ​ថៃ​ហើយ​បាន​គេច​ខ្លួន​ចូល​ប្រទេស​ម៉ាឡេស៊ី។ ពលករ​ទាំងនេះ​មកពី​ខេត្ត​ពោធិ៍សាត់​ បាត់ដំបង​ បន្ទាយមានជ័យ​ សៀមរាប​ និង​កំពត​ ហើយ​ត្រូវបាន​មេខ្យល់​បោក​យក​ទៅ​លក់ឱ្យ​ធ្វើជា​អ្នក​នេសាទ​នៅ​ប្រទេស​ថៃ​អស់រយៈ​ពេល​ចន្លោះ​ពី​៨​ខែ​ដល់​ជាង​១ឆ្នាំ។

លោក​ ហ៊ុយ​ ពេជ្រសុវណ្ណ​ ជា​មន្រ្តី​កម្មវិធី​ផ្នែក​សិទ្ធិ​ការងារ​នៃ​មជ្ឈមណ្ឌល​អប់រំ​ច្បាប់​សហគមន៍​បាន​ឱ្យ​ដឹង​ថា ​ក្រុម​គ្រួសារ​ជនរងគ្រោះ​បាន​ផ្ដល់​ដំណឹង​ដល់​មជ្ឈមណ្ឌល​របស់លោក ហើយ​មជ្ឈមណ្ឌល​របស់​លោក​បាន​សហការ​ជាមួយ​ក្រសួង​មាន​សមត្ថកិច្ច​និង​មន្រ្តី​ស្ថានទូត​កម្ពុជា​ប្រចាំ​នៅ​ប្រទេស​ម៉ាឡេស៊ី ​ហើយ​បាន​រកឃើញ​ពលករ​ទាំង​ប្រាំពីរ​នាក់នៅ​រោង​ចក្រ​អារ​ឈើ​ពីរ​កន្លែង​ផ្សេងគ្នា។

«ពេល​គាត់​ធ្វើការ​នៅក្នុង​រោងចក្រ​អារឈើ​នេះ​ទៅ​គាត់បាន​បើក​ប្រាក់​ខែ​ទីមួយ​របស់​គាត់​ម្នាក់​ប្រហែល​ជា​៩០​រីងហ្គីត។ គាត់​ក៏ទិញ​កាត​ទូរស័ព្ទ​ ហើយ​ទូរស័ព្ទ​មក​ឪពុក​ម្តាយ​គាត់​នៅផ្ទះ​រហូត​បាន​ឪពុកម្តាយ​គាត់​នៅ​ស្រុកខ្មែរ​នេះ​មកប្តឹង​អង្គការ​សង្គមស៊ីវិល​យើង​ទៅ​បាន​ខ្ញុំ​ចេញ​ទៅ​ប្រទេស​ម៉ាឡេស៊ី​សហការ​ជាមួយ​ប៉ូលីស​អន្តោប្រវេសន៍​ម៉ាឡេស៊ី​នេះ​រក​ពួកគាត់​ឃើញ​ប្រាំពីរ​នាក់​នេះ»។

បន្ទាប់​ពី​មក​ដល់​ប្រទេស​កម្ពុជា​ភ្លាម​ពលករ​ទាំងនោះ​ត្រូវ​បាន​អង្គការ​អន្តរជាតិ​ទេសន្តរប្រវេសន៍​ហៅកាត់​ថា​ IOM​ យក​ទៅ​ពិនិត្យ​សុខភាព​ ហើយក្រោយមក​អ្នក​ទាំងនោះទៅ​ផ្តល់ព័ត៌មានមួយ​ចំនួន​នៅ​នាយកដ្ឋាន​ប្រឆាំង​ការ​ជួញដូរ​មនុស្ស​និង​ការពារ​អនីតិជននៃ​ក្រសួងមហាផ្ទៃ​ មុន​នឹង​អង្គការ​លីកាដូ​និង​កាក​បាទ​ក្រហម​កម្ពុជា​ផ្ដល់​នូវ​សំភារៈ​ប្រើប្រាស់​មួយ​ចំនួនដល់​ពួកគេ។

លោក​ស៊ុន​ បារាំង​ ​អាយុ​៤៧​ឆ្នាំ មាន​ស្រុក​កំណើត​នៅខេត្ត​បាត់ដំបងបាន​រៀបរាប់​ទាំង​ទឹកភ្នែក​ថា​មេខ្យល់​បាន​មកទាក់ទង​គាត់​កាល​ខែ​តុលា ​ឆ្នាំ ​២០១០​ ឲ្យ​ទៅធ្វើជា​ពលករ​នៅ​ប្រទេស​ថៃ​ដោយ​មិនប្រាប់​ថា​ លោក​ត្រូវ​ធ្វើ​ការងារ​អ្វី​នោះ​ទេ។ ក៏​ប៉ុន្ដែ​មេខ្យល់​បាន​សន្យា​ថា​ លោក​នឹង​ទទួល​បាន​ប្រាក់ខែ​យ៉ាង​តិច​ចំនួន ​៨.០០០ ​បាត ​គឺ​ស្មើនឹង​ជាង​២០០ដុល្លារ​អាមេរិក។

លោក​ស៊ុន​ បារាំង ​បន្ថែម​ថា ​ដោយសារ​ជីវភាព​មាន​ការ​ខ្វះខាត​បាន​បណ្តាលឱ្យ​លោកបង្ខំចិត្ត​ទៅ​តាម​មេខ្យល់​ ក៏ប៉ុន្តែ​ទីបំផុត​គាត់​ត្រូវ​បាន​គេយក​ទៅលក់ធ្វើ​ជា​ទាសករនៅលើ​ទូក​នេសាទទៅវិញ។

លោក​បាន​ឱ្យ​ដឹង​បន្តថា​លោក​ទៅ​ប្រទេស​ថៃនេះ​មាន​គ្នា​ចំនួន​៤នាក់​តែ​នៅពេល​ឡើង​ទូក​ត្រូវ​បាន​គេបំបែក​មិនឱ្យ​នៅ​ជុំគ្នា​នោះ​ទេ​រហូត​មកដល់ពេលនេះ​៣នាក់​ទៀតនោះ​បាត់ដំណឹង​មិនដឹង​ថា​យ៉ាងម៉េច​នោះទេ។

«ពេល​ដែល​ខ្ញុំ​បាន​ទៅ​ដល់​កំពង់​ផែ​ប្រទេស​ថៃ​បាតណាម ​គេ​ក៏​បង្ខំ​ឱ្យ​ចុះទូក​បង្ខំ​ឱ្យ​រក​ត្រី​ឱ្យ​គេ​នៅ​កណ្តាល​សមុទ្រ​ធ្វើ​គ្មាន​កំណត់​ថ្ងៃ​ទេ កំណត់​ម៉ោង​ទេ ​ឱ្យតែ​ម៉ោង​រកត្រី​លើក​អួន​គឺ​គិត​តែ​ពី​លើក​ហើយ​គឺ​ស្លាប់​គេអត់​ដឹង​ទេ»។

លោក​បារាំង​បាន​បញ្ជាក់​ថា​អ្នកដទៃ​ទៀត​ដែល​ទៅ​ជាមួយ​គ្នា​គឺ​ក្មួយ​គាត់​ពីរ​នាក់​និង​ប្អូនធម៌​ម្នាក់។

«រួចតែ​ខ្ញុំតែ​ម្នាក់​ដល់​កន្លែង​រកត្រី​វា​បំបែក​ទូកគ្នា​ម្នាក់​មួយៗ​វា​មិន​ឱ្យ​នៅ​ជុំគ្នា​នោះ​ទេ​ ខ្ញុំមក​ដល់​ស្រុកខ្មែរ​បារម្ភ​ពី​ក្មួយ​ទៀត»។

លោក​ទិត្យ ​សុភ័ក្រ​ អាយុ​២៩​ឆ្នាំ​មាន​ស្រុក​កំណើត​នៅ​ខេត្ត​បាត់ដំបង​ដូចគ្នា។ លោក​រៀបរាប់​ថា​ក្រៅពី​ធ្វើការ​ជា​កម្មករ​ទូកនេសាទ​ថៃ​ដោយ​មិន​ទទួលបានប្រាក់​ខែ​ កម្មករ​ទាំងឡាយ​ត្រូវទទួលរង​ការធ្វើ​ទារុណកម្ម​ពី​សំណាក់​ថៅកែ​ និង​មិនបាន​ហូប​ចុក​គ្រប់គ្រាន់ទៀត​ផង។​ លោក​ទិត្យ​ សុភ័ក្រ​ បាន​បន្ថែម​ថា​ កម្មករ​ខ្លះ​ត្រូវ​បាន​សម្លាប់​ទម្លាក់​ចូល​ក្នុង​សមុទ្រ​ទៀតផង។

លោក​ឧត្តមសេនីយ៍​ត្រី​ ជីវ ​ផល្លី​ អនុប្រធាន​នាយកដ្ឋាន​ប្រឆាំង​ការ​ជួញដូរ​មនុស្ស​និង​ការពារ​អនីតិជន​នៃ​ក្រសួង​មហាផ្ទៃ​បាន​មាន​ប្រសាសន៍​ថា ​ពលករ​ទាំង​ប្រាំពីរ​នាក់​នេះ​ស្ថិត​ក្នុង​ចំណោម​ពលករ​ចំណាក​ស្រុក​១២​នាក់​ដែល​បាន​រត់គេច​ចេញ​ពី​ទូក​នេសាទ​របស់​ថៃ​ បន្ទាប់ពី​ទទួលរង​ការ​ធ្វើ​ទារុណកម្ម​ពី​សំណាក់​ថៅកែ។ ហើយ​ពលករ​ចំនួន​៥នាក់​ផ្សេង​ទៀត​ កំពុង​តែបាត់​ខ្លួន​នៅ​ឡើយ។

លោក ​ជីវ​ ផល្លី​ បាន​ឱ្យដឹង​បន្ត​ថា​ ពលករ​ចំណាក​ស្រុក​ដោយ​ខុសច្បាប់​តាមរយៈ​មេខ្យល់អូសទាញ​ប្រឈម​នឹ​ងគ្រោះថ្នាក់​ខ្ពស់​បំផុត។

«កាលណា​គាត់​ឆ្លង​ដែន​ទៅ​តាម​មេខ្យល់​ដោយ​មិនដឹង​ឈ្មោះ​ច្បាស់លាស់​មិនដឹង​សាវតា​របស់​អ្នកនោះ​ហើយ​គាត់​មិនមាន​ឯកសារ​អ្វី​ត្រឹមត្រូវ​ទេ​គឺ​គាត់​ងាយ​រងគ្រោះ​ទីមួយ​អន្តោ​ប្រវេសន៍​ខុសច្បាប់​ទី២​រងគ្រោះ​ការបាញ់​សម្លាប់​នៅពេល​ដែល​ឆ្លងដែន​ទី៣​បើសិន​គាត់​ទៅដល់​រោងចក្រ​សហគ្រាស​គាត់​ងាយ​រងគ្រោះ​ពី​ការកេងប្រវ័ញ្ច​ពលកម្ម​បើ​ខាងស្រី​ងាយ​ពី​ការកេងប្រវ័ញ្ច​ផ្លូវភេទឬ​រំលោភ​ឬក៏​ទាសករដាច់ថ្លៃ​ឬក៏​អាចលក់​ពី​កន្លែង​មួយ​ទៅ​កន្លែង​មួយ»។

ចាប់តាំងពី​ឆ្នាំ​២០១០​រហូត​មកដល់ពេលនេះ​ពលករ​ចំណាក​ស្រុក​ចំនួន​៦១នាក់​ក្នុងនោះ​ប្រមាណ​ជា​១០នាក់​ជា​ស្រ្តី​ត្រូវ​បាន​ជួយ​សង្គ្រោះ​ពី​ការរំលោភ​សិទ្ធិ​ការងារ ​ការធ្វើ​ទារុណកម្មលើ​រាងកាយ​ និង​ ផ្នែក​ស្មារតី​ ក្នុង​ប្រទេស​ម៉ាឡេស៊ី ​ឥណ្ឌូនេស៊ី ​ទីម័រខាងកើត ​និង​អាហ្វ្រិក​ខាងត្បូង។​ នេះ​បើ​យោង​តាម​លោក​ ជីវ​ ផល្លី ។

លោក​ អន ​ប៊ុនហាក់ ​ប្រធាន​សមាគម​ភ្នាក់ងារ​ជ្រើសរើស​ពលករ​កម្ពុជា​បាន​ឱ្យដឹង​ថា​ ភាគច្រើនពលករ​ចំណាក​ស្រុក​ខុសច្បាប់​តែងតែ​ប្រឈម​ជាខ្លាំង​នឹង​បញ្ហា​ជាច្រើន​ដូចជា​ការ​រំលោភសិទ្ធិ​ការងារ​ និ​ង​ការធ្វើ​ទារុណកម្ម​ជាដើម។ ក៏ប៉ុន្តែ​ពលករ​ដែល​ទៅ​ធ្វើការ​ដោយ​ស្របច្បាប់​ មិន​មាន​ការជួប​បញ្ហា​ធ្ងន់ធ្ងរ​បែប​នេះ​នោះ​ទេ។

«កើតឡើង​តែ​ចំពោះ​អ្នកខុសច្បាប់​តែម្តង​ដែល​មាន​ការលំបាក​ពីព្រោះ​កាលណា​គាត់ទៅ​គ្មាន​ឯកសារ​អញ្ចឹង​ប៉ូលិស​ក៏គាត់​អត់ចង់​ជួបដែរ​ដូច្នេះ​ហើយ​ជួនកាល​យើងឃើញ​ហើយ​មានការលំបាក​គាត់ត្រូវ​លួចតេ​មកផ្ទះ​ដើម្បី​ឱ្យ​មានការ​ជួយសង្គ្រោះ​ទាំងនេះ​ហើយ​ដែល​ជាបញ្ហា»។

ទោះបីជា​យ៉ាងណា​ក៏ដោយ​កាលពី​ថ្ងៃទី​១៧​ខែ​កក្កដា​នេះ ​ពលការីនី​ម្នាក់ដែល​បាន​ទៅធ្វើ​ការស្របច្បាប់នៅ​ប្រទេស​ម៉ាឡេស៊ីបាន​ស្លាប់។ ក្រុមហ៊ុន​បាន​អះអាងថា ​ក្មេង​ស្រី​នេះមាន​ជំងឺទឹក​ចូល​សួត។ ក៏ប៉ុន្តែ​ក្រុម​អង្គការ​ក្រៅរដ្ឋា​ភិបាល​បាន​ចាត់ទុក​ការស្លាប់នេះ​នៅ​មានមន្ទិល​សង្ស័យ​ទៅ​លើការ​ធ្វើ​ទារុណកម្ម​ដោយ​ករណីនេះ​កំពុង​ធ្វើ​ការស៊ើបអង្កេត។

ស្របពេល​ជាមួយគ្នា​នេះ​លោក​ មឿន ​តុលា​ប្រធាន​កម្មវិធី​ផែ្នក​សិទ្ធិ​ការងារ​របស់​មជ្ឈមណ្ឌល​អប់រំ​ច្បាប់​សហគមន៍​បាន​ឱ្យដឹង​ថា​ពលករ​ចំណាក​ស្រុក​ទាំង​ស្របច្បាប់​និងខុសច្បាប់​កំពុង​ប្រឈម​ជាខ្លាំង​ក្នុង​ការ​រំលោភបំពាន​សិទ្ធិ​ការងារ​និង​ការធ្វើទារុណកម្ម​ផ្សេង​ៗលើ​រាងកាយ។

លោក​ អន​ ប៊ុនហាក់ ​បាន​ឱ្យដឹង​បន្ត​ថា​ជារៀងរាល់​ឆ្នាំ​មាន​ពលករ​ចំណាក​ស្រុក​ស្រប​ច្បាប់​ប្រមាណ​ជា ​៣០.០០០​ទៅ​៤០.០០០​នាក់​ចាប់តាំង​ពី​ឆ្នាំ​១៩៩៥​ មក​ដើម្បី​ស្វែង​រកការងារ​ដូចជា​បម្រើការ​នៅតាមផ្ទះ​ធ្វើ​ សំណង់​និង​នៅ​តាម​រោងចក្រ​ជាដើម។ ហើយ​រហូត​មកដល់ពេលនេះមាន​ពលករចំណាក​ស្រុក​ស្របច្បាប់​យ៉ាង​ហោចណាស់​ប្រមាណ​ជា​៨០.០០០​នាក់​ នៅ​ប្រទេស​ជប៉ុន​ កូរ៉េ​ ថៃ ​និងម៉ាឡេស៊ី។

ក៏ប៉ុន្ដែ​លោក ប៉ាន់​ប្រមាណ​ថា​ពលករ​ចំណាក​ស្រុក​ខុសច្បាប់​អាចមាន​ចំនួន​ច្រើន​ជាង​នេះ​យ៉ាង​ខ្លាំង​ គឺ​អាចមាន​ចំនួនរហូត​ដល់​ប្រមាណ​ជា​៣០០.០០០នាក់ ​រហូត​មកទល់​ពេលនេះ។ បន្ថែម​ពី​នោះ​ប្រមាណ​ពី​៨០.០០០ទៅ​១០០.០០០ នាក់​ បាន​ធ្វើ​ចំណាក​ស្រុក​ជា​រៀងរាល់​ឆ្នាំ៕

XS
SM
MD
LG