ភ្ជាប់​ទៅ​គេហទំព័រ​ទាក់ទង

បទ​សម្ភាសន៍​ជា​មួយ​អនុ​ប្រធាន​រដ្ឋបាល​សាលាក្ដី​ខ្មែរ​ក្រហម​អំពី​ដំណើរការ​ឆ្ពោះ​ទៅ​រក​ការ​កាត់​ទោស​អតីត​មេ​ដឹក​នាំ​ខ្មែរ​ក្រហម​ក្នុង​ពេល​ខាង​មុខ


នៅថ្ងៃ​ទី​ ២៦​ ខែ​កក្កដា​ខាង​មុខ​នេះ​ សាលាក្ដី​ខ្មែរ​ក្រហម​នឹង​ប្រកាស​សាលក្រម​សម្រាប់​សំណុំរឿង​ កាំង​ ហ្គិច​ អ៊ាវ​ ហៅ​ ឌុច​ អតីត​ប្រធាន​គុក​ទួលស្លែង។​ លោក​ គង់ សុឋានរិទ្ធ​ បាន​ជួប​សម្ភាស​ដោយ​ផ្ទាល់​ជា​មួយ​លោក​ គ្នុត រ៉ូសិនហក​ អនុ​ប្រធាន​រដ្ឋបាល​សាលាក្ដី​ខ្មែរ​ក្រហម​ កាល​ពី​ថ្ងៃ​ពុធ​សប្ដាហ៍​មុន​ ដើម្បី​ធ្វើ​ការ​ពិនិត្យ​មើល​ឡើង​វិញ​ អំពី​ដំណើរ​ការ​ឆ្ពោះ​ទៅ​រក​ការ​កាត់​ទោស​អតីត​ពួក​មេ​ដឹក​នាំ​ខ្មែរ​ក្រហម​ ក្នុង​ពេល​ខាង​មុខ​ទៀត​ ក្រោយ​ពី​សហ​ចៅក្រម​ស៊ើបអង្កេត​ជាតិ​និង​ចៅក្រម​ស៊ើប​អង្កេត​អន្ដរជាតិ​មិន​ យល់​ស្រប​គ្នា​ក្នុង​ការ​ចាប់​ផ្ដើម​ស៊ើប​អង្កេត​សំំណុំរឿង​ លេខ​ ០០៣​ និង​០០៤។

នេះជា​បទ​សម្ភាសន៍​ រវាង​លោក​ គង់ សុឋានរិទ្ធ និង​លោក​ គ្នុត រ៉ូសិនហក ពី​ទី​ក្រុង​ភ្នំពេញ ​ដែល​មាន​ខ្លឹមសារ​ដូច​ត​ទៅ៖

សំនួរ៖ លោក​ គ្នុត រ៉ូសិនហក​ តើ​លោក​អាច​រំពឹង​ថា​ ការ​កាត់​ទោស​សំណុំ​រឿង​លេខ​ ០០២​ ដ៏​មាន​សារៈសំខាន់​នឹង​ធ្វើ​ឡើង​នៅ​ពេល​ណា​ពិត​ប្រាកដ ?

ចម្លើយ៖ នៅក្នុង​គម្រោង​ការងារ​របស់​យើង​ យើង​ឃើញ​ថា​ ការ​កាត់​ទោស​ក្នុង​សំណុំរឿង​លេខ​ ០០២​ នឹង​ធ្វើ​ឡើង​ជា​សាធារណៈ​ នៅ​ក្នុង​ខែ​មិនា​ ឆ្នាំ​ ២០១១​ ឬ​ក៏​នៅ​ដើម​ត្រីមាស​ទី​ ២​ នៅ​ឆ្នាំ​ ២០១១។

យើង​គិត​ថា​ ការ​បញ្ជូន​សំណុំរឿង​លេខ​ ០០២​ ទៅ​ជំនុំ​ជម្រះ​នឹង​កើត​មាន​នៅ​ក្នុង​ខែ​កញ្ញា។​ យើង​បាន​ត្រៀម​ខ្លួន​រួច​ជា​ស្រេច​ក្នុង​ការ​គាំទ្រ​ការ​កាត់ក្ដី​ដែល​ខ្ញុំ​គិតថា​ ការ​កាត់ក្ដី​នេះ​នឹង​បន្ដ​រហូត​ដល់​ត្រីមាស​ទី​បី​ ឆ្នាំ​ ២០១២។

សំនួរ៖ ចុះ​ចំណែក​ឯ​ករណី​ ០០៣​ និង​ ០០៤​ ដែល​កំពុង​តែ​មាន​ភាព​ចម្រូង​ចម្រាស​រវាង​សហ​ចៅក្រម​ស៊ើប​អង្កេត​កម្ពុជា​ និង​សហ​ចៅក្រម​ស៊ើប​អង្កេត​បរទេស​វិញ ?

ចម្លើយ៖ យើង​ឃើញ​ថា​ សំណុំរឿង​លេខ​ ០០៣​ និង​ ០០៤​ កំពុង​ត្រូវ​រៀបចំ​ បន្ទាប់​ពី​សំណុំរឿង​ទី​ ២​ នឹង​ត្រូវ​នាំ​យក​ទៅ​កាត់​ទោស។​ សំណុំ​រឿង​លេខ​ ០០៣​ និង​ ០០៤​ កំពុង​ស្ថិត​ក្នុង​ដៃ​សហ​ចៅក្រម​ស៊ើប​អង្កេត។​ ហើយ​ពួក​គាត់​នឹង​ដោះស្រាយ​បញ្ហា​ចម្រូង​ចម្រាស​នេះ​ នៅ​ក្នុង​ក្របខ័ណ្ឌ​ការិយាល័យ​សហ​ចៅក្រម​ស៊ើប​អង្កេត។​ ចៅក្រម​ដែល​មិន​យល់​ស្រប​ក្នុង​ការ​ចាប់​ផ្ដើម​ស៊ើប​អង្កេត​ក្នុង​សំណុំរឿង​ នេះ​នឹង​ប្ដឹងឧទ្ធរណ៍​ទៅ​កាន់​អង្គបុរេ​ជំនុំ​ជម្រះ។​ ក៏​ប៉ុន្ដែ​ច្បាប់​កាត់​ទោស​ខ្មែរ​ក្រហម​បាន​ចែង​ថា​ បណ្ដឹង​ឧទ្ធរណ៍​របៀប​នេះ​នឹង​មិន​បង្អាក់​ដំណើរការ​ស៊ើប​អង្កេត​នោះ​ទេ។​ ដូច្នេះ​ ការ​ស៊ើប​អង្កេត​នឹង​ធ្វើ​ជា​បន្ដ​ដោយ​ចៅក្រម​ម្នាក់​ ក្នុង​ចំណោម​ចៅក្រម​ស៊ើប​អង្កេត​ទាំង​ពីរ។

សំនួរ៖ តើផ្នែក​រដ្ឋបាល​មាន​ការ​ព្រួយ​បារម្ភ​ដូច​ម្ដេច​ដែរ​ នៅ​ពេល​ដែល​មាន​សម្ពាធ​ដោយ​កង្វះ​ថវិកា​ផង​ និង​សម្ពាធ​នៃ​ការ​មិន​ចុះ​សម្រុង​គ្នា​រវាង​សហ​ចៅក្រម​ស៊ើប​អង្កេត​ទាំង​ពីរ​ផង ?

ចម្លើយ៖ លោកជ្រាប​ហើយ​ថា​ ផ្នែក​រដ្ឋបាល​មិន​មាន​ក្ដី​បារម្ភ​ណា​ទាក់​ទង​ទៅ​នឹង​ដំណើរការ​និតិវិធី​ ទេ។​ អ្វី​ដែល​លោក​ហៅ​ថា​ ការ​ទាស់​ទែង​គ្នា​ឬ​ភាព​មិន​ត្រូវ​រ៉ូវ​គ្នា​រវាង​សហ​ចៅក្រម​ស៊ើប​អង្កេត​ នោះ​ គឺ​ជា​សកម្មភាព​ផ្លូវ​ច្បាប់។​ ក្រុម​ចៅក្រម​មាន​លទ្ធភាព​របស់​ពួក​គាត់​ក្នុង​ការ​ធ្វើ​ការ​សម្រេចចិត្ត​ ហើយ​ ពួក​គាត់​ក៏​អាច​អនុវត្ត​នូវ​សិទ្ធិ​របស់​ពួក​គាត់​ទៅ​តាម​សេរីភាព​នៃ​ឆន្ទៈ ​របស់​ពួក​គាត់​ដែរ។​ ដូច​នេះ​ យើង​នឹង​គាំទ្រ​ពួក​គាត់។

សំនួរ៖ លោក​ចង់​មាន​ន័យ​ថា​ម៉េច ?

ចម្លើយ៖ មាន​ន័យ​ថា​ ក្រុម​ចៅក្រម​កំពុង​ធ្វើ​យ៉ាង​ត្រឹមត្រូវ​តាម​ផ្លូវ​ច្បាប់​ហើយ។

សំនួរ៖ ចុះ​លោក​រំពឹង​ថា ​សំណុំរឿង​លេខ​ ០០៣​ និង​ ០០៤​ នឹង​ត្រូវ​បិទ​បញ្ចប់​ការ​ស៊ើប​អង្កេត​ នៅ​ពេល​ណា ?

ចម្លើយ៖ បាទ​ ការ​សម្រេច​បញ្ហា​នេះ​ មិន​មែន​ចំណុះ​ឲ្យ​ការិយាល័យ​រដ្ឋបាល​នោះ​ទេ​ ក៏​ប៉ុន្ដែ​ការិយាល័យ​រដ្ឋបាល​គាំទ្រ​ចៅក្រម​ក្នុង​សកម្មភាព​របស់​ពួក​គេ​ ហើយ​យើង​ជឿ​ថា​ ការ​ស៊ើប​អង្កេត​ នឹង​អូស​បន្លាយ​រហូត​ទៅ​ដល់​ឆ្នាំ​ក្រោយ​ ហើយ​ប្រសិន​អាច​កើត​មាន​ទៅ​រួច​នោះ​ ការ​កាត់​ទោស​សំណុំរឿង​ លេខ​ ០០៣​ និង​ ០០៤​ នឹង​ធ្វើ​ឡើង​បន្ទាប់​ពី​ការ​កាត់ទោស​អតីត​មេដឹកនាំ​ខ្មែរ​ក្រហម​កំពូលៗ​ នៅ​ក្នុង​សំណុំរឿង​លេខ​ ០០២​ ចប់​សព្វ​គ្រប់។

សំនួរ៖ នេះ ​គឺ​ជា​ការ​ខ្វែង​គំនិត​ធំ​មួយ​ សម្រាប់​សំណុំ​រឿង​ លេខ​ ០០៣​ និង​ ០០៤​ រវាង​សហ​ចៅក្រម​ ស៊ើប​អង្កេត​ តើ​ផ្នែក​អង្គការ​សហប្រជាជាតិ​នៅ​ក្នុង​សាលាក្ដី​ខ្មែរ​ក្រហម​មាន​ជំហរ​យ៉ាង ​ណា​ដែរ​ ចំពោះ​ការ​ស៊ើប​អង្កេត​ក្នុង​សំណុំរឿង​ទាំង​២​នេះ ?

ចម្លើយ៖ ខាង​ភាគី​អង្គការ​សហ​ប្រជាជាតិ​ មាន​ជំហរ​ដូច​ខាង​រដ្ឋាភិបាល​កម្ពុជា​ដែរ​ ដែល​ជំហរ​នេះ​ ត្រូវ​បាន​បង្ហាញ​ក្នុង​សេចក្ដី​ថ្លែងការណ៍​រួម​ជា​ចុង​ក្រោយ។​ អ្នក​គាំទ្រ​សាលាក្ដី​ខ្មែរ​ក្រហម​ សង្ឃឹម​ថា​ សាលាក្ដី​នេះ​ មាន​ដំណើរការ​ក្នុង​ទស្សនវិស័យ​ដែល​មាន​ពីរ​ភាគី​ ដើម្បី​ការពារ​គោលការណ៍​នៃ​ដំណើរការ​ដោយ​ទ្វេភាគី។

សំនួរ៖ រដ្ឋាភិបាល​កម្ពុជា​និយាយ​ថា​ មិន​ចាំបាច់​ធ្វើ​ការ​ស៊ើប​អង្កេត​ថែម​ទៀត​អ្វី​ទេ។​ តើ​លោក​មាន​អត្ថាធិប្បាយ​ដូច​ម្ដេច​ដែរ ?

ចម្លើយ៖ បញ្ហា​នេះ​ វា​ស្ថិត​នៅ​លើ​ឆន្ទានុសិទ្ធិ​របស់​ចៅក្រម​ ក្នុង​ការ​ធ្វើ​ការ​សម្រេចចិត្ត។

សំនួរ៖ ហេតុ​អ្វី​បាន​ជា​គ្មាន​ការ​បង្កើត​ការ​ចោទ​ប្រកាន់​ទៅ​លើ​សំណុំរឿង​លេខ​ ០០៥​ មួយ​បន្ថែម​ ទៀត ?

ចម្លើយ៖ ហេតុផល ​គឺ​ថា​ មក​ពី​ឆន្ទានុសិទ្ធិ​និង​អាណត្តិ​របស់​សហ​ព្រះ​រាជអជ្ញា​ក្នុង​ការ​បញ្ជូន​ សំណុំ​រឿង​ឲ្យ​ស៊ើប​សួរ​ ហើយ​តាម​តែ​ខ្ញុំ​ដឹង​ សហ​ព្រះ​រាជអជ្ញា​បាន​អះអាង​ថា​នឹង​មិន​មាន​ការស្នើ​ឲ្យ​មាន​ការ​ស៊ើប​ អង្កេត​ករណី​បន្ថែម​ទៀត​នោះ​ទេ។​ ហើយ​ដំណើរការ​របស់​សាលាក្ដី​ខ្មែរ​ក្រហម​ទាំង​មូល​នឹង​ត្រូវ​បញ្ចប់​នៅ​ ឆ្នាំ​ ២០១៥៕

XS
SM
MD
LG