ភ្ជាប់​ទៅ​គេហទំព័រ​ទាក់ទង

កម្ពុជា​និង​អាមេរិក​ពិភាក្សា​គ្នា​អំពី​នយោបាយ​ការពារ​ជាតិ


លោក Derek J. Mitchell, ឧបការីរង​រដ្ឋមន្ត្រី​ក្រសួង​ការពារជាតិ​ជាន់ខ្ពស់​សម្រាប់​កិច្ចការ​សន្តិសុខ​តំបន់​អាស៊ី​និង​ប៉ាស៊ីហ្វ៊ិក ដែល​កំពុង​បំពេញ​ទស្សនកិច្ច​នៅ​ក្នុង​ប្រទេស​កម្ពុជា កាល​ពី​ថ្ងៃ​អង្គារ​ទី​០១​ខែ​កុម្ភៈ​ឆ្នាំ​២០១១ បាន​អំពាវនាវ​ឲ្យ​ប្រទេស​កម្ពុជា

ប្រទេស​កម្ពុជា​ និង​សហ​រដ្ឋ​អាមេរិក​បាន​ពិភាក្សា​គ្នា​អំពី​នយោបាយ​ការពារ​ជាតិ​រវាង​ប្រទេស​ទាំងពីរ​ ​សំដៅ​ពង្រឹង​សមត្ថភាព​និង​បណ្តុះ​បណ្តាល​ជំនាញ​យោធា​កម្ពុជា​ ​ព្រម​ទាំង​លើក​ទឹកចិត្ត​ឲ្យ​ប្រទេស​កម្ពុជា​បន្ត​ដើរ​លើ​ផ្លូវ​ប្រសើរ​ឡើង​ប្រកប​ដោយ​តម្លាភាព​ ​អភិបាលកិច្ច​ ​ល្អ​ឆន្ទៈ​ចំពោះ​នីតិរដ្ឋការ​អភិវឌ្ឍ​ស្ថិតស្ថិរ​តាម​បែប​ប្រជា​ធិបតេយ្យ ​និង​ការ​គោរព​សិទ្ធិ​មនុស្ស។ ការការពារ​ប្រទេស​រវាង​សហរដ្ឋ​អាមេរិក​និង​កម្ពុជា​នេះ​បាន​ផ្តោត​សំខាន់​ទៅលើ​ផ្នែក​នានា​នៃ​សហ​ប្រតិបត្តិការ​ទ្វេភាគី​ ​ហើយ​បាន​និយាយ​ពី​បញ្ហា​សន្តិសុខ​ក្នុង​ប្រទេស ​និង​ក្នុង​តំបន់​ដែល​ជា​កង្វល់​រួម។

នៅ​ថ្ងៃ​អង្គារ​នេះ​ ​មន្ត្រី​ជាន់ខ្ពស់​ក្រសួង​ការពារ​ប្រទេស​អាមេរិក​បាន​អំពាវនាវ​ឲ្យ​ប្រទេស​កម្ពុជា​ធ្វើ​កំណែ​ទម្រង់​ការពារ​ជាតិ​សម្រាប់​ចូលរួម​ចំណែក​ដល់​សន្តិសុខ​ ​និង​ស្ថិរភាព​នៅក្នុង​តំបន់​ និង​ពិភពលោក។

ការ​កត់សម្គាល់​របស់​លោក​បាន​ធ្វើ​ឡើង​ ​បន្ទាប់ពី​ការិយាល័យ​របស់​លោក​រដ្ឋមន្ត្រី​ការពារ​ប្រទេស​របស់​សហ​រដ្ឋ​អាមេរិក​ ​និង​កង​យោពល​ខេមរៈ​ភូមិន្ទ​ ​បាន​ផ្តើម​ធ្វើជា​លើក​ដំបូង​នូវ​ការពិភាក្សា​ស្តីពី​នយោបាយការពារ​ជាតិ​រវាង​សហ​រដ្ឋ​អាមេរិក​ ​និង​ប្រទេស​កម្ពុជា​នៅ​ក្នុង​ទីក្រុង​ភ្នំពេញ។

លោក​ Derek Mitchell​ ឧបការីរង​រដ្ឋមន្ត្រី​ក្រសួង​ការពារជាតិ​ជាន់ខ្ពស់​របស់​សហ​រដ្ឋ​អាមេរិក​បាន​ដឹកនាំ​គណៈ​ប្រតិភូ​សហ​រដ្ឋ​អាមេរិក​ដែល​រួមមាន​តំណាង​មកពី​ការិយាល័យ​រដ្ឋមន្ត្រី​ក្រសួង​ការពារ​ជាតិ​សហរដ្ឋ​អាមេរិក​ ​ក្រសួង​ការ​បរទេស​សហរដ្ឋ​អាមេរិក​ ​សេនាធិការ​ចម្រុះ​ ​និង​បញ្ជាការ​ដ្ឋាន​នៃ​កងកម្លាំង​សហរដ្ឋ​អាមេរិក​ ​ប្រចាំ​តំបន់​ប៉ាស៊ីហ្វិក​ ទៅ​ជួប​ពិភាក្សា​ជាមួយ​លោក​ទៀ បាញ់​ ​រដ្ឋមន្ត្រី​ក្រសួង​ការពារជាតិ​ និង​លោក​នាង ផាត​ ​រដ្ឋលេខាធិការ​ក្រសួង​ការពារជាតិ​ ​នៅ​ក្នុង​ដំណើរ​ទស្សន​កិច្ច​រយៈ​ពេល​ពីរ​ថ្ងៃ​នេះ។

លោក ​Derek Mitchell ​ ​បាន​ថ្លែង​ប្រាប់​ក្រុម​អ្នក​រាយ​ការណ៍​ព័ត៌មាន​នៅ​ស្ថានទូត​សហ​រដ្ឋ​អាមេរិក​ប្រចាំ​នៅ​ទីក្រុង​ភ្នំពេញ​ថា​ ​លោក​បាន​លើក​ទឹកចិត្ត​ដល់​ប្រទេស​កម្ពុជា​ឱ្យ​ធ្វើ​កំណែ​ទម្រង់​ការពារ​ជាតិ។

លោក​ Derek Mitchell ​បាន​បញ្ជាក់​ថា​ ​គោល​បំណង​នៃ​ការ​ពិភាក្សា​ផ្នែក​ការពារ​ប្រទេស​នេះ​គឺ​ដើម្បី បញ្ជាក់​ពីឆន្ទៈ​របស់​ក្រសួង​ការពារ​ប្រទេស​សហ​រដ្ឋ​អាមេរិក​ ​ក្នុង​ការ​ជួយ​ដល់​កង​យោធពល​ខេមរ​ភូមិន្ទ​ ​ក្នុង​ការ​ពង្រឹង​កម្លាំង​ទ័ព​ឲ្យមាន​ជំនាញ​ច្បាស់​លាស់​ ​ហើយ​ទន្ទឹម​នឹង​នោះ​ ​លើក​ទឹកចិត្ត​ឲ្យ​ប្រទេស​កម្ពុជា​បន្ត​ដើរ​លើ​ផ្លូវ​ប្រសើរ​ឡើង​ប្រកប​ដោយ​តម្លាភាព​ ​អភិបាល​កិច្ចល្អ​ ​សុ​ឆន្ទៈ​ចំពោះ​នីតិរដ្ឋ​ ​ការអភិវឌ្ឍ​ស្ថិតស្ថិរ​តាម​បែប​ប្រជា​ធិបតេយ្យ ​និង​ការគោរព​សិទ្ធិ​មនុស្ស។

លោក​ Derek Mitchell​ បាន​បន្ថែម​ថា​ ​ការពិភ្សា​ផ្នែក​កិច្ចការ​ការពារ​ប្រទេស​រវាង​សហ​រដ្ឋ​អាមេរិក​ និង​កម្ពុជា​នេះ​ ​បាន​ផ្តោត​សំខាន់​ទៅ​លើ​ផ្នែក​នានា​នៃ​សហ​ប្រតិបត្តិការ​ទ្វេភាគី​ ​ហើយ​បាន​និយាយ​ពី​បញ្ហា​សន្តិសុខ​ក្នុង​ប្រទេស ​និង​ក្នុង​តំបន់​ដែល​ជា​កង្វល់​រួម។

លោក ​Derek Mitchell ​បាន​បន្ត​ថា​ «កិច្ច​សហ​ប្រតិបត្តិការ​ដែល​យើង​ផ្តោត​ការ​យក​ចិត្តទុក​ដាក់​នោះ​ ​រួមមាន​យន្តការ​កំណែ​ទម្រង់​ផ្នែក​ការពារ​ប្រទេស​ ​ការថែរក្សា​សន្តិភាព​ ​ជំនួយ​មនុស្សធម៌​ ​ជំនួយ​គ្រោះ​មហន្តរាយ​ ​ការប្រឆាំង​ការ​រត់ពន្ធ​គ្រឿងញៀន​ ​ការ​ប្រឆាំង​ភេរវ​កម្ម​ ​ការបង្រៀន​ជំនាញ​យោធា​អាជីព​និង​យន្តការ​សន្តិសុខ​តំបន់»។

លោក​ Derek Mitchell ​បាន​ថ្លែងថា​ ​ក្នុង​អំឡុង​ពេល​ទស្សនកិច្ច​នេះ​ ​លោក​បាន​ទៅ​ទស្សនកិច្ច​កន្លែង​ មួយ​ចំនួន​ ​ដូចជា​មជ្ឈមណ្ឌល​បណ្តុះ​បណ្តាល​ថែរក្សា​សន្តិភាព​នៅ​ក្នុង​ខេត្ត​កំពង់ស្ពឺ​ ​កម្លាំង​ពិសេស​ ប្រឆាំង​ភេរវ​កម្ម​ថ្នាក់ជាតិ​ ​និង​ទីកន្លែង​មួយ​ចំនួន​ទៀត​ដែល​ទាក់ទង​នឹង​កិច្ច​សហ​ប្រតិបត្តិការ​យោធា រវាង​ប្រទេស​កម្ពុជា ​និង​សហ​រដ្ឋ​អាមេរិក។

លោក​ Derek Mitchell ​បាន​បញ្ជាក់​ថា​ ​«ប្រទេស​កម្ពុជា​ជា​អ្នក​ចូលរួម​វិភាគទាន​យ៉ាង​សំខាន់​ដល់​សន្តិសុខ​ ​និង​ស្ថិរភាព​នៅ​ក្នុង​តំបន់​ ​និង​ពិភព​លោក»។

លោក​ Derek Mitchell ​ក៏​បាន​ជួប​ប្រជុំ​ផង​ដែរ​ជាមួយ​ថ្នាក់​ដឹកនាំ​អង្គការ​ក្រៅ​រដ្ឋាភិបាល​ ​ដើម្បី​ពិភាក្សា​នូវ​ដំណើរ​ទស្សន​កិច្ច​របស់​លោក​ ​និង​ការស្តាប់​នូវ​ទស្សនៈ​របស់​គេ​ស្តីពី​ទំនាក់​ទំនង​សហ​ប្រតិបត្តិការ​យោធា​នេះ៕

XS
SM
MD
LG